المقالات
السياسة
هلافيـت البلد ...
هلافيـت البلد ...
01-28-2014 01:55 PM



بسم الله الرحمن الرحيم
لا هميت
ولا جازفت بي زمني
لا عاينت في مسخاً
هلافيت البلد طرطاش
السِيد وود السِيد
وخادم السِيد
وسيِداً طاش
وشيخاً غاش
وحاكماً للحكم كنكاش
وسِيداً كوز مسلِّم أمرو لي خرباش
وكلباً انقرش في المديح نقراش
ونحن نقول : هلافيت البلد أوباش
أيه الدنيا غير حاكماً تقي وعدلان
أيه الدنيا غير ناساً تقول الحق
تلوَّن بالحقيقة ألوان
خلاص جفت دما الشهداء
وراحت في الضلام أحزان
دموع الصابرة من (أيلول)
ومن سابق ..
لا دا اليوم تنقط دم ...
تباري الهم ..
تفش عن وليداً كان ..
عشم باكر
وفرحة عيد
وزولاً ضو ..
هلافيت البلد يا بو
تضحك (فاطمة ) تتعجب
من عمماً منكسة بالوجوم
واللو ..
يا فطوم كان شفتي
عمائم الفجعة واللوعة
وكت ضلت خطاها سبيل
حتعرفي كيف لقينا دليل
على قاتل الشهيد الحر
وعلى سارق النسيم والضل
هلافيت البلد زادت كمان هلفوت
وزول خربوط
مواثيق العهود
جدودو رموها في بير الهلاك والموت
كيف تصدق رؤاك يا نيل ..
وإنت تفيض دموع وتشيل
تتحسر مويجاتك على العمم البتلمع من رويس لكتيف
وعلى ناساً تبيع الزيف
وحالا أسيف
وما معروفة جات من وين وسادت كيف
وتبكي .. وتبكي معاك أم الشهيد الفات
تنده الله في جوف الضلام بثبات
ابقى وليدها في عالي الجنان مقبول
وابقى الحول
يوم الصراط والهول
وترفع ايدا تتضرع دموعها هطول
الله انضف السودان عرضي وطول
من هلفوت
ومن همبول
ومن لمات النفاق والزور
ومن زمن الخراب والبور
ومن وعداً مجرد قول !

عروة علي موسى ،،،
[email protected]


تعليقات 3 | إهداء 0 | زيارات 1192

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#901196 [ست النفر]
0.00/5 (0 صوت)

01-29-2014 10:00 PM
قريتا مرة واتنين عشان أحاول ألقى ليها عنوان غير دة لكن لقيتة دة أنسب عنوان .


#899659 [اسامه التكينه]
0.00/5 (0 صوت)

01-28-2014 04:32 PM
الله انضف السودان عرضي وطول
من هلفوت
ومن همبول
ومن لمات النفاق والزور
ومن زمن الخراب والبور
ومن وعداً مجرد قول !
آآآآآآآآآآمييييييييييييييييييييين
يسلم فمك يا رجل . اين انت ؟


#899563 [karkaba]
0.00/5 (0 صوت)

01-28-2014 03:36 PM
روعة نسلم من كل بلا نرجو تعميم القصيدة علي كل المواقع السودانية


عروة علي موسى
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة