المقالات
السياسة
نشرة أخبار الجزيرة
نشرة أخبار الجزيرة
02-20-2014 01:27 AM


صمنا عن الكلام في الجزيرة المروية لعدة اسابيع لاننا غرقانين في داخلها لقد انشغلنا بحصاد البصل وقد كان الإنبات من ابدع ما يكون وسار الامر على ما يرام ولكن ما إن وصلنا مرحلة الحصاد و للاسف الشديد وكعادة اي منتج زراعي في الجزيرة الا والاسعار (دقت الدلجة) وبالسعر الجاري اليوم سيكون البصل خسران خسران ووقع الخسارة لن يكون على المزارع وحده بل على الشركاء في الزراعة فهؤلاء لهم خمسة اشهر في انتظار ساعة البيع لخصم التكلفة وتوزيع الارباح وبما أن التكلفة من تحضير ارض وتقاوي ومبيدات وسماد وجوالات سوف تأخذ كل عائد البيع فإن كل العمليات الفلاحية من سقاية وحش وحصاد سوف تذهب ادراج الرياح فأسعار اليوم اقل من مائتي جنيه للاردب هذا الاردب الذي فاق الالف في وقت الندرة وكان سعره قبل اسبوعين فقط خمسمائة جنيه.
ما حدث للبصل قد حدث للكسبرة فقد هبط قنطارها من الف لخمسمائة وما زال النزول جاريا وان كانت الكسبرة احسن من بصل الخريف لسهولة تخزينها بيد أن المزارعين وشركاءهم في حاجة ماسة الآن لأي قرش. عندما سألنا عن اسباب تدني اسعار البصل الى ما دون التكلفة قيل لنا انها حرب الجنوب فجنوب السودان كان المستهلك الاكبر لبصل كسلا ولما لم يجد بصل كسلا طريقه للجنوب انكسر في الخرطوم ولحق بصل الجزيرة امات طه والآن نحن في انتظار الفول السوداني فأسعاره هذه الايام لا بأس بها ولكن عندما يصل موسم الحصاد قمته في الشهر القادم سوف يضرب الدلجة هو الآخر ولكن ما يطمئن بخصوص الفول السوداني أن المزروع منه قليل جدا مقارنة مع العام الماضي كما أن انتاجيته منخفضة فتخيلوا لقد اصبحنا نفرح بتدني الانتاجية ولا حول ولا قوة الا بالله. و نفس المصير ينتظر الطماطم ففي هذه الايام تباع بالكيلو وغدا عندما تظهر طماطم الجزيرة الكيلو سوف تباع بالصفيحة اللهم الا اذا تدنت الانتاجية.
هكذا حظ مزارع الجزيرة يلقى العضمة في الفشفاش، ففي هذا الموسم كانت المياه متوفرة بسبب الامطار وتعلية الرصيرص ولن نبخس ادارة الري حقها فأداؤها هذا العام كان احسن مما كان عليه في الاعوام الماضية ولكن هذا لا يجعلنا نكف عن المطالبة بإرجاع الري لوزارة الري وهذه قصة اخرى، المهم في الامر في هذا الموسم تحسن الري ولم تحدث الا اختناقات محدودة ومارس المزارع حريته في زراعة المحصول الذي يريد ليأتي السوق ويلقف كل جهد المزارع المسكين.
المعلوم أن اي زراعة في الدنيا يحكم على نجاحها من فشلها بأمرين الاول الإنبات من البذرة الى الثمرة ثم السوق اي سعرها عند المباع وفي الدول والمجتمعات الزراعية المتطورة يجد المزارع الحماية من السوق بألف وسيلة ووسيلة الا في الجزيرة دوما نزرع اسفنا أو نحصد اسفنا فإما أن تكون مشاكلنا في الإنبات من تعثر في الري أو ارتفاع اسعار مدخلات أو فسادها أو تكون مشاكلنا ساعة التسويق
اما االلمايتسماش أو إن شئت قل سيد الاسم القطن والذي انخفضت المساحة المزروعة به في الجزيرة الى اقل من اربعين الف فدان بعد أن كانت في يوم من الايام خمسمائة الف فدان وهذه المساحة المزروعة في الجزيرة قد شهدت نوعين تقليدي ومحور وراثيا فستكون له معنا وقفة خاصة ولكن كقيدومة كدا اقول لكم إن القطن المحور وراثيا هذا الموسم نجح نجاحا كبيرا في الجزيرة وسيكون متوسط انتاجية الفدان مذهلا ولكن تبقى مشكلة العضمة المزروعة في فشفاش الجزيرة ولنا عودة لهذا إن شاء الله.
السوداني


تعليقات 11 | إهداء 0 | زيارات 3546

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#922373 [عثمان خلف الله]
0.00/5 (0 صوت)

02-21-2014 08:15 PM
لو الحكومه دولار الصادر نفس دولار السوق الاسود كان البصل ده كلو وصل الخليج
الحكومه تستفيد والمصدر يستفيد وكذلك المزارع
كده البضل يعفن فى مكانو ويكون حسرة على الكل
لازم الحكومه تتخذ قرار شجاع وتخلى اى سودانى يحول دولار الصادر فى المكان اللى يريحو بعد شويه الناس ما حايلقو مكان يودو دولارتهم ليهو الا الحكومه


#922289 [حسبو العوض ود السديرة]
0.00/5 (0 صوت)

02-21-2014 06:13 PM
في الجزيرة نزرع قطنا نزرع نتيرب نحقق املنا...بروف البوني لك التحية...لاسبيل لمزارع الجزيرة في الخروج من ورطته التي ادخلتها له حكومة الانقاذ الا بالرجوع لكل ماهو قديم ابتداءا بعود الدورة الرباعية والتوسع في زراعة القطن ، لان القمح بالعربي كدا المناخ غير ملائم اللهم الا ضربات حظ بس ، اما الفول والبصل فهي محاصيل معروفة في المشروع ولكن اظن الكسبرة وغيرها دخيلة علي مشروعنا ، وقبل كل شئ لابد من عودة نمط الادارة القديم لانه اثبت نجاحه عبر السنين ولاننسي عودة الهندسة الزراعية وملحقاتها لاننا وباختصار فقدنا الثقة في النهضة الزراعية وماشابهها من خزعبلات سياسية.


#922267 [abu muzan]
0.00/5 (0 صوت)

02-21-2014 05:50 PM
يا البونى المصيبة فى الزراعة عدم التخطيط السليم من المزارعين السنة الفاتت الناس غنت من البصل كلهم زرعوا بصل عشان يغنوا
اها خموا وصروا ابيتوا تزرعوا القطن اها القطن نجح وعاملين فيها بروفات وينوا علمكم
وقلت الري السنة دى كويس عشان كراكاتك شغالةومن ما اشتغلت سكت وكمان محتج على الضرائب
يا اخى احمد الله
كتاباتك ما تسخرا لى مصلحتك الشخصية ( دبيب فى خشموا جراداية ما بعضي )


#921394 [ابو الشيخ]
5.00/5 (1 صوت)

02-20-2014 05:26 PM
الفرحانين بخسارة مزارع البصل ديل يا بونى حناكيش بندر ومتشعلقى سياسه وما عندهم بعد نظر ويؤمنون بالمثل البقول بيع البصل بما حصل وما عارفين انو المزارع ده السنه الجايه حيزرع ليكم نيم عشان تاكلوا نيم ولا تاكلو حمت ربت مع تأكدى التام انكم ما بتعرفوا ( الحمت ربت )

قبال ما تخش فى موضوع القطن هاك دى

انا زارع قطن يا خوى وانتاجى الحمد لله وكمان محوًر الناس ديل وردنا ليهم ما يسدد تمويلهم وزياده وبالاسعار القالوها براهم باقى القطن ده حقى ولً ما حقى

القطن قطنى زرعته وحدى وحصدته وحدى ( مش قانون 2005 سيىء الذكر بيقول كده !!!) السبب البخلينى أورد قطنى لى حرامية شركة الاقطان شنو ؟؟!!!!!!


#921254 [عبد الله]
5.00/5 (1 صوت)

02-20-2014 02:57 PM
المزارع الذى يزرع ويتعب وينتظر شهورا وعندها يسوق محصولة يخسر اليس هو مواطن غلبان ؟؟؟
وكيف سيزرع العام القادم عشان تاكلو ؟؟؟
الجهل مصيبة غايتو


#921239 [MORIS]
0.00/5 (0 صوت)

02-20-2014 02:40 PM
ان شاء الله يبقي ببلاش
انت زعلان علي التجارة ول زعلان عشان البصل رخص والمواطن بقدر اعمل حلة سخينة لو ما عندو قروش بما انو الفول رخيص والبصل رخيص والطماطم رخيصة

ان شاء الله بركة الهي ومولاي تفقرو ما تغنو كلو كلو
كان البصل ول الفول دق الدلجة انت زعلان؟؟؟ التجارة ان شاء الله خسرانة كلها...


#921045 [جبل البركل]
5.00/5 (1 صوت)

02-20-2014 12:06 PM
افتنا يا بوني وادل برائيك في الاحتلال المصري لحلايب وتحويل حلايب الي مدينه وخلينا من الخزعبلات ,,العلاقات الازليه ونحن شعب واحد وابناء النيل ,, خليك راجل واكتب لتنصف اهل بلدك السودان ولو مره في حياتك يا بوني


#920749 [أبوأسامة المهاجر]
0.00/5 (0 صوت)

02-20-2014 08:44 AM
للأسف خبراءانا الإقتصاديين وحكومة السجم دي وجودهم مثل عدم وجودهم

معلوم أن كثير من المنتجات الزراعية مثل الخضروات والفاكهة لها سوق كبير في الخليج والسعودية على وجه الخصوص وأغلب هذه المنتجات تستورد من سوريا وتركيا وقد إرتفعت أسعارها بسبب الحرب في سوريا وزيادة تكلفة الإستيراد من تركيا التي تمر منتجاتها عبر سوريا إلى الخليج

بالمختصر المفيد توجد فرصة ذهبية لتنشيط تصدير الفواكه والخضروات لكن للأسف لاتوجد صناعة تغليف ولا بنى مواعين تخزين بالسودان

الأوطان تبنى ببنيها لذا أدعو من هنا المغتربين لتكوين شركة مساهمة عامة للعمل في مجال التصدير حتى يستفيد أهلنا المزارعين من زراعتهم فهذه الحكومة لا خير فيها ولا أمل


#920681 [شمال و جنوب فى محنة]
0.00/5 (0 صوت)

02-20-2014 06:22 AM
الاسواق العالمية فكنا من الجنوب فتح الجنوب قفل هو الجنوب فرقو مننا شنو التطوير في التغليف و فتح الاسواق الخليجية و لومنى كان ما سمعنا الحاج حج و جا شراب البيرة ما خلا


#920651 [ياسر عبد الوهاب]
0.00/5 (0 صوت)

02-20-2014 02:44 AM
كاتب مثلك كان يجب ان يتباكي علي هموم الوطن لا سعر البصل...
هبوط الاسعار رحمة للمواطن الغلبان لا لاصحاب حواشات البوني...
إختشي يا ديك تور


#920632 [صادميم]
0.00/5 (0 صوت)

02-20-2014 02:14 AM
قال المتنبئ مصائب قوم عند قوم فوائد فالحمد لله رخص البصل و الطماطم اما الفول السوداني فمبروك عليكم مزمزوا بي براكم.


د.عبد اللطيف البوني
 د.عبد اللطيف البوني

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة