المقالات
السياسة
الى كل الامهات في عيد المرأة العالمي
الى كل الامهات في عيد المرأة العالمي
03-08-2014 03:55 PM

الي كل الامهات في بلادي
أنت...
أمرأة من الزمن النضيف
زمن الودك
والمشاط لما يكون رهييف
وشرموط اللحم
وطعموا اللذيذ
والكسرة بملاح الورق
والشاي حلو بالرغيف
وقت البرد
الاوضة بي منقد دفت
زمن المرض
بداوا بالمحريب
والقرض المريح
لما كان رمضان ليو طعم
وعواسة الابري بالحطب
ومدفع الشفع الكبريت
زمن البرنجي
والقهوة كيف
وقت المساء
والدنيا صيف
الجلسة في الحوش الفسيح
مرشوش خفيف
والنور قطع
اتولع الفانوس سريع
بي جاز امان
ومافي خوف
والعشوة بي الرز واللبن
والنومة حلما همبريب
بكرا العرس
عرس الهناء
ما ليهو قيف
صفقة ورقيص
صبحية كاربة
وفطور عريس
قطع الرحض
ورقيص عروس
جرتق وقرمصيص
والسيرة لي وش البحر
ده كلو كان يا زمان
وقتين الحلة عامرة
بالنفير والامان
والجار رفيق
زمن المحبة
والبيت وسيع
الكنتي رمزو
وبلاك حفيف
بالله يما
انت وين
بالله وين

مجدي عبد الرحمن الجمعة 8 مارس 2014
[email protected]


تعليقات 1 | إهداء 0 | زيارات 623

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#935971 [بت البلد]
1.00/5 (1 صوت)

03-08-2014 09:48 PM
اتغير زمنا يا ولدي
وجانا الزمن الصعب
زمنا ما شفنا فيهو
غير الأذى والتعب

زمن المسئول
يشتم ويسب
وحول بلدنا
ساحة حرب
يكتل في الرجال
وفي النسوان يغتصب

باع المستشفيات
والطبيب دورو انسلب
والدوا المضروب
عديل يوديك الترب

الناس اشتهت السخينه
والبن والرطب
والشاي المقنن وحرف رغيف
يا سلام أسكت كب

زمنا عصيب
ما شفنازيو تب

الطفل البرئ
حرموهو اللعب
باعو الميادين
وحقها راح
في غيابة الجب

والماعندو قرش
ما يحضر درس
ولا يسمع جرس
علموهو الحقد
لا يعرف وطنية
ولا ايه يعني حب

راجين الاله
الرحمن الرحيم
الرب الكريم
ينهي المهازل
وينصف كل زول
ويجيب الطلب

يريح أهلنا
من حكم البشير
الكلو شر
ويرفع عنا
الضيق والتعب


مجدي عبد الرحمن
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة