المقالات
السياسة
شعر - أصلة تروع المواطنين بمنطقة مروي وتستنفر وزارة الدفاع
شعر - أصلة تروع المواطنين بمنطقة مروي وتستنفر وزارة الدفاع
03-06-2014 03:51 PM


شنو الوداك بالعشراب
كايسي الحن؟
مكمسدة يا اصلة الجن
وكم عكاز علي راسك
وكم فرار علي نصك
وكم طوريي فوق ضنبك
وضباحك لخوستو يسن
كايسي الحن؟
شنو الوداك بالعشراب
ما خلوك اندسيتي في الورتاب
ولا تركوك في الهباب
يا الجابوك بالواتساب
شنو الوداك بالعشراب
من وين جايي؟
ما سميتي
لا كوركتي لا نريتي
لا كاتلتي لا عضيتي
قدر ما قلتي واترجيتي
ماخلوكي يا الكتلوكي
في العشراب
كمان فضوحكي بالواتساب
شنو الوداك بالعشراب
ما ستروكي
من وراء بي حذر رفعوكي
ضكر انتايي ما خلوكي
يا الهجموكي
بالحصا والحجار رجموكي
من كاس المنية سقوكي
يا مسكيني وينو اخوكي؟
والدابي الكبير يا ابوكي
كيفن هملوك خلوكي
لامن تمشي بالعشراب
عليكي الحالة كيف صعبة
تبلعي في الصبار والطير
وفي بطنك لقو الكلبة
حق الناس مولعبة
يا الطعنوك بالحربة
نامن جيتي منقلبة
وشرط بطنك جنا العشراب
شنو الوداك بالعشراب
قالوا نقبله القبلي
ونكبر في ثبات وامان
ونضبحها جخ
حلال وضمان
ونسلخها بي رفق واحسان
اوعكن الجلد ينقد
وختوه اللحم كيمان
نقسم منو للجيران
عديراب ناس رباط وتويدي
ونخت باقيهو للضيفان
وندبغ جلدها الغالي
خاتين القرض كيمان
بخيتة الحال شنو الوداك للعشراب
وهناك تبكي الدوابي تنوح
امكي ابوكي ده المجروح
قالو صغيري مالي السوح
ويا النبي نوح ويا النبي نوح
ان جوكم يشيلو التار
ويا ستار ويا ستار
من عضة دبيب فرفار
عاد وين تمشو يا العشراب
تعصري وتجري بالواتساب
ما كان تمشي بالفلوكة بالعيراب
شنو الوداك للعشراب
وبعد ما كل شي خلص
واللحم الكتير بابح
وفي الاعلام خبيرها رشح
قام عبدالرحيم صرح
دفاعنا البنظر صحصح
تقوم القوة من مروي
تشيل كل السلاح ترررح
منظومة دفاع وهجوم تتبحبح
تموينات وتعيينات
نفاسات ودبابات ننسلح
عشان سودانا مستهدف
ولاسرائيل بقينا هدف
والاصلات من اسرائيل ببتتسلح
والجبخانة فوق الاصلة قالت تح
وبقت تتبكي تتوحوحوح
سوت حيلة همدت همدة ما ماتت
بشيش زاغت وبي تحت الحفير فاتت
وقام اعلامنا يتبجح
كتلناها وضربناه
وخطب حارسنا واتنحنح
لبس برنيطو وانشوبح
وبقى ينبح
وين ناس الضرايب وين؟
لحم للصادر الجلد السمح للدين
وبقى ينبح وبقى ينبح
قفلت الرادي والتلفاز وعقلي سرح
حليل الازهري المامات
نعز سودانا نمحى الفات
وبي دم غالي نتوشح
شنو الوداك بالعشراب
ما كان تمشي بي نوري
تبدري تركبي اللوري
شنو الوداكي بالعشراب

عبدالمنعم العوض


[email protected]


تعليقات 2 | إهداء 0 | زيارات 1133

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#936205 [خال فاطنه]
0.00/5 (0 صوت)

03-09-2014 08:51 AM
خلو أولاد الماحى يكشحوها بمدحه زى ما الماحى العود كشح التمساح بمدحة التمساح المشهوره


#934557 [ربش]
0.00/5 (0 صوت)

03-07-2014 03:15 AM
كلام عجيب و رهيب و كمان في التنك ...... صح لسانك وكمان تسلم و د العوض .


عبدالمنعم العوض
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة