تزوير إستغراشي
02-17-2014 12:57 PM


أطباء مزورون :
تناقلت الصحف مؤخراً أخباراً بالقبض على أكثر من 40 طبيباً مزيفاً (عندهم عيادات) يقومون فيها بفحص المرضي ووصف العلاج لهم فإذا هذا هو العدد المكتشف في (الطب العديل) ترى كم هم الأطباء المزيفون في مجال (الطب البديل) ؟ أعشاب ورقية شرعية !

معلمون مزورون :
في المدرسة التي يدرس بها إحد أبنائي جيئ بمشرف أكاديمي علمت بانه يتعامل بقسوة شديدة مع التلاميذ فذهبت وتناقشت معه ولأن العبدلله عمل في حقل التدريس أكثر من ربع قرن فقد تأكد له تماما بأن هذا المشرف (ما مسك ليهو طبشيرة في حياتو) فأخذ يسأل (تحت تحت) عن سيرته الذاتية فوجد أنه كان يعمل مضيفاً أرضياً قبل أن يتم الإستغناء عن خدماته !

أوراق عملة مزورة:
لا يمر يوماً واحداً إلا وتقرا في الصحف عن القبض على عصابة لتزييف العملة وبما أن العبدلله قد تلقى دورات متقدمة في التزييف الأليكتروني بحكم تخصصة وبما أنه يوميا تقع في يديه العديد من أوراق العملة المزورة (الما بتغباهو) أثناء تعاملاته المالية فهو يناشد المسؤولين القيام بإستبدال هذه العملة المتداولة بإخري يستحيل تزييفها بسبب الخامة المصنوعة منها ( حكاية الشريط المعدني والعلامة المائية والشنو ما
بعرف دى بقت تتعمل بسهولة) ! ومن هذه المواد مشتقات مادة البوليمر مثل biaxially oriented polypropylene
ممكن (خبير) يقول ليا تكلفة الطباعة عالية وفي الحالة دي نقول ليهو ما أغلي من العملة التالفة بسبب التمزق والعملات المزورة التي تهدد إقتصادنا (وهي قصة ما ح تنتهي بالشايفنو ده)

مرضعات مزورات :
تم توظيفهن في وظيفة (مرضعات) بدار المايقوما للأطفال فاقدي السند ولم يكونو غير رجال كاملي الرجولة (القصة ما فيها زراعة أعضاء زي النعاج) رجال بي (شنباتم) !

رجال أمن مزورون :
لا تخلو الصحف من أخبار القبض عليهم يوميا وهم يمارسون إبتزاز المواطنين بشتي الحيل وإقتلاع ممتلكاتهم من موبايلات ومبالغ مالية وخلافه ثم رميهم في العراء ! المشكلة الواحد من ديل وبعد ثبوت التهمة ومحاكمتو يدوهو ليك ستة شهور سجن ! عشان يطلع تااااني ويواصل (نهب) !

خراف مزورة :
بالطبع من أعجب أنواع التزييف وأغربها تلك القصة التي رواها لنا الأخ الزميل الطاهر ساتي عبر زاويته المقروءة بصحيفة السوداني قبل أيام والتي تتحدث عن إكتشاف نعاج معدة للتصدير وهي في شكل خراف بعد أن تمت زراعة أعضاء ذكورية لها

- من هم هؤلاء العفاريت الذين هم وراء هذه العملية؟
- كيف مرت هذه الخراف المزورة من جميع اقسام الفحص حتى وصلت لمرحلة المغادرة؟
- هل قام بعمليات الزراعة الجراحية طبيب متخصص وللا طبيب مزيف ؟
- هل تمت في عيادة بها حجرة عمليات مجهزة ومصرح بها وللا في (عيادة المحجر ذاتو)
- هل تمت العملية تحت البنج الكامل أم الموضعي (تفرق طبعن) ما برضو دي أرواح وكدة
- هل الزراعة تمت عن طريق الجراحة أم اللصق وإذا كان اللصق ما هي المادة المستخدمة (أوعا يكون صباع أمير) !
- ما مصير (الذكور الذين تم إستئصال أعضائهم)؟
- من هو الشخص المسؤول من فحص هذه الخراف صحياً (وما لاحظ حاجة) !
- هل سيقدم هؤلاء الذين يخربون إقتصادنا إلى العدالة وللا (نعمل ليهم كسرة) !

كسرة :
التزوير بتاع النعاج ده إسمو تزوير إستغراشي !
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و+و؟


تعليقات 25 | إهداء 0 | زيارات 7767

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#919974 [مريود]
1.00/5 (1 صوت)

02-19-2014 11:35 AM
مرضعات مزورات :
تم توظيفهن في وظيفة (مرضعات) بدار المايقوما للأطفال فاقدي السند ولم يكونو غير رجال كاملي الرجولة (القصة ما فيها زراعة أعضاء زي النعاج) رجال بي (شنباتم) !




دي دايرة وقفة


#919736 [ابو ابراهيم]
1.00/5 (1 صوت)

02-19-2014 08:15 AM
يا جبرا عندي ليك كسره واعتقد دي تكون كسره دائمه( اخبار ناكل مما نزرع ونلبس مما نصنع شنوووووو)


#919717 [عبدالرحيم ابوزيد]
1.00/5 (1 صوت)

02-19-2014 06:55 AM
والله حيرتو المصريين كمان


#919207 [وحيد]
1.00/5 (1 صوت)

02-18-2014 01:26 PM
كدي بالله كلمنا عن شهادات الدكتوراه التي حظي بها الولاة و الوزراء و كبار المسعولين في الانقاذ، و نرجو افادتنا بموضوع البحث الذي قدمه الطالب عمر حسن احمد البشير لنيل درجة الماجستير في الشريعة ، و هل كانت الدراسة عن الشريعة المدغمسة ام شريعة الله و الرسول


#918848 [بت ام الحسن]
1.00/5 (2 صوت)

02-18-2014 06:34 AM
أأكد ليك المزوراتية ديل كلهم رجال ومره واحدة مافيهم لانو الستات مابيعرفوش يزورو


ردود على بت ام الحسن
[الصوت] 02-18-2014 01:15 PM
انتي ما سمعتي بالحكمة السارية الجارية ((( ابحث عن المرأة ))) .....كل هذا التزوير يكون عشان خاطر عيون

المرأة ... وهي التي يستقر عندها كل الخير والشر في النهاية .... اسألي وداد كان انا كذاب ......


#918826 [ودامدرمان]
1.00/5 (1 صوت)

02-18-2014 03:53 AM
انت في التزوير ولا مصنع كنانة الاتحرق ومافي ولا خبر







تخريمة:
انا خايف تكونوا ماعارفين !!!


#918672 [عصمتووف]
2.75/5 (3 صوت)

02-17-2014 10:27 PM
مرضعات مزورات :
والخراف الكاملة الدسم

الحكومة تريد حلا للمثليين اهو اخترعوا وظيفة في وظائف العالم ما انشئت اما الخراف يمكن يقولوا ليك خراف مخنثة انت بتغالط الحكومة زي ما القطارات براسين الخراف لديها عدة اجهزة يعني الخروفة تكشح نفسها لتحمل نفسها بنفسها وتنتهي حكايات الفحول وتخفيض الصرف لعرب الخليج


#918623 [ساب البلد]
3.00/5 (2 صوت)

02-17-2014 09:31 PM
********* هل سيقدم هؤلاء الذين يخربون إقتصادنا إلى العدالة وللا (نعمل ليهم كسرة)*********** اكسر ساكت يا عمنا و كتر من الحبوب ******* يديك الصحة و العافية ********


#918588 [بدر موسى]
1.00/5 (1 صوت)

02-17-2014 08:27 PM
أقترح عليك يا أستاذ جبرة أن تقوم بكتابة عمود يومي ثابت جديد بعنوان (كسرات الأعمدة)، تعيد فيه وتكرر يومياً هذه الماسي للذكرى وكدة، أهو منها يجيك قرشين تلاتة ما بطالين، يدعموا ميزانيتك الخربانة دي، ومنها تفيد الشعب السوداني بتعزيتهم يومياً وكدة!!!
طبعن برضو العشم في أن تتمكن من إيقاظ ضمير مسؤول فاسد وارد، ولكنها واسعة شوية..
سلام سلام سلام


#918550 [ودالباشا]
3.00/5 (2 صوت)

02-17-2014 07:34 PM
اوعل تعمل كسرة لانه مافى مسوؤل بجيب خبرا وانت شايف كسراتك لمن اتكسرت وتفتت وتمددت ولاشئ يذكر يقرو بس ويكم كمان يسخروا عموما لا اريد احباطك واصل بقلمك الموجوع نحنا نقرا اذا اكتفينا بهذا سيطول الظلااااااام


#918542 [بت البلد]
1.00/5 (1 صوت)

02-17-2014 07:22 PM
ههه الله يديك العافية يا جبرا انت نسيت انو حكومتنا ذاتا مزوره... يللا كلو من بعضو وكان الله في عوننا


#918477 [محمد جمعة]
5.00/5 (1 صوت)

02-17-2014 06:17 PM
يا أستاذ دي ما عمليات دي لصق للعضو التناسلي ثانياً لا توجد ذكور تم استئصال اعضايها الاعضاء مأخوذة من ضان مذبوح أصلاً.


#918459 [دا كلام ما صاااااح]
4.88/5 (6 صوت)

02-17-2014 06:04 PM
اخونا جبرا .. جبر الله خاطرك
نسيت الجامعات المزورة .. مش مرة الوزارة حذرت اولياء الأمور من الجامعات الغير معترف بها؟

برضو نسيت المعسل المزور المعمول من المولاص

والأدوية المزورة .. وطبعا دى تختلف من المنتهية الصلاحية
اللحم المزور .. مش فى ناس باعوا لحم كلاب قبل كدا ؟؟
اما الشهادات المزورة .. كان فى نموذج حايم فى الراكوبة .. والجامعة لم تتخذ اى موقف
حتى شهادة الثانوى بقت مزورة .. وقبل يومين كانت القصة مكتوبة فى الراكوبة
اما موضوع قروشنا .. وصلت لدرجة انه طالب اساس كان بيصورها تصوير ملون .. واعترف بانه كان بيستعملها لمصاريفه اليومية بس ..
السيناتور الأمريكى مزور .. الملكة النوبية مزورة .. واحفاد العباس ديلك ما عارف الحصل عليهم شنو

والأسلاميين طلعوا ما اسلاميين ولا حاجة
والخبراء الوطنيين طلعوا ما خبراء زاتو


#918435 [komi kuku]
4.00/5 (1 صوت)

02-17-2014 05:43 PM
الشيء الطريف انا مرة اشتريت شيء من والدكان وكان المتبقي لي من صاحب الدكان جنيه واحد رجع لي ورقة بيضاء تماماً قلت ليه دا شنو قال لي جنيه قلت بس قول لي حسه اعرف دا جنيه كيف شنو العلامة او الدليل والاستغراااااااااش كتيييييييييييييييييييييييير


#918431 [العبيدي]
4.50/5 (2 صوت)

02-17-2014 05:40 PM
يا استاذ جبره ولا تستغرش ولا يحزنون، فالناس على "دين" ملوكهم، ومن شابه "شيخه" فما ظلم !!!


#918428 [العبيدي]
1.00/5 (1 صوت)

02-17-2014 05:39 PM
الحاجة أم الإختراع .... ويللا كله تزوير فى تزوير ، والناس على دين ملوكهم ومن شابه "شيخه" فما ظلم
وحتي لو شكلوا لجنة فمحصلتها فول الحاجات والبلح والظروف الغلاد، اما خلاصتها "المرحوم" غلطاااااااان


#918389 [حسين]
3.88/5 (4 صوت)

02-17-2014 05:00 PM
الى متى الزوغان ياعم جبرا بهذه الامور والمواضيع الهامشية؟!!
شد حيلك وانكرب شوية واكتب لينا كلام في المليان وما تخاف على اكل العيش..
الرازق الله..


ردود على حسين
European Union [ودالحاجة] 02-17-2014 09:46 PM
يعني عاوزو يقلبا ليك !! ما كفاية البيعمل فيهو ده .. الراجل ده خلوهو ما تشاغلوهو عندو قلب


#918352 [تمساح الدميرة]
0.00/5 (0 صوت)

02-17-2014 04:21 PM
يا عملك كثر كسراتك الجاى كثير,,, ويمكن تتطور ويكون بدل الكسرة خور.


#918322 [صباع امير]
0.00/5 (0 صوت)

02-17-2014 03:49 PM
- هل الزراعة تمت عن طريق الجراحة أم اللصق وإذا كان اللصق ما هي المادة المستخدمة (أوعا يكون صباع أمير) ! مبالغـــــــــــــــــــــــــة هههههههههههههههههههههههههههه


#918300 [الراصد]
3.00/5 (3 صوت)

02-17-2014 03:31 PM
(( مرضعات مزورات : تم توظيفهن في وظيفة (مرضعات) بدار المايقوما للأطفال فاقدي السند ولم يكونو غير رجال كاملي الرجولة (القصة ما فيها زراعة أعضاء زي النعاج) رجال بي (شنباتم) !...في رأي ان هذا الموضوع قد تم تناوله بصورة خاطئة ومغلوطة...والعمل في دار كالمايقوما يتطلب تعاطف وادارك للدور لايرتبط شرطا بالجندر...المرضع يمكن ان يستعمل (البزازة) المعروفة كما هو المتبع في معظم حالات دار المايقوما...وهي وظيفة يقوم بها الرجل والمرأة..


ردود على الراصد
[ام الحسن] 02-18-2014 06:31 AM
عليك الله بطل الاستهبال راجل شنو البمسك ليهو بزه ويديها لطفل فى خشمو والله اهو ده راجلى جبت منو اربعة وعينى ماوقعت فيو بالغلط ماسك البزه وبرضع فى واحد من عيالو والعجب بالليل انا بصحى مع اول كوراكة لاى واحد من عيالى لكن هو والله لو الشافع بكى الليل كلو مابصحيهو التقول نايم فى اضنينو 000عليك الله الرجال ديل يشوفو ليهم وظيفة تانية غير حكاية الببى ستر دى (مرضعيين) لانو مسألة الامومة دى حصرية على النساء فقط فماتشبكو ساى


#918238 [السوداني]
3.00/5 (2 صوت)

02-17-2014 02:47 PM
انت في زمن الفساد الكيزاني المنسوب زورا لشرع الله
ابتسم


#918182 [sumaya elradi]
3.50/5 (3 صوت)

02-17-2014 02:09 PM
اعمل كسرتك سااااااااااي عداله الا عند رب العداله


#918149 [ود نقد]
4.00/5 (3 صوت)

02-17-2014 01:50 PM
الاخ جبرا..لك التحية والود...بخصوص تعليقكم على اكتشاف (اطباء مزورون)..سيدى الفاضل نظم كل دول العالم مبنية على ان هنالك جهة مخول لها اعطاء شهادة مزاولة المهنة للممارسين لمهنة الطب وعندنا فى السودان ..المجلس الطبى...ثانيا كل الجنسيات غير السودانية التى تمارس الطب فى السودان..صينيون..مصريون...اردنيون...فلسطينيون....الخ ..لابد لهم (حسب انظمة الدول المحترمة) ان يقدموا شهاداتهم للمجلس الطبى السودانى ..وعلى المجلس التاكد من صحتها اولا بعملية تسمى (Primary Source Verification)...اى التاكد من صحة الشهادة من مصدر الشهادة..الكلية..الجامعة....ثم لا بد من تقييم هؤلاء اكاديميا من قبل المجلس الطبى للتاكد من مهاراتهم حتى لو كانت شهاداتهم صحيحة....بعدها تاتى مرحلة منح الترخيص لمزاولة المهنة...وقبلها يسال المجلس الطبى هل نحن نحتاج الى هؤلاء ام لا!!!لكن سيدى الفاضل هذا لا يتم فى السودان اولا لضعف امكانيات المجلس الطبى وثانيا لانه لا يوجد اصلا نظاما مكتوبا بذلك ...والضحايا اولا واخيرا هم المواطنين....هذا بخلاف موضوع الذين يمارسون الدجل الطبى من عشابين وشركات اعشاب والخبير كافور الذى يعيش فى جبال الهملايا....الخ....عندما رفعت الدولة يدها من مجانية العلاج اصبح المواطن هدفا سهلا للمزورين وعندما رفع ايضا اطباؤنا رسوم الكشف فى مجتمع جله من الغلابة اصبح هؤلاء يبحثون عن البدائل.....فيقعون فى فك الاطباء المزورين...والعقوبة ليست رادعة لتردع هؤلاء......وحتى نصل الى درجة الدولة المحترمة عليك صديقى جبرا بالمحافظة على صحتك..حتى لا يسوقك القدر الى ارصفة (اطباء مزورون)..ودامت صحتكم..


#918130 [محمد]
4.00/5 (10 صوت)

02-17-2014 01:26 PM
يا أخوي الناس ديل زوروا الراعي زاتوا كيف ما يزوروا التانيات


#918126 [AHMEDJALAL]
3.00/5 (2 صوت)

02-17-2014 01:24 PM
كتر الكسرات


الفاتح جبرا
 الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة