المقالات
السياسة
والأن (نحن أولاد البلد) عملنا أسوأ خدمة مدنية
والأن (نحن أولاد البلد) عملنا أسوأ خدمة مدنية
02-16-2014 03:59 PM

الشق الأول من الحديث عن من دمر الخدمة المدينة فى السودان
حسين خوجلى قال لمان خرج المستعمر خلى أفضل خدمة مدنية فى السودان والأن ( نحن أولاد البلد ) عملنا أسوأ خدمة مدنية
ياجماعة حسين دا حاقد على أولاد البلد - البارح دخلنا النار كلنا واليوم بيحملنا مسئولية تدمير الخدمة المدنية والكل عارف سبب تدميرها منو وتم كيف ومتين - يا حسين ألا تختشى من ربك تدخل أفضل شعب على الأرض النار وتجى تحمله مسئولية تدمير ما دمرتموه أنتم مع السبق والإصرار والتعدى
يا حسين خليك صاحى اللى خربوا الخدمة المدنية مش أولاد البلد - ديل إنتو الكيزان وإنتو مش أولاد بلد - الطيب صالح قال من أين أتى هؤلاء ؟ وقبل 3 أيام أنت رددت هذه المقولة - أولاد البلد الحقيقين شردتوهم منها بالقوة وهسع قاعدين فى كراسى القماش قدام بيوتهم محتارين فى اللى حصل للبد دا وأنت شاهد على ذلك بل بطالب الحكومة تمر بالشوارع تجمعهم عشان يجوا يحلوا المشكلة التى خلقها الكيزان وأنا بنصح كل صاحب فكرة يحتفظ بها لنفسه حتى يزول سرطان الأخوان
ديل لو أديتوهم فكره بيصلحوا حالهم بيها ويتقرفصوا على صدوركم خلوهم يقعدوا فوق العدم دا نحن وهم وأصلنا نحن متعودين على الصبر والإبتلاءات الكلام ناس المثنى وثلاث ورباع وأكل صدور وارجل الفراخ المحمر مع عسل النحل الحضرمى ديل عاوزين صبابة تصب فلوس عشان يحافظوا على مستوى حياة ماقبل فصل الجنوب وزوال بتروله بيد على عثمان وفريق عمله
قال ( والأن ( نحن أولاد البلد ) عملنا أسوأ خدمة مدنية )
تقتلوا القتيل وتشيلونا رقبته - أنا نيابة عن كل أولاد البلد أقول ( أولاد البلد برئين من تخريب الخدمة المدنية براءة الذئب من دم إبن يعقوب ومن خربها لايستحق صفة ( أولاد البلد ) لأن أولاد البلد مش عاقين
أولاد البلد الحقيقين ناس أزهرى والهندى وزروق وحسن عوض الله ومحمد نور الدين ونصر الدين السيد والصديق عبد الرحمن وعلى عبد الرحمن وبقية العقد الفريد طوروا ما وصل لهم من الإنجليز وإنتو زبحتوه من الوريد للوريد فى ليلة 30 يونيو 1989م
حسين قال ( مافى تواصل أجيال - يعنى تسليم الأجيال الخبرات لبعضهم البعض ماموجود ) ياجماعة حسين دا لو كان صغير فى السن لوجدنا له ألف عذر تواصل أجيال شنو وأنتو أول ماجيتو قطعتوا الحبل السى بينكم وبين أولاد البلد وقلتم عننا خونه وجاهلين وغير مؤتمين على قيام دولة الشريعة ومشروعها الحضارى وبعشرات الألاف رسلتونا لبيوتنا للصالح العام وإستبدلتونا بطاقم قيادة إخوانى نظيف نزيه مخلص متمكن عشان يطبق مشروعكم الحضارى - لا طبقتم مشروعكم لا أنقذتونا ونهبتم البلد وكل شخص قدم للقضاء طلع برىء
ياجماعة تواصل الأجيال اللى بيتحدث عنه أستاذ حسين دا زى ناس السباق الرباعى - متسابق رقم 1 يحمل علم وينطلق فى المضمار لمان يصل الميس يسلمه لزميله رقم 2 و2 يسلم 3 و3 يسلم 4 وبكده حيكون فى فريق فايز فى حلقة متصلة - لو نمرة 1 مشى ولقى رقم 2 مافى لن يجد من يتبادل معه الراية طبعا حيحصل ليهو اللى حصل لخدمتنا المدنية
دا اللى حصل لينا فى عهد الإنقاذ - الطيب مصطفى فنى اتصالات خريج معهد الإتصالات السلكية واللاسكلية سنيتن بعد الثانوى بنجاح ربنا رحمه وطلع خال الريس من ابى ظبى رأسا توش مدير عام التلفزيون - معاه متمكن اخر اسمه حسن فضل المولى بتاع قناة افراح افراح واغانى واغانى ونجوم الغد - مسكوا كوادر اعلامية صرفت البلاد عليها الملايين واهلتها فى امريكا والمانيا وبلاد اخرى فى الدنيا الواسعة - للصالح العام - ووضعوا محلهم كوادر اسلامية - وعلى كده قيس فى كل الوزارات والمصالح وعشان يعدلوا الحال قالوا لجامعاتهم أى شخص من جماعتنا ديل خلال سنيتن ثلاثة لازم يحمل دكتوراة ومنها حصتين ثلاثة فى الأسلامية ويلا يابروف يابروف والموضوع ما يقيف فى الحد دا يمشى قدام شوية وأول لقاء تلفزيونى المذيع ( نحن الأن مع الخبير الإقتصادى بروفيسر أحمد ... )
زمان نحن لمان نعين بعد التخرج فى الدرجة Q نجد قدامنا ناس فى DS ثم B الى الدرجة السابعة والسادسة حتى وكيل الوزارة فى الأولى تسلسل هرمى مادرسته فى الجامعات والمعاهد العليا لايؤهلك لأداء واجبك الوظيفى من سبقوك يعلمونك ما لم تتعلمه فى قاعة المحاضرات واهمها أدب التعامل مع الجمهور وقضاء حوائجهم - جابوا شفع صغار مره قابلنى مدير طبى فى مستشفى حكومى تحلف تقول بيرضع أصبعه لى هسع وعاينته تحت قلت يمكن أمه رابطه ليهو بامبرز ومدير طبى - لقد شوهتم كل شىء مش الخدمة المدنية وبس
وحسين خوجلى بيسأل وبيقول مافى تواصل أجيال - لا يا حسين - كان فى ولكنكم قطعتموه وأنت شاهد عليه لم تكتب حرف واحد فى ألوان تستنكر الإحالة للصالح العام أقصد ( الضرر العام ) وجاي اليوم تتبجح فى ( مع حسين خوجلى ) وكمان بتدينا درس فى الأخلاق - كدى درس جماعتك ديل نحن البينا عرفناها وقررنا الهروب النهائى أعنى إغتراب نهائى خروج بدون عوده - البلد خليناهو ليكم تداوسوا فيه أنتو والجبهة الثورية وقطاع الشمال حتى يقضى الله أمر كان مفعول - بس ماتفقع مرارتنا وتقول مافى تواصل أجيال
منو البيعلم منو - الوزير والمدير الجبتوهم الخفير افهم منهم
تخرج جيلى مطلع السبعينيات ووجدنا قدامنا جيل تخرج من كلية غردون وجامعة الخرطوم أبتعثوا لبريطانيا وجاءوا يحملون شهادات عليا يتولون المناصب العليا - علمونا كيف ومتى نتكلم - أنا درست وتعلمت تحت باقر خليفة - علمونا كيف نتصرف مع المواطن صاحب الغرض وكيف أن المواطن دائما على حق - فى زماننا حدث تسليم الراية من أجيال الأربعينيات لأجيال الخمسينيات - فجاء أجيال الخمسينيات وسلموها لأجيال الستينيات - كل عقد يسلم الراية للعقد الذى يليه - فى 30 يونيو 1989م قرر شيخك الترابى طرد الشعب السودانى كله وإخلاء الخدمة المدنية من كل كوادرها وإستبدالهم بجماعة التمكين - بعد ربع قرن إكتشف البشير أن ناس التمكين ودوه الطين وتأمروا عليه بالجنائية ليخلوا الجو لهم ولشيخهم - البشير فطن لهم ولكن متأخر جدا - فقرر ألا تمكين بعد اليوم - وعشان مايطلع كضاب الوالى الخضر قرر تعيين الوالى الأسبق بدر الدين طه فى منصب رفيع - وتقولوا لا تمكين بعد اليوم - أمال دا شنو ( طين ) ؟؟؟
يا حسين الإنقاذ إستأصلت الكلية السليمة للسودان وزرعت محلها كلية مريضة فمات السودان
ولمان تتحدث عن الفشل وعن من سيدخل النار خليك دقيق وحدد كلامك ماتقول أولاد البلد على لسانك وماتقول السودانين وكن شجاع وقول جماعة التميكن أو الإخوان أو الكيزان فنحن منهم براء
يا حسين لا تتحدث عن أمل أو بادرة إصلاح فى السودان قبل أن تزال كل الكلى الفاسدة التى زرعتموها فى جسد السودان لربع قرن من سنوات حكم الإنقاذ لتعود للسودان عافيته
نحن مش بنسجل ليك كلماتك نحن بنجسب لك أنفاسك - مافى داعي لحكيم العرب دى - خلينا فى الهجن والنيس بس - حقيقة اللى إختشوا ماتوا
الشق الثانى من المقال مفاوضات الحكومة مع قطاع الشمال
نحن نراه أمر مشروع وضرورة لوقف الحرب وحسين خوجلى له رأى آخر
أحرام على بلابله الدوح حلال للطير من كل جنس
جرت العادة أن نرددها كلما حدث كيل يمكيالين
حسين خوجلى قال مفاوضاتنا مع قطاع الشمال تقطع القلب
طيب يا أستاذ حسين مفاوضات ماشاكوس ونيفاشا وابوجا بتقطع شنو لو إعتبرنا الجنوبى أجنبى عنا فى الديانة واللغة فهل نفاوض الجنوبى ليصل للسلام وتأسيس دولته ونرفض مفاوضات إبن قطاع الشمال والجبهة الثورية الذى يربطنا به الدين واللغة
مفاوضات ماشاكوس ونيفاشا أدت لفصل الجنوب بكل خيراته من مانجو وأنناس وباباى وموز وشاى وبن حاجات تانية كويسة وأخرى بطاله
مش إنفصل بل يحترق الأن ولا أمل فى توقف الحرب الأهلية
لو مفاوضات قطاع الشمال بتقطع قلب شخص أكيد قلبك أنت لكن نحن البيقطع قلبنا كلامك دا
وحديثك ( اللى يمشوا للجنوبيين لو عندهم حاجة ) يعنى الشمال دا شمالكم إنتو وبس واللى عنده قضية يمشى للجنوب
ليواصل حسين ( لو كل واحد بسلاحه يفرض علينا شروطه الأمر لن يتوقف )
طيب يا أستاذ حسين إنتو جئتم كيفن - إختاركم الشعب - إنتو حكمتونا ربع قرن بقوة السلاح وفرضتم علينا شروطكم ومن حق ناس قطاع الشمال بقوة السلاح يفرضوا عليكم شروطهم - أنتم من إنقلب على الديمقراطية وقلمك فى ألوان كان مقاتل مع الكيزان
أم
أحرام على بلابله الدوح حلال للطير من كل جنس
نحن أرتضينا الديمقراطية إسلوب لتداول الحكم وأنتم فضلتم خيار السلاح والحكم العسكرى وهسع عرابكم الترابى ندمان ويتحدث عن العودة للديمقراطية
حسين خوجلى قال قطاع الشمال دا من إبتلاءات نيفاشا - طيب نيفاشا دى وقعها المهدى ، الميرغنى ، الأزهرى ما صنع أيديكم الناس قالوا ليكم خلونا نشترك جميعا فى هذا الحوار إنتو قايلين من وراها خير قلتو ننفرد بنيفاشا ورسلتو شباب ليس لهم سابق خبره سياسية ضيعوا الجنوب وضيعوا السودان وضيعوا مستقبل الحركة الإسلامية فى السودان
ضيعتم مليارات دولارات بترول الجنوب فى الفارغة والمقدودة وسويتوها حريم وقصور وثلاجات ومكيفات وسيارات فارهه وبقيتوا هسع تفرضوا عشور على ستات الشاى عشان تكملوا مشاريعكم وخططكم - مش عيب يا أحمد هارون - من ستات الشاى يامولانا كمان بلا خجله
لو كان المفاوضات مع قطاع الشمال بتقطع القلب زى ماقال حسين خوجلى
فإن بعض التعابير الجوفاء التى تخرج من فم حسين خوجلى تفقع المرارة فقع عديل
وأخذ العشور من ستات الشاى إعلان بإفلاس دولة المشروع الحضارى

م. سلمان إسماعيل بخيت على
[email protected]


تعليقات 4 | إهداء 0 | زيارات 1348

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#918247 [ود توتي]
0.00/5 (0 صوت)

02-17-2014 02:55 PM
والله فعلا الإختشو ماتو


#917411 [ابوخليل]
5.00/5 (3 صوت)

02-16-2014 07:48 PM
محاولة فاشل لتبرأت اولاد البلد (الجلابة) اليس هم هم مايطلقون على انفسهم اولاد البلد وماذا عن الأخرين هل هم اجانب انتم اساس دمار السودان بتقسيماتكم دى وعنصريتكم الفجة اقلية تساوى اقل من 10% احتكرت كل شى الخدمة المدنية قيادات الجيش قيادات الشرطة ومصادرة هوية البلد اقلية الجلابة للاسف هى سبب تاخر السودان اما هذه التسميات مثل الجبهة الاسلامية الامة الاتحادى كل هرأء يمثلون اقلية الجلابة وخير دليل اتحادهم الاخير


ردود على ابوخليل
United States [مامون] 02-17-2014 04:34 PM
زمان قرأت لهذا الكاتب (م. سـلمان اسـماعـ.....إلخ الاسم) مقالا ينضـح بالعنصرية والترفع على من يسميهم باصحاب السكن العشوئي ويفخر بمطاردته لهم وإجلائهم عن مساكنهم المتواضعة بشتى السبل والوسائل الظالمة المجحفة وكأنه بطل من الابطال الامر الذي ترك اثرا بالغا في نفوس هؤلاء المواطنين الضعفاء وهم في الحقيقة اسياد البلد الاصـليين وليسوا كمن يدعون العروبة والاسلام..
المضحك ان العرب الحقيقيين لا يعترفون بهؤلاء ولا باسلامهم الزائف ثم ان العرب صاروا لا يساوون شيئا في هذا الزمن لكونهم غير محترمين وهم يعرفون ذلك.. ولكن كيف يقتنع ناس (م. سلمان....) بهذه الحقيقة حتى يفهموا..


#917312 [المهندس سلمان إسماعيل بخيت على]
0.00/5 (0 صوت)

02-16-2014 06:15 PM
( وايضا تمسكت الحركة الشعبية بالحل الشامل الذي يشمل كافة القوى السياسية ومنظمات المجتمع المدني عبر حكومة انتقالية جديدة يتفق عليها، ومن مهامها عقد مؤتمر قومي دستوري يجيب على السؤال التاريخي كيف يحكم السودان ؟ قبل من يحكم السودان ، واقامة دولة المواطنة بلا تمييز وفق مشروع وطني جديد متراضي عليه)
شوف أخى أستاذ حسين خوجلى
الكلام اللى بين هلالين دا صادر من الحركة الشعبية يقوله عرمان يقوله عقار يقوله كائن ما كان دا من مطلوبات الأتحاديين والأمة والشيوعى والناصرى والبعثى يعنى من مطلوبات قرابة 29 مليون نسمة لو قلنا السودان فيه 30 مليون
الحكومة لن تصغى لرأى 29 مليون مواطن مسالم لا يحمل السلاح ولكنها ستصغى للقلة التى ترفع فى وجهها السلاح وحتجلس تتفاوض معها وقريبا ستصل ان شاء الله لحل يوقف نزيف الدم مش لأن الحكومة من دعاة السلام لأن الحكومة إقتصاديا لا تملك القدرة على القتال والصيف باقى ليهو شهر والتمرد مش حيتم دحره وكاودا بعيدة عشان كده زى ما توافقوا مع قرنق سيتم التوافق مع الجبهة الثورية والحركة الشعبية قطاع الشمال وسيعم الأمن السودان وعشان البشير يصل للمرحلة دى لازم ينفذ الكلام اللى قاله للجميعابى ( حينظف البلد من كل الأوساخ اللى ) وماذلك على الله ببعيد
حتقول لى أنت من مؤيدى الحرب ؟ أقول لك لا
أنت من مؤيدى الجبهة الثورية ؟ اقول لا
أنت من مؤيدى الحركة الشعبية قطاع الشمال ؟ أقول لك لا
هل الجبهة الثورية والحركة الشعبية قطاع الشمال يحملان نفس أمانيك وتطلعاتك لمستقبل افضل ؟
أقول لك نعم
ستقول لى ولكنهما لو لم يختارا خيار الحرب والسلاح لما أعارتهم الإنقاذ نظره وأصبح حالهم حال المهدى والميرغنى ؟
أقول لك نعمل وهذا خطأ البشير وحكومته يحتقرون المسالم ويمجدون ويرفعون من قدر المقاتل
ألم يكن أركو مناوى يوما ما كبير مساعدي رئيس الجمهورية
أعمل حسابك يا حسين خوجلى فقد يأتى عرمان واليا أو معتمدا لولاية الخرطوم وساعتها تقول ياريت اللى جرى ما كانش ولن أستبعد أن تستضيفه فى قناتك لتمدحه وتثنى عليه ، ألم يقل الشاعر نزار قبانى لافرق مابين السياسة والدعارة
وقالوا عن المفاوض كراقصة الإستربتيز يشلح قطعه وراء قطعه لمان ألهى كما خلقتنى


#917300 [كفاية]
5.00/5 (1 صوت)

02-16-2014 06:03 PM
كفيت ووفيت ولله


م. سلمان إسماعيل بخيت على
م. سلمان إسماعيل بخيت على

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة