العلم إتطور
02-13-2014 06:42 PM

لا زلنا في هذا العهد السعيد الميمون نطالع الأخبار التي تبعث فينا الكثير من الإستغراش المفضي إلى (الشلل) فها هو خبر اوردته الزميلة السوداني الأسبوع المنصرم يفيد بقيام وزارة الشؤون الاجتماعية بولاية الخرطوم بتعين(22) من الرجال في وظائف (مرضعات) اطفال بدار الاطفال مجهولي الابوين بالمايقوما ! مش كده وبس بل أن هؤلاء الرجال (المرضعين) تعهدوا في إقرارات (مكتوبة) بالبقاء في هذه الوظائف !
الـ 22 راجل مرضعة ديل الواحد فيهم من الصباح يقوم ياخد حمام ويلبس ويشيل (شنطة يدو) ويمشي على الشغل وآخر الشهر يمشي الصراف يقبض مرتبو ! العبدلله ما (زعلان) في حكاية (رجال مرضعات دي) ما (العلم إتطور) ويمكن كمان المسؤول العمل ليهم معاينة يكون شايف (الإنتاجية) بتاعتهم أكتر من بعض (النسوان) عشان كده قام بتعيينهم لكن العبدلله زعلان من حتة إنو هؤلاء الرجال (المرضعين) تعهدوا في إقرارات (مكتوبة) بالبقاء في هذه الوظائف ، لأن هذا التعهد يتعارض وحق أصيل في الدستور وهو أن المواطنين سواسية في الحقوق والواجبات طيب العبدلله مش من حقو يشتغل (مرضعة) في مكان واحد منهم ؟ طيب ليه التعهد بالبقاء في هذه الوظيفة الظريفة ثم كيف يتم تعهدهم بالبقاء في هذه الوظيفة التي ترتبط بالحمل والولادة هل هم حيكونو في حالة حمل وولادة طواااالي ! (النسوان ما بيكونو !!)
لم تكتف الصحيفة بإيراد خبر (المرضعات الرجال) هذا الخبر (الغريب وعجيب) بل كشفت الصحيفة عن خبر أعجب وأغرب يتمثل في وجود تجاوزات وصفتها بالخطيرة في اللوائح المنظمة للعمل وفي ترقيات العاملين بوزارة الشؤون الاجتماعية بولاية الخرطوم حيث أن هنالك ترقيات عشوائية قفزت بوظائف من الدرجة العمالية من الدرجة السادسة عشر الي الدرجة الثامنة بموافقة مدير قسم شؤون العاملين (يعني تكون عامل بوفيه بعد شوية تلاقي نفسك نائب المدير) !
يعني أنحنا لسه ما طلعنا من التصريحات التي تفيد بإنتهاء عهد التمكين (25 سنة) والقضاء على سياسة (شيلني وأشيلك) و(سوف تكون الكفاءة هي الأساس) حتى إتضح أن (الساقية لسه مدورة) وأن المحاباة والمحسوبية والواسطة لا تزال هي النهج الذي يسير دفة العمل (ده لو فضل فيها عمل) !
إن كنت عزيزي القارئ تظن أن هذا الخلل المعيب والفساد النتن يحدث فقط في وزارة الشؤون الاجتماعية بولاية الخرطوم فأنت (زول طيب) وعلى نياتك فالفساد ضارب باطنابه في كل مرفق لم تستثي منع حتى بعض المرافق التي لها بعض القدسية ، والفساد يا عزيزي إصبح بالمفتشر و(عيني عينك) لا يجتهد الفاسد في

إخفائه لأنه يعلم علم اليقين (إنو الحبة ما بتجيهو) !
لا تقلق عزيزي المواطن فالـ 22 (راجل مرضع) ديل والذين يصرفون مرتباتهم على حساب علاجك وتعليم أبنائك سوف تشكل لجنة تقصي للتحري في أمرهم وسوف ترفع اللجنة تقريرها الذي يقول : لقد توصلت اللجنة إلى أن هؤلاء الرجال المرضعون لا تنطبق عليهم الشروط (البايولوجية) للقيام بمهام هذه الوظيفة لذا توصي اللجنة بنقلهم إلى وظيفة (مساعد مرضع) عشان (يمسك للمرضعة البزازة) .... وكده !!
كسرة :
ما عندنا مانع رجال مرضعات .. رجال مرضعات .. بس الواحد يكون (قوى وأمين) .. قوي عشان إنتاجيتو بتكون عالية و(أمين) عشان ما يغش في عدد الرضعات !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و+و؟


تعليقات 19 | إهداء 0 | زيارات 7303

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#916442 [أبو أذكار]
2.00/5 (2 صوت)

02-15-2014 09:30 PM
تحياتي لك الأستاذ جبرا . حكاية مرضعات دي اتفق معك بأن أنسب لها النساء . أما بخصوص الترقيات فأرجو التحري في الأمر . لأنه في بعض الأحيان يكون هنالك موظفين قدامى و تحصلوا على مؤهلات أكاديمية أعلى من شهاداتهم عند دخول الخدمة . ولذا اذا كان هذا هو الوضع فمن الانصاف تعديل درجتهم الوظيفية.


#916364 [ود البلل]
1.00/5 (1 صوت)

02-15-2014 07:53 PM
رضاعة الرجال أهون من رئيسكم المرضعاهو بومة.


#916190 [ودالماحى]
0.00/5 (0 صوت)

02-15-2014 02:31 PM
باسيد الفاتح اسعد الله اوقاتك والسودانيون اجمعون بدون فرذ الرئيس حايهتم بشنو ويخلى شنو لو اعدم المفسدين في السودان كلهم لما وجدت غدا وزيرا او مستشارا او مساعدا او وزيرا اتحاديا او ولائيا او واليا او معتمدا او سفيرا او نوابهم او معتمدين ولا محافظين او مدرا بنوك - يعنى البلد حاتكون فاضيه لانهم بدون فز هم متهمون حتى يثبتوا انهم لم ينهبوا اموال الشعب المغلوب وهذه العمائر والفلل والارصده كانت لهم قبل الوزاره او الولايه او او او طبعا مستحيل - لك الله ياوطنا الناهبون فيه لايعلم عددهم الا الله نسال الله عز وجل بان كل من نهب جنيها من مال هذا الشعب ان يجعله نارا في بطنه وبطن اهاه وعشيرته


#915932 [المقدوم مسلم]
3.00/5 (2 صوت)

02-15-2014 09:28 AM
قصة عجيبة


#915814 [mansour]
4.00/5 (1 صوت)

02-15-2014 12:40 AM
والله يالفاتح في هذا العهد شفنا البدع واحد عايز يتزوج واح واحد قاعد يتدخن وواحد متخصص في الرقيص وهسع جونا واحدين مرضعات ويمكن اكان الله مد في العمر نلاقي واحد اجهض وواحد وانجب طبيعي وواحد انجب قيصري ويتعدل تخصص اطباء النساء والولاده الي اطباء الرجال والنساء والوالولاده وياسسسسسسسسساتر


#915712 [radona]
5.00/5 (1 صوت)

02-14-2014 09:53 PM
اؤكد لك بانهم سيسرقون حليب الرضع ويبيعونه في سوق الله اكبر
الفساد افة السودان الكبرى
والتمكين يستوجب التطهير والتطهير واجب وطني
الجماعة ديل شغالين ساكت امنو الدنيا تماما
ويظنون بانهم لن يحاسبوا يوما ما
دعهم في غفلتهم يعمهون


#915582 [وحيد]
4.00/5 (1 صوت)

02-14-2014 05:12 PM
طبعا في بلد تركب بيوض للنعاج عشان تتصدر خروف ما غريب يعينوا رجال عشان يرضعو الشفع ... يمكن يمونوا نسوان مركبين ليهم بيوض برضو


ردود على وحيد
United States [sabra150] 02-14-2014 07:29 PM
ياوحيد انت زمان ما سمعت بالنعجة ام بيض ؟


#915446 [حاج ابكر]
0.00/5 (0 صوت)

02-14-2014 01:08 PM
يا جبر اخطف رجلك على المايقومه و انت تعرف انو الموضوع عادى ذى الزبادى


#915368 [صبري فخري]
3.75/5 (3 صوت)

02-14-2014 11:31 AM
هذه هي الوثبة التي قصدها الرئيس أي ناس المءوتمر الوطني شبعوا رضاعة والآن اصبح الواجب ان يرضعوا الشعب الفضل.


#915094 [دً.مهاجر]
2.00/5 (1 صوت)

02-13-2014 11:23 PM
دا غباء منك ومن القراء ومعركه في غير معترك ،الرجال ديل برضعو الاطفال من الحليب المعد لذلك وعن طريق بزز نفس البعملنو المرضعات ولا انتا بتفتكر انو المرضعات برضعن من لبنن ،خلي عندك مخ


ردود على دً.مهاجر
[قال مهاجر] 02-15-2014 09:59 AM
والله انت دتور ما دكتور ،، ماسووووووووووووووووورة دكتور ماسووووووووووووووووووووورة
فهمك زبالة.

European Union [حاجة التاية] 02-14-2014 10:06 PM
إنتا دكتور في شنو يا ود أمي ؟ هسه باقي ليك لامن الرجال يمسكو البزازات للأطفال دي شغلانية رجال ! والله الفهم قسمة وكمان قال دكتور خليل الدكترة يا ود أمي

European Union [كرامة] 02-14-2014 12:57 PM
ماشاءالله على عبقريتك بس نسيت انو الأطفال يدل زي مما هم محتاجين جرعة لبن شان النمو الجسدي، كمان عاوزين جرعة حنان عشان النمو النفسي،،، واعتقد انو النساء أفضل من يعطين هذه الجرعة، حكمة ربنا،، ولا أنا غلطان

European Union [زول] 02-14-2014 12:47 PM
وانت يالعتدك مخ بتفتكر ان المرضعات كن يرضعن من اثدائهن ما برضو من البزز القصة ما كده القصة في ان الرجل يقبل وظيفة مرضعة لأن فيها تاء التأنيث يالعتدك مخ


#915092 [كاسترو عبدالحميد]
3.50/5 (2 صوت)

02-13-2014 11:18 PM
يا جماعـة انتو راكبين غـلط . عـمل هـؤلاء المرضعـين هـو ان يقوموا بعملية رضاعة الأطفال من بزازات الرضاعة .


ردود على كاسترو عبدالحميد
United States [ودالبله] 02-14-2014 06:27 AM
بالله.. يرضعوهم من بزازة وللا من قزازة .. ده شغل نسوان ىارجل .. وبعدين نحنا عارفين الكيزان ديل برضعوا .. مش هم الحكومة .. هسع ناس غندور ديل مامرضعات عديل


#915067 [فارس عبدالرحمن]
2.00/5 (1 صوت)

02-13-2014 10:45 PM
وديل حيرضعوا الاطفال من شنو ؟


#915057 [ساب البلد]
4.00/5 (3 صوت)

02-13-2014 10:24 PM
******** ما عندنا مانع رجال مرضعات .. رجال مرضعات .. بس الواحد يكون (قوى وأمين) .. قوي عشان إنتاجيتو بتكون عالية و(أمين) عشان ما يغش في عدد الرضعات ****** هع هع هع هع هع *******


#915034 [alimohamed]
3.00/5 (1 صوت)

02-13-2014 09:47 PM
الاستاذ جبرا اذا كنت لا تقرأ التعليقات فهذا والله غير صحيح منك اريد كقارئة مدمنة لعمودك ان توجه هذه الاسئلة للشيوخ عبد الحي يوسف وشيخ الرجال مش النسوان دفع الله منو ماعارفه
1 ماحكم زواج هؤلاء الاطفال الاخوة من رضاعة هؤلاء الرجال شرعا
2 هل يقومون بقضاء الصيام والصلاة ايام الحيض والنفاس شرعا
3هل يجوز لهم لزاما اكل الطحنية وشرب الحلبة لادرار اللبن وماهي الكمية التي يتناولونها شرعا
4 كم عدد الرضعات التي يقدمونها للاطفال شرعا
5 كم هي مدة العدة لديهم في حالات وفاة الزوجة وطلاقهم بالتلاتة منهن شرعا
اذا لم يتمكن هؤلاء الشيوخ من معرفة الاجابة الصحيحة فانا اطالب برفعها للازهر الشريف وان تعذر للبابا بحكم انهما اعلي مرجعيات دينية


ردود على alimohamed
United States [الاقرع النزهى] 02-15-2014 04:34 PM
يا على محمد ......تخاظبنا على انك على ثم تقول [ اريد منك كقارئة مدمنة ] ايه الجكاية ؟ مرضع انت ام مرضعة ؟

European Union [fattah] 02-14-2014 05:29 PM
يحبيبى انت راكب من وين رجال مرضعين يعنى يحملو البزازه وينظفوها وتعبئةمت الحليب عليها ومن ثم يحطوها فى فم الشافع هذه هى مهمتهم انشاء الله تكون فهمت


#914990 [بت البلد]
5.00/5 (2 صوت)

02-13-2014 08:24 PM
وليه يعني النسوان ممنوعات من الصرف ؟؟؟!!! وللا آآآآ نحن علينا الانجاب وانتو عليكم الرضاعة ومافيش حد أحسن من حد ... والله محن


#914988 [ودعمر]
0.00/5 (0 صوت)

02-13-2014 08:20 PM
يديك العافية ياستاذ والله جيهته لينا اصحاب المشروع الحضاري جيهة كاربه الله لا جاب عقابم


#914983 [التاله النوبيه]
1.00/5 (1 صوت)

02-13-2014 08:17 PM
والله يا استاذ الفاتح الناس ديل يطيروها ليك من راسك ,,,,,,,,,,,!!!


#914982 [Hatim Babiker]
3.00/5 (1 صوت)

02-13-2014 08:17 PM
العلم دا ما بيطور إلا عندنا في السودان،،، حقيقة علمية
(الرجال المرضعات) سبحان الله حتى من ناحية اللغة بتعمل حساسية وكاروشة خلينا من الباقي لكننا في زمن حفر الدخان وغيرو كلو ممكن!!!
يا ترى ماهي المؤهلات التي تقدم بها هؤلاء لتلك الوظائف؟؟
تعشيقة خلف الزمن السعيد ماسكة وبدأت في التعشيق بالنمر زي بعض العربات زمان خلف نمرة واحد وغتنين وكدا وأظننا في خلف نمرة مافي والخلف ماشيييييييييييييي وين؟؟ الله يفكنا
اللهم ازح عننا بقوتك وعزتك وجبروتك هذه السلطة المتسلطة وارنا فيهم قوتك وبأسك الشديدين كما أرونا بأسهم واذاقونا بؤسهم وألحقهم بقوم عاد وثمود وبفرعون وهامان وجنودهما فهم غير بعيدين عنهم وانت قاااادر على ذلك يا عزيز يا ذو البأس الشديد يا فعال لما تريد..
آآآميييين


#914938 [Abu Ahmed]
5.00/5 (1 صوت)

02-13-2014 07:30 PM
hhhhhhhhh, it is really funny to extend that you will cry ,better to cry my lovely people Now we have about 59 years since the second colonization by the group of civil people whome made by the last colonization ,don't wait thing, just the next colonization, moving brain should gain new manners


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة