المقالات
منوعات
الجن الكلكي
الجن الكلكي
03-07-2014 12:09 AM


لملم أوراقه المبعثرة بعشوائية ،ادخلها في حقيبته السوداء ، احكم ربطة حزامه حتى لا يتمرد بنطاله على جسمه النحيف، عندما هم بالخروج اعترضته ( ام العيال) مذكرةً بحوائجها المعيشية ادخل يده بعنف في جيبه الخلفي أعطاها بعض ماتبقى من ماهية طنطن بكلمات غير مفهومة توحي بعدم الرضى أعادته الي طبيعته قائلةً ؛
- ما تنسى تغشى معاك سيد الدكان تشوف الدفتر الراجل دا كشف حالنا
- حاضر
- وما تنسى الكهربا!!
- اف حاضر ( الكهربا يعني الموية أسي في داعي اربطوهم مع بعض) الله ادينا الصبر يحدث نفسه كهربا موية نفايات
- هي ذكرتني النفايات
- اها مالها مش الشهر دا دفعنا
- عارفه بس ما تنساها في كيس نفايات جنب الباب شيلو ارميهو معاك في الخور ناس النفايات شاطرين بس في خم القروش
- حاضر
حمل حقيبته بأحكام وخرج مسرعا قبل ان تلاحقه بأشياء اخري جرّ الباب بعنف
- ازيك يا عمر طولنا ما شفناك!!؟
انه حاج صالح كان يتكأ على حماره الأعرج الذى أعيته ( تُمٓن اللبن)
- اهلًا انا أسي واقف قدامك اشبع شوف امكن ما تشوفني تاني
- الدفتر الداير اشوفك مو انا
- عليك الله يا حاج صالح ما ترفع ضغطي اصبر علي شويه انحني بعناء وتناول كيس النفايات ،
هرول بساقيه تاركا حاج صالح يتابعه بنظرات مضحكة
دلف الى دكان ( الجعلي)
- السلام عليكم اخصم ديل من حسابك والباقي بجيك قريب
- علي الطلاق شغلنادا بالخسارة الدكان دا يا عمر عليهو إيجار ونفايات وكهربا وموية وعوائد هسي بتاع العوائد كان هنا ندفع ليهو من وين
- بتاع شنو!!!!!؟
- العوائد .
- ومشى بي وين ؟
- لاف على البيوت
حمل حقيبته وكيس النفايات وخرج مسرعا
راه يقف بجوار بابه يحمل دفترا يحدث نفسه ( يا زول أحسن اتخارج بسرعه)
وجد نفسه امام الخور الذي ضاقت به النفايات وملأ الفراغات بروايح تهرب منها الأنوف تخلص من حمله الاخر ورمى به دون وعي وجرجر قدميه بفتور نحو المحطة توقفت ( الحافلة) أمامه فكان اول الراكبين احس بنشوة الفوز بمقعد وبدت عليه علامات النصر المبين تنهد بعنف تفقد حقيبته لم يجدها نظر الي أصابعه المجعدة وجدها تقبض بقوة على كيس النفايات قفز من مقعده وفج جموع الواقفين على باب ( الحافلة) وأخذ يجري بسرعة نحو الخور قابلته حاجة ( عمايم) في الطريق لم يعرها اهتماما فأخذت تكلم نفسها
- أجي دا ما عمر راجل ( بخيتة) الراجل دا جنا ولا شنو
وصل الخور وجدها بين الأكياس اخذها بانكسار لكنها لم تسلم من بعض الأوساخ
عاد الى بيته يشكو ما وصل اليه من حال قد تكون نهايته التجاني الماحي
- عمر مالك جيت راجع؟!!!
- عيان
- عندك شنو
- جن كلكي يا وليه خليني
- سمح هاك الورقة دي اداني ليها بتاع العوائد
- جيبيها ( حشرها بين اضراسه ومضغها بقوه وابتلعتها) خليهم يجو يطلعوها!!!!!


[email protected]


تعليقات 0 | إهداء 0 | زيارات 806

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




عبد المنعم الزمزمي
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة