(عمود) مُكهرب ..!!!
03-17-2014 03:58 PM


*أسمع دوماً بعبارة (كهربتو زايدة) ولكني لا أفهم معناها من شدة الـ(إلتباس) ..
*أو إن شئت توصيفاً (كهربائياً) - ذا سجع - فلتقل : من شدة الـ(إلتماس!!)..
*(يعني) مثلاً أقرأ لبعض الأقلام الرياضية تشخيصاً لحالة مدافع المريخ موسى الزومة بأن (كهربته زائدة) فيذهب ظني نحو (شتارته) التي تطيح بالعكسيات فوق العارضة ..
*ولكني أسمع من يقول - بعد حين - أن (فلانة) تلك (نظراتها مكهربة) فيقف حماري فوق عقبة مصطلحات أيامنا هذه ..
*وحين اسأل القائل هذا عن المعنى يُحيلني - ضاحكاً - إلى شاعر الـ(عيون!!) عبد الله النجيب ..
*وأقول - متظاهراً بالفهم - : الآن فقط عرفت سبب (دعمشة !!) عيني شاعرنا المهووس بـ(العيون) هذا..
*وقرأت يوماً نصاً حداثوياً عن (صعقة الأنثى) أو (الأنثى الصاعقة) - لاأذكر - فتخيلت برقاً ذا شحنات كهربائية عوضاً عن الذي (تخيله!!) الشاعر ..
*والبارحة هاتفني من يشرح لي - وهو باحث إجتماعي - أسباب الهجوم (المكهرب!!) الذي أتعرض له من تلقاء بعض المعارضين الـ(إسفيريين) هذه الأيام ..
*فقد أرجع - الباحث هذا - الهجوم المذكور إلى (ضغطٍ عالٍ !!) كان بحاجة إلى تفريغ لـ (شحناته) جراء العجز عن تغيير (الواقع) أو (مواجهته) ..
*أو- بعبارة أخرى بسيطة - (كانوا عاوزين جنازة ويشبعوا فيها لطم!!) كيما يحسوا أنهم قد قطعوا عن عدوهم (الكهربا والموية)..
*والعدو المعني هنا هو نظام الإنقاذ - بالطبع - الذي كثيراً ما تسبب في (قطع) أرزاق كاتب هذه السطور في وقت ينعم فيه معارضو الخارج هؤلاء بتكييف ذي تيار (كهربائي) لا (ينقطع) وهم يمارسون فضيلة (الجهاد!!) عبر الـنقر على الـ(كي بورد) ..
*وحين يتعرض أحد زملائنا - من القابضين على الجمر (بالداخل) - إلى (قطعٍ) ما لا يسأل من (بالخارج) أنفسهم ما إن كان (المقطوع) هذا (مقطوعة كهربته !!) في بيته أم موصولة ..
*وتابيتا بطرس التي كنت أظن أني (فقدت أثرها)- منذ ليلة (الدموع !!) الشهيرة تلك - إذا بي أُفاجأ بها تقبع في مكان ذي (كهرباء) ..
*فالبارحة فقط اكتشفت أن تابيتا هذه تستحق من (ساخر) القول مثل الذي كان قد قاله الراحل غازي سليمان في مواجهة مذيعة - ذات جمال - أُختيرت عضوة في لجنة (الدستور!!)..
*فقد قال لها ضاحكاً بإسلوبه المعروف : (إنت يا السمحة بتاعة المكرفونات ، الجابك محل القوانين هنا شنو ؟!) ..
*و(دحين) أنتِ يا تابيتا - يا (بتاعة الصحة التمريضية!!)- كذلك : (الجابك محل الكهربا هنا شنو ؟!) ..
*فهي - حسبما اكتشفت - وزيرة دولة بوزارة (الكهرباء) ..
*ولكن لا تابيتا ولا المذيعة تلك يفترض أن يُوجه لهما مثل السؤال (المشروع) هذا وإنما يُوجه لأصحاب الـ(المشروع !!) الحضاري ..
*ولا أدري كيف فات عليهم - الإنقاذيون هؤلاء - اختيار صاحب (الكهربا العالية!!) موسى الزومة لوزارة (الكهرباء)بدلاً من تابيتا ..
*اللهم إلا أن تكون تابيتا هذه ذات عينين (مُكهربتين !!!!!!) .


الصيحة


تعليقات 31 | إهداء 0 | زيارات 4119

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#946064 [الاصم]
4.07/5 (5 صوت)

03-18-2014 01:04 PM
خلاص ........


#946022 [سوداني]
4.00/5 (4 صوت)

03-18-2014 12:34 PM
الأخ الرائع / صلاح عووضة . تحية و احتراما . أعتقد بأن موافقتك على الكتابة بالصيحة ضربة معلم . فقط أتمنى أن لا تأثر هذه ( الصيحة ) على
كتاباتك


#945910 [للضرورة أحكام...]
4.00/5 (5 صوت)

03-18-2014 11:17 AM
أستاذ صلاح.... بدون تاح تاح تراح طبعاً...

ناس الصيحة ديل.... مهما كان نقدهم للحيكومة.... فعنهم خطوط حمرا....

الخطوط الحمرا دي.... ما عشان الحيكومة.... عشان أكل العيش وكده.... خاصة وإنو الطيب مصطفى

كمل قروشو... الكان لماها من الانتباهة.... وما ممكن يسمح ليك أو لغيرك... توقف حاله...

فياخ كان تقول ليهو عديل.... انك دير الجريدة تدفع ليك حق الكهرباء... بدل عمودك المكهرب دا...

قلت لي نزلت لحدي تابيتا.... ياخ في ناس كتر ممكن تشاغلهم أعلى السلم....

عموماً.... ما بطال.... أحسن من تلقى نفسك قاعد ليك تحت عمود كهرباء...

تحياتي


#945893 [fenkoosh]
3.88/5 (6 صوت)

03-18-2014 11:06 AM
العينة من باديها ....أيوة بعد أن أنضميت للصيحة و التى لن يسمع أحد صياحها فى هذا الجو الذى به صائحون كثر و ربما تكون و مؤكد صيحات بعضهم أقوى و More Amplified من صيحة الطيب مصطفى و ستاف صحيفته الذين يظنون أنهم يحسنون صنعا...أيوة ما عندك فرصة تكتب فى أشياء غير دى ...موسى الزومة و تابيتا وووو...الخ .الم تقبل لنفسك أن تكون داخل مزرعة الدواجن هذه المملوكة للطيب مصطفى فى الظاهر و لكنها مملوكة للأنقاذ فى الباطن ...يعنى الطيب مصطفى داير يقنعنا أنو ضد ود أختو ...ما عادت القنابير موجودة على رؤوس الشعب السودانى ....بعد مسرحية المفاصلةالتى أستمرت 15 عاما و عاد الشيخ و تلميذه للتلاقى بالأحضان تحت الرعاية القطرية ...سيعود الخال لود أخته تحت رعاية مجلس العشيرة و يا دار ما دخلك شر ...و ستكون حينها يا عوووضة قد خدمت تاريخيا مرحلة من مراحل تغبيش وعى الشعب السودانى و جذب أنظاره لأشياء لا تمس عصب مشاكله اليومية مثل كهربة موسى الزومة الزايدةو غيرها من المسائل الأنصرافية و الشعب يموت شبابه كل يوم على يد قوات الأمن .....قل لى بربك يا عووضة الأ تستحى...أنا أفتكر أفضل لأى حامل قلم أن يمسك قلمه و يمتنع عن الكتابة أذا كان الجهر بالرأى و القول بالنصيحة غير مسوح به ...أفضل له أن يقف و( يقفل )قلمه من أن يكون أحد أدوات تغبيش وعى الشعب فى زمن عز فيه الصدق .. أرجو أن يكون دافعك لذاك الأمر المعايش ...و أن لا يكون دافعك أنك من الخلايا النائمة التى توجه حيثما يريد أهل السلطة ... و يا شماتة أبلة ظاظا فى الشعب السودانى الذى كان يظن أن عووضة من الأقلام التى نذرت حياتها للمنافحة عن قضاياه.....و لكنه طأطأ رأسه عندما طلبه الرويبضة للعمل معه لربما للمزيد من العمل لفصل ما تبقى من السودان ...اليس للطيب نصيب الأسد فى أنفصال الجنوب .....الأ تكفى هذه الخطيئة لكى تبعدك يا عووضة من الطيب مصطفى ؟ أن شرق تغرب و أن سفل تصعد ..و لكن قاتل الله المعايش و قاتل الله الدولار ....و لكن كما جاء فى حديث المصطفى صلى الله عليه و سلم ( ما قدر لماضغيك أن يمضغاه لابد أن يمضغاه فخذه بعزة نفس تربت يداك )...و لكن العزاء أن التاريخ لا ينسى .


#945875 [جوع كلبك يتبعك]
5.00/5 (3 صوت)

03-18-2014 10:58 AM
خبر التحاق صلاح عووضة بجريدة مصفر الاست ود مصطفى دلوكة ذكرنى بمثل:"جوع كلبك يتبعك"
اليكم القصة:
يضرب في معاشرة اللئام ، قال المفضل ؛ أول من قال ذلك ملك من ملوك حمير ، كان عنيفاً على أهل مملكته ، وكانت الكهنة تخبره أنهم سيقتلونه ، فلا يحفل بذلك ، وأن امرأته سمعت أصوات السؤال ، فقالت : إني لأرحم هؤلاء لما يلقون من الجهد .... فردَّ عليها :- جوِّع كلبك يتبعك .

فلبث بذلك زماناً ، ثم أغزاهم فغنموا ولم يقسم فيهم شيئاً ، فلما خرجوا من عنده ، قالوا لأخيه وهو أميرهم : قد ترى ما نحن فيه من الجهد فساعدنا على قتل أخيك واجلس في مكانه . فأجابهم إلى ذلك ، فوثبوا عليه ، فقتلوه ، فمر به عامر بن خديجة ، وهو مقتول ، وقد سمع بقوله : جوِّع كلبك يتبعك ... فقال :-

ربما أكل الكلب مؤدبه إذا لم ينل شبعه


#945667 [قطع شك]
2.47/5 (6 صوت)

03-18-2014 08:29 AM
يا عووضة والله بالغت عديل كده الانقاذ دى من يومها الاغبر كانت شغالة بمؤسسية او احترافية واليك بعض الامثال مدير عام الشرطة فحيص لايعرف يفتح بلاغ مشاجرة ولا علاقة له بالشرطة الا الكاكى القاشر بيهو ده ومدير وحدة تنفيذ مطار الخرطوم الجديد طبيب بيطرى ومير شركة التوليد المائى بالكهرباء مهندس زراعى ما بعرف الواط من القيقا ووزير دفاع الغفلة فنى بسلاح الطيران لايفقه الف باء العسكرية والدليل الدفاع بالنظر ووزير الشباب والرياضة قال اول مرة دخلت استاد كان فى عرس جماعى ويا عووضة الباقى تمو خيال .


#945634 [ربش]
3.94/5 (5 صوت)

03-18-2014 07:23 AM
ياعووضه بعد الصيحه نحنا رمينا طوبتك و قرينا علي قلمك ( الفاتحه ) و مبروك عليك الدنانير و إنشاء الله تكون بعت بالغالي ...


#945621 [ابو احمد]
4.38/5 (4 صوت)

03-18-2014 06:40 AM
مالك ومال الانقاذيين تانى عيب تعض اليد الاتمدت ليك


#945619 [سد مروى]
3.44/5 (5 صوت)

03-18-2014 06:32 AM
نعمل ليكم شنو حميييييير قاعدين فى الحر والكيزان يقشوكم بالرد الرد السد السد

استاذ عووضة خلى الخال يشتر ليك جننيتر ويديك حق الجاز بتاعو ماكتييييييير عليك والله النقر فى الكى بورد فى الحررررررر صعب بالحيل اخير منو دخول الغابة بالكلاش زى ماقالت واحدة اختنا امبارح


#945538 [البنك الأهلي]
3.00/5 (6 صوت)

03-18-2014 01:26 AM
الحكاية بقت فيها ضحاكات و تردد كهرباء ..و خلوها مستورة .


#945428 [أحمد طاهر]
2.50/5 (3 صوت)

03-17-2014 10:32 PM
عوضة كهربتنا


#945343 [مجنون ليلى]
3.75/5 (5 صوت)

03-17-2014 08:07 PM
الداير يفهم كتابات الاستاذ عووضة لازم تكون كهربتو عالية ( مترددة يعني ) لو كهربتك (مباشرة) لازماك ( فهامة ) زي بتاعت الاستاذ الفاتح جبرا عشان الفهامة دي بتقوي ( التيار ) مهما كانت (المقاومة ) سوا كانت هذه المقاومة ( داخلية ) أو ( خارجية ) وطبعن زي ما انتو عارفين المقاومة الداخلية (للمادة)يصعب التحكم فيها أما المقاومة الخارجية فمن السهولة (إزالتها والتحكم فيها)
وزي ما قالوا في الامثال (المقاومة قسم ) و ( القلم ما بزيل مقاومة)........


لك التحية استاذ عووضة


مجنون ليلى والهلال

النرويج


ردود على مجنون ليلى
European Union [الطريفى زول نصيحة] 03-17-2014 09:13 PM
اخى مجنون ليلى شكرا يعنى ماتاخرت علينا بس مالاحظت انك وعوضة وجهتم مدفعيتكم لرفقاء السلاح وظهرت مفردات الهندى ومااظن ان هذة هى الصيحة التى بشرنابها عوضةمع الود


#945314 [الطريفى زول نصيحة]
3.50/5 (3 صوت)

03-17-2014 07:41 PM
ياربى هل هناك علاقة بين عودة الوطنى والشعبى وعودة الانفصالى وعوضة وان كنا ننتظر تعليق الاخوة معلقى الراكوبة الذين اشاد بهم عووووضة لهذا المقال


ردود على الطريفى زول نصيحة
[مجنون ليلى] 03-18-2014 12:06 AM
العزيز جدا اخي الطريفي ، ياخ انت زول نصيحة اين هي مدافعنا التي تزعم بأن شخصي الضعيف والكاتب الاستاذ عووضة قد وجهناها نحو رفقاء السلاح ؟؟؟

عموما احيانا كثيرة نقول شيئا ويساء تفسيره ، لسوء الحظ ، يحدث هذا حتى مع أفضل الناس وأقربهم إلى قلوبنا( رفقاء السلاح )، لذا اعتقد إنه من الأكثر حكمة أن نختار ما نقول بدلا من أن نقول ما نختار واعني بذلك شخصي وشخصكم الكريم والكاتب عووضة وكل رفقاء السلاح ..

اما بالنسبة لتشبيهك لنا بالهندي ياخي (دي زي السما للواطة ) الله يسامحك بس يا الطريفي ..

تحياتي لك من على البعد ، من بلادا طيرا عجم ونحنا ذاتنا بقينا عجم والحمد لله على كل حال يا اخي ..


كسرة بسيطة : عليك الله يا الطريفي ، انت مشكلتك مع كلام مجنون ليلى ولا مع الهلال سيد البلد ؟قول النصيحة يا زول النصيحة ...هههههههه

مجنون ليلى والهلال


#945310 [Wadalfa7al]
4.75/5 (3 صوت)

03-17-2014 07:36 PM
يا سيدي الفاضل معارضين كنا او متوالين مع الإنقاذ هذا لايغيير من وضعك كصحفي متواضع الإمكانيات تقارن نفسك بأنيس منصور..كما لا يغيير كون انك تعرضت لهجوم قاسي من معارضي الكيبورد انك تشارك الطيب مصطفي نفس الأفكار والمعتقدات والنهج ..اذكر جيداً ولسوء حظك ان بعض السودانيين ذاكرتهم جيداً،قبل سنوات لما كانت الحرب الصحافية مشتعلة بين الانتباهة وأجراس الحرية إبان عهد كتابة الشرفاء كمرتضي الغالي والحاج وراق ..كال لهم الطيب مصطفي ما كال وأوضح ان يكفرهم وقال ان واحد من كتاب أجراس الحرية لسه منو رجاء لانه علي الاقل يستشهد دائماً بآيات القرآن ..هذا الكاتب هو انت فهنيئاً لك بالصيحة وألف مبروك عليك الطيب مصطفي وما تزعج نفسك بالمعارضين والاسفير والكيبورد والكلام الزي ده..اكتب كتابتك وأقبض قروشك ورقصني يا جدع...
وشكراً


ردود على Wadalfa7al
European Union [Wadalfa7al] 03-17-2014 11:33 PM
أنيس منصور ده متواضع جداً لو قارنته بأستاذ عووضة ..يا حسرة عليه توفي قبل ان تتيح له الأيام كتابة الأعمدة بصحيفة الصيحة.؟؟؟؟؟عجب والله
لكل من يقرأ بين سطور صلاح عووضة يجد هذه المقارنات الجوفاء..ليته كان كأنيس منصور ..عمق وفهم وقلب شفااااااف وفلسفة جريئة وأعمدة مباشرة لا همز ولا غمز ولا لمز..رحمه الله رحمة واسعة..
وشكراً

European Union [الكلس] 03-17-2014 09:26 PM
بكل صدق هو ما قارن نفسه بأنيس منصور وانما قال مع الفارق الكبير طبعا . نرجوك تكتب بامانة يا ود الفحل عشان نحترمك مهما كان مقدار كرهك لعووضة


#945309 [amo]
4.13/5 (6 صوت)

03-17-2014 07:33 PM
تحياتنا للأستاذ عووضة وألف مبروك و بخيتة عليك كهرباء المؤتمر الوطنى و إنشاء الله كهرباء الصيحة تضوى ليك لكن تأكد ان الشرفاء الذين وصفتهم بمناضلى الكيبورد هم القابضين على الجمر و هنيئا لك الدنناير كما يسمونها قومك الذين حللت عليهم عضو مشترى وتأكد ايضا انك لم ولن تغير شيا بصياحك مع هذا الديك الذى يصيح صياحا كله عنصرية والفاظ يعف عن ذكرها مناضلى الكيبوردز
لكن كما ذكر احد الاخوة ما جبت سيرة سيدك اسامة سدود ولا خايف تصيح وداد و يصيح زوج وداد و يصيح فيك خال زوج وداد و هذا طبعا صيحاتة معروفة وصيحتو تخرج المسكوت عنه فى صفقة انضمامك للصيحة او بالأصح ثمن صوتك وقلمك .
اما عن قطع نظام الانقاذ ارزاق الكاتب إن صحت الرواية فالحمد لله الآن تم تعويضك و اخذت تعويضاتك و هذا ليس بالغريب فأنت تلميذ مدرسة الامام و الامام ملك التعويضات وحاجات تانية .
ختاما غنشاء الله يدوك وزارة الثقافة و يسكنوك كافورى مربع البشير .. بالمناسبة وداد ما عندها اخت يعروها ليك عشان تدخل فى مثنى وثلاث زى الجماعة ؟؟؟


#945300 [ودالباشا]
2.25/5 (3 صوت)

03-17-2014 07:24 PM
صحفيي النظام هذه الايام شغالين جلد

انت شابكنا ضغط العال ومعارضو الخارج

كهربة العيون تفريغ الشحنات

يا انا مافاهم حاجة او انت كهربتك انخفض تيارها


#945294 [telal]
3.75/5 (6 صوت)

03-17-2014 07:16 PM
الجاب تابيتا الصحة هو نفس الجابك الصيحة كاش ياعم فعلا انعل ابوك بلد


#945279 [القعقاع الفي القاع]
3.00/5 (6 صوت)

03-17-2014 07:03 PM
لا نقول خسارة. فخسائر السودان و السودانيين منذ 30 يونيو 1989 لا تعد و لا تحصى و أنت يا "عووضة" لا تسوى في تلك البلاوي قيد أنملة. لكن خسارة في الخال الرئاسي الخسر مشروع حلمه بفقده "الإنتباهة" و جاء اليوم و خسر ماهية مرتب في خردة قديمة لن تنفعه و لا تضرة. و المرء مع من أحب لو كنت فعلا بتعرف المنطق. إييييه!!! لكن في النهاية برضو نقول إنزلاق أي سوداني - أي سوداني, في منحدر كيزان السوء خسارة للوطن مهما كان. كٌـل عيشك من سكات و حبة حياء معه لن يضرك شيئا


#945275 [أزرق]
4.12/5 (9 صوت)

03-17-2014 06:58 PM
يشهد الله نحن نحترمك ونقدرك ايا كان قرارك . فقط نرجوك ان لا تحاكى اسلوب الهندى فى الرد عل منتقديك


#945242 [الكوز الفى الزير التحت الراكوبه]
4.04/5 (7 صوت)

03-17-2014 06:21 PM
ياعووضه تابيتا عملت ليك شنو , صحى هى شغاله فى الكهرباء لكن كهربته مازايده؟ حل مشكلتك مع كتائب الجهاد الالكترونى الضغطهم الكهربائى والدموى مرتفع بعيد من تابيتا .
انا المقال الفات قلته جنس كلامك ده رد لى واحد وله واحده ماعارف كهربتها زايده وادبها ناقص وشتمتنى بكل أريحيه, بس انشاءالله تكون ارتاحت نفسيا" لأنى بقدر حاله الناس ماعندهم ( TRANSFORMER ).


#945229 [العريبية]
3.50/5 (6 صوت)

03-17-2014 06:10 PM
طيب انت ماتطلع وتنعم بالتكيف فى الخارج مع باقى المعارضة الحاميك شنو تجى تقبض على جمر الغربة معانا على الاقل ارزاقنا حلال مافيها شبهة

لكن الغربة سترة حال والغربة اقسى نضال

وانت ياخوى بتعارض الانقاذيين بى شنو مابرضو بالنقر على الكى بورد بس الفرق انو نقرك الكى بوردى مدفوع الاجر والعجيب الدافعين ليك حق النقر انقاذيين لقعر القدح


ردود على العريبية
European Union [المهاجرة] 03-18-2014 02:12 PM
الليلة اختنا تينا البدفاع عن عووضة وين

وللا لحقها طرف السوط بتاع النقر فى الكى بورد تحت المكيف

تينا كهربتكم قاطعة وللا شنو الليلة

European Union [الخواجة] 03-18-2014 06:21 AM
اختى العريبية هذا الهراء الذى ينقره بكى بورده كل صباح ((((مابأكل عيش بره)))))


#945227 [صوره مقلوبه]
3.63/5 (4 صوت)

03-17-2014 06:06 PM
هههههه معليش للاخ عووضه ما يناله من النقد في الفتره الاخيره ... فأنا عن نفسي زعلان انك تأخذ مرتب من هذا الطيب مصطفى ... و لكن ماذا نفعل اذا كان البلد كلها اصبحت ملكهم ... المهم في الامر اخي عووضه ان لا يؤثر عملك في الصيحة من هذا الاسلوب القوي جدا في رأيي في نقد النظام (ما يعجبني ان نقدك في النظام نفسه و ليس في ممارسات بعينها)... نثق فيك و نتمنى ان لا تحتج على المعارضين بالخارج فدورهم ايضا مؤثر. تحياتي لكم


#945196 [عمر]
3.75/5 (4 صوت)

03-17-2014 05:36 PM
يا استاذ صلاح . .
ترفع عن الرد على المعارضين المنتقدين لك والايام كفيلة باقناعهم بصحة موقفك . .
مصطلحات من شاكلة مناضلي الكيبورد وغيره اقل من مستواك يا استاذ . .
دع القارئ هو الحكم و في النهايه لا يصح الا الصحيح . .


#945189 [ابوالنور]
3.00/5 (3 صوت)

03-17-2014 05:28 PM
استاذ عووضة ليس الامر كما زعم صاحبك ولاهو فش غبينة القصة انك كنت تظهر لنا انك تحكي نبض الناس برغم اسلوبك الفلسفي بداء الناس يتابعون ماتكتب ومشغوفون بما تقول وكانو يشجعونك وانت تتعرض لمخاشنات السلطةويتعاطفون معك وكانو لك وجيع وانت لهم وجيع وكانو يظنون وبعض الظن اثم انك علي ماهم علية من المبداءولم يدر بخاطرهم ان الشغل اكل عيش والا فما الذي يجمع الشامي مع المغربي ان كان المبداء قائما فما تغير والطيب هو الطيب المستعلي بعنصريتة البغيضة فما الذي دفعك للوقوع في براثنة ان لم يكون تفضيلك اكل عيش علي المبداء...نعلم ان طعام الانجاس دسم ولكن هل اجزتم الصلاة خلفهم ؟؟؟؟؟


#945171 [التاج محمد احمد]
4.13/5 (5 صوت)

03-17-2014 05:15 PM
كلام ما بشبهك


#945170 [عبد الله]
4.25/5 (4 صوت)

03-17-2014 05:15 PM
هكذاهو حال السودان ، المنصب ليس مهما ان يكون شاغلة ذو كفاءة بل ان يجيد فن تكسير التلج بجدارة واقتدار وان يجيد فن الرقص كمان


#945151 [ود عدلان]
2.75/5 (5 صوت)

03-17-2014 04:56 PM
اقطع دراعي لو كنتو فاهمين حاجة


ردود على ود عدلان
United States [المتجهجه بسبب الانفصال] 03-17-2014 08:26 PM
وأنا أؤيدك يا ود عدلان


#945149 [وحيد]
4.00/5 (4 صوت)

03-17-2014 04:53 PM
ارى ان الحديث لم يشر الى أسامة كهرباء او اسامة سدود و الذي كان البعض يطلق عليه لقب " مهندس" حتى اطتشف الناس ان هندسته مثل " شريعة" عديله صاحب الماجستير في الشريعة ....
اما " الشيخة" تابيتا - من سواقط الحركة الشعبية - فهي كباقي المؤلفة جيوبهم من سواقط الاحزاب السياسية ... تنتقل كالفراشة من وزارة لوزارة تمتص المخصصات بلا اختصاص و لا صلاحيات ... فالمسالة قشرة و حوافز ... و ذلك ما جعل عدد الوزراء في حكومة المشروخ الحضاري يساوي وزراء جميع دول افريقيا مجتمعين


#945143 [كى بورد]
4.38/5 (5 صوت)

03-17-2014 04:48 PM
وإنت يا أستاذ ما عارف ليه ، لا يكون عندك سلك عريان


#945121 [Gogomri Salim KOKO]
3.00/5 (4 صوت)

03-17-2014 04:25 PM
Good go A head money talks not lips keeeps ,you will no longer be in our hearts


#945109 [قاعد برة السودان و الحمد لله]
4.49/5 (7 صوت)

03-17-2014 04:14 PM
للاسف الشدييييييد انت بقيت ما عندك موضوع والله كتاباتك كانت معبرة هسي بفت فشوش ساكت


ردود على قاعد برة السودان و الحمد لله
European Union [عادل] 03-18-2014 10:26 AM
زمان قلنا الكلام ده وهاك ياشتيمة زى الكفرت

قلنا كتابتو ماعندو موضوع قالو ما بتفهم الايحاءت


صلاح عووضة‎
صلاح عووضة‎

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة