إشانة سمعة
03-15-2014 02:30 PM


في نهار قائظ الحر قبل عدة ايام وبينما العبدلله عائد إلى منزله بعد قضائه لبعض الأعمال بالخرطوم إذا بالهاتف يرن وإذا بالرقم رقم غريب غير مسجل وهذه معناه أن شخصاً جديداً غير مسجل لديك يريد محادثتك وهذه بالنسبة لي لا تعني مشكلة فرقم هاتفي اعطية لإستقبال أي صحيفة أعمل فيها وأطلب منهم أن يعطوه لأي سائل عنه .. (يعني متاح لأي زول) .. رقم جديد (معناتا) زول بيتكلم معاك لأول مرة وعليك أن تجهز نفسك لمعرفته ومعرفة سبب إتصاله بك وقد فعلت :
- السلام عليكم يا أستاذ
- وعليكم السلام ورحمة الله تعالى وبركاته
- أنا مساعد شرطة حماد من شرطة نيابة الصحافة والمطبوعات
- مرحب بيك
- يا أستاذ بس عايزنك عشان نسمع أقوالك عشان ناس الشرطة ديل فاتحين فيك بلاغ إشانة سمعة !
- في شنووو؟
- لمن تجي ح نقول ليك يا أستاذ
- طيب مكانكم وين؟
- إنتا بس يا استاذ تعال نادي الأسرة في الخرطوم وأتصل عليا في الرقم ده ذاتو
- طيب شكراً ..

إستبد بي الفضول غاية الإستبداد فكيف برجل مثلي أن يقوم بإشانة سمعة الشرطة التي من المفترض أن تحميه وتوفر له الأمن ولأطفاله وعائلته ولجميع المواطنين فقمت على الفور بتغيير الإتجاه من أم درمان إلى الخرطوم .
كثير من الإحترام بذله لي مساعد شرطة حمدان .. وبعد فنجان القهوة أجاب عل سؤالي وفضولي :
- يا أستاذ إنتا كتبتا مقال قبل كده بعنوان (الشرطة ناقوس الخطر) !
- ومالو؟ بنحذرهم !
- الناس ديل قالو دي إشانة لسمعة الشرطة

لعلم القارئ الكريم ان المقال كان يتحدث عن مواطن لا أعرفه إتصل بي وقال إنو الصباح مشي يركب عربيتو الكانت في الشارع (مقفلة) بايته قدام بيتهم قام لقى (القزاز) مكسور وبعض المقتنيات التي بالعرية غير موجودة .. لم تأخذ المسألة وقتاً طويلاً حيث أخبره جيرانه عمال الفرن (المخبز) الذين كانوا يعملون ليلاً بان عربة شرطة ترجل منها عدد من أفراد الشرطة بالزي الرسمي وقاموا بكسر العربة !!
بعد أن أخبرني المواطن بالحادثة الفاجعة قمت على الفور بالإتصال بصديقى الدكتور عميد شرطة هاشم على عبدالرحيم بشرطة ولاية الخرطوم وشرحت له ما حدث حيث أخبرني بأنه سوف يتصل برئيس شرطة محلية كرري الذي يتبع لها القسم المعني وبالفعل إتصل بي بعد دقائق ليأخذ منى رقم هاتف المواطن ذاكراً لي أن رئيس شرطة محلية كرري سوف يهتم بالأمر شخصياً .
وطفقت أتابع مع المواطن التحقيقات التي أجرتها الشرطة مع منسوبيها والتي أخذت شهوراً حتى تمت محاكمة الأفراد الذين قامو بتلك الحادثة (يعني القصة ثبتت عليهم) !
طيب السؤال البفرض نفسو هو (طالما القصة ثبتت) إشانة السمعة وين ؟ نحنا جبنا كلام من راسنا؟ وللا الأخوان في الشرطة عاوزننا نسكت ونحنا نري هذه التفلتات التي تحدث يومياً حيث أصبح من العادي أن تطالعك الصحف بأخبار من شاكلة (القبض على شرطي يروج للمخدرات) .. (القبض على أفراد شرطة يبتزون المواطنين) إلى أخر مثل هذه الأخبار التي تفقد المواطن إحساسه بالأمن والطمأنينة .
لك أن تعلم عزيزي القارئ ان الأفراد الذين تمت محاكمتهم في الحادثة موضوع هذا المقال والعاوزين (يجرجرونا فيها) للمحكمة قد تم إنذارهم وتغريمهم فقط ولم يتم رفدهم من الشرطة .. يعني (أمشوا أنهبوا تااااني) !! بينما قد يواجه العبدلله حكماً بالسجن إذا ما رأت المحكمة أن المقال يحتوي على إشانة سمعة لجهاز الشرطة (شفتو كيف؟) !!
كسرة :
لو الشرطة بتفتكر إنو ممكن نسكت على تفلتات أفرادها ومنسوبيها تكون (بتحلم) ..

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)؟


تعليقات 21 | إهداء 0 | زيارات 8327

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#946325 [سوداني]
0.00/5 (0 صوت)

03-18-2014 05:01 PM
اذا دعتك قدرتك علي ظلم الناس فتذكر قدرة الله عليك


#944581 [زردية]
3.00/5 (1 صوت)

03-17-2014 08:32 AM
شرطوا قزازنا يا ناس الشرطة
و و شرطوا عينا


#944312 [بت ام الحسن]
3.00/5 (2 صوت)

03-16-2014 08:48 PM
عندك حل واحد من تلاته

--وقف الووووووووووووووووووووواوووووووووووووات وفك البيرك


---بعدين انت ماماوثبت لسه راجى شنو احسن من الوثبو فى شنو عامل فيها فقرى --ملكى وهم


---تلاته شوف صحيفة الخال الرئاسى فيها وظائف شاغرة ذات حصانة يعنى تكتب واواتك دى بكل ارتياح


#944305 [ام الحسن]
5.00/5 (1 صوت)

03-16-2014 08:38 PM
شيل كسراتك دى وزول بهبشك مافى

مامكن لكن الواوات دى حدها وييييييييييييين صراحة ياجبرا انت مستفذ

يخوفى بكره نكتب احنا ونختم تعليقاتنا بى

كسرة:

اخبار قضية جبرا مع ناس الشرطة شنووووووووووو

والناس ديل فكو من الحراصة ولاشنوووووووووووووووووووووووووووووووووو


#944100 [الكوز الزنديق]
2.00/5 (1 صوت)

03-16-2014 04:48 PM
اهن يا جبرة
الميدان القدام بيتكم قلعو و لا لسة؟؟؟؟؟؟


#944088 [السودانى الغيور]
5.00/5 (1 صوت)

03-16-2014 04:31 PM
لله درك ياجبرة


#943959 [الصاحب]
0.00/5 (0 صوت)

03-16-2014 02:05 PM
و سمعة ده عندو كم شريط؟


#943720 [hasco]
5.00/5 (1 صوت)

03-16-2014 10:37 AM
عمك الفاتح بتعرف تجرى اجرررررررررررررى الناس نو عليك خلاص اكرموك قلت لي المرة الجاية بجيبوليك الغدا في العامود حلحل ديونك واكتب وصيتك , الناس ديل بقتلوك وبجو اشيلو الفاتحة فيك (قبال كدة ما نفس الشهداء الشمو فيهم ريحة المسك طلعوهم تاني فطايس ساكت )اها انت ولاكوز يعني من الاول فطيس


#943697 [سوداني]
5.00/5 (2 صوت)

03-16-2014 10:21 AM
يا أستاذ الفاتح انحنا من بدريييييييي عارفين حاميها حراميها
وناس البوليس بتقسموها مع الحرامية
غير عمليات ترويج المخدرات والبنقو المعمول ليها تغطية

ربنا يحفظك من وساختم


#943594 [osama dai elnaiem]
5.00/5 (2 صوت)

03-16-2014 08:58 AM
استاذي جبرة--- بصراحة انت مذنب في هذا الاتهام لانك اتهمتهم بسرقة شئ ( هايف) مثل سيارة صاحبك وممتاكاتها التي مهما غلت لا تتعدي جوال وشوية فكة --- يعني غيرهم من ( الجماعة) سواء كانت رجال شرطة او غيرهم (ياخذوا عنوة) من البنوك نهارا وليس ليلا ومن مؤسسات الدولة الاخري ايضا جهارا نهارا وتسود فيهم صحائف المراجع العام ولجان التحقيق وهم ( يتضرعون ساي-- هنا لا يتضرعون لله وانما يذرعون الطرقات جيئة وذهابا)-- يعني لمن تجي وتقول ناس البوليس ( مدو يدهم المتوضئة) لقليل من ممتلكات الناس اللي مفروض يحموهم تسويها سرقة ---- اها دي اشانة السمعة لان ( المأخود- مش المسروق) اقل من الحد الشرعي-- بالله ايه رأيك في الفتوي دي كمان مش تتماشي مع فتاوي الكاروري من علي المنبر الذي يحمل ( حفيدة غردون) وزر انفصال الجنوب بعد ان مات جدها من عشرات السنين وعبث ( الجماعة) من بعد ذاك) لاكثر من نصف قرن في السودان.


ردود على osama dai elnaiem
European Union [ahmad] 03-16-2014 12:43 PM
الهايف عندك غالي جدا جدا عن سيدو


#943514 [بت البلد]
4.50/5 (2 صوت)

03-16-2014 02:44 AM
يا أستاذ جبرا يا خوي الناس ديل ياهو حالن والعيب عند اهل العيب شرف وانت تراكا شايفن دحين يا خوي خلينا من خط هيثرو وشوف لينا الكسرة الجديدة دي ...أخبار الباخره الرسلوها الايران ورست في بورتسودان شنوووووووووو؟؟؟؟؟


#943467 [komikukuloooo]
1.00/5 (1 صوت)

03-16-2014 12:47 AM
يا جماعة بس تعالوا نبحث او نعدد ونشوف النافع تاني شنو في السودان، او ممكن نقول اذكر ثلاثة مؤسسات امينة وناجحة في السودان ما فيها ريحة فساد؟ (صعبة لكن حااااااااااااااول).


ردود على komikukuloooo
[علي خميس] 03-16-2014 01:59 PM
نافع .... علي نافع !!!!


#943384 [وجع راقد]
4.50/5 (4 صوت)

03-15-2014 10:35 PM
الشعب في خدمة الشرطة...


#943341 [jackssa]
3.00/5 (6 صوت)

03-15-2014 09:42 PM
...التحيه والأحترام لأستاذنا ودجبره ... كل السودانيين يعلمون من هـو الفاتح جبره لم يبيع نفسه فهور حر والحر لا يخاف لؤمة لائم ...


#943318 [عصمتووف]
3.00/5 (2 صوت)

03-15-2014 08:46 PM
كانوا علي حق لو قلت رجال الشرطة امناء يمسحون دموع الكدايس والجقور يفترض فتح بلاغ فيك بعد اداء وتقديم الضيافة ليك انت عارف وانا عارف انت مخير


#943305 [ساب البلد]
5.00/5 (3 صوت)

03-15-2014 08:14 PM
********** خيرا تعمل ****** شرا تلقي ******** التحية لك استاذ جبرة ******** سيظل الكبير كبير ******** اخبار الجماعة ماليه الجرائد و جرائم الشرطة علي قفا من يشيل ***** القصة ما قصة اشانة سمعة بقدر ما هي محاولة لاذلال الشرفاء امثالكم ******


#943244 [زول ساكت ..... سااااي!!]
3.50/5 (2 صوت)

03-15-2014 06:23 PM
الأستاذ جبرا،،
السلام عليكم،، لك التحية على الوقفة الشجاعة دي وأكيد ما جديدة ولا مستغربة إنها تجي منك وما عرف عن (حرفة) الصحافة وما يحفها من (هواء) إلا غذا كنت من الجماعة او ضابي ضنبك وقاعد فوقو،،

قصة الجماعة ديل ذكرتني قصة: (فرد من أفراد الشرطة في مدينتنا الغالية، كان شغال في المرور يعني حريق شديد، طبعاً بتعرف الحريق،،، المهم دردقتو الأيام لحدي ما حرق ليك ضابط كبير يقال إنو نائب مدير عام الشرطة كان في زيارة لمدينتنا العامرة،، تم نقل الشرطي إياه إلى قسم السواري ـ البتلف بالليل وتحمي المواطنين وهم نيام وتقبض على بعض الحرامية).

والله المستعان،،،


#943217 [ودالشريف]
0.00/5 (0 صوت)

03-15-2014 05:55 PM
لك الله يا وطن صار كل حدث فيك لا عجب ولا استعجاب فكل شي فى بلادى اصبح ممكن لك الله يا مواطن فمن يحميييك فاحاميها حراميها ودون عقاب اذهب ومعك الله وكل الوطن فهم اهون من ان يفعلو لك شي ولا اسكت الله لك حسا فكل اهل السودان يعلمون انه لا امن ولا امان فى بلادى والشرطة والامن يحمون النظام لا الوطن والمواطن للاسف هذا واقع الحال حسبنا الله ونعم الوكيل عليهم ولك ولنا الله


#943169 [جنرال زمان]
5.00/5 (2 صوت)

03-15-2014 04:36 PM
هو البلد دي رئيسها وحريمه وأخوانه (ما عارف عنده أخوات ولا ضكور بس!!!!) وأفراد نظامه وكل الجبهجية حراااااااامية, فمتوقع شينووووووو يا حاج جبرة من ناس البوليص ديل؟؟؟؟؟؟ كلهم حرامية وأولاد ستين ........ ولا مافي داعي


#943142 [الولايات المتحدة السودانية]
5.00/5 (8 صوت)

03-15-2014 03:46 PM
أول مرة أعرف إنو الشرطة عندها سمعة !!!!


#943081 [دا كلام ما صاااااح]
3.50/5 (11 صوت)

03-15-2014 02:43 PM
ما يشين لسمعة الشرطة الا افراد الشرطة نفسهم

قال اشانة قال


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة