المقالات
مكتبة كتاب المقالات والأعمدة
شوقي بدري
سوات السمكري في الصفيح هي ، دق قص شرتيم قديد وكي .
سوات السمكري في الصفيح هي ، دق قص شرتيم قديد وكي .
03-19-2014 08:34 AM


الجماعة قاموا علي قطر ، وحيسوا فيها سوات السمكري في الصفيح . يعني الديلي تلغراف البريطانية كلما امام الجامع ؟؟. ما لازم المخابرات البريطانية كشفت ليها انو وارنر المسكين ممثل ترينداد ونائب الرئيس لاتحاد الكرة الدولي ، ، اخد ليه قرمة 2 مليون دولار علشان ساعد قطر في فوزها بالمونديال . وبعد شوية حيطلعوا انو قطر بتروج مخدرات . في كاس العالم الاخير ترنداد ما نامت كم يوم احتفالا باول قون يسجلوه في تاريخهم . وفي تشابه بين البلدين . صغار وجعجاعين. وترنداد وتباقو دولة واحدة . عاوزين كل الوقت ينافسوا جمايكا في الموسيقي والرياضة والسياحة .
زمان في واحد فتح بارفي الثورة الحارة الخامسة . مافي زول جاهو . كان بيناقش مشتري لتحويل المحل لي بقالة .ووتبدأ العربات تقيف . عربية وراء عربية . سألهم لي ما كنتو بتجو من زمان ؟ قالوا ماكانوا عارفين في بار في الخامسة . وكان بيمشوا لحد السوق . وعندما سألهم الكلمكم منوا ؟؟ قالوا ليه كلمنا امام الجامع . فامام الجامع في خطبة الجمعة شتم البار والفتح البار والادا رخصة لصاحب البار . ويمكن سيد الطعمية الفتح جمب البار .
في صيف 1968 قابلت استاذي والرياضي والمربي فؤاد التوم ،بعد كاس العالم الذي فازت به الارجنتين . وكنا جلوس في المطار . وتحدث الاستاذ فواد التوم عن سوء الارجنتينيين ، لانهم سرقوا شنطة فلوس فيها 30 الف دولار من غرفة عضو مجلس قيادة الثورة زين العابدين محمد احمد عبد القادر. فقلت بانفعال ,, تلتين الف دولار لقلها وين ؟ ,, وفات علي ان الجميع من سدنة مايو . وبدا الغضب علي وجوههم . وقال لي الاستاذ ,, كيف لقاها وين دي ما مخصصاته ,,. وعندما انكشفت الاوراق ظهرت اسماء كل من قبض من الطغمة العسكرية في الارجنتين لتفوز باستضافة المناسبة . ووقتها 30 الف تشترس بيتين من احسن بيوت الخرطوم .
صديقي الاسود خوسي من بيرو حكي لي ان اسرتهم كانت فقيرة لدرجة انهم ارسلوه للسكن عند الكنيسة . وان ابن عمه قد قبض في 1968 مبلغا خرافيا بالنسبة لهم . وابن العم كان لاعبا في الفريق القومي . وكان وقتها عند البيرو احسن فريق . وكانت الارجنتين ستنسحب من المنافسات في ارضها اذا لم تفز علي بيرو بخمسة اهداف . وذالك كان في حكم المحال . والجنطة العسكرية تريد الفوز ، لاطالة عمرها وللتغطية علي مذابحها وجرائمها. وفازت الارجنتين بستة اهداف . وقبض كل اللعيبة والمسئولون من بيرو . واستلمت بيرو مساعدات عسكرية واقتصادية . السؤال هو لماذا يستغرب الناس ؟ لقد كان واضحا ان قطر اشترت وماما امريكا كانت عارفة . وامام الجامع كان عارف .
كورت فالدهايم كان سكرتير الامم المتحدة . وكان بقامته المديدة يبدوا انيقا كممثلي هولي وود . وكان الجميع حتي اسرائيل تبدي ارتياحا له وتشيد به . لانه ينفذ سياستهم . ولكن عندما اراد ان يترشح لقيادة بلدة النمسا . دقوا الصفايح وطلعوا الفضايح . وسكرتير الامم المتحدة مفروض يكون اهم من رئاسة دولة . وظهرت صوره وهو ظابط من قوات الاس اس الهتلرية . وهم من اداروا معسكرات الاعتقال . وصفوا الاسري وارتكبوا كل المجاذر . وكأن تلك المعاومات لم تكن متوفرة من قبل .
وهتلر في الحقيقة اجنبي في المانيا لانه نمساوي بالميلاد والنشأة . وكان كثير من ظباط الاس اس من النمساويين وحتي بعض الاسكندنافيين . والنمساويون الي اليوم يفوقون الالمان في الانضباط والتشدد وبينهم اكبر العنصريين؟

كما اورد الاساتذة ابو رنات وبيومي في كتابهما المهم . اسرار جهاز الاسرار ، والاستاذان من ظباط الامن في زمن نميري . ولقد ذكرا ان النميري طلب تقريرا عن الوزير الجنوبي البينو قبل تعيينه . وذوده الجهاز باسوأ تقرير عن الرجل . وتاكدوا من انه سيستبعد . ولكن النميري كان يبحث عن انسان سئ ، كما يبدو . لانه عين وزيرا . وكان هذا تلميعا جعله يصير وزيرا بعد الانتفاضة ز وقبض عليه في السعودية وهو في وفد ابو صالح . وكان يحمل حقيبة مخدرات .
لقد صرفت قطر وهيأت نفسها لان تكون جوهرة العرب . وان تكون الدولة التي يعرفها ، يعجب بها ويغبطها الجميع . لماذا سوات السمكري الآن؟؟؟
ع . س . شوقي
[email protected]


تعليقات 14 | إهداء 0 | زيارات 3919

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#948475 [لوممبا]
3.00/5 (1 صوت)

03-20-2014 06:40 PM
تحياتى استاذ/شوقى والتحايا موصولة للاخوة المعلقين المتفاعلين مع مقالاتك والما عاجباهم الله يكون فى عونهم لفهم السودان وحواريه والله نعتز بيها اجمل من الحرافيش بالنسبة للمرحوم ( زينكو )له الرحمة الدوﻻرات كانت من اجل التصويت وزى ما اخد بتاعة تصويت اولمبياد اطﻻنتا من الامريكان يعنى الحكاية من كبار الدول بتدفع من اجل كسب التظيم ليه حﻻل ليهم وحرام لقطر .
مزلت فى انتظار المعلومة بتاعة التعليم الاهلى من غير البدرى الكبير تحياتى ومودتى .

[لوممبا]

ردود على لوممبا
[shawgi badrh] 03-20-2014 11:57 PM
عزيزي لوممبا لك التحية . اول حاجة امسكك معلومة . عابدين كان اسمه عابدين زي ما سمعنا امه الخالة نفيسة بتقول لية . بعدين عرفنا انه اسمو الزين . الزينكو اسم اطلقته عليه السيدة الشيكية داشا اسكومالوفا . والتي اعرفها منذ ان كانت فتاة صغيرة . وكنت صديق صديقتها الينا كالاشوفا . وتعرف صديقي عمرالعبيد بلال بداشا وتزوجها بعد ان رجع السودان عن طريق توكيلي . وهي التي اطلقت هذا الاسم علي الزين او عابدين رحمة الله عليه والذي كان صديق زوجها دكتور عمر العبيد بلال الذي كان مستشارا لنميري ووزيرا فيما بعد. والكاف والواو في اللغة التشيكية هي ياء المناداة . زي يا الزينكو او عمركو لوممبكو حسينكو .
الحاجة التانية ياخي كل يوم الناس مجنناني لانه انا بعظم في اهلي ز مع انه مع ناس بدري يجمعني القليل ز ابن عمتنا المحاضر الطيب ميرغني شكاك كتب انو بابكر بدري كان مانعهم من اللعب مع اولاد الشوارع. كتبتا ليه واشدت بكتابه بس قلتا ليه . اولاد الشوارع الكانوا بيحزروكم منهم . ديل انحنا ديل . زعل ووقف مراسلتي . حاشوف ليك دبارة للموضوع .


#948427 [عكر]
1.00/5 (1 صوت)

03-20-2014 05:49 PM
التور وقت يقع بتكتر سكاكينه...!!!!!

[عكر]

#947932 [EzzSudan]
2.00/5 (1 صوت)

03-20-2014 10:38 AM
I think Mr.Zain Alabideen had been convicted of bribery in the 80th,by the International Olympics Committee

[EzzSudan]

#947685 [بت ملوك النيل]
3.00/5 (2 صوت)

03-20-2014 02:41 AM
أحبك حقيقه و أحبك مجاز

[بت ملوك النيل]

#947609 [المتفائلة جدا]
4.50/5 (4 صوت)

03-20-2014 12:35 AM
شكرا ..شكرا كثير لأن ما تكتب فعلا يدخل علينا الفرح ..غايتو (قالوا ليه كلمنا امام الجامع) دى أظرف شىء فى الموضوع وضحكتنى ضحك ... الله يفرحك يا أستاذ شوقى ويفرح الشعب السودانى .. وإستعمالك للمفردات السودانية الضاربة فى العمق هى التى تنعش الوجدان وتذكرنا بالزمن الجميل وتخلينا نقول يارب هل من عودة تانى ؟؟
وسمكرية السياسة العالمية ديل زى ما بقولوا الحبوبات فى المثل البدوروهوا بيبلعوا ليه الظلط والبكجنوا يقيفوا ليهوا على الغلط .. غايتو كجنوا قطر ومعاها الجماعة لكن زى ما بقولوا الهنود كسيكا نقصان كسيكا فايده ..بمعنى مصائب قوم عند قوم فوائد.

[المتفائلة جدا]

#947233 [مدحت عروة]
3.50/5 (2 صوت)

03-19-2014 04:01 PM
والله مقالاتك ممتعة!!
عليك الله اصلك ما تقيف من الكتابة!!
والله يديك الصحة والعافية الاهم من الدولارات!!

[مدحت عروة]

#947193 [أيام لها إيقاع]
4.50/5 (2 صوت)

03-19-2014 03:15 PM
كتاب ( أسرار جهاز الأسرار ) من تأليف الضابط هاشم أبو رنات وضابط آخر هو محمد عبد العزيز ،،و ليس بيومي كما ذكرت يا أستاذ شوقي ، مالك الأيام دي معلوماتك كلها مغلوطة ،، بالنسبة لكأس العالم يبدو إنك تقصد 1978 ،، نعتبرها غلطة مطبعية ، لكن إختيار الأرجنتين تم في العام 1968 ،، يعني قبل مايو ، و قبل زين العابدين يكون وزير ،،

[أيام لها إيقاع]

#947104 [الديمقراطي]
5.00/5 (1 صوت)

03-19-2014 01:39 PM
اسع دي يا شوقي الجاب زين العابدين محمد احمد في سنة 1968 شنو ؟ ولا القروش دي ادوها ليهو في فترة التريننق ؟

[الديمقراطي]

ردود على الديمقراطي
European Union [فرح ود تكتوك] 03-20-2014 11:31 AM
الخطأ مطبعى يا شاطر . المقصود فى سنة 1978 م

[الخمجان] 03-19-2014 07:05 PM
هههههههههههههههههههههههههه والله ضحكتنى
عمكم خرف يا جماعة ما عاوزين تصدقونا


#946964 [المتجهجه بسبب الانفصال]
0.00/5 (0 صوت)

03-19-2014 11:41 AM
قالوا ليه كلمنا امام الجامع . فامام الجامع في خطبة الجمعة شتم البار والفتح البار والادا رخصة لصاحب البار . ويمكن سيد الطعمية الفتح جمب البار .


لقد كان واضحا ان قطر اشترت وماما امريكا كانت عارفة . وامام الجامع كان عارف .

الاستاذ شوقي والله أمثالك وحكمك الشعبية الواحد براهو مقال تحليلي ،، الله يديك العافية ،،

[المتجهجه بسبب الانفصال]

#946944 [مصباح]
0.00/5 (0 صوت)

03-19-2014 11:26 AM
قطر ستدفع أكثر الآن والثمن سيكون باهظاً جدا بالتأكيد، ستدفع الخسران والخسارة وسوء السمعة وضياع فرصة إقامة العرس الكروي فيها،حقاً كل مابني على باطل فهو باطل.. قطر تستاهل دا كلو وأكتر كمان ..ههههة .
والسؤال الآن هو: هل شيخهم القرضاوي حلل ليهم الرشوة1!؟

[مصباح]

#946869 [البيان الواضح]
5.00/5 (1 صوت)

03-19-2014 10:29 AM
اقتباس ( في صيف 1968 قابلت استاذي والرياضي والمربي فؤاد التوم ،بعد كاس العالم الذي فازت به الارجنتين . وكنا جلوس في المطار . وتحدث الاستاذ فواد التوم عن سوء الارجنتينيين ، لانهم سرقوا شنطة فلوس فيها 30 الف دولار من غرفة عضو مجلس قيادة الثورة زين العابدين محمد احمد عبد القادر) طيب انقلاب مايو في عام1969م وكلامك في 1968م كيف يكون ذلك : بعضهم يقول أن شوقي أحياناً يلقاها عايرة ويديها سوط : وهذا من ذاك

[البيان الواضح]

ردود على البيان الواضح
[shawgi badrh] 03-19-2014 04:17 PM
طيب انتا ما عارف انه المقصود 1978 لانه كاس العالم كان في السنه دي . والناس الحضروا الكلام ده وارستاذ فؤاد التوم موججودين . والمقابلة كانت في مطار هيثرو . وكان في الصيف في شمال الكرة الارضية وفي جنوب الكرة الارضية كان شتاء يمكن يجي زول يتكلم عن الطقس .

[مارس ماسك يد أبريل] 03-19-2014 03:37 PM
أخي الكريم أفهمها وهي طائرة
قال ليك كاس العالم في الأرجنتين
يعني 1978 ما 1968
واصل يا عم شوقي
ولا يهمك
نحن منتظرين التحلية

[زهجان من الضبان] 03-19-2014 03:00 PM
لا ابدا لم يغلط الحاصل كلو هي اخطاء مطبعية لا اكثر ولا اقل ... فكأس العالم نظمته الارجنتين في العام 1978 و فازت به فكان قصد الاستاذ شوقي 1978 و ليس 1968 و الذي قبله اي في العام 1974 فازت به المانيا و الذي قبله 1970 فازت به البرازيل بقيادة بيليه و الذي قبله 1966 فازت به انجلترا ... و تم الباقي ... و لا ما كده يا عمنا و حبيبنا شوقي بدري ؟؟؟؟
روق المنقة شوية

United States [ابو شقرود] 03-19-2014 02:46 PM
الأستاذ شوقي بدر الرائع درره تجمع بين الكوميديا السوداء وأدب الرحلات والتوثيق زالتاريخ والتراث أتمتع دائما بقراءة كل ما يكتبه
الطأ قد يكون من الكي بورد أو من شئ ثاني وطبعا يقصد كأس العالم بالأرجنتين وكان عامي 1970 وعام 1986
غبروا التاريخ الفوق دا في مقال الأستاذ لأي من التاريخين وسوف يستقيم الطرح والزمان والمكان

[المتجهجه بسبب الانفصال] 03-19-2014 01:24 PM
ربما خطأ في التاريخ لانو قال بعد كأس العالم الذي فازت به الارجنتين ،،، والارجنتين فازت بكأس العالم في 1978 في الارجنتين وفي
1986 في المكسيك والاثنين في عهد الراحل نميري ،،،،


#946855 [ابو علي]
0.00/5 (0 صوت)

03-19-2014 10:21 AM
غايتو جنس عبط وكلام خارج النص ، بلد مافيها تمساح يقدل فيها الفارس البطل الملاكم سليل الاسره العظيمه ووووووووووووووووووووووووووو مين كده بدري ، اهم حاجه بدري دي ظهرت

[ابو علي]

ردود على ابو علي
[المتجهجه بسبب الانفصال] 03-19-2014 01:30 PM
يا أبو علي شوقي بدري البلد خلاها قبل أكثر من 45 سنة ونجح في انشاء بزنس في شرق اوروبا البختفوا اللقمة من الفم ودي في حد ذاتها شطارة ،، وشكرا للتماسيح القاعدين في السودان وباعوهو في الدلالة لا خلو خطوط جوية لا بحرية ولا نهرية حتى خطوط الطول والعرض سرقوها اضافة لكمر السكة حديد،،، بغض النظر عن ما كتبه الاستاذ شوقي بدري لكنوا زول ناجح ،،، والغربة في زمن الانقاذ سترة حال زي ما قال الكابلي الذي برضو اغترب في آخر عمروا وبرضو ترك البلد لتماسيح العشاري ،،،


#946850 [كانت لكم أيام....]
5.00/5 (1 صوت)

03-19-2014 10:17 AM
الرائع شوقي... أشكرك حتى تستغيث!

يعجبني جداً عندك.... أسلوب السخرية اللازعة .... الموجود بين السطور....

شوف دي مثلاً: (... ويمكن سيد الطعمية الفتح جمب البار....).... الموقف كله ساخر جداً

لكن يا عم شوقي عندي ملاحظة صغيرة.... وماني مكذبك....

الملاحظة هي...

عندي قريبي ذهب للحج عام 69 وأخبرني أنه حول الجنيه ب 12 ريال وقتها ، وبالدولار كان الجنيه

السوداني يساوي 3 دولارات ...

يعني 30 ألف دولار .... تساوي وقتها 10 ألف جنيه.... يعني أحسن بيت بي 5 ألف جنيه...

طيب لماذا أصبح سعر البيت العادي... في أطراف الخرطوم اليوم.... 150 ألف دولار...

[كانت لكم أيام....]

ردود على كانت لكم أيام....
[shawgi badrh] 03-19-2014 04:33 PM
المؤلم عزيري ان البيوت بتاعة العمارات الفاخرة كلفت بين 3ال5 الف جنية واشتروها الموظفين وبعض التجار وبالتسهيلات . الارض في الثورة كانت بي 30 جنيه . ذي ما كتبتا انا قبل كده هذه فقاعات والاسعار غير حقيقية .
في بداية التسعينات كان الشقة العادية في تل ابيب بي 150 الف دولار وفي نيو يورك بي 100الف . وخارج بيو يورك ممكن تشتري بيت بي حديقة . اسرائيل عندها مشكلة اراضي . وفي بداية التسعينات استجلبوا مئات الآلاف من الاتحاد السوفيتي وبولندة وقبلهم الفلاشة .
في السودان الاراضي والبيوت ماسكاها مافية الانقاذ .


#946782 [jackssa]
1.00/5 (1 صوت)

03-19-2014 09:10 AM
... نشكر أستاذنا الجليل أبو الشوش... ودامدرمان بلد الأمان الدخلها بحمار يمرق بحصان ...قليلا من الموهبين في كتابة المقالات الساخرة ينجحون , ولكن ودبدري نجح فيها , متعك الله بالصحة والعافية ودمت لنا ...

[jackssa]

ردود على jackssa
[EzzSudan] 03-20-2014 10:52 AM
May Allah bless him.Ameen


شوقي بدري
شوقي بدري

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة