المقالات
السياسة
بشة وتفعيل الخدمة
بشة وتفعيل الخدمة
03-16-2014 04:12 PM

أخيرا وبعد سنين وسنين من الحرابة، قرر جنابو الله جابو أن يلتقي بمولانا اللذي غشانا ونط البيت وأكل عشانا وفات خلانا. واستنادا إلى مصادر غير موثوقة كانت المحادثة كالاتي:

مولانا: يااا بشة.. مشتاقين واللاي
جنابو: ياخ واللاي بالاكتر، وين انت يا راجل؟
مولانا: قاااعد، لكن انت واللاي بقيت كعب، ما بترد على مسكولاتي مالك؟
جنابو: معقولة بس يا مولانا؟ والناس يقولو علي شنو؟
مولانا: اي واللاي، اسمع المرة الفاتت جليت من المظاهرات ديك ببنط، ما ناوي تفك الشغلة دي قريب؟
جنابو: هوي هوي افكها وين، أنا يا فيها يا مفسيها. الانتخابات الجاية ذاتا فرزنا أصواتها من هسي
مولانا: تاني؟ ووين اتفاقنا والبيعة والحكم المدني والحركة الاسلامية والكلام داك؟ انت مش قلت هتدينا معاك شدة في الكرسي دا؟ انشالله لفة واحدة. هو الصادق اداها شدة، انا ما أديها؟
جنابو: يازول وطي صوتك، نسيبك دا ياهداك مصنقر هناك
مولانا (مندهشا): عمك! دا العزمو منو دا؟
جنابو: واللاي ياخ اداء واجب بس، زي ما تقول كدة تمامة عدد. قالو حوار وطني وبتاع.. ما ظريفة نتلوم مع "أمتو" دي.
مولانا: أها قلت لي ما فيها فرقة؟
يازول ماف عوجة، انت بس بعد الانتخابات الجاية ديك اعمل ليك حركة كدة على شكل وردة.
مولانا (ضاحكا): حركات زمان ديك تاااني؟ تصريحين تلاتة واجهز فرشة أسناني؟
جنابو: كان لقيتهم ما صلحو الريسيفر قول عوك، بنقلبها ليك إقامة جبرية في بيتك. بعديها ممكن نمسك بالناس ديل زمن بحوارات وطنية ومؤتمرات زيادة وبالمحبة حبة حبة بندخلك في اللعب. أخوك ضمان شركة ما تلاوز.
مولانا: مية مية. منها نخدر الناس ومنها انت ذاتك منطرك ما بكون شين قدامهم. أها عملت في الدولار شنو؟
جنابو: دولار شنو ياخ؟ الصين ساكين بترولهم والسعودية وبقت لاعباها معاي ضاغط. واللاي كان ما أوكامبو دا أنا كان زمان قدمت لفيزة أمريكا دي تاني
مولانا: بشة ياخ كلامك الاحير دا ما منطقي، طيب وقت أصلا هي بلدك قسموها ودارفور غالباك، وبترولك شاوهو والدولار مسخن معاك، وشعبك جاع والناس مابياك، منادينا وماسك بينا زمن مالك؟
جنابو (مخرجا الورقة من جيبه): عشان: "تفعيل" مبادرة الحوار الوطني و"التطرق" لآليات الحوار الوطني

.. ياخواننا ما نلقا لينا زول يفعل لينا آليات التطرق لمشكلة الفلس والجوع والمرض وانعدام الأمن والصحة والتعليم؟ هسي دا وقت تفعيل خدمة آليات مبادرة حوار؟ شريحة هي؟ .. ما عندكم رحلة من ماليزبا للصين؟


ياسر عبدالرحمن حاج الخضر
[email protected]


تعليقات 0 | إهداء 0 | زيارات 930

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




ياسر عبدالرحمن حاج الخضر
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة