عملتوها ظاهره
02-09-2014 06:51 PM


• العبدلله لا يندهش إذا أخطأ مسؤول فالمسؤول بشر (وكمان سوداني) ولكن أن تستمر الأخطاء والتجاوزات بهذه الصورة التي نراها في هذا العهد السعيد وأن يتم التمادي وبسفور في إنتهاك القوانين والتلاعب بمقدرات المواطنين (عيني عينك) دون وازع من دين أو حياء فهذا والله يجعلنا نقيم مأتماً وعويلا لهذا البلد الذي يتهاوى نحو الدرك الأسفل للقاع في متوالية هندسية دون أن يهتم مسؤول واحد ويعمل على إيقاف هذا السقوط !
كلنا يذكر ذلك القرار الذي سبق وأصدره السيد رئيس الجمهورية يمنع التعدي على الميادين العامة (بعد أن عدمت العاصمة الميدان) وتحول معظمها إلى (إستثمارات) مشبوهة لا يعلم حقيقتها أحد ، ولكن على الرغم من ذلك القرار فهنالك جهة ما لا تأبه له بل وتتحداه بالقانون (كمان) !
اهلنا في الشعبية جنوب بحري (غرب المؤسسة) يتعرضون لعصي وهراوات قوات الامن وهم يناضلون من أجل ألا ينتزع منهم ميدانهم الوحيد الذي يمثل المتنفس لكل اهل الحي هذا الميدان الذي يمثل رئة حقيقة لشباب هذا الحي والأحياء المجاورة منذ أكثر من نصف قرن حيث يمارس فيه الشباب والصبية والأطفال كل أنواع الرياضة من كرة قدم وكرة الطائرة وخماسيات وتقام فيه الاحتفالات الكبرى والليالي الثقافية والبرامج الرمضانية ، اضافة الى اقامة المواطنين لمناسبات افراحهم وأتراحهم فيه.
أهلنا يقولون إذا عرف السبب بطل العجب .. طيب ليه السلطات عاوزة (تقلع) الميدان ده ضاربة بعرض الحائط ما يقدمه من خدمات لشباب وأهل الحي؟ السبب يا أعزائي القراء كما يقول أهل الحي أن أحد المستثمرين يريد أن يقيم فيه (مولاً) أي مكاناً راقياً للتسوق ! – ناخد حبوبنا ونواصل – !
بداية لماذا تمنع الشرطة المواطنين وبالقوة من إبداء حقهم في التعبير السلمي تجاه نزع ميدانهم؟ اإلا يعبرون عن ما يحيق بهم من ظلم وإزدراء لإنتهاك القانون (ذات نفسو) وقرار الرئيس القاضي بعدم التعدي على الميادين العامة؟ ثم (يعني) العاصمة دي كوووولها أخونا (المستثمر ده) ما لقى ليهو فيها مكان إلا الميدان ده ؟
كما ذكرنا في بداية هذا المقال فيمكن للشخص أن يخطئ مرة وربما ثانية وثالثة وعاشرة ولكن أن يكون الخطأ وأن يكون التجاوز على قفا من يشيل وأن تستمر هذه المسرحية البايخة بتاعت التعدي على الميادين العامة وبيعها للمستثمرين وأولي الحظوة فهذا والله عين الفساد بل عين الدمار لهذه البلد وشبابها الذي أصبح لا يجد مكاناً صالحاً لمزاولة هواياته فإتجه لتعاطي الخمور والمخدرات والتفرغ لمتابعة ما يستجد موضات وبناطلين (ناصلة) وكمان جابت ليها (حفر دخان) !
العبدلله لا يلوم أبداً هؤلاء الشباب فالدولة على مدى ربع القرن الأخير لم توفر لهم ما يعينهم على الإستفادة من طاقاتهم لتطوير انفسهم ولم تصرف على ذلك ما تصرفه على أسطولاً واحداً من عربات أي مسؤول .. يعني لا مكتبات عامة ..لا صالات جمباز .. لا حمامات سباحة .. لا أندية مشاهدة .. لا أندية ثقافية .. لا قاعات سينما .. بدلاً عن توفير كل ذلك أو بعضاً منه يا سادة يا أماجد تقوم الدولة بنزع الميادين عنهم ثم يصرح مسؤوليها عن إرتفاع نسبة تعاطي المخدرات وسط الشباب ؟ وإرتفاع نسبة (الشنو ما عارف) ..عاوزنهم يعملو شنو يعني؟
هل يوجد مسؤولاً واحداً يستطيع أن يقنعنا بأن إزالة هذا الميدان (خليكم من الميادين التانية) فيهو فايدة أكبر للمواطنين؟ بالطبع لن يستطيع كائناً من كان أن يدافع عن مثل هذا القرار (الغريب) والذي تشتم منه رائحة ضرب الحائط بمصالح المواطنين من أجل المصالح الخاصة الضيقة .
العبد لله بعد ما طرح المشكلة دي ما عرف يقوم بمناشدة ياتو مسؤول عشان يحلها ويعيد الميدان لأصحابو المواطنين .. ما هو أساساً لو في مسؤول (مسؤول) ما كان ده حصل (وللا أيه) ؟ لمن المسؤول يكون شايف (الغلط) وساااكت ده يناشدوهو فوق كم ؟ عموما نحنا خلاس فترنا من مناشدة المسؤولين و(من هنا ورايح) ح نناشد من بيده الملك وهو على كل شئ قدير أن يعيد لهؤلاء المواطنين ميدانهم فهو حق لهم وأن (يشل) يد كل من يضرب أحداً منهم وأن (يهلك) كل من تواطأ لبيع هذا الميدان وأي ميدان فيه متنفس للشباب والمواطنين وأن (يدمر) أي فاسد لا يريد مصلحة هذه الأمة .. قال أيه عاوزين يعملوهو (موول) بالله ما بتخجلو؟ ما عملتوها ظاهرة وكده !!
كسرة :
مناشدة المسؤولين دي خليناها .. تاني ح نناشد اللا نام لا أكل طعام وهو حسبنا ونعم الوكيل !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و+و؟


تعليقات 26 | إهداء 2 | زيارات 8713

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#912708 [أبو عمر]
0.00/5 (0 صوت)

02-11-2014 05:19 PM
حكومة غير محترمة لا تستحق الاحترام ، كل ناس حلة يشيلوا عكاكيزهم و يحرسوا حقهم


#912023 [سامى المك]
5.00/5 (1 صوت)

02-11-2014 03:28 AM
يا استاذ جبرة انت تنفخ في قربة مقدودة فالحكومة حامل واضانها طرشة ولا يهمها تنفس المواطنين والمسؤولين في سبيل الكمشن يمن ان يكتموا انفاس المواطنين حتي لو راحوا في ستين دهية...لأن العمولات اهم من حياة اي مواطن. شاهدت في استوكهولم عاصمة السويد اعتصام لنية الحكومة ازالة شجرة من ميدان عام ولم ينفض الاعتصام الا بعد تخلى الحكومة عن القرار...


#911512 [محمد العطبراوى]
5.00/5 (1 صوت)

02-10-2014 02:32 PM
والله ياسيد جبرة ناس الاحزاب مانافعيين احسن تتحركوا انتوا وتحركوا الشعب معاكم
والله جيبتوا لينا وجع الراس بمقالاتكم دى عشان كدا تانى ماتقرفونا بالاخبار دى اما نطلع الشارع اما نسكت كلنا
بالله ماتتحركواعشان الشعب كلو تلقوهو بره


#911506 [gasim]
5.00/5 (1 صوت)

02-10-2014 02:26 PM
دولة غريبة وعجيبة فى كل شى


#911453 [ود فارس]
5.00/5 (2 صوت)

02-10-2014 01:42 PM
ااااه الريس ال ( قال) لكن ماكتبشي زي ما قال موظف مصري لمواطن ايام مبارك


ردود على ود فارس
[رانيا] 02-10-2014 06:34 PM
ههههه فعلا لو في إلتزام بالكلام لكنا(فقنا العالم أجمع)أما مبارك في زمانه فيعتبر ملاك بالنسبة للمجارمة حقوننا ..


#911327 [كاسترو عبدالحميد]
2.00/5 (1 صوت)

02-10-2014 11:56 AM
الرئيس الذى لا يحترم المسولين ما يصدره من أوامر أو توجيهات أو تعليمات أو قانون يصبح رئيس طرطور طرطور طرطور وابله وعـوير وغـنماية الخ ... من الصـفات التى تليق به.


#911298 [صلاح نور الدين]
0.00/5 (0 صوت)

02-10-2014 11:36 AM
حمد الله علي السلامه الوصلت اخيرا انحنا قبيل شن قلنافقط الباقي لا حوله و لاقوة الا بالله و لا ملجا من الله الا اليه


#911276 [adamo kenoor]
5.00/5 (1 صوت)

02-10-2014 11:18 AM
نحن مغتربين عاوزين نرفع قضية دستورية نبدا من وين ؟؟
القضية الدستورية ضد الحكومة
وعن الضرائب وتعليم الابناء والزكاة والرسوم المفروضة علينا
عايزين محامي شاطر ياجبرة
وممكن نضيف ليها حكاية الميادين دي


#911201 [احمد حسن]
3.00/5 (2 صوت)

02-10-2014 10:23 AM
ايوة يا جبرة انت بردو عملتها ظاهرة يعنى شنو ما فى مسؤول تناشده يعنى قاصد منو انت ؟


#911054 [osama dai elnaiem]
4.00/5 (2 صوت)

02-10-2014 08:09 AM
مشكلة المشاكل ياستاذي انه كضب المسئولين صار عيني عينك والواحد يرمي الكضبة ولا ترجف له عين -- يعني البلد كوووولها صارت مجموعة مسئولين كضابين --- وزي ما قلت نشتكي بس للشديد القوي ياخذهم جميعا فرعون ومجلسه اخذ عزيز مقتدر.


#911001 [المحجوب أحمد]
3.50/5 (2 صوت)

02-10-2014 03:47 AM
معقولة يا استاذ الفاتح ( على أسطولا واحدا) ؟! ... درسنا زمان أن (على) حرف (جر) .. لكن أظنها في زمن (النصب) صارت حرف (نصب) ... لذلك نصبت المجرور باندغام كامل مع سيرورة الأحابيل


#910938 [komi kuku]
3.00/5 (4 صوت)

02-10-2014 12:31 AM
تحية وسلام يا عزيزنا جبرا، بس انت معقول مصدق كلام الرئيس او القرار اللكان اصدره بعدم التعدي على الميادين العامة، دي كلها تمثيليات سااااااكت بس ممكن تقول لي وتقنعني مرة الرئيس اصدر قرار وتم تنفيذه.


#910905 [radona]
4.25/5 (3 صوت)

02-09-2014 11:19 PM
العبرة يااستاذ جبرة مافي المستثمر
العبرة تتجسد في الشريك الوطني لهذا المستثمر
دائما ابحثوا عن بيت الداء
من هو شريك المستثمر الاجنبي .. الوطني... البلاء من الشريك الوطنى


#910896 [salah]
4.00/5 (4 صوت)

02-09-2014 11:04 PM
بقول الامام على كرم الله وجهه (من سعى وراء الحق فاخطأه ليس كمن سعى وراء الباطل فأدركه ) ان االباطل فى دولة الانفاذ مقصود ومخطط له سرا وليلا وبحقد شديد مدروس بمكر السوء.انه المخطط الماسونى لاقامة النظام العالمى الجيد الذى ينشأ من تحت انقاض المجتمعات الفقيرة القديمةعن طريق الفوضى الخلاقة كما يزعمون ياجبرة.بدأءوا بالسودان وتمكنوا منه ثم العراق وليبيا وتونس والان سوريا اما مصر ام الدنيا والشعب الواعى ولا يخدع بأسم الدين افشل عليهم المخطط ...يا جبرة ما عندنا غير قوله تعالى (وعنت الوجوه للحى القيوم وقد خاب من حمل ظلماومن يعمل من الصالحات وهو مؤمن فلا يخاف ظلما ولا هضما )


#910884 [ودالباشا]
3.50/5 (2 صوت)

02-09-2014 10:47 PM
ياجبرا يا اخوى الشعب كلو فتر زهج بس دا ما حل الناس تبقوا قدر التحدى اذا عايزين يعيشوا بكرامة والدعاء الفرادى دا برضوا ما كفاية حقوا الغلابة يقيموا دعاء جماعى ودا فيه ميزات جمة وربما هذا التجمع فى المساجد يثمر والناس تطلع الشوارع بعدين يا جبرا بعد قيام هذه المبانى فى الميادين حمرة عين الشعب يجرب تفجير هذا الصروح الشيطانية بعد خلو مرتادينها نصف الليالى وبعد تجربتين تلاته صدقنى ما تمساح تانى بقدل فى ميدان


#910874 [nasr]
5.00/5 (1 صوت)

02-09-2014 10:34 PM
ايه رأيك أخوى الفاتح قررت أرفع دعوى قضائية فى المحكمة الدستورية يدونى حقى وحق أولادى فى السودان وأتوكل على الله وأشوف لي حتة تانية تلمنا قبل ما السودان يتفرتك تانى ونصيبنا ينقص وكدة لأنو خلاص قرفنا بمافيه الكفاية وصحتنا ذاتها بقت مابتتحمل والله يعوضنا.......منو العوض وعليه العوض ...........رأيكم ودمتم


#910858 [عمة مكرفسة]
4.00/5 (1 صوت)

02-09-2014 10:04 PM
اصلا نحنا انتقلنا من مرحلة التمكين الانى الى مرحلة التمكين المستفبلى

ستجددونا فى كل الساحات وفى كل المساحات وفى كل المولات وداخل حبة الفول داخل الرغيفة
ستجدوننا فى الصادر وفى الوارد فى الجو وفى البحر فى الزراغة وفى الصناعة فى المستشفيات
اينما تلتفتوا ستجددوننا سنخنفكم
تعالوا حاوروننا سنعطيكم لها
لكننا سنؤدبكم حتى تسلخوا النمل
لتعلموا قيمتنا


#910845 [قرقوش]
0.00/5 (0 صوت)

02-09-2014 09:23 PM
يا جبرا ..
الليلة الحاضرة دي .. ريسنا (بتاع خط هثرو الماشي للاهاي) عمله ظاهرة ونطّ من (وعودو) في (مفاجعاتو) و قال : : لن تشارك كل القوى السياسية في الحوار..
وحكم البلاد بالتفويض الشعبي ، يعني بالخّج .. رجعّنا لي عمايلو ديك تاني ..
يا سيدي .. عندنا ميدان كبير جداً قلعوهوا الحرامية ديل مننا وما قادرين نرجعوا منهم .. ميدان اسمو (البلد) الحدادي مدادي .
بقت على ميدان عيال بحري الشعبية .. خلوهو ليهم .. و المول بتاع الغول ،

الشكوى لله ..


#910835 [ساب البلد]
5.00/5 (2 صوت)

02-09-2014 08:58 PM
****** يا جبرة كتر من حبوبك سااااااي ******* شكلك ح تستهلك مصنع الشفاء كووووولو ***** ربنا يديك الصحة و العافية ******* قرارات البشير ما في مسؤول شغال بيها ******** رئيس مهزلة *****


#910833 [alimohamed]
5.00/5 (1 صوت)

02-09-2014 08:56 PM
ده كلام منطقي بس ياجبرا سيد الخطيب ده ترجم احابيل وابابيل و اندغام و الغغا م وانشطام واهم شئ الوثبة دي للسفراء الاجانب كيف ورينا عشان نضيفها ل OXFORD DICTIONARY


#910830 [hasco]
5.00/5 (1 صوت)

02-09-2014 08:54 PM
كدي يا عمنا الميادين دي ساهلة شوف لينا موضوع النعجة ام بيض دي


#910804 [opti]
3.00/5 (3 صوت)

02-09-2014 08:07 PM
الغريبة زمان التماسيح ديل كانوا بينزعوا الميادين و يقولوا عايزين نعمل مسجد و استثمار سغيروني كدا بالجمبة لكن هسا بقوا ما بختشوا و كلمة مسجد الكانوا بغشونا بيها دى زاااتا استكتروها علينا و يقول ليك الماعاجبوا يشتكينا لي الله.


#910791 [Saeed]
5.00/5 (1 صوت)

02-09-2014 07:44 PM
( وأن (يهلك) كل من تواطأ لبيع هذا الميدان وأي ميدان فيه متنفس للشباب والمواطنين وأن (يدمر) أي فاسد لا يريد مصلحة هذه الأمة)
يا الخدر يا والي الخرطوم الدعوة دي جياك عديل , هسع تلقاك متورط في مول الشعبية, أنت أصلك شرفان وطمعان


#910784 [sultan]
2.75/5 (3 صوت)

02-09-2014 07:34 PM
الناس دي تاني الا افجروا ليها الميادين دي بعد ما يبدو الساس عشان اي كلب ولا مستثمر يفهم حاجة


#910778 [دا كلام ما صاااااح]
5.00/5 (2 صوت)

02-09-2014 07:25 PM
مناشدة مسؤولين ؟؟
هو اكتر من الرئيس فى مسؤول
ما ياها دى واواتك بقت اكتر من قضايا الفساد
اها تانى تناشد منو ؟؟

نرفعع ايادينا معاك ونقول آميييييين


ردود على دا كلام ما صاااااح
United States [دا كلام ما صاااااح] 02-10-2014 04:17 AM
يا شباب الله يديكم العافية
لكن قنعتوا جبرا دا من حكاية مناشدة المسؤولين

[ALMOUR] 02-10-2014 12:56 AM
والى الخرتوم ال أسمو الخدر دا كان بتاع صحن فول راجـــــــىء منو شنو

United States [fadeil] 02-09-2014 09:43 PM
رئيسك يا سيد يعوعي ساكت زى ديك أم بلينه الذى يصيح صباحا ومساءا دون فائده تذكر .


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة