إلا في الأمازون
03-22-2014 01:19 PM


(1)
طبيب يتجه إلى مستشفى (أمازونيا) الحكومى حيث يعمل (عشان يمسك الوردية بتاعتو) فيفاجأ وهو يهم بالدخول بأحدهم يمنعه من الدخول :
- يا دكتور معليش مافي ليك طريقة تدخل؟
- يا خي أنا دكتور شغال هنا !
- يا دكتور أنا عارف إنك دكتور لكن خلاس شركة (صحة وعافية) مسكت المستشفى ده
- يعني شنووو؟
- يعني البشتغلو هنا إلا الدكاترة والسسترات والممرضين التبع الشركة
- وبعدين ؟
- بعدين كدي أمشي قدم ليهم أوراقك كان أخدوك تعال بندخلك !!
(2)
مسافر عائد يتجه إلى كاونتر الجمارك وهو يحمل شنطته التى أخذها لتوه من السير … يضعها أمام رجل الجمارك الذي يقوم بفتحها وإفراغ محتوياتها .. ثم
- شايل ليك تلاته موبايلات وكمان كووولهم (ثري نوت) ؟
- وفيها شنو ؟ واحد ليا والتاني هدية لزوجتي والتالت للولد
- لكن الكلام ده ما مسموح بيهو .. مسموح ليك بجهاز واحد بس
- والعمل ؟
- العمل تخلي لينا واحد هنا وتشيل الباقين
- لكن ده إبتزاز ؟
- إبتزاز ما إبتزاز تخلي واحد وللا ح (نجمركم) ليك كووولهم
- ده كلام غريب والله … رئيسكم وين؟
- (مبتسماً) : هناااك في المكتب الفيهو المكيف دااك لو عاوز أمشي ليهو
- (يتجه إلى المكتب) :
- السلام عليكم
- وعليكم السلام .. يا أخي العسكري بتاع الجمارك داك قال ليا يا يشيل موبايل من التلاته موبايلات دي يا (يجمركم) كووولهم .. يااخ معقوله بس ما ..
- (وهو يخمش موبايلين) : عسكري شنو يا مواطن .. ده ما عسكري .. الجمارك دي ما بقت ماسكاها شركة (تتجمركون) !!

(3)
هرج ومرج وصياح بعد أن توقفت عدد من البكاسي ونزل منها بعض الأفراد المدججين بالسلاح والخراطيش السوداء وهم يرتدون زياً موحداً يشبه إلى حد بعيد ذي قوات الشرطة الأمازونية إلا أن لونه كان (بمبياً) ، يهجمون على ستات الشاي والفريشة ويضعون كل من لا يبرز رخصة (المحلية) في (البوكس) هو (والعدة بتاعتو) !
حوار يدور بين بعض المواطنين الذين يشاهدون في المنظر :
مواطن (1) : الله لا كسبكم والله بس قوات صاقعة
مواطن (2) : ما لازم يكونو شرسين كده إنتا ما عارف؟
مواطن (1) : عارف شنو؟ ناس المحليات ديل والله جنو!!
مواطن (3) : الظاهر أخونا ده ما ناقش حاجة !
مواطن (1) : يا جماعة ما توضحو ليا ما ناقش شنو؟
مواطن (2) : ياخي ديل ما تبع المحلية ديل تبع شركة (العصبة لخدمات الكشات السريعة) .. الظاهر عاوزين يطلعو ثمن العطاء الوقع ليهم من المحلية في يوم واااحد !!
(4)
الشعب الأمازوني يصطف على شارع طويل لمشاهدة طابور عرض عسكري في إحدي المناسبات الوطنية :
(مواطن أمازوني بيشرح لأخوهو المواطن الأمازوني) :
- شفتا البنات الشايلات كلاشات ولابسات أصفر مبرقع ديييييك
- شفتهم .. مش اللابسات (طرح) بيجية (وجاكات) ديييك
- أيواا
- أها ديل تبع شركة (نسيبة للدفاع عن الوطن)
- والرجال الشايلين الآر بي جي
- ديل ناس شركة (أبودجانة للراجمات)
- طيب والعربات المصفحة الأسود بأبيض ديييك
- لا دي تبع شركة (اللموزين الحربي)

(5)

مواطن أمازوني يمسك بالصحيفة اليومية ثم يضعها ويصفق قائلاً :
- والله ياهو ده الفضل !
- مالك يا أبو محمد (الأمازوني طبعن)
- تعالي شوفي الخبر ده
- خبر شنو كمان ؟
- قال ليك ( شرطة السجون الأمازونية) تشتبك مع أفراد شركة (أب عضل لخدمات السجون) عشان عاوزة تمسك منهم كل سجون الأمازون !!
(6)
أمام كاونتر البلاغات (قسم شرطة أمازونيا الأوسط) مواطن أمازوني يحمل عريضة في يده ويريد فتح بلاغ
- يا حاج كده بتأخر نفسك ساااي قلنا ليك لو الليلة لفيت أمازونيا دي كووولها ح تلاقي كل الأقسام ما شغالة
- لكن معقولة بس قسم شرطة يكون ما شغال؟ كيف الكلام ده
- ما قلنا ليك يا حاج (الشركة دي) بتقفل في حساباتا عشان آخر السنة
- شركة شنووو؟ إنتو ما ناس الشرطة ..
- شرطة شنووو كدي عاين ليا كده لبسي ده لبس شرطة؟
- مال إنتو منو؟
- نحنا يا حاج شركة (ذو البأس للخدمات الأمنية) .. فزنا بالعطاء بتاع (فتح البلاغات) وكمان في شركة (الكلبشات المنيعة) فازت بالعطاء بتاع (الحراسات) !!
- والشرطة مشت وين؟
- الشرطة الأمازونية إتفرغت للمهام الجسام !! وما تودينا يا حاج في داهية !!

- كسرة :
الشعب يريد شعب جديد !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)؟


تعليقات 17 | إهداء 1 | زيارات 5647

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#951349 [howida]
2.00/5 (1 صوت)

03-24-2014 05:26 AM
صحى قبيل ماشة فى شارع افريقيا اتعجبت من اليافطه المكتوب فيها شركه مطار الخرطوم ده كﻻم

[howida]

#951223 [كومي كوكو]
0.00/5 (0 صوت)

03-23-2014 11:48 PM
اليوم اول مرة اسمع بان هنالك منظمة اسمها ( مبادرون ) وامكن هذه على وزن يكنكشون، ويدجلون، ويعتقلون، ويفلسون، ويغتصبون ..........الخ

[كومي كوكو]

#950893 [osama dai elnaiem]
5.00/5 (1 صوت)

03-23-2014 03:47 PM
كسرة الرئيس يريد شعب جديد(افني القديم طبعا بالحروب)-- مع تحياتي

[osama dai elnaiem]

#950783 [aburadi]
4.50/5 (2 صوت)

03-23-2014 01:56 PM
خط هيثرو يا الفاتح؟

ما سمعت بالجماعة ديل باعوا خط أمبده؟

خليك في تساؤلاتك دي لحدي ما يبيعوا جلابيتك اللابسها دي ....

ياخي دول يبيعوا ناقة الله وسقياها .....

كدا قول لي بأمانة البلد دي فضل فيها شنو الما باعوه أعني في الداخل والخارج ....

كمان المنظراتيه بتاعيمهم بيروجوا اليومين دول في (مبدأ عفا الله عما سلف) .

يعني عاوزين (يكاورونا) عشان ما في مظلوم يتجرأ ويطالب بحقه ....

[aburadi]

#950656 [daim mitry]
4.00/5 (2 صوت)

03-23-2014 12:15 PM
شكرا استاذ جبرا لكن الواقع أبلغ من كدا؟؟؟؟؟؟؟؟؟؟؟؟؟

[daim mitry]

#950566 [Abdo]
5.00/5 (1 صوت)

03-23-2014 11:06 AM
و الله إنك صامد ياجبرة ،، أحيي فيك الروح التي لا تلين ،،، أمام شركة تأمنون

[Abdo]

#950512 [ابو محمد]
5.00/5 (1 صوت)

03-23-2014 10:29 AM
بعد شوية حيفكر كوز كبير في عمل شركة اسمها تتناكحون وهي طبعا مسئولة عن عقود الزواج في السودان الفضل وبرضه شركة اسمها تتراقصون ودي مخصوصة لبشه وكده ههههههههههههههههههههه محن الزمان الزول ضعيف وجعباته سمان ههههههههههههههههههههههههه

[ابو محمد]

#950484 [غليان]
3.00/5 (2 صوت)

03-23-2014 10:11 AM
محن !!!

[غليان]

#949974 [mohammadsaad]
1.00/5 (1 صوت)

03-22-2014 06:45 PM
انت ما هاجرت لأمازونيا مالك ومال هثرو شوف ليك نغمة ثانية مش كسرة إن شاء الله من شركة (بيت الكلاوي البتزيد البلاوي)

[mohammadsaad]

#949918 [سواق الليموزين]
4.00/5 (1 صوت)

03-22-2014 05:20 PM
بس أوعا طيارتك ما تأخرت عند احتلال مليشيات شركة أواب الأمنية لمطار الخرطوم الاسبوع الماضي !!!!

[سواق الليموزين]

#949874 [غردون]
5.00/5 (1 صوت)

03-22-2014 04:20 PM
ضحكتنى وانا عيان
الله يخليك يا جبرا

[غردون]

#949873 [ابراهيم الحسين]
0.00/5 (0 صوت)

03-22-2014 04:19 PM
وزير الاستثمار مصطفى اسماعيل ليه ما بيعرض علينا نحن المغتربين
الإستثمار البيجيب الدهب الاصفر ده بس جارى ورا الاراضى الزراعية والكلام الفارغ ال ما يجيب
حصته ال هو بياخدها انا خبير فى جمع النفايات من القصور بما فيها القصر الجمهور خبرة 40 سنة فى الخارج

[ابراهيم الحسين]

#949849 [مواطن علي حسن]
0.00/5 (0 صوت)

03-22-2014 03:46 PM
خلاص شركة تتشعبون حتوفيرليكم شعب!!!!!

الريس بتجبوا من وين!!!!!!شوفوا ناس شركة تنهبون!!او شركة تتحوشون!!!

[مواطن علي حسن]

#949844 [julgam]
1.00/5 (1 صوت)

03-22-2014 03:45 PM
الشعب يريد شعب جديد !!..الله يخت محنك ياود جبره والله لو بتضرب السجاير الهناى داك ما كنت جبت أمازونيا دى ..ياخى بالواضح أمازونيا تريد شعب جديد..وعلى فكره ما باقى ليك الكيزان ديل ما عندهم فكره باستبدال الشعبالفضل بشعوب الجوار..كدا إتلفت حولك واحسب..شايف شنو؟

[julgam]

ردود على julgam
United States [محمد حسن] 03-24-2014 10:29 AM
فعلاً يا جولقام الخرطوم صارت لحم راس وكلها أجانب .. زمان لما تقوم مظاهرات تاني ما بتقيف لأنه الناس كانت حاسه ببعض يعني كلمتهم واحدة ورد فعلهم واحد ضد أي طاغية وتغيير الشعب اللي حصل زي ما قلت محل ما تتلفت تلقى شكل وهذه هي إستراتيجية هذا النظام الخبيث كل واحد من هؤلاء الغرباء إذا كانو من الداخل أو الحارج كل واحد فيهم يقول ياروحي من أول بمبانه كلهم يرقدو صوف وإنت واقف تتحير الناس دي قلوبهم ماتت ياربي ولا الحاصل شنو..


#949812 [fattah]
0.00/5 (0 صوت)

03-22-2014 03:16 PM
والله يااستاذ ده الحصل بالظبط لجماعة امن النقل الجوى وطبعا فى مطارات امزونيا وكده لكن يظهر انو الجماعه حصلو الموضوع وفهموهم ان التمكين فى الحته دى صعب وجماعة قون امازون شالو العده ورجعو

[fattah]

#949796 [وحيد]
5.00/5 (1 صوت)

03-22-2014 03:02 PM
ما يبدو خيالا يصبح حقيقة ..... حكومة ود اب زهانة تقوم بخصخصة و تخصيص كل الخدمات و الإدارات الحكومية المدنية و العسكرية ... و كلها حتكون تبع شركات يملكها أصحاب الايدي المتوضئة- بالبول طبعا- .... و اهو ... كله لله

[وحيد]

#949722 [دا كلام ما صاااااح]
4.50/5 (16 صوت)

03-22-2014 01:46 PM
وقف السيد رئيس الجمهورية وهو يخطب بانفعال فى يوم عيد ثورته المجيدة
وبعد انتهاء الخطاب ، دخل الإستراحة مناديا لمدير مكتبه التابع لشركة (مطبلون)
الرئيس : الناس الجبتوهم ديل مالهم مضبلنين كدى ؟؟
مدير المكتب: سيادتك ناس الهجيج بتاعين السنة الفاتت كانوا تابعين لشركة (يتراقصون)
لكن الشركة قالت انهم محجوزين للوالى فى افتتاح الكشك الجديد .. ديل ناس شركة (يرتعون) التابعة للمعتمد

[دا كلام ما صاااااح]

ردود على دا كلام ما صاااااح
United States [دا كلام ما صاااااح] 03-22-2014 07:33 PM
شكرا يا هندسة على التعليق
جبرا ما قصر .. الله يخليهو ويبعد عنه الجماعة

[هندسة] 03-22-2014 06:24 PM
فعلا دا باقي المقال ... وجبرة مااااااااااا بقدر يكتبو لانو ما بهبش الحديد السخن برازي من بعيد بعيد


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة