(كدارة) جديدة
02-24-2014 12:22 PM

زوجتى تشتكى من (صداع نصفى) أو ما يعرف (بالشقيقة) كانت نوبات هذا الصداع تنتابها فيما مضى بين الحين والآخر إلا أنها أخيراً قد زادت شوية مما إضطرنى لسؤال عدد من أصدقائى (الأطباء) الذين أجمع عدد كبير منهم على ضرورة عرضها على الأخصائى (س) الذى برع فى معالجة مثل هذه الحالات.
بصعوبة بالغة إستطعت أن أوقف عربتى أمام (المجمع) الذى به عيادة الدكتور(س) وبصعوبة بالغة أيضاً إستطعت أن أوصل إلى (التربيزة الحديدية البالية) التى يجلس عليها (شاب) يقوم بتسجيل أسماء المرضى والذى نظر إليّ قائلاً بعد أن قام بأخذ البيانات :
- خمسين يا استاذ
فأدخلت يدي في جيبي وقمت بتسليمه الخمسين ألف كما طلب إلا أنه فاجأني قائلاً :
- ده شنو يا أستاذ؟
- دي ما الستين بتاعت الكشف القلتا عليها
- يا استاذ إنتا الظاهر خلطتا الأمور .. ده الرقم بتاعكم يعني دوركم رقم خمسين لكن الكشف بى ميه !
بالطبع كان سؤالى التالى هو عن رقم المريض الموجود داخل غرفة الكشف حيث أخبرنى الشاب بأنه رقم (10) أى أن علينا الإنتظار ريثما يفرغ الدكتور (س) من معاينة ( مريضاً! فكان لابد من الإنتظار ولكن أين ننتظر و(المسرح) مكتمل العدد! مما إضطر بعض المرضى والمرافقين للوقوف!
عدت لسؤال ذلك (الشاب) من جديد :
- هسه يا إبنى التسعة وتلاتين مريض القدامنا ديل ح ينتهوا متين؟
ما بياخدوا كتير يا أستاذ عشان فيهم ناس (مراجعة) ساكت!-
- يعنى ممكن ياخدو زي كم كده؟
- قول زى ساعتين كده
عدت إلى مكانى الذى كنت أقف فيه برفقة زوجتى (المريضة) وأنا أقوم بمحاولة (قسمة) الساعتين (120 دقيقة) على عدد المرضى المتبقين لأجدها (بعد الإستعانة بحاسبة الموبايل) ثلاث دقائق وكم جزء من الثانية! وما أن أخبرت زوجتى بالنتيجة حتى خاطبتنى قائلة :
- والله قالوا ليك الدكتور ده شاطر جنس شطارة الزول قبل ما يفتح خشمو يكون شخّص ليهو حالتو وكتب ليهو الروشتة
هنا فقط عرفت اننى أتمتع بدرجة لا بأس بها من الغباء حيث كنت أعتقد جازماً بأن (الكلفتة) شئ و(الشطارة) شئ تانى إلا أن زوجتنا المصون (شفاها الله) قد أقنعتنى بمقولتها تلك.. فقلت لنفسى والله كلام منطقى يعنى إذا كان (الطبيب) بما أوتى من ذكاء وخبرة يستطيع أن يشخص حالة المريض فى (تلاتة دقائق) ليه (يحتفظ بيهو) عشر دقائق؟
بعد ساعتين تقريباً وبعد أن تجاوزت الساعة (الحادية عشرة ليلاً) جاء دورنا لمقابلة دكتور(س) والذى لدهشتى قد أعطانا من الوقت الكثير الشئ الذى سمح لزوجتى أن تسرد له (تاريخها المرضي) فى إسهاب وبعد أن قام بالكشف عليها قام بكتابة بعض الأدوية والعقاقير لها وخرجنا من (غرفة الكشف) لتزول دهشتى بعد أن وجدت صالة الإنتظار خالية وتأكدت أن زوجتى كانت (آخر المرضى) !
قلت لزوجتى وأنا أجلس على مقود العربة عائدين :
- والله الدكاترة ديل بختهم.. شفتى (النقاطة) دى؟ الولد (ناجى) ده لازم يطلع دكتور!
- دكتور شنو كمان؟انتا ما شفت أنديتنا بقت تسجل اللاعبين بي ملايين الدولارات؟ كدى أغشى السوق قال عاوز ليهو (كدارة) جديدة
كسرة :
والله ما ثورة التأليم دي أحسن ليهو يتمرن إحتمال تظبط معاهو وكده

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و+و؟


تعليقات 17 | إهداء 0 | زيارات 7604

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#926879 [المصباحي]
3.00/5 (2 صوت)

02-26-2014 12:01 PM
اخبار متابعة الرئيس لتوجيهاتو شنووووووووووووووووووووووووووووووو+و+و+و
ده اذا كان في رئيس ومهتم بمتابعة قاضيا البلد .. الشغلة كلها اعلام وحنعمل وحنسوي ووووو رقصة


#926740 [samani]
1.00/5 (1 صوت)

02-26-2014 10:01 AM
هههههه والله شكلك بتلفها... يا استاذ


#926695 [وحيد]
0.00/5 (0 صوت)

02-26-2014 09:24 AM
الدكاترة نوعين: نوع مرزق زي صاحبك ده و هم ما كتيرين و ديل بيلموا القروش و ما بستمتعوا بيها اتخيل مرقة من الصباح لحدي اتناشر بالليل كل يوم! و نوع تاني و هم الشباب و الاغلبية ديل حدث و لا حرج كان لقوا وظيفة يكون همهم يوفروا حق الفول و المواصلات و اكبر احلامهم الواحد يلقى ليهو عقد في السعودية. مسالة الكورة دي ما مضمونة الحكومة بقت تستورد الافارقة و تجنسهم للعب، طيب ليه ما فكرت في السمسرة؟ جلابية و طاقية ملونة و مكتب وسخان و يدور في الخلق مع العقارات المليارية دي السمسار زي المنشار 5% من البائع و 5% من المشتري بدون اي تعب


ردود على وحيد
United States [Khwajaa Sudani] 02-27-2014 10:02 AM
وههههههههههههههههههههههههههههههههههههههههههههه اه اه اه اه


#926349 [aflaiga]
2.00/5 (1 صوت)

02-25-2014 08:09 PM
ههههه
عمنا جبرا مازلت تنكا الوجع بكوندوم من الضحك هههه
تحياتى للمحترف ناجى والمدام كفارةسلامة
خليها تجيب نعناع وتلفوفى طرحى وتبلو شوية وتربطو فى راسا انااالاهو تشفى
هو الصداع الما بجيبو شنو
تحياتى افليقا


#925838 [محمد شرف]
3.50/5 (3 صوت)

02-25-2014 11:15 AM
يا ود جبرة سيبك من الدكترة والكورة وعلم ناجي الكضب ونزلو السوق وانت نوم في البيت بلاش وجع راس وكسرات .


#925337 [على]
0.00/5 (0 صوت)

02-24-2014 10:37 PM
والله كلام زوجتك صاح انا ولدى قبلوه فى احسن جامعات فرنسا فى الطب لانه نجح بامتياز فى البكالوريا الفرنسية لكن من التيرم الاول رفض الكلية بالرغم من نجاحه فى التيرم وجرى الكلية وراهو بعدها وبضغط منى سجل فى كلية الهندسة الخمسة سنين بالنظام الفرنسى واجتاز السنتين الاصعب والبقو فى الكلية عشرة من عشرين وهو كان واحد منهم برضو رفض عايز يعمل الفى راسه وسجل تاريخ اها خلى الولد يعمل العايزوة ويسجل فى برشلونة


#925283 [بت البلد]
4.50/5 (2 صوت)

02-24-2014 09:28 PM
لك التحية أستاذنا جبرا نصيحتي لك عدم أخذ زوجتك لأي طبيب فيما يختص بمرض الشقيقة ... فهذا المرض لا يتم الشفاء منه الا بعد حدوث التغيرات البايولوجية الطبيعية الهرمونية التي تحدث لكل امرأة بعد سن معينة ... وان شاء الله تكون قداقتربت من هذه السن التي لا تحبها المرأة ههه وتقع عليها المقولة داوني بالتي كانت هي الداء ... المهم يا أستاذ عليها بالابتعاد عن أماكن الزحام والسخانة والانفعالات وعدم التفكير في هموم الدنيا وكدارة ناجي وأخذ قرص من التايلنول قبل بداية أو مهاجمةالألم...أي عند الشعور بأنها ستصاب بالصداع ثم الاستلقاء في غرفة هادئة مظلمة ...وربنا يديها العافية ... أها يا أستاذ موضوع الكبر دا معاك كيف هههه...


ردود على بت البلد
United States [بت البلد] 02-26-2014 10:07 AM
السلام عليكم يا أخي وربما تكون ابني ... أولا الحالة النفسية ليها دور كبير في علاج هذا النوع من الصداع لذلك سوف أقوم بتغيير اسمك من حزين جدا الى سعيد جدا... ثانيا هذا الصداع ليست له أي مضاعفات ... ويمكن الحد منه بتجنب أسبابه ومنها:
تجنب التعب والارهاق النفسي (التوتر والقلق)
تجنب الارهاق العقلي والجسدي وقلة فترات النوم وعدم انتظامها
عدم شرب الكحول والتدخين
تجنب عدم الانتظام في الأكل
تجنب التغيير المفاجئ للضغط الجوي وعدم تغييرالتوقيت عند السفر والرحلات (وطبعا دي لايمكنك التحكم فيها)
عدم شم بعض أنواع العطور الزيتية المسببة للحساسية
المحافظة على نسبة الكافين المعتاد تناوله يوميا
عدم التعرض للضوء الساطع والضوضاء والازعاج المستمر حتى ولو كان موسيقى صاخبة
العلاج كما ذكرنا سابقا وأشير الى أنني كنت مصابة بهذا الصداع سابقا والحمد لله تعافيت تماما ... أما بخصوص التايلنول فقد وصفه لي طبيب أمريكي عندما كنت بالولايات المتحدة في مطلع السبعينات... وهناك طريقة أخرى جربتها وكانت ناجحة وهي استعمال مجفف الشعر (سشوار) كنت أضعه في درجة حرارة متوسطة فكان مريح جدا ويساعد على النوم ...
وهناك وصفة بلدية يمكن تجربتها وهي:نقع الزعتر في ماء مغلي بنسبة 10 جرامات زعتر الى 200 جرام من الماء المغلي ويشرب 3 مرات يوميا وبالهنا والشفاء...
كما أنصحك بالمحافظة على الوضوء قبل النوم مع قراءة هذه الآية يوميا وهي (وعنت الوجوه للحي القيوم وقد خاب من حمل ظلما)
أشير الى أن هذا الصداع ليس بالخطير ولكنه طويل الأمد يخف مع التقدم في السن و يتطلب منك أن تحرص على تجنب مسبباته ... وفقك الله وأتمنى لك شفاءا عاجلا ولا شفاء الا شفاءه...

United States [طافش من زمان] 02-26-2014 09:44 AM
الاخ حزين .. شفاك الله .. افضل علاج للشقيقه والصداع هو زيت ابوفاس ... تلقاه فى بقالات الهنود ..تمسح سته نقاط فى الراس وهى .. الصدغين واسفل الاذنين وجانبى الحلق .. وتغطى راسك بقطعه قماش ثقيله .. بعدوربع ساعه ستشعر بالتحسن باذن الله .

[حزين جدا] 02-25-2014 10:42 AM
والله يا بت البلد انا مقيم في السعوديه وعندي الصداع النصفي عذبني شديد خلاص .. من ضمن الادويه الادوني ليها مسكن التايلنول ده والدكتور قال لي لمن تحس بالصداع جاييك استعمل الحبوب طبعا انا مستكر للوصفه دي وكلام الدكتور ده ,اول مرة اسمع بدواء الدكتور يقول ليك تاخدو لمن تحس انو الصداع جاييك .. وحسي سمعت الكلام ده منك .. بس للاسف انا كل المسكنات ما عملت حاجه ولمن يجي الصداع يتفسح فيني زي ما عايز ويتركني في حالة يعلم بها الله .. لو في واحد يعرف علاج بلدي ياريت يورينا ليو


#925175 [julgam]
3.00/5 (1 صوت)

02-24-2014 06:43 PM
الجماعه ديل قاموا جو لميدانك ..ليه ياود جبرا عايز ناجى يلبس كداره ويجى ينزل الميدان الملغم ده؟


#925060 [كوز كنافه]
5.00/5 (3 صوت)

02-24-2014 04:41 PM
خمسه مليون دي قروش ياخ دي ولد اصغر كوز بيتعشي بها سمك في احد المطاعم


#925022 [غلبان]
3.94/5 (5 صوت)

02-24-2014 03:57 PM
لماذا يصر أطباؤنا الأجلاء علي رفع قيمة الكشف في بلد يكابد غالبية أهله مشقة البحث عن لقمة العيش ؟ ؟ و ما يترتب علي سؤ التغذية و الفقر من أمراض !!! في حين أن نصف قيمة كشف الدكتور (س ) يمكن أن توفر له حوالي الخمسين مليون جنيه مقابل عمل عشرين يومآ بالشهر ...


#924960 [الكوز الزنديق]
4.00/5 (1 صوت)

02-24-2014 02:49 PM
يا جبرة ناجي يتمرن وين مع ميدانكم القلعهوا ؟؟؟؟
اخير ليهو يمسك في الطب و لو لقي ليك ميدان فاضي يمارس تمارينو

اهن ميدانكم لو بنوهو و انت قاعد حتعمل شنوووووو؟؟؟

ههههههه


#924937 [هيثم الحلاوي]
4.00/5 (2 صوت)

02-24-2014 02:21 PM
ههههههههه يتمرن وين و الميدان مليانه رمله و خرسانه مرحبا بكم في ثورة التأليم العالي


#924925 [جكسا]
4.50/5 (2 صوت)

02-24-2014 02:10 PM
خمسة مليون في الليلة الواحدة .. عيني باردة .. أحسن ينسي الكدارة و يلعب علي المضمون ..


#924908 [حمدى]
3.75/5 (3 صوت)

02-24-2014 01:49 PM
يااستاذ المرة دى ماعافلة ولا شنو؟
مكريفون وكرفتة وشويت عللعلة على اليمين العداد يصفر فى اول اسبوع
العالم دى عايزالها زول ينومها الساعة 6 صباعا عشان تفوت الفطور والغدا


#924875 [ودالباشا]
4.00/5 (1 صوت)

02-24-2014 01:18 PM
استاذنا جبرا اولا

سفاء الله ام العيال بس طاعت ساخرة اكتر منك والشقيقة دى من شقاء وتعاسة البلد والهموم والغم والغبن المعايش يوماتى
اما الولد ناجى تخليوه يضرب التلاته كفر ووتر اولهم العلم واذا فى اربعة برضو برضو يكابسا ولربما ظبط معاه فى بلد العجائب يا عجيب


#924873 [محمدين]
3.88/5 (5 صوت)

02-24-2014 01:16 PM
الكدارة واشتريتوها ... أها حيلعب بيها في ياتو ميدان!!!


#924851 [osama dai elnaiem]
3.47/5 (6 صوت)

02-24-2014 12:58 PM
ده كلام ياستاذ---- كدارة شنو النتجيب قروش---- خلي ناجي يربي لحية اليوم ويمسح جبهته(بزلطة) عشان غرة الصلاة وبكرة تاخده وتسجلوا اما في المؤتمر الوطني او الشعبي او الاصلاح الان--- يعني الحكومة ما طالعة منهم( الجماعة) وما تنسي تعلمه نغمتهم اياها--- اللهم احفظ ناجي واسرته.


ردود على osama dai elnaiem
[مرقنا... وادسينا تاني] 02-24-2014 05:41 PM
انت أعقل زوول عارف القصة صح ..اما الجبه بيعملوها في سوق العتبة ( القاهرة) بي 5 جنيه عليها ضمان 13 سنة وسبحة هدية كمان فوق البيعه


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة