المقالات
السياسة
عودة نهائية !!!!!!!!!!!
عودة نهائية !!!!!!!!!!!
03-04-2014 10:30 PM

أغرب رسوم في السودان ... رسوم إسمها (علي إفتراض إنو.....)............................!!

بعد عناء دام عدة أسابيع قمت بتخليص عفش شخصي لاحد أبناءنا قادم علي نظام (المغادره النهائيه)....

والقادم علي نظام المغادره النهائيه يسمح له بعدد من الإستثناءت (كتر خير حكومتنا ) وتتمثل في إستثناء عربه (موديل قديم5 سنوات) و2 تلاتجه و2 غساله و2 بوتجاز وعفش منزلي ....
ذهبنا لشئون المغتربين في بورسودان ومعنا البرنت اوت للخروج النهائي وبعد مراجعة سداد الضريبه ومراجعة رسوم الخدمات (لمن راتبه أقل من 1500 ريال) أعطونا خطاب لإدراة جمارك بورتسودن فحواه بان المعني معفي تماما من أي رسوم جمركيه ...

ذهبنا ونحن فرحون بالخطاب ولكن فوجئنا بان الحكومه السنيه التي تعفي المغترب من الرسوم الجمركيه تأخذها بطريقة تحايليه أخري ... ومثال ذلك :

المواني لا تعفيك من رسومها علي إعتبار انك دخلت عبر موانيها (المفروض تدخل بي جيبوتي او ميناء عصب)... لذا لابد ان تدفع 750ج علي العفش الشخصي واكثر من 3 مليون للعربه ..

شركة باعبود التي اخذت رسوم الشحن او ما يعرف بالنولون كاملا في جده لا تعطيك إذن التسليم إلا بعد دفع رسوم (850ج).... وإذا لم تعطيك الشركه هذا الإذن فلن تقوم الجمارك بأي إجراء تجاه عفشك ..

ثم تاتي لمرحلة كشف العفش بواسطة الجمارك بعد دفع رسوم كشف 150 رغم أنك تحمل خطاب إعفاء من جهاز شئون المغتربين ....

ثم تقول بإدخال العربه او الشاحنه التي ستحمل عليها العفش وهناك لابد ان يدفع السائق اللي إنت مؤجره (رسوم دخول) في البوابه ..

بعد دخول الشاحنه تقوم هيئة المواني برفع عفشك في شاحنتك المؤجره مجانا (كتر خيرهم) ماهم شايلين رسوم مواني 750 ج ولكن حتي يتكرم سائق الكرين لأداء عمله الحكومي (لابد من تحفيزه)

أهااا الحمد لله رفعت العفش وخلاص داير تطلع .... ماشي وين يأخ ؟ يجوك ادروبات بصديريات دايرين حق الكله ( والكله هم عمال المواني اليدويين الذين إستغنت المواني عن خدماتهم بعد إدخال الآليات الحديثه)...... أهااا أدينا حقنا ياعمنا ؟

حقكم ياتو ؟ ما حق رفع العفش .....!!

لكن أنا رفعت العفش بالكرين ....أيواا لكن علي إفتراض إنو نحن المفروض ده شغلنا والمواني جابت الكرينات ...

ويبدأ الاخذ والرد والنقه تحت سمع وبصر الشرطه والمواني وفي النهايه (يا عمنا إنت وذوقك ادينا أربعين خمسين أصلو الحكومه فكتنا عكس الهواء)...
ولم ينتهي المسلسل فعند بوابة الخروج يوقفك رجل بذي مدني .... لو سمحت ادفع لينا الضريبه .... الضريبه ياتها ؟ الضريبه حقت الحكومه .... طيب حكومتك ما أعفتني من الجمارك عشان انا جاي خروج نهائي ... يعني المطلوب أجيب إعفاء من كل جهه حكوميه ...( المهم في نهاية الأمر إنت وحنكك لو حنكت كتير بيخلوك ولو جريت واطي بيدفعوك.....
أنا لحد هنا دوري إنتهي ورفعت العفش في دفار ماشي لحد الشماليه .... والسواق يشيل شيلته في نقاط التفتيش اللي في السكه ... يا إما يفرتك العفش كله ويطابقوه مع الورق ويا إما كمان ............
............ وهذا هو السودان ....


محمد عثمان الجعلي
[email protected]


تعليقات 1 | إهداء 0 | زيارات 1291

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#933827 [ابو الشيخ]
0.00/5 (0 صوت)

03-06-2014 10:05 AM
د/ الجعلى التحايا والود والاحترام

صاحبك ده حقو تنصحو يعمل خروج نهائى من السودان ويرجع البلد الجا منو حتى ولو بنصف الراتب القديم وبى فيزة راعى كمان

يا دكتور فى ارنيك 15 فى بند اسمه اخـــرى عليك الله كما سألتهم لى اخرى دى شنو ؟


محمد عثمان الجعلي
مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة