المقالات
السياسة
اضراب ائمة المساجد في الجزيره
اضراب ائمة المساجد في الجزيره
03-23-2014 08:49 AM



وانا قاعد الجمعه الفاتت في مناسبه جوها ناس من مدني والحكاوي دايره عن الجزيره والوالي وحكومته , فجاه واحد قال" تصدقو ياجماعه الائمه في مدني قررو يدخلو في اضراب, وقالو للحكومه الجمعه الجايه دي بنصلي بالناس, بس حانضرب الجمعه البعدا" عاينته للزول كدااا, وقلت ليه "انته جادي؟" حلف بي اغلظ الايمان انو الكلام دا سمعو من امام واصل, وعزا السبب لي عدم صرف مرتباتم بي قلتا لي كم شهر كده.
باعتبار معظم الائمه, وخصوصا في ولايه الجزيره, كيزان فاعتقد انو دا حايكون اعظم قرار لي كيزان الجزيره عشان ذاتو نشوف لينا ائمه غيرهم امكن ربنا يستجيب اخيرا لي دعواتنا وترطب بعد الكتمه النحنا فيها دي. يعني هم مفتكرننا حانبطل صلاتنا عشان اضربو, ولا خلاص بهمنا انهم يصرفو ولا يرفتوهم حتي. ثم بعدين تعال هنا, نحنا ذاتنا بنفتكرهم مانافعين معانا بدليل دعواتهم كلها ماجابت نتيجه. معقول شابكننا الجمع كلها اللهم انصر المسلمين في وين كده ماعارف ونحنا القاعدين قدامهم زيتنا طالع؟ لا ماهيه زادت ولا ولد اغترب ولا بت عرست ولا الحكومه دي غارت من وشنا؟ والله انا عندي شعور انو الكيزان ديل جنو عديل كده. هسع الخبر دا يمسكو من وين ولا من وين؟ طبعا نحنا في القعده اتداولناهو وكل زول علق قدر لحافو, والجو العام نسا الناس العقد الاتلمينا عشانو.
بالنسبه لي انا, لمن رجعته البيت وقعدته افكر في الموضوع, لقيت انو لو الكلام دا صاح تكون دولة الشريعه في السودان في ازمه حقيقيه. ويكون كمان كل الناس الببنو في الدوله دي من كبار العلماء وناس الفتاوي والشئون الدينيه وناس الحج وائمه المساجد واساتذه الدين في المدارس والجامعات والحكومه زاتها, شايتين (ضفاري) ساي.
اوريكم كيف. انتو مش الصلاه هي الصله بين العبد وربو؟ ومش نحنا بما فينا الائمه المقصودين (بالعبد) في الحاله دي؟ حاجه تانيه. وظيفه الامام الاستحدثتها الحكومه دي مش وظيفه؟ والسيد الامام مجرد موظف ساي في الخدمه المدنيه؟ اذا فعلا دا كده, الامام اثناء صلاتو هل بكون متقمص شخصية العبد ولا الموظف؟ لو قلتو العبد, فالموضوع دا مابهمنا كتير لانو مجرد انسان بيسعي للتواصل مع ربو ودا حق مشروع ومطلوب كمان. بس البهمنا لو قلتو موظف لاننا في الحاله دي دايرين نعرف الراجل دا كيف بقدر يفصل بين الشخصيتين وكيف بقدر يوفق بيناتهم وحديث الرسول (ص) واضح "من اخذ الاجر حاسبه الله علي العمل".
يلا نجي لي موضوع الاضراب. السؤال المحير فعلا هل الجماعه ديل حايضربو عن العمل (اي صلاة الجمعه) كموظفين في الخدمه المدنيه بس ولا برضو كعبيد للمولي عز وجل؟ اذا كان كموظفين, حايصلو الجمعه (كعبيد) كيف؟ ولا حايصلوها في البيوت ضهر لانو اصلا بي اضرابهم مافي مسجد حيكون (فاتح) وكت الصلاه حسب الكلام الاتقال لانو كل الائمه حايلتزم بيو كاعضاء في (نقابه الائمه).
المهم في موضوع تعيين الائمه بي صوره عامه (طبعا انا ماعارف في سند ليو في الدين ولا لا) في حاجه مفهومه وحاجه مامفهومه. الحاجه المامفهومه كيف بتتعامل معاهم الدوله كموظفين في الخدمه المدنيه. يعني هل عندهم ترقيات ونقليات ومجالس محاسبه وبدلات, ولا بس (صم.. لم) كده ماهيه وخلاص. اما الحاجه المفهومه فهي تدني مستوي التدين في بلادنا. والدليل علي كده انو واحد من الناس القاعدين وبي كل بساطه قال" ياخ مايضربو, اصلو الناس الفي الجامع ديل مافيهم زول ممكن يصلي بالناس؟" قام واحد تاني قال "هو اي زول ممكن يصلي بينا الجمعه؟" ودا طبعا مربط الفرس, لانو دا سؤال طوالي بنطرح ويمكن كمان يكون السبب في تعيين الائمه ديل زاتهم. فاذا كان مافي اي زول في الجامع في اللحظه ديك ممكن يصلي ويخطب في الناس, دا مش دليل علي تدني مستوي التدين في السودان؟ ولو لا, يبقي بس الكيزان غاشننا بي حكايه الائمه دي ساي. عشان كده انا قلته انو نحنا في مشكله دينيه حقيقيه لو فعلا بعد اعلان دولتنا الاسلاميه مافي زول بقدر يصلي بينا الجمعه لو الامام ماجا او اضرب. خصوصا المساجد ملت البلد والحكومه مانعه إمامة اي زول الا الزول الموجود في كشف مرتبات الحكومه.
غايتو ياناس الجزيره شيلو شيلتكم. اذا الاضراب حصل, إلا تمشو تصلو الجمعه في الولايات المتاخمه زي سنار والخرطوم والنيل الابيض لانو الحكومه الشايفا دي ماحاتسمح ليكم بي الصلاه وراء امام باختياركم. او اقول ليكم؟ خلو واليكم المجاهد ينتدب ليكم ائمه من الخرطوم. ولو انو دي حيكون فيها مشكلة بتاعة دفع بدل سفريه وكده.
من اول يوم قال فيه اديبنا المرحوم الطيب صالح قولتو المشهوره عن الجماعه, ومعظم الكتاب في اي جريده ورقيه او اسفيريه ماعندهم (استشهاد) إلا بيها. انا زاتي مرات كتيره في كتاباتي لمن اكون داير اوصل فكره للقارئ, مابلقي اصدق من مقولة الرجل عشان اوصل فكرتي. استحلفكم بلاي, مش المرحوم الطيب صالح لمن قالا كان قاصد الحاله دي؟ رحم الله اديبنا الفذ, فقد كان حكيما, وقد قال سبحانه وتعالي " ومن يؤت الحكمه فقد اوتي خيرا كثيرا".
[email protected]


تعليقات 7 | إهداء 0 | زيارات 2483

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#952130 [ياسر عبد الوهاب]
0.00/5 (0 صوت)

03-24-2014 06:48 PM
يا اخوانا انا حسب علمي ان الصلاة مفروضه علي كل مسلم....
لو اراد الإمام ان يضرب معناه ان يمتنع عن اداء الفريضة.....

انا فقط اطلب من كل امام جامع ان يلتفت خلفه قبل البدء في الصلاه...
من غيره من جميع المصلين يتقاضي اجرا علي صلاته ؟؟؟؟

[ياسر عبد الوهاب]

#952065 [اكرم محمد زكى]
0.00/5 (0 صوت)

03-24-2014 05:23 PM
اخى د الرازى : السلام عليكم ورحمة الله
اخشى ما اخشى ان تكون المساجد قد اصبحت منابر لبسط النفوذ وبث افكار معدة ومتفق عليها والترويج لحكومة ( انقاذ ) معينة لا تختلف في ذلك عن بعض قنوات ( ام درمان ) فضائية

نسال الله ان ينصر الحق ويعجل بالفرج
حفظكم الله

ا*

[اكرم محمد زكى]

#950665 [محمد احمد]
0.00/5 (0 صوت)

03-23-2014 12:19 PM
صدقت والله يا دكتور الرازى ، لقد جاءا الانقاذ قالت لكى تحارب الفساد الذى استشرى فحدث العكس استشرى وتمدد ونام ، جاءت الانقاذ وقالت لكى تنشر الطهر ولكن حدث العكس فعمت القذارة الريف والحضر والمدر ، جاءت الانقاذ وقالت لتربط قيم السماء بالارض والآن لا هى ادركتنا قيم السماء ولا قيم الارض ، جاءت الانقاذ وقالت انه تولى القوى الامين ولكن كما ترى ي ادكتور فانهم يتزوجون مثنى وثلاث ورباع ويزيدون فى تطاول البنيان ويركبون بطون الطائرات فى السفر الى ماليزيا ودبى والدوحة وخلق الله الاخرى فى السودان ياكلهم المرض ويفتك بهم الجوع وهم يرمونهم ضغثا على ابالة بحمم الطائرات على رؤوسهم فى دارفور وجبال النوبة وجنوب الازرق وفتيان البجا السمهريين يفتك بهم الدرن الرئوى .
اما ائمة الجوامع امثال عصام البشير والكارورى وجعفر بتاع سندس فانهم لم يفتح الله لهم كلمة واحدة عن جور السلطان ، بل اقصى ما يتحدثون عنه عن النظام العام ، وتجدهم لا يأبهون لجوع الجائعين وعطش العاطشين ومرض المرضانين وتسرب التلاميذ من المدارس بسبب الفقر المدقع

تحياتى لك يا دكتور ولقلمك النابه

[محمد احمد]

#950661 [ابوحسن]
0.00/5 (0 صوت)

03-23-2014 12:18 PM
والله أنا الشئ العارفو يا دكتور زمان لمن كان الدين لله والوطن للجميع الأئمة كانوا بقرّوا القرآن وبدرسوا الفقه وبصلوا بي الناس مجانا ولوجه الله تعالي بس يوم ما ظهرت الإنقاذ سوّت ليها مرتبات ... قول ليهم خلوا الجوامع وما تصلوا معانا كمان وبرانا بنصلّي جمعة وبقية الصلوات المكتوبة ... بس ما عايزين نشوف خلقتكم ولا خلقة أئمتكم الذين لا يأمرونكم بمعروف ولا ينهونكم عن منكر ولا يحبون المساجد إلا من أجل الراتب و(الأوفر تايم) بتاع العقد .. إتو اظنكم ناسين دا ... بالمناسبة فيهو هبرات كبيرة تزوغ لها أعينهم .... يا دكتور الرازي عايز أسألك سؤال خاص :إنت درست في محمد حسين الثانوية؟ ما حأذكر التاريخ طبعا

[ابوحسن]

#950578 [جنوبي]
0.00/5 (0 صوت)

03-23-2014 11:13 AM
ههههههههههههه
يعني زمنهم ده كله بيصلّوا للحكومة !!؟؟؟؟
احسن يفتوا ليهم بي صلاة ويسموها صلاة السبت تكون للحكومة عشان لو اضربوا في المستقبل ما يختلط علينا الامر بين ربنا سبحانه وتعالي والحكومة !,,,,,,,,,
هم عارفين ربنا ما بيديهم اجر علي نفاقهم ده شان كده حريصين علي عطية السلطان !!

[جنوبي]

#950454 [taluba]
0.00/5 (0 صوت)

03-23-2014 09:56 AM
ان الله خلق هذا الكون ،وهو يعلم بكل شئ. فالسؤال الذي يطرح نفسه هل الله محتاج لصلاتك؟!! الصلاه وسيله او ركن من اركان الاسلام تخص الفرد حتي يرضي الله عنه. لقد وهب الله الانسان بالعقل وميزه عن بقيه الحيوانات . ولكن من الملاحظ اليوم نجد الحيوانات المتوحشه في الغابه لها عقليه فطريه قويه تحافظ علي نسلها. مثال علي ذالك حتي تفهمني، نجد كيف قطيع الافيال تحمي طفلهم الجديد ،وكيف اللبوه تحمي اطفالها وكل الحيوانات لها طريقتها لحمايه نفسها. اما أئمتنا فلا حول ولا قوه بأستعمال الدين لمصالحهم الشخصيه اصبحنا نأكل في بعضنا البعض ونادر ما تكون عند الحيوانات ذات الصنف الواحد. نصيحتي يجب قراءه الدين بالفهم وليس الحفظ كما عهدنا.

[taluba]

#950409 [ود الجزيرة]
0.00/5 (0 صوت)

03-23-2014 09:27 AM
استحلفكم بلاي ؟؟؟؟ العياذ بالله .. اللهم لا تؤاخذنا بما فعل السفهاء منا .. آمين

[ود الجزيرة]

ردود على ود الجزيرة
[zoalcool] 03-23-2014 12:57 PM
يا ود الجزيرة انت خاشي ضفاري ساكت الجمله نهائي ما بتودي للفهم الانت قاصدوا دا.بصراحة لو في سفه يا هو السويتو انت بتعليقك دا.الكتابة بالدارجي ما وقعت ليك.تعال قول لي انا انا جدي العباس كمان!!!!!

[FAT] 03-23-2014 11:47 AM
والله من اسمك دة انت السفيه


د .الرازي الطيب ابوقنايه
د .الرازي الطيب ابوقنايه

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة