المقالات
السياسة
وثبة الرئيس وثقافته صينية !!!
وثبة الرئيس وثقافته صينية !!!
02-01-2014 08:45 AM



ثقافة الرئيس صينية بحتة ، جعلت الرئيس يوثب وثبة واحدة من البرطعة في القصر الجمهوري وسط رفاقتو لي عالم (ماو تسي تونج)
حسب ما قرأنا في الآونة الأخيرة الخطاب منقول بالكربون ومترجم من خطاب الزعيم الصيني ( ماو تس تونج ) وشر البلية ما يضحك,, إنت العربي المعرب قدرت عليه لما تنط مرة واحدة لثقافة بعيدة كل البعد عنك وعن عالمك ولغتك المعلمة الله من مجاميعو!!!
بعدما كان البشير الخطير يرتجل القرارت زي حكاية ( افتح البلف واقفل البلف ) ويرتجل الخطابات في كل لقاءته! والكلام على شاكلة الزارعنا يجي يقلعنا , واختو تحت (جزمتي ) الله يكرمكم.. فجأة وثب ,, والوثبة كانت قووووية عليه، ما قدر حيلو،ولا قدر قدرته!!ولا عندو ليها قوة ولا إستعداد! عشان كده بقى يبرطم زيو زي الشافع الطارت ليه حمى في نص راسو ,, هضربة جد !!
وطبعا الفكرة ما فكرتو ، لكن إتوكح بيها لي إضنيه غصبا عنه!! وبقى اضحوكة لكل الحوالينو, شمتانين فيه لشيء في نفوسهم.
منهم المحروق من طردو خارج التشكيلة الوزارية الجديدة,, ومنهم من ضاقت بيه الوسيعة وعدم تلبية رئيسهم لمطالبهم الما بتكمل !
المصيبة لا بتعظ ولا بستوعب الدرس! ردة الفعل الحصلت من خطابو ( الصيني ) ما إتعلم منها التكتح، سمع كلام البحركوه في الخفاء وقرر يصلح البلبلة العملها بي خطاب تاني يوم الثلاثاء , والخطاب الوثبة، اصبح زيو زي المباراة الحكمها فاشل وطردوا الجمهور بالإجماع مرددين التحكيم فاشل!!اسمع يا رئيس الغفلة،الحكاية ما تغيير كلام ولا تغيير مراكز نفس الوجوه!الحكاية تغيير نظام بالكامل و قلعه من الجذور !
يعني بالواضح لا إنت لا احزابك ولا كل التشكيلة المعمعة بالغش ومغتغتة بدقون الضلال ! فيكم رجاء ولا أمل للشعب ولا البلاد! كلكم على بعضكم يجب ان تغادروا الساحة دون شرط او قيد!! السودان غطس في وحل لا يمكن يطلع منو بالساهل! و إنتو ما الرجال البتحلوا الآزمة !! إنتو سببها وإنتو المكنتوها في البلاد! ومغادرتكم لا يمكن تكون زي ما إنتوا مفتكرين!! تختوا طاقية ده في رأس التاني!! وشوية شوية تتسللوا من الزنقة الورطتوا بيها البلد,! وتفروا بي جلودكم وبي اموال البلد الوصلتوه الهاوية !!
طبعا ده حلم إبليس بالجنة !! يجب محاسبتكم واحد واحد ,, وجوة البلد وعلى رؤوس الأشهاد, ترجعوا حقوق كل المظلومين,, وتتحاسبوا على قتل الأبرياء وعلى نهب اموال البلاد الإحتكرتوها لي اسركم واهلكم وحولتوها في الأرصدة الخارجية !!
خطاب الثلاثاء بلوا واشرب مويتو واسقي رفاقتك الكانوا محكرين ومقهيين فيك و في وثبتك الفاتت ، ربما يقنعكم إنتو والرفقة المعاك , الساعدتك في كنس ما تبقى من هذا الوطن المقسوم ومحموم.. كلهم غشيمين زيك، بي كوم فكة ووظيفة في وزارة بركعوا ليك!!
لكن ما تفتكر الشعب غشيم وممكن تمر عليه حكاية إنه الخطاب إتغير أو حا تعيد إمتحانك الفاشل بخطاب تاني، والمرة دي ما معروف مين الحا يتبرع يكتب ليك الخطاب !! ( ربما بلة الغائب ،، في الركايب،، سنونو صفر وعيونو حمر) حلب الناقة في السنقاقة وكج يقرصك!!) ويقول ليك بتحكم تاني ربع قرن!! ( طبعا لازم تتحمل القرصة لأنها بتديك جولة حكم تانية) ما بعيدة يطلع شيخك بلة !!ما تفكيرك ما احسن من تفكيره ولا بتتفوق عليه بالدهاء ! بل هو اكثر دجلا منك وقدر يقنعك ويقنع رفقتك الميمونة بتصريحاتة المشعوذة بالدجل والتخاريف والجهل والتخلف !!!
لذلك ننصحك ان لا تعيد الكرة مرة ,, الشعب قنعان من خيرا فيك من زمنا خدو مشلخ ! ياما قريت خطابات وإرتجلت تصريحات وقرارات، كلها غير غتست بيها حال البلد ما عملت حاجة!! لو داير تعيد النظر ، عيد النظر في اوضاع البلد ونهب حقوق الغلابة! عيد النظر في جورغة اعجاز النخل من الأحزاب الطمعانة في حقوق الغلابة ودايرة تورث السودان لي جنا جناها وعلى حساب ارواح الشعب المطحون! عيد النظر في تقسيمك لوطنك وتفتيتك لكل الأقاليم دون وجه حق، ! عيد النظر في الأموال البتقسم فيها للنهبوا اراضي بلدك حمرة عين وما تقدر تقول ليهم تلت التلاتة حلايب!! عيد النظر في الحواليك من طماعين و وزراء جوعارين على السلطة والكراسي وحقوق الناس رايحة وسط الرجلين ! في عهدكم اغتصبت الآراضي وسقط إقتصاد البلاد ! وسقطت الأخلاق والمباديء ! وفي عهدكم رفعت راية الظلم وتجارة الدين, وسقطت الحرية والديموقراطية وضاع الحق وكلمة الحق, واصبح النصر حليف المجرمين والقتلة ،، السجون اصبحت تحتضن الحرائر من بنات بلادي ,, والشرفاء , وبره السجون يقدلوا الحرامية وناهبي حقوق الوطن والغبش،، وإنت ترقص على اشلاء الشهداء والوطن الجريح! وداير تعيد الوثبة بعد ربع قرن من الفساد !! حسبي الله ونعم الوكيل عليك وعلى كل كوز ارزقي تاجر بحقوق هذا الشعب ، قتل ، وشرد خيرة شباب الوطن وإنتهى من المتبقى بالفساد الأصبح شعار نظامكم الغابر!! يمهل ولا يهمل..

متاوقة
لو داير تعيد قرآءة وثبتك ,, بنردد معاك :
وثبة وثبة الليل نعدو
والسنين ياحليلنا عدو
وإنت ما عااارف طمعك
لما يسرح وين بودي
الوثبة الكتيرة يابشة حقارة
كلما نزيد وثبة انت تزيد عوارة
السرقة الكتيرة صبحت ليك منارة
الراجع ديارو انت من اهلو بتطردو
والداير يعمر إنت كمان تصدو
للكيزان معاك ماخليت قباحة
اعواد العشر انت عقود صباحا
دايرين نشتكيك وين نلقي الصراحة
نفضح نظامك قبل مالايام يعدو

الإعتذار لشاعرنا الحلنقي وللفنان المبدع إبراهيم حسين ولكم جميعا..

[email protected]


تعليقات 11 | إهداء 0 | زيارات 3170

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#904456 [المشتري الترماي]
0.00/5 (0 صوت)

02-03-2014 05:34 AM
اسلوبك فيهو سخريه ظريفه حقيقي انت كاتبه رايعه والاروع تناولك للموضوع ببهذه السخريه


#903676 [mansour]
0.00/5 (0 صوت)

02-02-2014 09:32 AM
احسنت يااستاذه ولكن دايرين السيد الرئيس يشرح لينا ماذا تعني كلمه( شذاذ افاق)


#903381 [Abu sami]
5.00/5 (1 صوت)

02-01-2014 06:35 PM
كل ما ذكرتيه هو الواقع المرير الذى نعيشه. لعنة الله عليه الأعرج القبيح.


#903235 [ترانى قاعد]
5.00/5 (2 صوت)

02-01-2014 02:12 PM
صادقة واصيلة يابت الجنيد والله ماقصرتى وريحتينا بكلمات نزلت السكرى والضغط واعادت لنا امل الحياة فبمثلكى السودان بخير والمستقيل المشرق قادم لا محالة فدمتى ياثائرة وليحفظك الله لنصرة الحق مع فائق تدقديرى لشخصكم النبيل.


#903207 [Dr Abdelwahab Yousif Babiker]
0.00/5 (0 صوت)

02-01-2014 01:30 PM
Allah Yadeek alaafia Ya Asmaa.


#903128 [الكاهلية]
0.00/5 (0 صوت)

02-01-2014 11:57 AM
ايووووووووووووووووووووووووووووي يا بنت الجنيد فشيتيني
انت يا بنت الجنيد الوثبة دي ما كان فيها وثبة اقصد رقيص وقطع رحط ليه
نسوا يكلموا قيقم يجي
طيب لو واحد سجل قيقم في موبايله ما كان تتم قطع الرحط
قطيعة تقطعكم كلكم


#903116 [كاظم]
0.00/5 (0 صوت)

02-01-2014 11:45 AM
اقل ما يقال في هذا الرئيس ، انه حقير ضيق الافق عميان البصيرة وجاهل ، والجاهل والمجنون معزور .
ما شايف العالم كيف اتطور ورجال صنعوا بلادهم من عدم وانت لسه تكذب وترقص وتخت يدك في المصاحف وتحلف. طيب لو احنا خلينا حقنا ، بطير وين من القبر الجاييك والرب المثلت بي دينه مالم يمثل بيهو عدو جهارة ويلك وارجي الجاييك يا حثالة يا منافق لانك كذبت ووعدت فاخلفت وااتمنت فخنت الامانة. انت منافق بجدارة


#903094 [ع. ش. تصويب]
5.00/5 (2 صوت)

02-01-2014 11:28 AM
أحسنتِ يا ست الكل... دائماً تتحفين القارئ.. فلا عليك إذا اختلط عبد العظيم حركة بإبراهيم حسين.. كلاهما (جميل).. والأجمل (رسالتك وصلت).


#903080 [كمونية بس]
5.00/5 (1 صوت)

02-01-2014 11:13 AM
الليلة جابت ليها رييد وحنية . حقو يوم تجدعى لينا كم غنية بلغتك الحلوة دى . ولك الود أسماء


ردود على كمونية بس
[البيان الواضح] 02-03-2014 11:33 AM
إذا لم تستح فاصنع ما تشاء التزام الأدب واجب ، لا أدري من هؤلاء ومن أين أتوا من يكتبون بهذا الأسلوب المنافي للأخلاق .


#903041 [عوض ياسين]
4.00/5 (1 صوت)

02-01-2014 10:18 AM
مفروض الريئس يرفت الزول الغمل فيهو الحركة البايخة دي . عيب عليهم يستغلوا جهل البشير وهو مهما كان رئيس البلد والفضيحة كل يوم ماشية كبيرة . الناس ديل قايليننا بهائم وما بنفهم . وما عارفين الشباب السوداني هاجر واغترب بسببهم واتشتت في تايلاند والصين واليابان وفيتنام وكمبوديا وأستراليا ونيوزيلندا وبقى مختلط بشعوب حتى الكيزان ذاتهم في السودان ما جايبين خبرهم . قال وثبة قال . تخيلي المضحك إنو البشير وغيره ما عارفين الفرق بين القفزة والوثبة وقايلين الإتنين معناهم واحد ومقعد جنبو البروفيسور الخنزير البقري غندور شايفوا فاهم . وغندور ما بيفهم غير قلع الأسنان وكسر الخشوم أمشي أسألي منه في مستشفى الدويم يوروكي كم خشم زول كسرهم وما عارفين ليهم علاج لي يوم الليلة إلا كان عندهم زول معترب يسفرهم الأردن عشان يصلح المكسور .


#903007 [اوبرا]
0.00/5 (0 صوت)

02-01-2014 09:36 AM
كوووووع انتي والبشير وحزب البشير والكيزان واحزاب المعارضة ماعندكم موضووع ؟؟؟


ردود على اوبرا
United States [المستعرب الخلوى] 02-01-2014 10:10 PM
خلاص الموضوع عندك إنت / إنتى ..قولو لينا ..
فى موضوع الان اكبر من ضحك البشير على 35 مليون مواطن سودانى .؟وبقا مصير السودان كلو فى إيده ..
لعنة الله عليك وعلى امثالك ..


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة