المقالات
السياسة
الرحله الماليزيه 370 واحتمالاتها
الرحله الماليزيه 370 واحتمالاتها
03-15-2014 11:44 AM



سيبنا من موضوع عدد السفن والطيارات بالاجنحه الثابته والغير الثابته المشاركه في حكايه البحث عن الرحله 370 المفقوده وفيها قريب لي 250 راكب. وسيبنا كمان من الدول الدخلت في الموضوع وحكايه تمديد نطاق البحث لغايه الهند, الاقمار الصناعيه وين؟ الامريكان والفرنسيين والانجليز والالمان واليابانيين وين؟ معقول ياجماعه طياره كبيره زي ال777 تختفي كده بس؟ طيب شنو حكايه حرب النجوم والجماعه بشوفو تحت الارض لي كم ميل, ومافي ضبانه في العالم دا طايره مابكونو عارفنها؟ الكلام دا كان نجر ساي يعني ولا شنو؟ ونحنا مصدقين.
ال777 بتعتبر من الطائرات الحديثه لشركه بوينج ومزوده بي احدث الاجهزه. الطياره دي طولا زي 74 متر وارتفاعا قريب 19 متر. الجناحين طولهم 61 متر والمنطقه بتاعتهم بتغطي 428 متر مربع (http://www.flugzeuginfo.net ). معقول حاجه زي دي اكتر من اسبوع ماتتعرف وين؟ ناس شركه البوينج قالو المكنات فيها جهاز برسل معلومات للشركه وبوري الطياره وين وعلي ارتفاع كم. طيب ورونا ليها وين؟
المتابعات الدقيقيه العملناها من خلال رصدنا لي تدفق المعلومات في النت وصلتنا لي 6 احتمالات كدي نشوفهم واحد واحد:
الاحتمال الاول بيقول انو الشركه المصنعه للمكنات التقطت رساله من مكنات الطياره بتوري انو بعد ما الطياره اختفت من شاشات الرادار ظلت طايره لمده تتراوح بين 4 لي 5 ساعات في اتجاه الغرب (الرحله كانت في اتجاه الشمال الي بكين في الصين), والغرب يعني طايره عبر الاراضي الماليزيه الغربيه الي المحيط الهندي في اتجاه شبه القاره الهنديه. الاحتمال دا بغير وجهة البحث من بحر الصين وجنوب فيتنام (شمال ماليزيا) الي مساحه كبيره داخل المحيط الهندي (غرب ماليزيا). الامريكان اقتنعو بي كده وقامو بسرعه وجهو سفنهم للمنطقه دي.
الاحتمال التاني تكون حصلت مشكله فنيه كبيره في الطياره عطلت كل الاجهزه بما فيها اجهزه النداء والاستجابه. وزي ماقال المحامي استيف مارك المتخصص في قضايا حوادث الطيران انو النوع دا من الطيارات مفترض يكون مجهز بي معدات ترسل معلومات عن اي عطل في الطائره. وبما انو مافي اي رساله وصلت من الطائره تدلل علي كده, فدا معناهو انو الاجهزه دي حصل ليها عطل كامل. يعني عطل في الاجهزه البترسل رسايل عن الاعطال.
الاحتمال التالت برضو بتكلم عن عطل ميكانيكي اصاب اجهزه الاستجابه في الطياره. واهميه اجهزه الاستجابه في الطياره بتتمثل في انها (بتعرررف) الطياره للرادارات المدنيه والطيارت التانيه الحايمه بالقرب منها. ودا بوري السبب الخلا الرحله 370 ماظاهره في الرادارات المدنيه ولا لي اي طياره تانيه.
الاحتمال الرابع انو الاجهزه بتاعة الاتصال او الاستجابه تكون وقفت لكن مابسبب عطل فني او اي عطل تاني, وانما حصل ليها اغلاق بواسطه الطاقم او اي واحد من الركاب عندو معرفه حقيقيه بي معدات الطائره وطريقه عملها (الاحتمال دا مربوط بالاحتمال السادس). اما السند القوي للاحتمال دا تقرير بثته القناه الفضائيه الامريكيه اي بي سي قالت فيو انو في شخصيتين امريكيتين (واصلات) قالو انو في جهازين للاتصال اتقفلو ورا بعض حوالي الساعه 1:07 ص بعد الطياره طارت زي ساعه من مطار كوالا لامبور لكن جهاز الاستجابه البوري الموقع بتاع الطياره اتقفل الساعه 1:21 ص. يعني في الاول اتقفلت اجهزه الاتصال وبعدها اتقفلت اجهزه معرفه مكان الطائره. ودا دليل علي انو الموضوع (intentional) او مقصود.
الاحتمال الخامس وبالرغم من المعلومات النشرتها الشركه الماليزيه عن خبرات قائد الطائره كابتن زهاري احمد 53 سنه وطاير زي 18365 ساعه (طبعا خبرة الطيار بتتحسب بي عدد الساعات الطارا) والتحق بالخطوط الماليزيه في العام 1981, ومساعد الكابتن فارق عبد الحامد وعمرو 27 سنه وطار حوالي 2763 ساعه والتحق بالشركه في 2007, الا انو الجماعه يكونو (دقسو) في حتة ما. فبالرغم من المعلومات دي, فالاحتمال الخامس دا بمشي في الاتجاه البوصل لي غلطه ما من الطاقم بدون تحديد الغلطه هي شنو.
الاحتمال السادس والاخير ودا متمسكين بيو بعض الشخصيات الامريكيه وقالوه لي صحيفه يو اس اي توداي المشهوره, انو الموضوع كلو عمليه ارهابيه خصوصا في اتنين من الركاب الايرانين كانو في الطياره بي باسبورتات مسروقه. بس السيد رونالد نوبل السكرتير العام للانتربول دحض الكلام دا بي انو بعد البحث لقو الشخصيتين ديل ماعندهم اي ملفات في الانتربول. ودا دليل اولي علي عدم ارتباطهم بالارهاب. وبفتكر السيد نوبل انو الجماعه ديل هدفهم كان التوجهه الي اوروبا لطلب حق اللجوء السياسي ليس الا.
دي الاحتمالات الرصدناها من موقع صحيفه اليو اس اي تودي يوم 14 مارس 2014. بس تعرفو اغرب حاجه في الاحتمالات دي البحث العملوه ناس الس ان ان عن تفاعل اهل الركاب معاها. فبالرغم من كراهية العالم الشديده للارهاب من سنه 2001 وحادث منهاتن الشهير بتاع برجي التجاره العالمي, وهوس جميع اجهزه المخابرات في العالم وتوحدها في الحرب علي الارهاب, الا انو الرصد الاتعمل لي اهل الضحايا اثبت انو نسبه كبيره منهم بتمنو الاحتمال السادس بتاع الارهاب يكون هو الارجح لانو علي الاقل فيو نسبه ولو ضئيله يكون الناس البحبوهم لسع احياء. بالنسبه لي راي انا في الموضوع, امشو المحيط الهندي ورا اليانكي لانو الناس ديل بكونو عرفو حاجه بس (قتيتيين).

[email protected]


تعليقات 9 | إهداء 0 | زيارات 3652

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#943634 [وحيد]
0.00/5 (0 صوت)

03-16-2014 09:35 AM
غتيت - غتيتين .. و ليس قتيتين ... مقال جميل و تحليل رائع بس برضو ما فهمنا الحصل شنو و لا حصل كيف و لا الطيارة مشت وين!


#943630 [المشروع]
0.00/5 (0 صوت)

03-16-2014 09:31 AM
والله حكايةعجيبة لا اثر للطائرة انا استغرب ومحتار ولا حتى واحد من الركاب اتصل بأهله من داخل الطائرة او بعد ما وقعت دي تكون مشت وين؟
لكن يا دكتور الرازي انت اوعة تكون ود الطيب ابو قناية المعروف - مدير مفوضية مكافحة الفساد في السودان والكان وكيل ديوان الحسابات ؟؟؟


#943509 [عكر]
0.00/5 (0 صوت)

03-16-2014 02:22 AM
في احلك المواقف الانسانية الدولية ... تتفتق عندنا نحن السودانيون روح الدعابة و خفة الدم ... العالم اليوم قرية كونية و احدة و يتالم الانسان لاخيه الانسان الا من راء في نفسه العلية و الافضلية (superiority)... و هذا من لا منطق له و اخرج نفسه من (الانسنة)... الم يقف العالم معنا في كوارثنا الكبيرة و الصغيرة (Sudan call world program 1985- 1986)حتي اخذنا من جهلنا نناصرهم العداء ان لم نساعد الاخرين بجد فلنبعد و نصمت ...
فالفكرة الايجابية مهما كانت صغيرة ان كتبت في محلها و العالم اليوم كله و سائل اتصال كان من الممكن ان تضاف لنا كرصيد يخفف عنا الدين الكبير ...!!!
اما عن ماليزيا و شعبها الطيب فجميعنا يعلم ما هي العلاقات التي يجب و المرجوه مستقبلا...!!!


#943378 [الطاهر]
0.00/5 (0 صوت)

03-15-2014 10:28 PM
تحليل جميل
والاجمل الدارجية حقتنا دي ،،،،،
تعرف ان كنت مقاشرك اشان اسمك مربوط عندي بي مكافحة الفساد الماشفنا منها حاجة،،،،
لكن معليش مفروض "كل شاة معلقة من عصبتا"،،،،
دا لو ماكان اسم على اسم


ردود على الطاهر
European Union [أبو مونتي.] 03-17-2014 12:32 AM
هههههههههههههه تعليقك لذيذ ياصلاح
ياناس الركوبه عالجوا مشكلة الصفحه البيضاء
المقال غير موجود لكن التعليقات موجوده الحاصل شنو؟

United States [اصلاح] 03-16-2014 11:52 AM
اذا بقي تبع ابو قناية بتاع الفساد عاوز ليهو قناية في راسو ..معليش يا دكتور نحن كجنا القنا الفي الخلا ذاتو


#943271 [دويحي (من الدوحة)]
0.00/5 (0 صوت)

03-15-2014 07:10 PM
يا دكتور، لازم تعرف إنه نصف رأيك الشخصي الختمت بيه التحليل، عند أخيك (اللينبي)، عندك مانع؟


#943099 [buraie]
0.00/5 (0 صوت)

03-15-2014 02:58 PM
ديل مشو امريكا 2
باى باى يا ارض


#943085 [الحامدي ود الحبوبات]
4.50/5 (2 صوت)

03-15-2014 02:46 PM
علي بالدين التقول ساطل....ماجننت التحليل يادكتور باسلوب رائع وبديع ...تنفع معانا محاضر في الجامعة...رايك شنو؟


#942969 [عطوى]
2.00/5 (1 صوت)

03-15-2014 01:06 PM
قلنا ليكم الطيارة دى خطفتها المخابرات الكيزانية بقيادة مهندس الفكرة الريس بشبش وغالبا تم توجيهها لى كوكب المريخ وهبطت بسلام بعد العملية الخارقة والخبيرة من الايد اليمين لبشب ابوريالةخبير الدفاع بالنظر حتى يساومو بها اليهود والامريكان فى القضية الفلسطينية .. عشاان يعرفو حااجة .. هى لله هى لله


#942954 [yahoo]
5.00/5 (1 صوت)

03-15-2014 12:53 PM
الثابت انوقدرة ربنا اكبر من الرادارات الصينية والاقمار الصناعية الامريكية


د.الرازي الطيب ابوقنايه
د.الرازي الطيب ابوقنايه

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة