جغمسة وإخواتها
01-17-2011 12:48 PM

ساخر سبيل

جغمسة وإخواتها

الفاتح جبرا

بحلقة : هى النظر فى بلاهة وغباء وإندهاش كمن ينظر إلى بطاقات أسعار السلع فى ذلك المول الشهير

برطمة : البرطمة هى التفوه بكلام غير مفهوم كذلك الذى يتفوه به الموظف عند إنتهاء مرتبه يوم خمسة فى الشهر

بستفة : بستف فلان علان أى أفحمه وما خلى ليهو جيهه يرقد عليها

بصبصة : البصبصة هى النظر إلى الشئ فى خفاء وهى عادة يمارسها الرجال المتزوجون

بطبطة : هى حالة تصاحب عدم المقدرة بالوفاء بالإلتزام فى وقته وهى أقرب إلى الجقلبة سوى أن الأخيرة يصاحبها حراك وصراخ فى أغلب الأحوال

بعزقة : تطلق حصرياً على المال دون سواه خاصة إذا كان مالا عاماً والبعزقة لغة هى إخراج المال وصرفه فى غير موضعه وفى أكثر من جهه

بلبصة : (أنظر دهنسة)

بشتنة : أنظر إلى النفايات فى الاسواق والشوارع وإنتا تعرف على طول

تركشة : هى المواربة وتستخدم للباب دون سواه يقال تركش معاك الباب أى أجعله موارباً والتركشة تعنى أيضاً ذهاب العقل و(الجنترة) يقال أن فلان زول متركش أى مرشح لإحتلال إحدى الصوانى البقت مافى دى

جرجرة : هى أن يفضى بك إجراء إلى إجراء آخر حتى تطلع روحك وهى عادة تستخدم عند متابعتك لأحدى المعاملات الحكومية

جقلبة : أنظر بطبطة

حمبكة : هى فعل يستخدم عند عدم الرضاء بالنتائج على الرغم من صحتها يعنى (خرخرة) ساااكت !

حندكة : هى الفعل الذى يصاحب إظهار شئ (لذيذ) – لحمة ضانى مثلاً- لشخص لا يستطيع إمتلاك مثله كناية على (تعذيبه) ..

خرمجة : هو الما مخرمج شنو؟ دى بالذات ما عايزه ليها شرح

دبرسة : هى فعل يتناسب طردياً مع (الفلس) وخلو الجيوب من (الضحاكات) أى الدنانير

دربكة : يمكنك مشاهدة هذا الفعل (بدون ما نشرحو) عندما يصل مهاجمو فرقنا الكروية إلى منطقة جزاء الفريق الخصم

دردرة : يمكنك معايشة هذا الفعل تماما بالنظر إلى حال المغتربين بالخارج

سركنة : هى بذل المال بسخاء ، وللموظفين حاسة سادسة فى معرفة الزول المتسركن من الزول (الجلدة)

دهنسة : أنظر بلبصة

سلبطة : هى إدعاء الشخص إمتلاك شئ لا يخصه سلبطة ساااكت يعنى

سلوحة : هى النحافة الشديدة يقال أن فلان مسلوح أى أنه يعانى نقصاً حاداً فى البروتين الحيوانى (ح يجيبو من وين يعنى؟) !

شحتفة : شحتفة الروح حالة كانت تصيب النساء دون الرجال (هسه ما عارف كيف؟) ويمكن أن تطلق على الشئ القليل الصغير كقول إحداهن : ده عشاء شنو المشحتف ده؟ العريس ده اصلو كان مغترب فى الشكينيبة؟

شربكة : تداخل الأشياء بعضها ببعض حتى تصعب إعادتها إلى حالها الأول (زى حالتنا دى) شركنة : حالة يحس فيها القلب بالشك وعدم الإرتياح وتصور قدوم الأسوأ كالحالة التى أصابت المواطن بعد إعلان وزير المالية بأن (آخر الكى) لسه ما وصلنا ليهو !

شرمتة : شرمت الشئ أى قطع من أطرافة وأخذ منها وخريطة مشرمتة أى كالتى سوف تؤول إلينا بعد الإنفصال

شفتنة : أنظر همبتة

شمشرة : التلصص لمعرفة اسرار وأخبار الآخرين وفاعلها يقال له (شمشار)

ضكرنة : يا حليلا .. (أمبارح مشيت الحلاق أحلق لقيت شاب طول فى عرض الحلاق قاعد يشيل ليهو فى حواجبينو !)

طربقة : الكلام الفاضى على أن يكون متواصلاً وبدون إنقطاع ..

طرطشة : التهور وفقدان البوصلة وزول مطرطش أى زول غبيان ساااكت

كما أن الطرطشة نوع من الطلاء الاسمنتى تطلى به جدران المنازل الخارجية لتبدو وجيهة أيام العمارات فى البلد كانت بالعدد .

عجرفة : تكبر وإستعلاء

عصعصة : أنظر سلوحة

عكلتة : الإلتصاق بالشئ على الرغم من عدم إستيفائك لشروط ذلك على الرغم من المحاولات المتعددة عشان يفكوهو منك (شوفوا عندنا كم زول عكليت) !

غطرسة : عجرفة لكن زائدة حبتين

قرطعة : هى شرب الماء بسرعة (طبعن خوفاً من رؤية الطحالب) !

فرفشة : مرح وحبور كالذى شاهدناه يصيب النواب لحظة إجازة زيادة الأسعار

فهلوة : شطاره إنتهازية والفهلوى هو ذلك الشخص الذى يستطيع بناء عمارتين على الرغم من إنو لسه ما إتثبت فى وظيفتو !

كبكبة : شوف حال المدير والموظفين عن مرفق معين عند زيارة السيد الوزير وإنتا تفهم أيه يعنى كبكبة !

كرمشة : تجعدات تصيب الجلد بفعل التقدم فى السن لا تظهر على رؤساء الأحزاب السياسية لدينا (تظهر كيف مع الراحات دى؟)

كشكرة : هى دعوة الشخص لآخرين لمشاركته شئ يخصه بينما يتمنى فى داخله ألا يحدث ذلك

كشكشة : لها عدة معان كقولهم : بالله كشكش لينا الزول ده كان نطلع لينا منو بى قرش قرشين (أى حاولو لينا) ، كما تستخدم دلالة على ذهاب العقل فيقولون فلان (مكشكش) أى (أسلاكو ضاربة) كما أن الكشكشة هى وضع ترديف قماش (الفستان) فى شكل طبقات عند الخصر (لمن كان فى فساتين

كنكشة : هى التشبث الشديد بالشئ لفترة طويلة (أنا قلتا حاجة؟)

مزمزة : أكل (الأطايب) فى تأنى وهدوء وتلذذ .. (فى فول بيمزمزوهو؟)

همبتة : هى قطع الطريق ولكن بدون (إيصالات)

هترشة : أنظر طربقة

هنضبة : تحوير وتحويل لسانى للجملة الإنجليزية Hands-Up والتى ترجمتها (إيدينكم فوق) وكان إستخدامها يقتصر على أفلام الكابوى إذ كان البطل يهنضب (الخيانة) كما تهنضب الأسعار الآن المواطن !



كسرة :

معقولة؟ تصوروا نسيت أشرح كلمة جغمسة !


تعليقات 42 | إهداء 29 | زيارات 9258

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#87791 [Muslim.Ana]
3.55/5 (7 صوت)

01-31-2011 09:23 AM
والله يا جبرا كلامك ده فيهو جنس (جغمسة) ولو ما الجماعة الايامات دي (مفرفرين) و(مبطبطين) ومشغولين من (الشخشخة) الحاصلة من الشباب واحتمال تجيب ليها(قشقشة) وهم لسه ما كملو (برطعة) وعندهم عيال او على الاقل مرتين لانهم قمة (الفحلنة) و مستقبلهم لسه في (جهجهة)، لو ما كده كان كلامك ده جاب ليهو جنس (بشتنة).


#80841 [بنانكو]
2.44/5 (5 صوت)

01-19-2011 07:39 AM
الى المعلق kamal
المقام ليس بمقام العنصرية ووصم الاخرين بالتفاهات ...ده الخلى الجنوبيون ينفصلو ...ارتق بتعليقك دون اسفاف او تجريح ......خلونا نعيش في وطن يسع الجميع دون غبن او اساءة


#80719 [نورالايمان عبد الحق]
3.69/5 (5 صوت)

01-18-2011 09:01 PM
لازم تعمل ليها ملحق لسه باقي القاموس وبعدين انت سرحت شكلك في بلبصه انظر دهنسه وفي دهنسه انظر بلبصه


#80643 [وجع الزمان ]
2.19/5 (5 صوت)

01-18-2011 06:36 PM
اتمني يااستاذنا في المقال الجاي تتناول موضوع اللحس ، وطبعا اللحس انواع كثيرة ومتعددة وياحبذا لو شرحت كتاب ( ابوالعفين الجربوع وفن لحس الكوع )
كسرة:
الجفلن خلهن اقرع الواقفات


#80632 [nayer]
2.63/5 (5 صوت)

01-18-2011 06:11 PM
عسل والله ياجبرا ..;) ;) ;) ;) ;) فرفشت عنا كتير ... اسعد الله ايامك


#80404 [علي تمساح الكدرو]
2.94/5 (5 صوت)

01-18-2011 12:15 PM
ضكرنة : يا حليلا .. (أمبارح مشيت الحلاق أحلق لقيت شاب طول فى عرض الحلاق قاعد يشيل ليهو فى حواجبينو !)
بس دي جد ولا( ضقلمة) منك ساي..
ولو جد نحن الباكين عليها شنو؟؟؟؟


#80369 [abdu]
3.19/5 (5 صوت)

01-18-2011 11:46 AM
جغمس يجغمس فهو مجغمس مفعول به مرعوب من لاهاى منصوب بالمطبلاتية مجرور بالحسابات المدنكلة فى سويسرا وماليزيا واخواتها والفاعل فى محل الجهابذة من ذوى المنافع المليارية وحركة السكون هؤلاء الفضلوا


#80366 [kamal]
3.19/5 (5 صوت)

01-18-2011 11:42 AM
شرمتة دي لو قراها واحد من اهلنا ال في الغرب بيفهمها غلط


#80325 [شلاق]
2.94/5 (5 صوت)

01-18-2011 10:49 AM
بحكم انك شمارتجى من طراز فريد (فى زول كده هنظبوا ناس الراى العام وقالوا بيتوا من قزاز والماضي بتاعه لسه مطارده والشينه منكوره وكده وحسب الكلام المكتوب عندهم معلومات عنه تحوله الي مذبلت ........ ويكتب فى الصفحة الاخيرة ) عليك الله الشمار حارقنا يلااااا هات المختصر المفيد من اخبار هذا الثعلب متلمظ اظافره بعد ماينتف ريش الدجاج ياخد عطيه مزين ويمشي مبسوط حسب ما ورد في مقال محمد عبد القادرعدد الاحد 16/1/2011


#80294 [hassan]
2.75/5 (5 صوت)

01-18-2011 10:21 AM
تعرف البشير ضاربو فايروس مصطلحات عامية
والوندوز بتاعو ضرب ومافى طريقه نعمل فورمات
الحل يركب التونسية
المشكلة يمشي وين
لاهاى ولا تل ابيب
اثنان احلاهما مر


#80276 [برى بانج]
2.63/5 (5 صوت)

01-18-2011 10:09 AM
والله قاموس مابطال بس عيبه عدم ورود الأمثال يعنى فى الكنكشه كان يفترض يدينا مثل مع أن الأمر محتاج لشوييية شجاعه لكن معليش.
فى ملاحظه تانيه: كشكشه هى ممكن تكون محاصرة الشئ تمهيدا لقبضه ومثال لذلك مايفعله أوكامبو الجبان!!
أنا قلت لابد من الأمثال وعاين أنا مرقت منها كيف (أوكامبو الجبان) قلبت فيها الهوبه مش كده؟ تانى كشكشه ممكن تكون بمعنى الطرد وكت نقول كشكشو أو كشو بمعنى الكشه. ومثال لذلك كشكشة بن على من تونس أو كشة بن على من تونس والأمثال لذلك كتييييره وحاول أدينا مثل محلى من شجاعتك لوسمحت (عفوا!! أقصد من فضلك لوسمحت)


#80110 [الزول السمح]
3.19/5 (5 صوت)

01-18-2011 07:50 AM
الأخ كسلاوى

نحنا برضو كسلاويين وبنحب الجغمسة.. نتواصل عشان نجغمس مع المجغمسين


#80107 [الزول السمح]
2.44/5 (5 صوت)

01-18-2011 07:47 AM
الله..ياأستاذ والله نحنا وإنت نسينا مصطلح ما أضفناه وهو مصطلح :

هـــجولــة : ( لما الوزراء والسفراء يقترضوا شعر الغزل ( الناها النادية خداها)


#80073 [واحد ف الغربه]
2.94/5 (5 صوت)

01-18-2011 04:48 AM
برضو نسيت تشرح لينا معانى :
زمزغه , نعمصه , جعمصه , جعبصه


#80057 [شمالي]
2.63/5 (5 صوت)

01-18-2011 01:37 AM
الجغمسة هي ما يصدر من (هترشة) جراء (ش....ة) وطنك بسبب (الكنكشة) الطويلة على منصب رئاسة الجمهورية عن طريق (السلبطة) في انتخابات يجري تزويرها بـ(عجرفة)
ويطلقها دائماً من بهم (تركشة) جراء (هنضبة) أوكامبو لهم وفي العادة يسبب لهم هذا الأمر (جقلبة) شديدة وخوف من المصير المحتوم في سجون لاهاي ولا فكاك من ذلك المصير مهما كانت (عكلتة) صاحبها.


#80033 [خرباش]
2.63/5 (5 صوت)

01-17-2011 11:29 PM
نبدأ بإسمي
خربشة: وهي الكتابة غير الواضحة ويقال شخبتة
بشتنة : أنظر لحال كل السودانيين عدا ال...........
طقطقة: نفذها التوانسة في الزين
رمتلة: عندأحزاب التوالي
دردرة: تعرض لها السودانيو من قبل 21 سنة
ولولة: ولولنا وقلنا الروووووووووب
بشكرة: من بشكير
زندقة: أعوذ بالله منها


#80032 [علي ]
3.94/5 (5 صوت)

01-17-2011 11:28 PM
كنكشة و ما ادراك ما الكنكشة


#80028 [kassalawy]
3.19/5 (5 صوت)

01-17-2011 11:04 PM
الأخوة محبي الراكوبة وهمبريبها....أخوكم كسلاوى جديد فى الشغلانة وأوعكم من الدغمسانة.


#79986 [ابو امين]
2.94/5 (5 صوت)

01-17-2011 09:31 PM
الله يسامحك يا استاذنا دخلتنا فى حاله هستره الله يحفك يارب البهدله


#79982 [ابو يوسف]
2.57/5 (5 صوت)

01-17-2011 09:26 PM
الفاتح جبرا الله يجازي محنك المصطلحات دي سمعناة وشفناها
كثير من جماعتنا وما عرفنا معناها فنرجو منك تجعلها في كتاب
تسميهو ( جغمسة المشروع الحضاري)


#79969 [ابوسامي]
2.88/5 (5 صوت)

01-17-2011 09:00 PM
افضل ما يقال هذه الايام :
الخرخرة : وهي عدم الالتزام بما نص عليه الاتفاق والتراجع عنه ؟؟
الفرفرة : أنظر خرخر سوى أن هذه تصاحبها حلايف قد تكون بالطلاق
البهدلة : تصيب من كان عايش في أحسن ما يكون ثم تدور عليه الايام كما دارت على بن علي ؟؟؟؟
البرطعة :؟؟؟؟؟؟؟؟؟؟؟
الفرتقة : من قام مولي ظهره للقوم وعقبالنا نشوف واحد مفرتق لكن الملاج شقيش ؟؟؟


#79954 [ناصرابي]
3.94/5 (5 صوت)

01-17-2011 08:32 PM
والله يا معلم جبرا دي بالغت فيها عدييييييييل

الناس دي كلها مستنية شرح كلمة جغمسة تقول نسيت

وبعدين الظاهر عليك بقيت دينكاوي عدييييييل في نطق كلمة (ش......)

علي هامان يافرعون (ش....)
هههههههههههههههههههههههههههه


#79863 [kassalawy]
3.94/5 (5 صوت)

01-17-2011 06:13 PM
والله أنت عسل يا جبرا


#79842 [Omar Humaida]
3.94/5 (5 صوت)

01-17-2011 05:49 PM
This is absolutely funny in this sad time


#79836 [نادر محمد]
3.57/5 (5 صوت)

01-17-2011 05:37 PM
هيمنه : اعمل حسابك قدو قدو راجيك


#79829 [عبداللطيف]
3.94/5 (5 صوت)

01-17-2011 05:28 PM
بصراحة اول مرة اكتشف انو القاموس السوداني مليات بالمصائب دي!


#79735 [حنكابي]
4.07/5 (5 صوت)

01-17-2011 03:18 PM
كشكرة : ان تدعوا احزاب المعارضة للانتخابات .
كنكشة : ان تقعد في كرسي كم وعشرين سنه
شفتنه : ان يكون راتبك خمسين الف وتكون عايش في رفاهية
خرمجة : زي برامج التلفزيون مثلا


#79730 [هاشم عبد الماجد خالد]
3.57/5 (5 صوت)

01-17-2011 03:13 PM
تونسة ------ ان يركب البشيرالطائرة ويذهب ماليزيا هاربا
قشقشة ------ان يقبض على قوش فى الحدود شاردا
غندرة--------- يمسكو غندور ويعملوا لية حاجات تانية حاميانى
كرتتة -------- بقاية الطعام والفتات لشعبنا السودانى
ودودة---------امرأة جميلة كانت مفلسة واصبحت مليارديرة
جعجعة ----- حديث نافع للمعارضة
مرمطة ------ معاملة الانقاذ للشعب


#79708 [صلاح]
2.63/5 (5 صوت)

01-17-2011 02:49 PM
ياخى اليومين الناس اخلاقا( مكركرة)


#79706 [ابوارجوان]
3.94/5 (5 صوت)

01-17-2011 02:47 PM
والله ياستاذ جنس بطبطه بعد الحصل لى ابن على........والمتسلبطين ديل كل يوم زياده فى الفهلوه....

كسره0oo

زمن الزمزه بتسبقه حاجه لكن اجبارى حق البسبقه مافى


#79693 [علي سنكل]
3.19/5 (5 صوت)

01-17-2011 02:29 PM
دهنسه يا جبرا مش أنظر بلبصه وبس. دي ليها عدة معاني و من معانيها لمان يقوم زول في القضارف يجغمس ويقول تاني في السودان بعد إنفصال الجنوب ما في تعدديه دينيه والشريعه يا داب ما جاتكم ، و يقوم الاستكبار يضرب تلفون يقول ليهو دا كلام شنو دا البتقول فوقو في القضارف دا؟
يقوم واحد من مساعدنو يسافر شندي ليحتفل مع الأقباط بعيدهم بتاع الكفار.
دي هي الدهنسه. شايف يا جبرا.
ودي لقيتها في معجم جديد إسمو المونس بعد انتفاضة تونس.


#79679 [احمد تاج ]
2.57/5 (5 صوت)

01-17-2011 02:21 PM
شكراً للإضافة الجديدة لقاموس اللغة الدارجة السودانية وسنعمل على حفظ حقوق الطبع
لكن دعك من تفسير كلمة جغمسة لان البشير قد يطالب بحقه في القاموس لهذه الكلمة


#79674 [bam]
3.19/5 (5 صوت)

01-17-2011 02:19 PM
بحبحة : انظر اخوان الرئيس

جرقسة : انظر قرارات وزير المالية

هلوسة : انظر حال المواطن السوداني وهو ماشي في الشارع

فلقسة: فلسفة على الفاضي

بلطجة : شوف افعال ناس قدوقدو

برطعة : لما تلقى المال العام سايب

مشكلة : هي في السودان وبتحتاج لحل مستورد من تونس عشان ناس كتير لازم يركبو التونسية ويتوجهوا نحو جدة


كسرة : جغمسة تعني كلما سبق شرحه


#79648 [الطيب]
3.19/5 (5 صوت)

01-17-2011 01:59 PM
يا استاذ حبرا انت نسيت ان تشرح اهم حاجات مثل حنكشة_ومنتشة وفنطسة_وفركشة_وجقلبة_وفرفرة_وصمصمة_وشكشكة_وجعجعة زي البيعمل فيها ابو العفين دي ههههها


#79625 [صديق حمدتو ]
2.94/5 (5 صوت)

01-17-2011 01:43 PM
يا ود يا جغموس إنت!


#79621 [سارة]
2.25/5 (5 صوت)

01-17-2011 01:41 PM
انظر افعال بشبش


#79619 [أبورماز]
2.94/5 (5 صوت)

01-17-2011 01:38 PM
يا أستاذ جبره .. أنا راجل بعرف كويس فى الإقتصاد ومتخصص عمل دراسات جدوى ولأنى بعد قراية موضوعك ده إكتشفت إنو كل الحاجات الكتبتها دى عندى وما كنت عارف إسمها شنو ذاته .. وعلشان ما تضيع حقوقك مع ناس الرواكيب ولو داير تبقى زول منشيات وطوائف وسوارى ـ وبعد دراسة جدوى موجوده بطرفى ـ أنا بشوف أحسن تلم مخزونك من الجغمسه وأخواتها وتعملها فى كتاب (على الطلاق) أضمن ليك أقل شى توزيع 20000000 نسخه مضروبه فى 5000 بالقديم تساوى 10000000000 وما عايز منك حاجه فى تعبى ده غير تهدى لى أول نسخه من كتاب ( الجغمسه وأخواتها )


كسره :

كلامى ده ما كلام هترشه ولا هضربه ولا طرطشه ولا جغمسه ... ده كلام مصلحه !!!!!!!!!!


#79616 [ام اليتام]
2.94/5 (5 صوت)

01-17-2011 01:30 PM
كركبة:أصوات غير طبيعية او تحركات غير مفهومة(البلد اليومين دي مكركبة)
فبركة: كلام قاطعوا من راسك ماعندو اي اساس من الصحة(تصريحات المسؤلينعن دعم المواطن)
فتفتة:تفتيت الشيئ اي جعله اشلاء متناثرة كا يحدث في خريطة السودان
لكلكة: زول ملكلك يعني ما جادي وبتكلم ساي ويلكن ليك اي حاجة
سفسفة:انظر همبتة وشفتنة وسلبطة وعكلتة
جلكنة:انظر كرمشة
شرفنة:تقال للشخص الذي لا يشبع وداير يسف علي طول والمصيبة لو بقت معاها كنكشة
سلفكة:دي بي ايصالات
مرمطة :انظر جرجرة لكن دي معاها مسح واطة
رجرجة ومرضنة ومصرنة ويييييييييييييييييييييييييييييك يا ود جبرا
الله يكون في العون


#79610 [سودانى بطنه طامه]
3.94/5 (5 صوت)

01-17-2011 01:24 PM
والله بالغته.....رائع يا ود جبرا


#79607 [الزول السمح]
3.57/5 (5 صوت)

01-17-2011 01:23 PM
مسكنة: تمسكن حتى تتمكن فى مجال عملك وهسع إسمها ( التمكين )

شخشخة: هى زمان كانت بتتقال لما الراديو يقطِع أثناء البث وهسع بتتقال للزول البشوش على المسؤلين ( مادايرين أى شخشخة )

جعجعة: الزول البرمى الكلام الدراب والوعيد والتهديد وهو ماقدرو يعنى حداث ماسواى ( دى قلها جبرا )

جنتلة: يعنى لقيط ورق

جرجرة: لمن تنتقد النظام ويلموا فيك الجماعة

تلتلة: لو عندك معاملة فى دائرة ساكيها ليك فترة طويلة وماخلٍصت


#79608 [gogo]
2.57/5 (5 صوت)

01-17-2011 01:23 PM
جغمسة : كلام الطير في القضارف


ردود على gogo
Saudi Arabia [شمالي] 01-18-2011 01:13 AM
هاهاهاها
حلوة منك شديد يا gogo


#79600 [ابوجعفر63]
2.44/5 (5 صوت)

01-17-2011 01:16 PM
جغمسة احدي الفاظ رئيسنا الراقص تعني ان ما يقوله نائبه (الحمام) علي عثمان لتهدئة الخواطر انه جغمسة


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة