المقالات
السياسة
المدعو حسين خوجلي
المدعو حسين خوجلي
03-21-2014 12:00 PM

ماعارف ليه كلما اشوف حسين خوجلي في برنامجو بتذكر العسكري حسين بتاع شاهد ماشافش حاجه. غايتو يااستاذ حسين (زي مامسمي نفسك) عملتها ظاهره المره دي. رغم الحصيله الكبيره من اللغه البتتمتع بيها, بس الغبن كان ظاهر في وشك. ماعارف الناس التانيين كان رايهم شنو في الحلقه بتاعه الصادق, بس انا كنته شامي ريحة البزنس وليس السياسه. يعني زول بسوق في نفسو وفي قناتو بس. مسكين الشعب السوداني البقت مشاكلو بتتحله في برنامج نبت عشوائيا واصبح بي قدرت قادر المنقذ الوحيد ليو. ياخ حكايه كلما تكون عايز تعمل (بروموشن) لي نفسك تقبل علي الصادق المسكين دا بقت ظاهره. ولا عشان عارفو بتاع جهاد مدني ساي. فالراجل هسع ما رئيس وزراء ولا رجل مسئول, حكايتك معاهو شنو؟ الحكومه الاديت نفسك الحق تفلفلا زمن الصادق زي ماقلته هسع موجوده بس بي وجوه مختلفه. وانته كان راجل اتكلم في عمر البشير مش ياهو الصادق زمانو؟ ولا في بكري ولا عبد الرحيم ولا رئيس جهاز الامن عشان تعرف نجوم الليل بالضحي. نحنا عارفين لمن قبلو عليك عملو فيك شنو, بس للاسف ماعارفين رجعوك لانك عملته ليهم شنو.
مرات بتدينا الاحساس انك احسن مننا كلنا فيما يخص الصحافه والسياسه والعمل العام. دا مفهوم غلط. نحنا بنعرف بالفطره ياسياتك بس مابنقول. وكمان بنقدر نصل زيك بس ضميرنا مابسمح. يعني تفتكر عشان الواحد يبقي كوز ويتسلق دا موضوع صعب؟ ولا قايل التنظيم البتدعي انك بتنتمي ليو (تملقا) حاجه كبيره كده مابنتمو ليها الا الصفوه؟ كلها شويه دقن وجملتين حلوات وتلاته احاديث عن القوي الامين وتكون وصلته.
المشكله انته لسع راكبك وهم انو الناس بتلمو حول التلفاز وقت برنامجك. الكلام دا كان صاح في الاول لمن كلامك كان جديد علينا ونحنا كنا بنتخيل انك صحفي شريف ممكن تعكس مشاكلنا. لكن مع مرور الايام بدات تتساقط الاقنعه. ولو بتفتكر الناس مستنيه برنامجك تكون موهوم. من زمان عرفنا مويتك وفرتقنا ياحبه. نحنا بقينا لمن نمر علي قناتك ونلقاك بتتكلم بنتشاءم عديل كده, وكلامك ذاتو بقي مثير للغثيان. اوعك تفتكر انو بي شويه كلام عن المعتمد عمل شنو ولا اللجنه الفلانيه سوت شنو ولا القضاء لازم يكون شنو بتقدر تستدر عطفنا. نحنا مشاكلنا اكبر من كده بي كتير. مشاكلنا انو اي زول بتكلم في السياسه واي صحفي ماقادر يعكس وجهه نظرنا دا زول اصولي وبنفتح ليو طوالي.
الحلقه الافردتها للسيد الصادق كانت قمه في السطحيه والنرجسيه. معقول ياخي كلما تكون داير تطلع في الكفر ماتلقي غير الصادق المهدي؟ عرفنا الكلام دا في الديموقراطيه الفاتت لانو كان رئيس وزراء, بس هسع هو شنو؟ معارضه مش كده؟ انته كصحفي داير تبني امجادك بي الهجوم علي اكبر معارض في البلد؟ ولا انته متخيل نحنا كشعب بنقيف معاك لمن تعمل كده؟ تعرف من اكتر الاشياء الخافيه علي كل الناس البشتغلو في العمل العام عدم معرفتهم بالسودانيين. نحا وبي كل اطيافنا اي زول معارض بالنسبه لينا بنعتبره زول مقدس حتي لو بنختلف مع طريقتو في المعارضه. الصادق المهدي دا مهما اختلف الناس حولو ومهما قلتو انتو الكيزان فيو,حايظل شوكه حوت في حلقكم ومحبوب الشعب رقم واحد لانو ماوقف في معسكر الكيزان ضد الشعب اطلاقا. اي ممكن تكون ادواته في المعارضه مختلفه لكن لا انته ولا اي زول من ناسك بقدر يقول انو وقف ضد الشعب. عشان كده نحنا كشعب في تصنيفاتنا بنعتبر الصادق المهدي الاب الشرعي للمعارضه, ومهما عملته انته حتي لو طلعته مظاهرات بنعتبرك زول انتهازي, اقطاعي ورجل اعمال ماعندك علاقه بي مشاكلنا اطلاقا. وكل كلامك وتحليلاتك وبرامجك في قناتك او جريدتك او اذاعتك بس من اجل الكسب المالي الرخيص. يعني ممكن تتكلم في الفن والشعر بس دا مابديك الحق تتكلم بي اسمنا.
ماتقعد ياحسين..اقعد ياحسين ياخي وسيب النرجسيه بتاعتك دي. والطريق الماشي فيو للمكسب المالي بي هجومك علي لانصار والسيد الامام وعر ومليان شوك. ووهمتك انو اتفردت ليك خطبه الجمعه ماغريبه, فالائمه ياما افردو خطب لي ابليس وابولهب وفرعون. اما حكايه انك زول ما انصاري ومابتبصم بالعشره للامام فما اظن في زول قال ليك تعال ابصم. ياخ انته بصمته بالعشره للصوص وسارقي قوت الشعب, تجي تبصم للامام؟ ولا انته مفتكر مصاحبة الامام في طريق النضال مفروش بالورد والياسمين؟ زي ما انته قلته, الصحافه بتقيف ضد الباطل. حلو. الحكومه الحاليه هي الباطل ماشي علي رجلين ولو مغالط اسال اي زول. يلا ورينا شطارتك ياسي حسين.
[email protected]


تعليقات 31 | إهداء 0 | زيارات 6225

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#950767 [سوداني 100 ٪]
0.00/5 (0 صوت)

03-23-2014 01:47 PM
كلام الطير في الباقير

[سوداني 100 ٪]

#950462 [حاج ابكر]
0.00/5 (0 صوت)

03-23-2014 10:00 AM
انا كنت فاكر نفسى مثقف نص نص لكن بعد برنامج حسين و الكلام المتناقض البيقول فيهو حسين دا و الناس بيعتبروه من كبار مثقفين البلد اعلان عن نفسى و بالفم المليان (حاج ابكر من كبار رجال الثقافه
فى البلد) مع الاعتذار للبروف على شمو و العندو اعتراض اليقابنى فى قناه حاج ابكر

[حاج ابكر]

#949870 [ema]
5.00/5 (1 صوت)

03-22-2014 04:13 PM
حاجةة غريبة يا استاذ معارضة شنو البمثلا الصادق وولدو البكر مجعوص فى القصر وياكل فى قروش البلد ويشترى فى القصور ..........هوى يا ناس قرفتونا زهجتونا بالله اختونا

[ema]

#949862 [عادل]
5.00/5 (1 صوت)

03-22-2014 04:05 PM
الترابى
=الميرغنى
=الصادق
=البشير
=عرمان








الشياطين الذين دمرو السودان

[عادل]

#949822 [وحيد]
1.00/5 (1 صوت)

03-22-2014 03:23 PM
الهلس الممكيج دا داير اتفدع و يتجدع زي ما عوز قيل الناس بتتغش ... و كمان الكلاب الجربانة بقت تنبح في قادة السودان الحقيقيين .... قولوا ليهو اتخج و اترج لكن بتلحق محمد طه و امات طه...

[وحيد]

#949759 [امابي صميم]
1.00/5 (1 صوت)

03-22-2014 02:22 PM
الدكتور الرازي , فتح الله عليك ابن الشعب يا منصف , لكن هذا الحسين المتملق الزائف الجبان لايستحق مدادك هذا , انما ما خاطبته به من دارجه بارده اسلجت صدري وابانت ان هذا الشعب منصف , بفرز الشينه من الزين ويا ابو السره كج العين :), التحايا والاحترام للمعارض الاول والمبدئي والراسخ علماً وسياسه ومبدئيه السيد الصادق المهدي وتحياتي واحترامي لك

[امابي صميم]

#949710 [مدحت عروة]
5.00/5 (1 صوت)

03-22-2014 01:36 PM
الصالح العام
اعدام بدون محاكمات
خنق الحريات
شنق ناس العملة
ده كله ما كان باطل؟؟؟
وين كان حسين خوجلى ومنتسبى الحركة الاسلاموية فى هذا الوقت؟؟؟
ولا كان داك زمن التمكين واى فساد ادارى وجريمة هى لله وتمكين شرع الله؟؟؟؟
اقسم بالله الذى لا اله غيره انا مما الله خلقنى ما شفت لى حركة عاهرة وداعرة زى الحركة الاسلاموية السودانية بت الكلب وبت الحرام والله على ما اقول شهيد!!!!!!!!!

[مدحت عروة]

#949626 [ايدام]
3.00/5 (2 صوت)

03-22-2014 12:21 PM
الصادق ما رئيس وزراء ولا مسؤل !!!!!! طيب ليه كل شهر جاى مادى ايدو لمال الشعب ويقول تعويضات ؟؟؟ لماذا لم يسحب تعويضات لاهل دارفور انصار وابناء انصار شخص زي دا انانى لازم يهاجم ولولا حسين لاخذ خزينة الديمقراطية كلها باسم التعويضات ,,, برافو يا ود خوجلى

[ايدام]

ردود على ايدام
European Union [.فنجال السم عشا البايتات] 03-22-2014 03:59 PM
يا ايدام انت شخص سطحي وبوق من ابواق النظام ولا تملك ادني معرفه بما يدور حولك وكاتب كلام ركيك دعك من مصداقيته. الصادق المهدي كان رئيسا للوزراء في فترتين ديمقراطيتيبن وان كنت لا تعلم كان لا ياخذ راتبا من الدوله السودانيه واتي باختيار الشعب لا كما اتي جماعتك وشيخكم الضليل الشيخ النجدي جئتم علي ظهر الدبابات ونهبتم البلد وثرواتها حتي انت العيي الذي لا تحسن كتابة سطرين بدون اخطاء نحويه واملائيه تكون الان كوشت علي ما لاتستحقه فلا انت ولا فاتيكم الاملس حسين تستطيعوا ان تلونوا واجهات الافق بالزيف والكذب والادعاء الفارغ. لن تستطيعوا ان تحجبوا ضؤ شمس الحقيقه التي يعرفها اهل السودان والاخرون عن عفة وشرف ونبل رئيس الوزراء الشرعي السيد الصادق المهدي ولكن لانكم تفتقدون لقيم النبل والشرف بداتم تبحثون وتلفقون الاكاذيب لتلحقونها به ولكن هيهات هيهات يا ايها الدعي الصغير وفاتيكم الاملس حسين


#949561 [habbani]
5.00/5 (1 صوت)

03-22-2014 11:26 AM
تحية لك يالرازى ونامل المواصلة لانه هذا الرجل خطر على السودان زى طيب الانتباهة الذى تقزم

[habbani]

#949534 [محمد]
5.00/5 (1 صوت)

03-22-2014 11:00 AM
لا اخفى استماعى شبه اليومى لبرنامج مع حسين خوجلى واتفق معه فى اشياء كثيرة الى ان كان حلقة يوم الخميس الماضى عندما تحدث عن قرار عبد الرحمن الخضر بضم مستشفى ابراهيم مالك الى كلية الطب جامعة الخرطوم وكيف ان ناس الجامعة فرحوا بهذا القرار ولم يذكر لنا لماذا سحب مستشفى الخرطوم من الجامعة واستعيض عنها بابراهيم مالك وكيف يفرح شخص اخذ منه قلعا مليار جنيه واستعيض عنه له بعشرة جنيهات وانا المحيرنى لا مامون حميدة و لا الخضر ولا حسين زول شرح لنا اسباب تجفيف مستشفى الخرطوم ولا تحليلنا انه موقع المستشفى موقع استراتيجى ببلايين الدولارات خسارة يتعالجوا فيه الرجرجة والدهماء من السودانيين ةواكاد اجزم واكاد اقسم لمعرفتى اللصيقة بهؤلاء ان هذه هى العقلية التى يتعاملون بها

[محمد]

#949428 [agadir]
5.00/5 (1 صوت)

03-22-2014 09:34 AM
كلو فيل ابيض
عند حسين خوجلى
فهو لا يرجع الى مايقوله الاخرون عنه
الا اذا كان بحجم السيد الصادق

[agadir]

#949360 [ريمبات]
5.00/5 (1 صوت)

03-22-2014 07:28 AM
لافض فوك
100% يرافو

[ريمبات]

#949266 [د. محمد عبد الرازق سيد احمد]
1.00/5 (1 صوت)

03-22-2014 12:29 AM
السيد الدكتور الرازي المحترم .. تحياتي لك كلامك في محله في شان الاسمه حسين خوجلي .. لكن انا
عاتب عليك كتير .. ترد عليه .. خسارة قلمك العظيم .. وانت العالم بأن الله خلق الماء والطين
فغلب الطين الماء فصار حجرا .. وغلب الماء الطين فصار بشرا ..والمدعو لا هو بشر ولا حجر وبمعني آخر فلاهو انثي ولاذكر والزيه الناس بتتبرا منه والنظام لما اتقبل عليه انقلب انثي وتمحور ويريد ن يكون ذكر وبسطاء سعبنا مسمينه ليلي علوي واريته كان حصل مكانتها والامه
السودنيه منكوبه بامثاله .. والوقت الان لايسمح بالتحول من القضيه الاساسيه حتي يصبح مثل هذا ملهاة فهو زيل .. واذا انقطع الراس سينتهي الذيل .. وهو يعرف نفسه كويس .. يبقي خليك منه واهتم باكوام الظلم الواقعة علي بلادنا .. وارصدها لان يوم الحساب قادم لامحاله .

[د. محمد عبد الرازق سيد احمد]

#949257 [اسامة على]
0.00/5 (0 صوت)

03-22-2014 12:10 AM
قلنا ليكم من زمان ان الاستاذ حسين خوجلى يذركنا باغنية الحقيبة ( جسمى المنحول)خصوصا المقطع البقول
الساحرة عقول
بروق فى غيم ولادر فى لمى
خدودك ام ازهار فى حقول
تركنى هواك بين مين وحى
تررررررم

[اسامة على]

#949214 [مدثر موسي]
0.00/5 (0 صوت)

03-21-2014 11:00 PM
يا دكتور مالك مسخن كدا الحاصل عليك إيه.. بشويه...بشويه... كيف أخبارك

[مدثر موسي]

#949213 [صالح الشفيع النيل]
5.00/5 (2 صوت)

03-21-2014 10:59 PM
دكتور الرازي ده يبدو انو اسم علي مسمي. يعني ما زي الدكاترة وناس الماجستير المضروبين بتاعين الزمن ده.كلامك بالدارجي جميل ومفهوم.يا دكتور الرازي في ناس غنوا( يعني بقوا أغنياء) من شتيمة الامام الصادق المهدي. والامام ما برد عليهم لأنو زول مؤدب.في أغلب الأحيان بردوا ناس رباح وأم سلمة ومرات مريم وبعض الناس الكبار زيك( كبار في الثقافة مش في السن ).قبل سنة كده كنت بكتب بشكل شبه منتظم في الراكوبة وسودانايل وأحدي الجرائد الورقية.وفي يوم من الأيام قام واحد كبير جداً في منصبو السياسي أداني معلومات وقال لي لازم تشتم الصادق المهدي في الجرايد.قلت ليه دي معلومات عاديةوبعدين الراجل ده ما هين عشان أنا أشتمو بدون سبب ، بل بالعكس أنا بحترمه وبحبو.قال لي لازم تشتمو .قلت ليه خلاص أنا بكتب المقال لكن توقع عليه انت. قال لي أنا كان وقعت بعرفوني عشان كده أحسن تكتبوا انت عشان انت ما معروف وبقولو دا رأي الشارع في الصادق المهدي. قلت ليه كويس ومن يومي داك هربت بجلدي من الزول ده وما دخلت مكتبو تاني.وفي يوم من الايام قلت لواحد صاحبي - بدون مااديو الخلفية دي - أيه رأيك لو الواحد قام شتم الصادق المهدي في الجرايدعشان يظهر.قال لي يا زول انت مجنون ولا شنو.كلها عربيتين من النيل الأبيض مليانة بالأنصار يجوا الخرطوم يفتشوا علي الزول البشتم الامام ده منو.بعد كده شوف ليك حفرة أدخل فيها.من يومهاأنا شلت شتيمة الامام خالص من راسي.بل قابلتو في احدي صالات الزواج قبل شهور فمشيت ليهو وسلمت عليه لأول مرة في حياتي.وكان الراجل غاية في الأدب والرقة مع الجميع.القصة دي حقيقية وقد تكون مرحة بعض الشيء.ماقصدت الوصول اليه انو البلد دي ما بحل مشاكلها الهجوم علي الامام أو الهجوم علي المراغنة أوغيرهم .البلد دي في ناس حاكمنها بالحديد والنار من 25 سنة.انتو شايفنهم وعارفنهم.يااخوانا انتو شايفين الفيل تقوموا تطعنوا في ضلو . عيب الكلام ده.تحياتي لك يا دكتور الرازي والتحيات موصولة للمناضل الامام الصادق المهدي وتحياتي لكل رموزنا الوطنية في الشمال والشرق والغرب والجنوب.والتحية لكافة كتاب وقراء الراكوبة المهمومون بمشاكل الوطن الجريح.

[صالح الشفيع النيل]

#949197 [محب الأكواز .. !]
3.00/5 (2 صوت)

03-21-2014 10:05 PM
يا مصطفي محمد صالح أولاً أنا متأكد أنو ده ما إسمك .. ونوعك دة ما عندو شجاعة يعلق تحت إسمو الحقيقي .. و لما تكون عايز إسم غير إسمك للتعليق أبعد عن أسماء الأنبياء و الرسل و أرشح ليك كوز إبن كوزة .كإسم للتعليق .. ثانياً إن طالب الصادق بالتعويضات فهذا من حقه زي أي مواطن الحكومة لو صادرت منو حاجة حيطالب بإعادتها أو تعويضهُ عنها و ده تصرف طبيعي ما فيهو حاجة .. لكن ممكن يكون لك مأخذ في أنو التوقيت غير مناسب أو أي سبب آخر .لكن مافي زول بيخلي حقو للحكومة إلا يكون منتفع و خصوصاً زي حكومتك دي ! و بعدين إنت رجل كاذب و أبوك و أمّك علموك الكذب .. ده لو كان في أبو و أم ؟ للأنو الخزينة بعد نميري ما كانت فاضية لأنها ما خزنة دكان زي ما إنت بتفتكر و الراجل من ما ولدونا ما سمعنا أفسد أو شال حق زول أو أساء حتي لي زول .. .. و أخيراً شايفك بتسأل ببراءة لو في حاجة في حسين خوجلي ما عاجبة الكاتب ؟ .. ! يا راجل ؟ إنت بتسأل عن جد ؟ و لا خجلان تقول ؟ إنت ما عارف يا هناي ؟ .. حسين خوجلي ما هناااي ! و منتفع و بكسر التلج و بشعل الفتن و كان يروِّج ضد الديمقراطية في ألوان و بطبِّل للكيزان و من فوق يشبه الناس و من تحت خزَّان .. و لو ما عارف يا هناي كمان شارك مع الإنقاذ خمسة و عشرين سنة في تضييع البلاد و إفقار العباد .. و شارك في الفساد و قاعد في البرلمان لمّا المؤتمر الوطني دمر الإقتصاد و فصل الجنوب و حرق البسطاء في دارفور و فقأ عين حليمة و قتل عوضية و انتهك الحرمات و سحل الشباب و أشعل الحروب في كل جهات الوطن و لم يفتح الله عليه بكلمة حق طوال هذا الربع قرن .. أها حسي بستقل أنصاف المتعلمين و المسطحين .. أي نعم هم متضايقين من الإنقاذ و كرهو الإنقاذ لكن صغار .. ما عارفين حاجة و لا حضروا حاجة ولا قروا حاجة ولا عندهم خبرة في حاجة و لا محتاجة .. مساكين .. لكن نحن بنشرح ليهم و بنوريهم و بنفَهِّمُن ! و كلامي ده ما تنقيص من شأنهم ولا تقليل من قدراتهم لكن ده واقع و ما عندهم إيد فيهو و حيتم معالجتو و تحسينو .. ناس بلغوا الرشد في زمن الإنقاذ و الإنقاذ ما عندها شي و طبعاً ما بتقدر تديهم أكثر من العندها .. إنشاء الله تكون قرّبت تفهم

[محب الأكواز .. !]

#949192 [د محمد]
5.00/5 (2 صوت)

03-21-2014 10:00 PM
قروش التعويضات مطالبه ولا ادوهم ليها جد جد؟ اذا مطالبه حسين زعلان ليه مش اي زول عندو الحق يطالب بي حقو زي ماعمل هو زاتو؟ مش حقو يستني الحكومه حاتعمل شنو ولو ادوهم بعدين يتكلم؟؟ ولا بفتكر حسين ممكن الحكومه تديهم قروش اكتر من مطالبتهم. دي لو حصلت بتبقي مشكله الحكومه مش حزب الامه. بعدين هو ليه داير يوروهو تفاصيل مطالبتهم اصلو هو الحكومه؟ اي زول عندو الحق يطالب بالحاجات الصادرتا منو الحكومه حتي الشعبي طالب بي المعدات بتاعه جريدتهم ولا حزب الامه دا بس حسين داير يعملو مطيه يتسلق بيها؟؟ اما حكايه المحكمه فماتفتكر انو دا اكتر تصرف حكيم من الحزب الامه انو يلجا للقضاء. بس بعد كده شد حيلك فناس الامه الهسع ماناس الامه بتاعه اواخر التمانينيات. معقول ياحسين في الوكت الاتكلمته فيو في الموضوع دا كان في طالب جامعه الخرطوم الكتلو تقوم تمر علي الخبر دا ساي كده؟

[د محمد]

#949189 [zoalcool]
0.00/5 (0 صوت)

03-21-2014 09:55 PM
هههههههههههههههه.والله يا دكتور فهمتو حاجه هذا الحبيس الدسم

[zoalcool]

#949172 [زردية]
5.00/5 (1 صوت)

03-21-2014 08:51 PM
القمته حجرا

[زردية]

#949150 [شمال و جنوب فى محنة]
5.00/5 (1 صوت)

03-21-2014 07:42 PM
يا جماعة ده ولد مطرطش سوتو ليييييييهو راس و قعر القعر في لكن الراس فاخورة و دين المسيح الزول ده قديتنا بيهو قد شوف لينا حلل من الخولات البطبل ليهم ديل ما شفتو ناس بورسودان عملو شنو بس سو زيهم و لومونى لو ود مطهرة تانى فتح بقو ده الشغل سوطى و سوطك نشوف الاقوى ياتو

[شمال و جنوب فى محنة]

#949057 [شهيد مشروع الجزيرة]
4.13/5 (4 صوت)

03-21-2014 03:53 PM
نجحت الانقاذ في إزلالها للشعب

كما نجحت في توجيه سهام معارضيها

نحو معاريضيها . شوف الشعب الجبان

ده بعد الذلة والإهانة والإستعباد

الذي الحقته به الإنقاذ والكيزان

مازال يغض الطرف ولا ينبت ببنت شفة

لكن شاطر في توجيه النقد وقلة الأدب

نحو الصادق المهدي لماذا الصادق ؟

الصادق جاء للحكم بدبابة؟ الصادق باع

جنوب السودان او تنازل من حلايب او الفشقة؟

الصادق فتح بيوت الأشباح؟ الصادق دمر مشروع الجزيرة؟

الصادق جاب القوات الأجنبية لتحتل دارفور؟ الصادق أشعل

الحرب في جنوب كردفان والنيل الأزرق؟ الصادق جاب المشروع

الحضاري؟ الصادق جلدد الصحفيات أو قتل عوضية أو أستباح

حرم الجامعات؟ الصادق حرم المواطن من التعليم والعلاج المجان؟

هذه المنكرات كلها جاءت في عهد الانقاذ التي ألجمتكم وأخرستكم

للأبد واليوم تجعلون الصادق شماعة لإخفاقاتكم وجبنكم وخوفكم

ماذا تريدون من الصادق أيها الجبناء؟ عينكم في الفيل وتطعنوا في ضله

يا أشباه الرجال ولا رجال.عالم مابتستحي.

[شهيد مشروع الجزيرة]

#949042 [الاصم]
3.00/5 (2 صوت)

03-21-2014 03:35 PM
القضية ليست فى نقد زيد او عبيد فالصادق المهدى لاتخلو الصحافة اليومية من نقده كل يوم .........القضية فى اسلوب حسين خوجلى المستفز يتحدث وكأنه العاقل الوحيد فى السودان والمبصر لقضاياه...........
فمشكلة حسين ليس الصادق فقط وانما مشكلته فى اعتقاده فى نفسه وفى بدايته مع هزه القناة وصفه بعض الاسلاميين بأنه يمجد الانصارية والدعوة المهدية
صراحة الزول دا غاية فى الميوعة الاعلامية لا أدرى لمازا

[الاصم]

#949041 [Amin]
3.00/5 (2 صوت)

03-21-2014 03:34 PM
ما في حركة شعبية بتنجح لو ما وقف فيها سيد صادق


أهل الإنقاذ يعلمون هذا جيداً ...لذلك نشطوا هذه الأيام

[Amin]

#949033 [حلقة حسين خوجلي في الصادق]
5.00/5 (1 صوت)

03-21-2014 03:20 PM
حلقة حسين خوجلي في الصادق لم تسر الا الحاقدين و الحاسدين امثال حسين خوجلي

[حلقة حسين خوجلي في الصادق]

#949030 [لقد انصفت الصادق ايها الكاتب]
3.00/5 (2 صوت)

03-21-2014 03:16 PM
لقد انصفت الصادق ايها الكاتب( د. الرازي)...هذا بالضبط ما يفعله هذا الحسين خوجلي.... و حسين خوجلي يجب ان يساءل لانه من الذين ضيعوا الديمقراطية

[لقد انصفت الصادق ايها الكاتب]

#949016 [ود البطانه]
5.00/5 (1 صوت)

03-21-2014 02:56 PM
الشماليين وعملاءهم اصيبوا بالجنون!! مين الصادق المهدى الدنقلاوى حتى تغضبون له !! واصل يا ودخوجلى وهم كعادتهم الشماليين عندما يوا نجاح ابناء الجزيره يصيبهم الجنون

[ود البطانه]

ردود على ود البطانه
United States [محب الأكواز .. !] 03-21-2014 08:28 PM
يا ود البطانة أنا عملت تحليل لي تعليقك فوجدتك رجل سازج و فاقد تربوي .. لما تحاول تتحدث بطريقة جمعية عن ناس الشمالية أو الشرق أو أي مجموعة من مواطني السودان أنهم يفعلون كذا أو كذا ضد مجموعة أخري فهذا عين الجهل و الفكر المسطّح .. في كل جهة من هو سيئ و في كل جهة أيضاً من يعمل صالحاً .. و زي أسلوبك ده في إشعال الفتن عفي عليه الزمن و عقول الناس تجاوزته ! .. وظاهر أنك لا ود بطانة لا غيرو .. لكن ود مايقوما ممكن !.. و طبعاً لك علاقة مهنية منذ الصغر مع من تدافع عنه .. خسئت

[أرض البطانة] 03-21-2014 07:03 PM
كل السودان أهل الامام وخاصة اهل الجزيرة ......... فأهل الامام بالجزيرة اكثر من أهلك .......
وهزا فقط للتوضيح......


#948977 [مصطفي محمد صالح]
5.00/5 (1 صوت)

03-21-2014 01:57 PM
أ الموضوع في غاية البساطه الصادق المهدي ده من الديمقراطيه الثالثه بقول عاوز من الحكومه قروش ولولا الخزينه كانت فاضيه بعد سقوط نميري ماكان قصر كان شال الكاش الفيها لكن لقاها فاضيه .......الان نفس الموال شغال كلام حسين واضخ وافتكرحلقة يوم الاربعاء وضحت الصوره ...أنت في شي في حسين ما عاجبك ساكت ....اصلوا نجاح حسين كأعلامي بألم الكثيري......؟؟؟؟

[مصطفي محمد صالح]

ردود على مصطفي محمد صالح
United States [انت مهزلة] 03-22-2014 11:10 AM
تعليقك ****..حسين اعلامي ناجح!!!!!!!!!!!!!!!! ما هذه المهزلة

[سامي] 03-22-2014 10:51 AM
الصادق المهدي هو الرئيس الشرعي للسودان حتى الان وهؤلاء المعتوهين الذبن قتلوا الناس وافسدوا البلاد انما هم نبت شيطاني لا علاقة لهم باهل السودان الحقيقين فالصادق المهدي هو ابن السودان الحقيقي وان كانت له املاك فلياخذها لان هذا حق وانتم يااولاد الكلب اين مشروع الجزيرة واين البواخر واين السكة حديد واين الاراضي واين الجنوب والتقسيم جاي على جبال النوبة والنيل الازرق ودارفور واين حلايب واين الفشقة بل واهم من ذلك اين الملايين الذين قتلتموهم وعذبتموهم هل الصادق قتل او عذب او فرط في ارض السودان أيها الانجاس الملاعين اذهبوا الى الجحيم وصدوا الابواب من خلفكم


#948960 [أبوعلي]
4.63/5 (5 صوت)

03-21-2014 01:27 PM
نحنا كشعب في تصنيفاتنا بنعتبر الصادق المهدي الاب الشرعي

مافي فرق بينك وحسين خوجة ، إنت تتكلّم باسم الشعب بتخويل من منو؟
ياخي إنت كدت أن تجعل من الصادق الاها ، إنت عايز تبقى وزير مع الصادق؟
قال: الصادق (أكبر معارض في البلد) تبّا لمعارضة يكون الصادق جزءا منها دعك من (أكبرها
وقال:(حايظل شوكه حوت في حلقكم ومحبوب الشعب رقم واحد لانو ماوقف في معسكر الكيزان ضد الشعب)
ياخي الصادق هو الرافعة النشلت البشير وبقيّة الزبالة من محرقة الشعب ومكنتهم ومازالت
الصادق هو الفرتق المعارضة في الخارج بالقاهرة وأسمرا و الداخل الآن. أنسيت أم تناسيت!
80% من مآسي النظام الوقح الحالي يتحمّلها الصادق بلولوته ودعمه الخفي لأطالة عمر النظام
هذا رأيي الشخصي كمواطن مفجوع في الكيزان والصادق والميرغني ، ولا أعبّر باسم الشعب كما (أنت )

[أبوعلي]

#948957 [لن ترتاحوا يا لصوص]
5.00/5 (1 صوت)

03-21-2014 01:20 PM
يستاهل الصادق المهدى لانو منبطح وكايس حقوقو من هؤلاء بدل يقود المعارضة ويسعى لان يجيب حقو بايدو .. يهادن هؤلاء ويطلب منهم اعطوه او منعوه حتى اصبح اسيرا لمثل حسين خوجلى ينتقد فيو صباح ومساء : تعال نتحاسب قال !! البسمع كلام المنافق حسين يقول حول قروش السودان لآل بيته ..نقول للصادق وللانصار عموما خصوصا الشباب الرد على امثال حسين خوجلى يكون فى الملعب السياسى وتقود المظاهرات بى نفسك ..واقسم لك ان الكيزان سياتوك جريا حتى بيتك ويركعون لك ويقولوا ليك داير كم مليار ؟؟ ولا كم الف فدان ؟؟ ولا نديك حلايب والفشقة ودار فور .. وقتها ستقول لهم انا داير السودان موحدا اخرجو من هنا ..

[لن ترتاحوا يا لصوص]

#948934 [خالد]
5.00/5 (2 صوت)

03-21-2014 12:51 PM
للاسف لم تكن منصفاواشتمل خطابك كثير من الاسفاف والمتناقضات , ليس حسين خوجلى بالرجل الصالح ولا انتم ايضا . واليك هذا :

(انته كصحفي داير تبني امجادك بي الهجوم علي اكبر معارض في البلد؟ )

بالله عليك الصادق المهدى اكبر معارض بالبلد ؟ وهل يعمل ابنه بمنسقية المعارضه فرع الحكومة.

(حتي لو طلعته مظاهرات بنعتبرك زول انتهازي, اقطاعي ورجل اعمال ماعندك علاقه بي مشاكلنا اطلاقا)

من الذى اسس الاقطاعية فى السودان ؟ اذهب وشوف جهد وعرق المتعبين فى الجزيره ابا بيمشى وين.

(ولا انته مفتكر مصاحبة الامام في طريق النضال مفروش بالورد والياسمين؟)

نعم هو مناضل ولكن من اجل ابنائه فقط .

[خالد]

ردود على خالد
United States [خالد] 03-22-2014 10:06 AM
كونى ادعى الفهم هذا شى لاشك فيه طالما انك لم تستطيع تفنيد او تكذيب ماكتبته فى مداخلتى , بعدين اسمع يا اخوى نحن بنناقش الفكرة (الفعل) وليس الاشخاص والصادق المهدى شخصيه عامة ومن يقدم نفسه للعمل العام يجب ان يتحمل انتقاد الناس ولو ما بيستحمل يقعد فى بيته .
الفكره ببساطه يا اخوى (اذا كان حسين خوجلى شيطانا فهذا لايعنى ان الصادق المهدى من الملائكة فهمت يا اخوى لانو لو قلنا كده بنكون دسسنا السم فى العسل.

طيب كدى خلى كلامى ده شوف كلام الشريف زين العابدين الهندى هل هو فاقد للمصداقية ايضا.

http://www.youtube.com/watch?v=C9kGbriQ51s

United States [عاصم] 03-21-2014 09:43 PM
اخي الاستاذ خالد بعد التحية اود ان اعلق على ما كتبت .ان ما كتبته اصاب عين الحقيقة واضيف لاقول من الصادق من المسؤل عن فشل كل فترات الديمقراطية في السودان اليس خبث هذا الصادق يجب على الناس قراءة تاريخ السياسة في السودان بعد الاستقلال لتتضح لهم الحقيقة المرة .وبعدها الكل سيكون له راي اخر

United States [يعني انت اللي بتفهم يا خالد؟؟؟] 03-21-2014 03:11 PM
يعني انت اللي بتفهم يا خالد؟؟؟؟ انت ذاتك يا خالد زي حسين خوجلي... عايز تنفث سمك و تسئ للصادق المهدي.... ردك هذا في حق الصادق يفتقد للمصداقية


د.الرازي الطيب ابوقنايه
د.الرازي الطيب ابوقنايه

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة