سعودي يسخر منا !!
01-21-2016 12:24 PM



*ومعه ألف حق ولست غاضباً منه أنا..
*ولا بقية السودانيين يجب أن يغضبوا كذلك..
*والساخر منا هذا هو ناصر القصبي نيابة عن السعوديين..
*القصبي (بتاع) برنامج (أحلى ما طاش)..
*وتصح سخريته نيابة عن العرب أجمعين أيضاً..
*ومبعث السخرية- كالعادة -هو عشقنا للكلام والتنظير والتفلسف..
*فقد أضاع ناصر القصبي (السوداني) من زمنه - وزمن رفيقه السدحان- يوماً كاملاً..
*والسبب حادث مروري بسيط كان يمكن تجاوزه لو قبل الأول عرض الثاني بالتسوية..
*ولكنه عوضاً عن ذلك أصر على أن يأخذ القانون مجراه كما في (الدول المتقدمة)..
*مع ملاحظة أنه كان ينطق كلمة (متقدمة) بالغين كناية عن عقدتنا مع حرف القاف..
*ثم في فعل مناقض لـ(التقدم) هذا يبصق على زجاج نظارته مراراً بغرض تنظيفها..
*ثم لا يبالي بما أصاب صاحبه من (قرف) ارتسم على وجهه..
*ولا أدري ماذا كان سيفعل القصبي إن حضر إلى بلادنا هذه الأيام؟..
*الأيام هذه التي تفاقمت فيها (حالتنا) الكلامية إلى أن صارت (مرضاً مستفحلاً)..
*مرض بات مستشرياً حتى بين المسؤولين الذين من واجبهم (العمل)..
*فما من مسؤول إلا ويريد أن يتكلم اليوم كله دون كلل..
*ثم يظن أن الكلام في حد ذاته هو إنجاز (خداعاً) للناس وصناع القرار..
*سيما إن كان مقترناً باحتفاليات ومهرجانات وبرامج (شو) إعلامي..
*وقد يكون (الفعل) وسط الضجة الكلامية هذه كلها شفخانة من (أوضتين وبرندتين)..
*وحين نُقل إيلا إلى الجزيرة توقعت أن يبدأ بشيئين لا ثالث لهما..
*مهرجان للسياحة والتسوق لا يخلو من (البعيو)..
* وفضائية ستوديو بثها هو ستاد مدني..
*وبالفعل لم يخذلني وفعل الذي توقعته تماماً..
*توقعته من واقع (انجازاته الكلامية) عندما كان والياً على البحر الأحمر..
*ثم بقيت مشكلة مياه الشرب دون حل إلى أن رحل..
*وستبقى مشكلة مشروع الجزيرة دون حل إلى أن يرحل أيضاً..
*فغالب ولاتنا - ومسؤولينا- يهمهم فقط أن يحتفلوا ويبتهجوا و(يتكلموا)..
*و(مرض) عوام الشعب (الكلامي) صار معروفاً ولا يحتاج إلى (نغاش)..
*ويكفي أن ترى (آثاره) حتى في المقابر عند دفن ميت..
*ولكن أن تنتقل العدوى إلى الولاة والوزراء والمسؤولين فهذه هي المصيبة..
*و يا القصبي إليك هذه الهدية (السودانية) المضحكة..
*فليلة مباراة في الدوري المصري تركت مسؤولاً يتحدث في تلفزيوننا القومي..
*وبعد صافرة النهاية عدت فوجدته ما زال يتكلم..
*يتكلم عن ضرورة (ترك الكلام وبدء العمل)..
*و(اسخر يا رجال مِتل ما تبغي!!!).






الصيحة


تعليقات 15 | إهداء 0 | زيارات 7544

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1404774 [سوداني حزين]
0.00/5 (0 صوت)

01-24-2016 02:15 PM
في اكبر فضيحة اليوم في الحصاحيصا في افتتاح مصنع سور للغزل والنسيج وفي حضور البشكير شخصيا.كانت هناك كلمة لضابط في الجيش القطري اخطأ خلالها في ذكر اسم البشكير مرتين(محمد حسن البشير)،صراحة موقف مخجل ومضحك في نفس الوقت

[سوداني حزين]

#1404433 [سناء عبد المنعم]
0.00/5 (0 صوت)

01-23-2016 07:08 PM
عشان كده ما تلوموا العرب وهم بضحكوا منكم وبستهزئوا بيكم لان سكوتكم عليهم هو البخليهم يزيدوا في افتراءهم على السودان والسودانيين لانهم بفسروه جبن مننا واذا ردينا عليهم بتهمونا اننا حساسين اكتر من اللازم ومكبرين الامور وانهم بضحكوا من الناس كلهم وهم في الحقيقة حتى ولو ضحكوا من كل الناس بركزوا علينا نحن في الاصل.
واتذكر في سنة من السنوات قدمت سفارة السودان في الامارات احتجاج على مسلسل اماراتي كوميدي اسمه كان حقك علينا وهو برنامج كاميرا خفية كانوا اساءوا فيه للسودانيين بطريقة بالغة وده كان سبب احتجاج السفارة عليه وكان رد مخرج البرنامج او مؤلفه بكل برود انهم ما قصدوا الاساءة وان الممثل اللي قلد السودانيين لقوه بيجيد اللهجة السودانية عشان كده خلوه يمثل بدور سوداني وهو طلع ما بجيدها ولا شيء واتكلم بطريقة ما بنتكلم بيها نحن السودانيين وكمان كان رده ان دي بس حساسية مننا اننا ردينا، اضف الى ذلك التعليقات والردود اللي كانت في منتدى اماراتي او خليجي كانوا ناقشوا فيه الموضوع ده والناس ردوا ان ما من حقنا نقدم الاحتجاج واننا حساسين اكتر من اللازم و وين الاساءة بالضبط في البرنامج

[سناء عبد المنعم]

#1404377 [كلام جرايد!!]
5.00/5 (1 صوت)

01-23-2016 03:37 PM
ياودعوضه خليك من النضمي الحي!كترت الجرايد دي مو نضمي فارغ ساكت!!!!!! بس في الورق وبنشتريهو كمان!!!!!!!!!الكوره ساكت تسعميه جريده!!!لي فريقين كل واحد اكعب من التاني!!!!!!!!!!!!!!

[كلام جرايد!!]

#1404093 [الدنقلاوي]
4.50/5 (5 صوت)

01-22-2016 11:42 PM
اعتقد أن ما يتحدث عنه عووضة هو حلقة قديمة من طاش ما طاش بثت في رمضان مضى ولقد شاهدتها وهي تقدم سخرية لطيفة من السودانيين وهم يسخرون حتى من السعوديين قالسوداني ليس مقدس بل هو من أسهل الناس في السخرية منه، وبالأمس في قناة أمريكية كنت أشاهد فلم كرتوني فيهو سخرية من سيدنا المسيح لو حدثت في السودان لكانت جيوش نصرة الأنبياء نصبت خيامها قرب الجامع الكبير وبدأت في العويل المدفوع القيمة، إنها الحرية ولا شيء غيرها أو دونها
أما عووضة فهدفه واضح فهو جعل الموضوع مدخل للسخرية من المسؤولين الما مسؤولين

[الدنقلاوي]

#1403774 [البصيرة ام حمد]
3.00/5 (3 صوت)

01-21-2016 08:22 PM
اسلوب كتابة مزعج يا استاذ عووضة،نجمة جملة نقطة، انت عاوز تنزل رصيد، طريقة كتابة اسحق فضل الله كريهة، لماذا تقلدها.

[البصيرة ام حمد]

#1403769 [سودانية]
5.00/5 (2 صوت)

01-21-2016 08:14 PM
تعرف يااستاذ عشان تصدق انا ذولة حقانية وذولة نصيحة بشكر المصريين في حاجة ومابدسها... المصريين ديل اكتر الشعوب العربية والاسلامية تقدما في حكاية حقوق المرأة وفايتين باقي الجوقة دي مسافة غصبا عن عين اللبنانيين الفاكرين ان حرية المرأة في مياصتها واظهار انوثتها بشكل مقزز...وفي دي ابصم بالعشرة للمصريين واديهم نجمة كمان ...
عارف ليه ؟؟؟؟ مش لانو اخيرا وافقو انو المرأة يمكنها ان تعمل كقاضي لانو المصريين هم السباقين او البايونير في ان يتضمن قانون الاحوال الشخصية الخلللللللللع ونتمني من الباقين ان يلحقو بالركب اسرع لانو في الاخر كلو ح يتطبع اقصد ح يخلعن ...اتمني ان لانكون اخر المخلعنيين اسوة باننا كنا اخر المطبعين مع اسرائيل لكن للاسف اسرائيل قفلت اوكازيون التطبيع وقالت خلاس جبرنا والبضاعة شطبت عشان كده بقولو علينا كسلانين وبنجرجر كرعينا وبنجي بعد الحفلة ماتنتهي

[سودانية]

ردود على سودانية
European Union [سودانية] 01-23-2016 02:41 PM
اللدرع انت عايز تصادر حرية التعليق وفي الراكوبة كمان ...شوف قوة العين عايز تخت لينا استاندر للتعليقات وجوة راكوبتنا كمان ...عمليتك ماظريفة وحركتك جبانة

European Union [اللدرع] 01-22-2016 09:04 PM
طبعا الفهم قسم ومستويات.والناس مقسمة لأنواع مش نوعين وفقا لذلك . انتى غردتى خارج السرب بتعليق احسبه لايمت إلى المقال بصلة وذلك بعد مطالعة التعليقات يا اختى .

European Union [سودانية] 01-22-2016 03:02 PM
والله ياخوي الفهم مستويات وقسم ...عشان كده ربنا مقسم الناس لنوعين اولي الالباب وناس تانيين فهمهم طاشي شبكة ساكت

European Union [اللدرع] 01-22-2016 02:03 PM
يا زولة انتى راميك جمل..
الزول دا بتكلم فى شنو وانتى فى شنو.


#1403725 [د. هشام]
5.00/5 (1 صوت)

01-21-2016 05:57 PM
(يتكلم عن ضرورة ترك الكلام وبدء العمل)..ذكرني قولك هذا بظهور بعض محبي الكلام-أي كلام-بعد إنتهاء الصلاة بالمساجد...أنبرى أحد هؤلاء، في يوم من الأيام، بمسجد من المساجد، ليحدثنا عن الخشوع في الصلاة...و كان هنالك مسبوقون لم يكملوا صلاتهم بعد...قلتُ له: إنك بحديثك هذا تشتت إنتباه المسبوقين الذين يكملون صلاتهم...لم يعجب قولي الكثيرين وخاصة المتحدث الجهبوذ !!!

[د. هشام]

#1403722 [ودا العوض]
0.00/5 (0 صوت)

01-21-2016 05:46 PM
والله ياباشا لم نفهم شيئا من مقالك اذا سميته مقالا لكنك تربط شخصيات سعودية ومسلسل سعودي وتسقطه للأشارة للمزك الكريه ضد المسئولين وفي انصراقية كاملة لانفاق اصيل لديك حول النقد والأعتراض نفاقا علي الأوضاع ولابد الأكيد المؤكد ان تتحفنا بوطنك الأول مصر سلوكا واخلاقا واقتداء فتفتخر أنت بأنك حاورت بني جلدتك وشاهدت بني جلدتك وتمثلت ببني جلدتك مصر انك مريض بحب وطنك ويا خيبتك ونحن مرضي بحب السودان فلاتفتح عليك ابوابا لن تقدر انت ومعك كل احبابك ان تردوها لأن ثقافتنا غير ومنطلقنا غير فهو سوداني نبعا وعقلا وفكرا لاتمثيل فيه ولا لمز ولا ثقافة يامصري

[ودا العوض]

#1403721 [تاجر في سوق اللخوان]
0.00/5 (0 صوت)

01-21-2016 05:21 PM
معليش
انابة وليس نيابة

تثقفوا يا صحفيو آخر الزمن والله تلانقاذ ليها الف حق تكتم نفسنا اكتر من كدي

[تاجر في سوق اللخوان]

ردود على تاجر في سوق اللخوان
[مشتري في سوق اللغة] 01-21-2016 09:00 PM
معليش انت يا التاجر ، كلمة نيابة صحيحة وما تسخر تاني قبل ما تستوثق

[mahmoudjadeed] 01-21-2016 08:45 PM
يا صحفيي وليس صحفيو يا مثقف انت .


#1403718 [ودالفاضل]
5.00/5 (2 صوت)

01-21-2016 05:19 PM
فليلة مباراة في ( الدوري المصري )تركت مسؤولاً يتحدث في تلفزيوننا القومي.. !!!!!!!!!!!!!
ولماذا الدوري المصري بالذات , اعتقد ان هذه الجمله ليست ذات معني فكان من الاحري ان تقول ,في ليلة مباراة في الدوري الإنجليزي او الاسباني او جتي السوداني كانت مقبوله بعض الشئ ولكن لماذا في الدوري المصري .

[ودالفاضل]

#1403672 [سوقني بعجلة]
0.00/5 (0 صوت)

01-21-2016 03:34 PM
صدقت يا عووضة
افتنا الكلام والتنظير,الكلام الفارغ
فقط قارن بين الحروف التي فرمها البشير في متاهة جولاته واكاذيبه
وبين ما قاله الرؤوساء الافارقة
تجد ان بشيرنا يتفوق عليهم
اغاني واغاني وكلام وكلام
الحوار الخوار والنتيجة المحتومة زيرو
ومرسلين مجموعة عشان يبشرو اهل الخارج
حتي حركاتنا المصلحة خلت السلاح
وقامت علي النضمي
نضمي انترناشونال

[سوقني بعجلة]

#1403667 [لون النيل]
5.00/5 (2 صوت)

01-21-2016 03:16 PM
لماذا لاتغضب هل ماتت النخوة فيكم ام بكم عرق مصري لن ولم نقبل ان يساء لانا من قبل هذا الحاقد والفاسق الذي يشوه صورة الانسان السوداني بشكل قبيح ومستفز بكل اسف

[لون النيل]

#1403643 [خالبوش]
0.00/5 (0 صوت)

01-21-2016 02:14 PM
كلام الأستاذ صلاح عووضة هذا وسخريته اللاذعة الواجبة على، ويستحقها ولاة أمورنا، ليت الله يجعلها شواكيش ضخمة تسقط على راس ولاة أمورنا فرداً فرداً وتأذيهم أذى كبيراً ...آمين ففعلاً، (فما من مسؤول إلا ويريد أن يتكلم اليوم كله دون كلل..
*ثم يظن أن الكلام في حد ذاته هو إنجاز (خداعاً) للناس وصناع القرار..) المسئول التدميري - أقصد الإنقاذي - يحسب الكلام إنجازاً بعد أن عجز طيلة أكثر من ربع قرن عن إنجاز شيء ملموس.

[خالبوش]

#1403628 [سودانية]
4.25/5 (3 صوت)

01-21-2016 01:42 PM
خليني من حركات جبر الخواطر دي ...
سخرية المصريين دي مدورة فينا من زمن الاتراك وعلي قلبك زي العسل هي جات بس علي سخرية ناس طاش ماطاش ليوم واحد ضيعوا لكن في الاخر السوداني مشا حرامو ...علي الحرام تعملو التامين وعملو التامين اسوة بالدول المتقدمة ...ومن يسخر اخيرا يسخر كتيرا
ناس طاش بتريقو علي كلو هنود مصريين سودانيين سعوديين لكن انت ياعووضة اخيرلك تبطل شغل الخيار والفقوس لانو كترتها وبعد ده بجيب ليها شبهة عمالة ...اها اديتك النصيحة كان ترضي كان تزعل

[سودانية]

#1403622 [زول..]
3.82/5 (5 صوت)

01-21-2016 01:39 PM
ياخي شوية كدي خلي عندك غيرة على بلدك وبني جلدتك.....!!

ومن يكون ناصر...؟؟ حتة ممثل هزلي درج على تقديم دراما فطيرة لا تقدم ولا تؤخر حتى على نطاق مجتمعه.

[زول..]

صلاح عووضة ‎
صلاح عووضة ‎

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة