المقالات
السياسة
تسريب قائمة ضباط بجهاز الأمن محالين للتقاعد يعتبر جريمة
تسريب قائمة ضباط بجهاز الأمن محالين للتقاعد يعتبر جريمة
02-20-2014 11:05 AM


ورد فى مقال نشر على الراكوبة صباح اليوم أن البشير يطيح بقائمة مكونة من 68 ضابط عظيم بجهاز الأمن لإرتباطهم بعلى عثمان محمد طه وصدرت قائمة بالأسماء ودا أمر خطير جدا لو كان صحيح
فجهاز الإستخبارات الأمريكية المحترم ( السي أي أيه ) يعاقب بالسجن والطرد من الخدمة أى مسئول يتسبب فى كشف إسم عميل عادى من عملائه ناهيك عن إسم برتبة فريق أو لواء أو حتى ملازم ثانى
اللى حصل دا فضيحة بجلاجل تجعل كل ضابط بجهاز الأمن السودانى من رتبة فريق أول لرتبة ملازم ثانى أو مجند عادى بجهاز الأمن يعيد حساباته ويقدم إستقالته لأن المحاسبة آتية وكشف خطير زى الكشف المنشور دا يشكل بيان إدانة لصاحبه
ياترى لمان إنكشف أمرهم حيمشوا بين الناس كيف - بيمشوا بيوت العزاء ويرفعوا الفاتحة كيف - بيدخلوا صالات الأفراح ويشاركوا الناس كيف
أنا أطالب كل الشعب السودانى أن تنزع الجنسية السودانية من كل هذه القائمة والقوائم التى لم تكشف
تخيل 68 بهذه الرتب ديل جماعة على عثمان
وين كشف جماعة نافع
وين كشف جماعة قوش
وين كشف جماعة عوض الجاز
وين كشف جماعة أسامة عبد الله
وين كشف جماعة كمال عبد اللطيف
ووين ووين ووين
دى مش دولة مؤسسات دى دولة أفراد دى لبننة جديدة ويا حليل السودان وزمان السودان ورجال السودان
تخيلوا حسين خوجلى أمس صلح كلامه وقال نحن مش ضد ياسر عرمان - الظاهر سمع كلامى لمان قلت ليهو أعمل حسابك عرمان دا قد يأتى والى لولاية الخرطوم ولو الحلو وعقار قالوا يا عرمان والى للخرطوم يا صلح بلاش الريس حيوافق
وياسر عرمان لمان يجى والى برضو حيعمل جماعته فى جهاز الأمن وحيكون عندنا جماعة عقار وجماعة الحلو وجماعة عرمان
ولمان نحل مشكلتنا مع الجبهة الثورية
حيكون عندنا فى جهاز الأمن جماعة جبريل
وجماعة مناوى
وجماعة عبد الواحد
ومافيش حد أفضل من حد
السودان دا بقى كيمان مراره
وكل زول عنده كوم إلا نحن غالبية أهل السودان من الغبش العاديين
ولو عاوزين تحلوا مشكلة السودان بشكل نهائى - الحل كما يلى
يخرج البشير وجماعته نهائيا وكل من شاركه من أحزاب حكومة القاعدة العريضة
يستثنى دخول أى فرد من قطاع الشمال ولا الجبهة الثورية
نمشى المقابر نأخذ عينات دى أن أيه من رفات الأزهرى والحسين الهندى وزروق وحسن عوض الله ونصر الدين السيد ومحمد نورالدين والمحجوب ونستنسخ رجال جدد يعيدوها سيرتها الأولى أما بالرجال القدام عيونى ديل مافى أمل - مو السودان دا أخير تبيعوهو وتوزعوا حقه على كل سودانى يحمل جنسية سودانى بالميلاد أو التجنس - خلاص ربع قرن من حكم الإنقاذ قطع الأمل وإحالة 68 ضابط عظيم فى الجهاز للشك فى تبعيتهم لعلى عثمان يدق ناقوس الخطر أن الضابط العظيم لم يعين خدمة للوطن والمواطن ولكن خدمة لمسئول والخطير فى الموضوع أن بقية الضباط العظام والصغار اللى فضلوا فى الجهاز مش ضباط جهاز أمن الوطن والمواطن ولكنهم جماعة البشير وبكرى ومؤيديهم ويمكن حسبو تكون عنده جماعته وغندور ليهو جماعته والخضر ليهو جماعته ودا يدق ناقوس الخطر يعنى المليارات الكثيرة التى صرفت من عرق ودم محمد أحمد دافع الضريبة لم تؤسس لجهاز أمن وطن ومواطن ولكنه جهاز أمن على عثمان وجهاز نافع وجهاز قوش وجهاز البشير وجهاز بكرى وجهاز عبد الرحيم وما عارف دكتور غازى والحاج ساطور عملوا ليهم فرع فيهو - ياجماعة والله نحن كنا نعلم منذ سنوات أن الجهاز ليس جهاز أمن وطنى ولكنه جهاز أمن لافراد وأهو الكوك يبان عند المخاضة - هسع دى قائمة جهاز أمن على عثمان والشعب السودانى يريد أن يتعرف على قوائم قوش والجاز ونافع والفضل لى الرئيس منو
الشعب السودانى تعود أن يحترم العظماء من أيام المهدى وود حبوبة والماظ والأزهرى والهندى فمتى يعود مسلسل العظماء لقيادة السودان وحتى يحدث ذلك المستحيل فكل مواطن سودانى يطالب بفتح فرع له بجهاز الأمن عشان يحميه ومافيش حد أحسن من حد وكلنا ولاد تسعة
[email protected]


تعليقات 12 | إهداء 0 | زيارات 8986

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#922495 [Bad boy]
0.00/5 (0 صوت)

02-21-2014 11:44 PM
فليذهب كلهم في مزبلة التاريخ


#922182 [كاسترو عبدالحميد]
0.00/5 (0 صوت)

02-21-2014 03:45 PM
اللهم لا شماتة في هؤلاء الضباط . فعلا كيف يقابلون الناس بعد ما انكشف سرهم . وكيف يتعامل اولادهم وعائلاتهم مع الناس . ياللعار يا للعار ربنا يمهل ولا يهمل ولعذاب الآخرة اكبر لو كانوا يعلمون .


#921981 [ابو مرام]
5.00/5 (2 صوت)

02-21-2014 11:56 AM
يا باشمهندس ذى ما قال احد المعلقين هؤلاء ضباط معروفون وليسوا عملاء سريون حتى لا تكشف اسماؤهم العملاء السريون لا احد يعرفهم حتى فى جهاز الامن السودانى وبعدين منو القال كل شغل الامن قتل وتعذيب وهلمجرا هذه وحدات متخصصة على ما اعتقد وغالبية شغل الامن عمل اخر تماما فليس كل منتسب للامن مجرم بهذه السطحية التى ذكرتها ارجو من كل من يتصدى للكتابة فى الشان العام ان يكون ملما بشىء من الثقافة فى كل مجال ولا يفضح نفسه هكذا ولا انت بتكتب على حسب طلب السوق وبس!!!!!


ردود على ابو مرام
European Union [koko] 02-22-2014 09:45 AM
انت لاتعلم الحكم فيمن يتجسس على المسلمين فحكمه فى الاسلام القتل ولو جاء تائباً كحكم الزانى المحصن لان الدين من سماحته جعل ان لايؤخذ الناس بالشبهبات فهم لايعملون خارج السودان وانما وسط المسلمين لحماية نظام فاسد على قمة الكذب والنفاق والادعاء الفارق لايؤيده الااصحاب المصلحة او المغفلين


#921906 [إسماعيل آدم]
5.00/5 (1 صوت)

02-21-2014 10:06 AM
ده كلام ما معقول أبداً- ياخي جهاز الأمن ده ما بتاع الشعب السوداني و لا يمثلهو ،ما ممكن تقارنوا بالسي أي أ الأمريكية -ديل كلهم إخوان مسلمين و كلهم تابعين لعلي و قوش و ألحس كوعك و...
و طبعاً لما يحدث أي تغيير ستتم محاسبتهم علي جرائمهم، هذا إن ظلوا أحياء فهم كما تعرف خبراء في التصفية و الإغتيالات و التعذيب و بيوت الأشباح. و لا يعملون بأي مهنية ولا نحتاج لدليل إذ أن السودان الآن مخترق و إسرائيل تسرح و تمرح و يمكنها إختطاف أي واحد منكم و يكون في علمك -إسرائيل
و غيرها من الدول لديها عملاء و لو قاعد تقرأ ، فقد تم تشبيه الخرطوم بأنها مثل هانوي من حيث أعداد أفراد المخابرات الأجنبية و ده في أوائل السبعينات من القرن الماضي!و بصراحة الآن في السودان لا نشعر بأن المؤسسات الموجوده تمثلنا أو تشبهنا - كلها أي مؤسسة كلها مليئة بالمحاسيب و عديمي الخبرة- هل تعلم بأن شركات البترول تلاث أرباع العاملين بتاعين أمن؟ و أنهم يتمتعون بإمتيازات أفضل من الخبراء!


#921759 [تمر الفكى]
0.00/5 (0 صوت)

02-21-2014 02:35 AM
اقتباس "نمشى المقابر نأخذ عينات دى أن أيه من رفات الأزهرى والحسين الهندى وزروق وحسن عوض الله ونصر الدين السيد ومحمد نورالدين والمحجوب"

الازهرى ماسورة كبيرة كتل المزارعين فى جودة(1953) و الفلاتة امبررو رغم صلة الدم التى تربطه بهم فى النيل الازرق(1954) من اجل اصوات الانتخابات.


#921458 [ياسر عبد الوهاب]
5.00/5 (1 صوت)

02-20-2014 06:34 PM
يا ربي راس السوط وصل منو!!!!؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


#921272 [انصاري]
0.00/5 (0 صوت)

02-20-2014 03:15 PM
إحالة 68 من أنصار علي عثمان بجهاز الأمن بينهم 3 برتبة فريق و 14 برتبة لواء

1- الفريق عبدالقادر يوسف نائب المدير العام للامن الوطني
2- الفريق الأمين دفع الله مدير العمليات
3- الفريق محمد الفضل
4- اللواء محمد جودة دفع الله
5- اللواء علي ( عادل ) حسن
6- اللواء علي محمد علي
7- اللواء محمد جمال الدين
8- اللواء أيمن عواض
9- اللواء خالد يس
10- اللواء ابراهيم محمد ( كهرباء )
11- اللواء أيوب المرضي
12- اللواء مصطفى يعقوب
13- اللواء يحي محمد القرشي
14- اللواء عيسى يحي ( تلس )
15- اللواء نصرالدين قسم عقيد
16- اللواء مأمون أحمد عباس
17- اللواء عاطف عبدالقادر
18- العميد عبدالله أحمد
19- العميد محمد عبدالرحمن محمد
20- العميد عاطف علي الله
21- العميد مبارك عثمان بشير
22- العميد حاكم حسن دراج
23- العميد عبدالمطلب مصطفى
24- العميد الجزولي محمد الجزولي
25- العميد يحي بكري حمدان
26- العميد عبدالعظيم صالح أحمد
27- العميد الطاهر الحاج محمد
28- العميد الأمين المرضي علي
29- العميد هاشم منصور خليل
30- العميد نجم الدين أحمد عثمان
31- العميد محمد عباس محمد
32- العقيد أبوالقاسم محمد أبوالقاسم
33- العقيد فخرالدين ابراهيم
34- العقيد مجاهد حسن سليمان
35- العقيد عمادالدين نصر محمد
36- العقيد ياسر عوض عبدالعزيز
37- العقيد يوسف عبدالله عيسي
38- المقدم عباس البدري أحمد
39- المقدم راضي الفكي أبو
40- المقدم عمار عبدالكريم
41- المقدم جعفر عبدالصادق
42- المقدم حبيب محمد أسحق
43- المقدم جعفر عبدالمجيد
44- المقدم عثمان مساعد سليمان
45- المقدم بشير دفع الله
46- المقدم ادريس حمزة يوسف
47- الرائد صديق محمد الفكي
48- الرائد مدثر يوسف العوض
49- الرائد عبدالله موسي ادم
50- الرائد فتح الرحمن نصر
51- الرائد هيثم فضل أحمد
52- الرائد خالد صديق
53- الرائد صالح أبوالحسن
54- الرائد عماد علي محمود
55- الرائد ادم بخيت ادم
56- الرائد عباس علي محمد
57- الرائد حسن ابراهيم
58- الرائد عبدالله عبدالقادر
59- الرائد بكري عبدالوهاب
60- النقيب أيمن دياب
61- النقيب وليد محمد أحمد
62- النقيب هاجر محمدالحسن أحمد البشير
63- النقيب عبدالفتاح عثمان
64- النقيب ياسر مدثر
65- النقيب طارق حسن
66- ملازم أول رامي عبدالله
67- الملازم هاشم الزين أحمد
68- الملازم السماني


أحال جهاز أمن نظام الخرطوم عدداً غير مسبوق في تاريخه من الضباط إلى المعاش و الصالح العام، و قد شملت الإحالة ثلاثة (3) من الضباط برتبة فريق، و (14) ضابطاً برتبة لواء، و (14) ضابطاً برتبة عميد، و (6) ضباط برتبة عقيد، و (9) ضباط برتبة مقدم، و (13) ضابطاً برتبة رائد، و (6) ضباط برتبة نقيب، و ضابطاً واحداً برتبة ملازم أول، و ضابطين برتبة ملازم.
و ترى مصادر قريبة لمواقع إتخاذ القرار أن الإستغاء عن هذا العدد الضخم من الضباط من جهاز في درجة حساسية جهاز الأمن لا يمكن تصوره إلا في إطار الصراع الداخلي في المؤتمر الوطني الذي ترتّب عليه إزاحة أعمدة النظام أمثال على عثمان، و نافع علي نافع، و عوض الجاز، و أسامة عبدالله، و “البكاي” كمال عبداللطيف، و غيرهم من مواقعهم المتقدمة في أجهزة الدولة و الحزب. و تقول المصادر ذاتها إن جلّ الذين إحيلوا إلى التقاعد أو الصالح العام في هذا الكشف هم من أنصار النائب الأول السابق للرئيس، و نسبة معتبرة منهم من إثنيته و لا شماتة. فنار العنصرية تأكل نفسها إن لم تجد ما تأكله، و البتسوي كريت في القرض تلقاه في جلدها.


ردود على انصاري
[sasa] 02-20-2014 05:07 PM
اقتباس (((( أحال جهاز أمن نظام الخرطوم عدداً غير مسبوق في تاريخه ))))

اى تاريخ ؟؟؟؟؟ تاريخ اغتصاب رجال ونساء السودان؟؟؟!!!!

تاريخ قتل واغتيال الشرفاء المطالبين بحقهم فى ثروة وادارة البلاد بحكم جنسيتهم؟؟؟؟

تاريخ ضياع حلايب والفشقة وابورماد وشلاتين والتعدى على الحدود مع الاريتريين وافريقيا الوسطى ؟؟؟؟

التاريخ الاسود الفاشل القذر .... لاتفقع مرارتنا اكثر ارحمنا الله يرحمك


#921181 [المتجهجه بسبب الانفصال]
5.00/5 (1 صوت)

02-20-2014 01:43 PM
بكرة حا تلقوهم في الكرين ومكاتب العقارات ودكاكين الجملة وميناء بورتسودان ،،، نقيب استقال من الامن سنة 99 مكافأتو كانت 65 مليون وفي نفس الفترة دكتور استقال كانت مخصصات مكافأتو 7 مليون رغم طول الخدمة ،،،


#921130 [osama dai elnaiem]
3.50/5 (3 صوت)

02-20-2014 12:57 PM
ياباشمهندس لك التحية والتقدير---- انت لا تستبين النصح الا ضحي الغد قايلك خلي الحبوب جنبك كما يفعل اخونا جبرة وتنقل بين القنوات ولا تسمع كثيرا لحسين خوجلي حتي لو كان كلامه صاح زي كلامه عن الباصات( الطواجن) الجايه لحرق ما تبقي من الاهل الغبش في السودان وبعدين لا حظ الباصات لازم يعدلوا ليها الشوارع عشان تاخذ اللفه علما بان المبلغ الاصلي المدفوع يجيب باصات جديدة علي الزيرو بدون تصليح شوارع المهم خلينا في نصيحتي لك وازيدك من الشعر بيت -- الجماعة اللواءات والفرقان هم اهل التمكين والمكنهم قلعهم يعني المعادلة صفرية انت تحرق دمك اذا كان الجماعة تدرجوا في الوظائف وكانت عقيدتهم حماية الوطن وليس حماية دولة ( الجماعة)---- ياخي انت ما بتسمع النصح والمرة الجاية مابنصحك واخليك تركب واحد من الباصات البشر بيها حسين خوجلي وربنا يحفظنا جميعا من كل مكروه ولك التحية.


ردود على osama dai elnaiem
[المهندس سلمان إسماعيل بخيت على] 02-20-2014 03:40 PM
الأستاذ أسامة لك منى الود والحب والتقدير نصائحك مفيده لكن تقول شنو فى شيبة طلق ومابيسمع الكلام ياريت تعرفت عليك فى صباى ما كنت ببارى محطات المرض والوجع
وجعونا يا أسامه وكرهونا فى السودان أجمل بلاد الله والله ديل مفروض يجتمعوا كلهم بى شيخهم ويقرروا إنتحار جماعى بعد أن يصدروا قرار إعتذار للأمة السودانية عن كل مافعلوه به
شكرا وسأجتهد فى سماع النصيحة الطيبة
متعك الله بالصحة والعافية والظاهر عليك بتكرههم أكتر منى


#921091 [عصام الجزولى]
5.00/5 (2 صوت)

02-20-2014 12:33 PM
الشعب السودانى شعب عملاق يتقدمه أقزام - الاستاذ محمود محمد طه


ردود على عصام الجزولى
European Union [Sudanese] 02-20-2014 07:17 PM
اقزام دي زمن نميري حسي اقذار (جمع قذر)


#921020 [أحمد عبد الرحيم]
4.75/5 (3 صوت)

02-20-2014 11:51 AM
السيد الكاتب الصحفي ، هولاء كلهم معروفون ، وليس عملاء سريين ،، القانون الأميريكي يحاسب على كشف أسماء العملاء السريين أما هؤلاء فهم ضباط معروفون و لديهم بطاقات تعريف خاصة بهم في جهاز الأمن والمخابرات ،


#920972 [كومى كالو]
4.25/5 (4 صوت)

02-20-2014 11:22 AM
تشبيه غريب بين جهاز أمن الوطنى وبين السى اي ايه الأول تم استيعاب أفراده على أساس الأفراد القبائل والترضيات والأتفاقيات الثنائية والثانى جهاز محترف يهتم بالأمن القومى ولا يستخدم ضد الأمريكيين .الأول أنشى لقمع الشعب لصالح النظام وتكميم الأفواه ومصادرة الحريات والقتل خارج نطاق القانون والحصانة من المحاسبة والثانى أنشى لمصلحة المواطنين الأمريكان أسياد العالم حاملى الجوازات التى ترعد يد من تمده اليه .بأختصار مافى مقارنه


المهندس سلمان إسماعيل بخيت على
المهندس سلمان إسماعيل بخيت على

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة