وضحك البشير وامر له بدولة
03-28-2014 08:38 AM


وضحك الخليفة البشير وامر له بدولة.
كنا نقرا قديما عن عطايا الملوك والخلفاء . ويقولون وضحك الخليفة وامر له بعشرة الف دينار واتبعها باخري . والخليفة المقصود كان هارون الرشيد الذي قال للسحابة صبي اين شئت فسيأتيني خراجك .
ولكن وضح ان ذالك المال لم يكن موجودا في الحقيقة . لان عرس هارون الرشيد الذي كان اسطوريا ، زادت تكاليفه فليلا علي 30 الف دينار. وكل ثروة قريش التي هرب بها ابو سفيات قبل غزوة بدر الكبري حددت ب100الف دينار . وهذا يعني انها قد تكون نصف ذالك المبلغ . والخليفة كان يستدعي سيافه مسرور اكثر مما كان يعطي الهبات . ولقد اطاح برؤوس البرامكة وكانوا وزرائه وندمائه .
وسمعنا عن الشاعر الذي قال للامير معن بن زائدة .
انسيت اذ فراشك جلد شاة واذ نعلاك من جلد البعير
فجد لي ياابن ناقصة بمال فاني قد نويت علي الرحيل
هذا هو المعني من البيت الذي كسرته لان الزاكرة لم تساعدني . ولكن المهم تقول الرواية انه قد اعطاه 10 الف دينار . واردفها بأخري وثالثة. ومعن بن زائدة هو من ابقي علي حياته عبد الله السفاح حتي يقال عنه انه اكرم من معن بن زائدة . والآن اثبت البشير انه اكرك الاكرمين ، ولم لا ، فلأول مرة يهدي انسان دولة علي البحر الاحمر الي امير الكويت وشهادة دكتوراه ، الي مين ؟؟ الي امير الكويت . ونقول ليكم البشير عندة غزالة تقولوا لا .
لقد قال الفيلسوف السوداني الشيخ العبيد ود بدر للناظر مدني شنبول ناظر السنابلة الذي طلب هدية من الشيخ . وقد يكون للتبرك . فقال له الشيخ ما صار مثلا ,, بئس الفقير البهدي للأمير ,, . البلادة عرفناها كمان جابت ليها حماقة .
عندما سيطرت المخابرات المصرية علي السودان بعد انقلاب مايو ، ارتكبوا كل غلطات مصر . وقاموا بتاميمات لا معني لها . لدرجة ان عبد الخالق محجوب كان يقول انه ليس هنالك معني لتاميم مصنع شعيرية . وبعد انقلاب هاشم العطا تغيرت سياسة النميري . لان الامريكان سيطروا علي السادات . وصارت سياسة نميري هي فتح البلاد للغرب . وارجعت الممتلكات الي اصحابها . ولكن الشركات كانت قد ذابت لان من استلمها اكل وشبع . وكانت هنالك عدم معرفة وسوء تقدير. فاكبر الشركات مثل مركنتايل التي كان يديرها بريطاني سلمت لمدرس وهو الاستاذ عثمان الذي كان متزوجا بالاخت اسماء شقيقة زين العابدين محمد احمد عبد القادر اصغر اعضاء مجلس قيادة الثورة . مثل سودانير التي سلمت الآن لامام جامع .
وعندما ارجعت املاك آل مرهج كانت اهم شيء هو العمارة في المحطة الوسطي والتي تشمل مكاتب سودانير ووكالات الشركات ومنها معجون الاسنان السقنال . وكان المسئول عن الشركة هو القاضي محمد صالح عبد اللطيف . ووضح ان الشركة كانت تحت ادارته تسير بطريقة حسنة وحققت ارباحا . علي عكس الشركات الاخري . فقرر فؤاد مرهج ان يواصل القاضي كمدير . واسلم فؤاد وابنه علي يدي محمد صالح عبد الطيف . وكان اسلام فؤاد قد سبق بول بسنين . وصارت تربط فؤاد صداقة متينة مع محمد صالح . وصار ابنه بول الذي كان انطوائيا يعتبر محمد صالح بمثابة العم والصديق .
المشكلة هنا ان منزل آل مرهج والذي كان ساقية علي النيل في بداية القرن الماضي، وقام آل مرهج ببناء منزل فاخر يطل علي النيل . وعندما اتي الشيخ زايد لزياره السودان ووظف مسئولين لبلديات الامارات وقال انه يريد ان تصبح ابو ظبي مثل الخرطوم ، قام النميري برعونة باهداء منزل آل مرهج للشيخ زايد . والنميري كان يسكن في الدومة يبدو دائما وكأنه محتاج لتزبيل .
عندما ارجعت املاك البشر ، لم يستلم آل مرهج منزلهم . ولم يكن هنالك من يجرؤ علي مطالبة النميري . ولقد شاهدت اوراق الملكية . ومكتوب عليها ساقية ملك حر . وطلب مني فؤاد ان اطلب من احد شيوخ الخليج ان يتصل بالشيخ زايد ، والذي في الحقيقة لا يحتاج للمنزل . ويمكن ان يرده لهم .ولكن احد اعضاء اسره شيخ زايد . كان يقول ان شيخ زايد لايحب من يأتي له بالاخبار الغير سارة . ومات الموضوع . وبعد وفاة فؤاد سألت ابنه بول . ولكن كان يبدوا انه قد صرف النظر عن الموضوع . وهو شخص قليل الاتصال بالناس . كانت اقرب انسان له هي مربيته الاثيوبية .
في اسكندنافية هنالك قانون اسمه ,, الا مانز ريت ,, وتعني حق الجميع . وهذا يعطي الجميع الحق في السير في الغابات واستخدام شوطئ البحيرات والانهار والبحار والجبال والسهول ، لالتقاط الفطر او الاعناب البرية التي تنمو في مليين الهكتارات . ولا يسمح بامتلاك الشوطئ .
وعندما تعرض ارض مميزة للبيع تقوم البلديات بشرائها لفائدة الجميع . وتوجد مزرعة مميزة بين مدينة مالمو ومدينة لند الجامعية . ويميز هذه المزرعة طاحونة هواء ضخمة علي تل , قامت البلدية بشراء المزرعة وحولتها الي منتجع للشباب . والآن يهدي البشير السواحل السودانية والتي في السبعينات كانت مسرح اجمل افلام البحار العالمية من ظهر السفين الفرنسية كاليبسو .
احد الاخوة البحرينيين والذي رجع الي البحرين بعد سنين اغتراب . فال لي ان ما يؤلمه هو ان البحرين جزيرة و98% من الشواطئ قد صارت ملكية خاصة . والفنادق تحتل كل شئ . ولا يستطيع ان يشاهد مراتع الطفولة والصبا .
قبل عشره سنوات اشترت ابنتي سابينا منزلا ضخما وارض بمساحة 8500 متر مربع وبداخلها بحيره صغيرة واشجار مثمره والسعر لم يزد عن230 الف دولار . لم تدفع سوي10% من الثمن والبقية علي اقصاد لمدة 30 سنة. وبعد ان رزقت ببنت وولد ارادت والدتها ان تجاورها لكي ترعي احفادها ، لانهم يعتبرون انفسهم سودانيين . . فاقترحت ان تقتطع الف متر من الارض وتبني عليها منزلا .
عرفت ان المنطقة نسبة لقربها من المطار لايسمح باي بناء جديد. فاشترت والدتها منزلا صغيرا . وبعد جهد سمح لها الاسبوع الماضي بأن تضيف غرفة داخلية لاتزيد عن 30 مترا مربعا ولا ترتفع عن بقية البناء . والمنزل لم يكلف اكثر من 110 الف دولار تسدد في 30 سنة . وفي السودان الواسع لا يستطيع الانسان ان يشتري ارض بذالك المبلغ .
قرار منع البناء هو ان المطار قد يتوسع بعد 50 او 100 سنة . والمنطقة قد تصير هوتيلات او مخازن او منشئات تجارية . والبلدية والدولة تخطط لمئة سنة . والحكومة النرويجية توقف وتقلل من انتاج البترول . ويقولون انهم لن يسرقوا من الاجيال القادمة. لان هذا جريمة . والبشير يوزع في اراضي السودان زي دعاية الحرية . الحرية مشروب كان يناضل للوقوف امام الكيتي كولا والسينالكو . والمصنع في امدرمان ملك للاعمام نورين والعم حسين . وكانت دعاياتهم توزع في كل مكان .
ع . س . شوقي


[email protected]


تعليقات 11 | إهداء 0 | زيارات 3965

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#956342 [واحد كان سوداني]
2.00/5 (1 صوت)

03-29-2014 03:43 AM
الأخ شوقى لك الود والتحية والله ما قصدت الا المزيد من سحارتكم الزاخرة، لا حسد ولا حاجة، الدرديرى رحمه الله وعز الدين متعه الله بالصحة والعافية هما القدوة الحسنة لنا ونكن لهم كل الاحترام والتقدير، عندما كنا أطفالا بمشو كنا ندعى بان القصر الجمهوري ملك جدنا ادريس أبتر ، أظن يا شوقى عشمانة هى حبوبة عزالدين؟،
الأخ المحسى ودتوتى لك التحية، أنا زوجتى حفيدة عبد الرحيم حاج الأمين عمدة برى المحس ، يعنى طلعنا أهل وكدة كدة عندنا نصيب فى القصر!!!
الأخ نص صديرى لك التحية والشكر للمعلومة بس ادريس أبتر لم يلاقى ويعمل مع غردون، ولا أنا غلطان يا شوقى
عبدالرحمن

[واحد كان سوداني]

ردود على واحد كان سوداني
[المحسي ودتوتي] 03-30-2014 12:42 AM
"لاعلاقة له او محس توتي باراضي الضفة المقابلة وبالمناسبة دي كانت منطقة جدباء من الحصى نخلة واحدة مافيها وكل الخضرة والتشجير الذي تراه الان تم في فترة كتشنر وصور البناء والتشجير لكل المنطقة منشورة في عدة كتب يعني لاساقية لايحزنون"

الحجه في شنو؟ شكلك بتحب الغلاط يا نص صديري.
مين قال انو كان في نخيل او ساقيه في منطقه القصر؟ وعلى فكره نحن جدودنا ماكان بزرعوا النخيل. شويه خضارات والعيش والليمون.
بري اصلا جايه من كلمه بر وذلك عندما كان اهالي توتي يقولون ماشيين البر من الجزيره حيث كان يزرعون في الجرف الضيق المحازي لتوتي. وعلي فكره الخرطوم دي كانت رمله ماتديك الدرب ماعدا الجرف.
كلامي واضح المنطقه دي كان فيها حله بري الاولى واللي هي قبل كتشنر بكتيير وفي التركيه عهد محمد سعيد باشا على مااظن تم ترحيلها من منطقه القصر الي موقع ثكنات الجيش الانجليزي محل مستشفى النهر وداخليات الجامعه حاليا ثم رحلت مره تانيه الي موقعها الحالي بعد الاستعمار الانجليزي.

European Union [نص صديري] 03-29-2014 09:09 PM
اعتقد شوقي اوفى بكل المعلومات فعلا كان غنيا وقصته التي ذكرها شوقي معروفة عندما حاول بجنود الحكومة الاستيلا على كبانيات سليمان ابن الزبير باشا فهزمه سليمان وهرب للخرطوم وليشتكي ابن الزبير لحكمدار الخرطوم في فترة غردون.
يعني الزمن داك بعد بناء القصر بعشرات الاعوام لذلك لاعلاقة له او محس توتي باراضي الضفة المقابلة وبالمناسبة دي كانت منطقة جدباء من الحصى نخلة واحدة مافيها وكل الخضرة والتشجير الذي تراه الان تم في فترة كتشنر وصور البناء والتشجير لكل المنطقة منشورة في عدة كتب يعني لاساقية لايحزنون
واعتقد هنالك رسم قبل التصوير يبين المنطقة القريبة من القصر انها كانت كساحة مولد بها حظائر حمير
اما المشرع فكان شرقا من القصر راجع تاريخ توتي في عهد الخليفة برضو غير الجبخانة ماكانت فيها بيوت كثيرة

European Union [shawgi badrh] 03-29-2014 02:39 PM
ادريس ابتر اشتهر بالمكرالشديد عمل مع الزبير باشا في الاول لان الدناقلة كانوا يعرفون بالابحار وعرفوا بالبجارة . ودخل في مصادمات مع الزبير باشا . الحكومة ابعدته من الجنوب . دفع رشوة الف جنيه للقنصل الاوربي وتوسط له وارجعه غردون وصار حاكم الرجاف . وحارب ود الزبير باشا عندما كان االزبير ممسموكا في مصر وهزم . ووشي بابن الزبير والب عليه الحكومة . ولم يستمع سليمان الزبير لنصيحة قائد والده رابح فضل الله وحارب الحكومة وقتله جسي باشا الايطالي فالاوربيون كانوا يحاربون تجارة الرقيق .
انا كتبت ان والدة عز الدين هي عشمانة ابتر المشاوية . ولكن من الممكن ان القصر الجمهوري كان ساقية جده ، فجده محسي . ووالد كان ريس اكبر مركب في السودان تبحر فقط في الدميره تحمل المحصولات السودانية وترجع بالسكر والقماش وكل البضائع المصرية

[shawgi badrh] 03-29-2014 02:04 PM
ادريس ابتر اشتهر بالمكرالشديد عمل مع الزبير باشا في الاول لان الدناقلة كانوا يعرفون بالابحار وعرفوا بالبجارة . ودخل في مصادمات مع الزبير باشا . الحكومة ابعدته من الجنوب . دفع رشوة الف جنيه للقنصل الاوربي وتوسط له وارجعه غردون وصار حاكم الرجاف . وحارب ود الزبير باشا عندما كان االزبير ممسموكا في مصر وهزم . ووشي بابن الزبير والب عليه الحكومة . ولم يستمع سليمان الزبير لنصيحة قائد والده رابح فضل الله وحارب الحكومة وقتله جسي باشا الايطالي فالاوربيون كانوا يحاربون تجارة الرقيق .
انا كتبت ان والدة عز الدين هي عشمانة ابتر المشاوية . ولكن من الممكن ان القصر الجمهوري كان ساقية جده ، فجده محسي . ووالد كان ريس اكبر مركب في السودان تبحر فقط في الدميره تحمل المحصولات السودانية وترجع بالسكر والقماش وكل البضائع المصرية

[المحسي ودتوتي] 03-29-2014 12:20 PM
وصلت تب يا عبدالرحمن! واعذرنا نحن نفسنا بقى حار شايفين الناس يتقالعوا في حقنا... ناس الخضر وغيرهم بدون حيا ونحن قاعدين نتفرج.
ناس حاج الامين (ومنهم المناضل الاسطوري عبيد حاج الامين) فعلا كان منهم شيخ الحله بتاع بري المحس.
بري المحس دي بالذات ترجع لاكثر من متين وخمسين سنه وكلها بصرها راجل واحد اظنو اسمو حتيك كان مفتي السودان في التركيه وتم ذبحه بعد دخول الانصار.
محس توتي والخرطوم (الما رطانه) في عادتهم بورثوا اولاد اخواتهم ويعتزوا بهم اكثر من اولاد الراجل يعني اولادك فعلا عندهم حق بس انت مااظن :)


#956222 [ابو خالد]
5.00/5 (1 صوت)

03-28-2014 11:01 PM
علشان يسبت لكم انه بشه الفشه وما زال عوير

[ابو خالد]

#956151 [نص صديري]
4.50/5 (2 صوت)

03-28-2014 08:42 PM
قلت "والنميري كان يسكن في الدومة يبدو دائما وكأنه محتاج لتزبيل ."
انت خرفت ياشوقي؟ النميري عمروا ما قطع الحلة في اتجاه الدومة قبل مايكون رئيس وبعد ماكان
بيكره ناس الدومة وناس شارع الدومه بيكرهوا عشان كده مسح بودنباوي الارض
وبالمناسبة النميري حتى قبل فاطنة خليل مابنت بيتهم ديوانه على شارع ودالبصير كان طوب احمر يعني ماسكن في بيوت زبالة الا ربما والده
ناس نميري بيكون وعجتهم بي دي
وكت انقلاب البشير ناس ودالبصير قالوا ده انقلابهم فذهبوا كلهم في مسيرة لشارع الدومة عشان يكاوا ناس الصادق شفت الكراهية بين الشارعين ديل قدر شنوا

[نص صديري]

ردود على نص صديري
European Union [نص صديري] 03-29-2014 09:23 PM
فعلا الحي ما اسموا ود البصير والدومة مرتع طفولة لكن من ودالبصير وجنوبا حتى شارع الدومة ممكن تقول عليهم دناقلة لكن نميرى حلته من ودالبصير وشمالا علاقته جنوبا كانت الجمعة المساء فقط بيصلي مغربها في الشيخ قريب الله
ومشاكله مع ناس شارع الدومة في فترة شبابه سمعناها قبل مايكون رئيس وكت كان بيجوعر في فوالي احمد سعد
اما يقول انو من ودنوباوي فدي اشك فيها بيكون بيغيظ ناس الصادق لانوا الانصار في ودنوباوي بيقطعوا لو دخلها
تعرف ياشوقي رحمة الله عليه وكت عرفتوا كان بيمشي بدون حرس في الحلة بعد الضربة بقي زول الخرطوم ذكرتها ليه بعد دق الواطة
معلومة سقوط الدومة ماعارف سنة كم لكن اذكر هنالك دومتين واحدة مقابلاها تشوفها في بداية ابروف لوكنت في نهاية الشارع وطبعا كانت السهلة من الدومة حتى ابروف زي الخور قبل ما تتعمر اما الشارع فعلا كان بيوت زبالة حيطانها واقعة مشاء الله عمارات الان

[shawgi badrh] 03-29-2014 01:34 AM
يا اخي خلينا ذي ما قلتا ليك نتساعد عاشان نملك الناس معلومة . وافتكر انت عارف انو في اسلوب الطف من خرف ومرض ، ولا شنو ؟؟ لم يكن هنالك حي يشار اليه بود البصير , في شارع ود البصير ذي مكان في حي اسمو الاربعين . شارع الدومة شرق غرب بيربط الشارعين الكبيرين . عندما صدم سائق اللوري الدومة وسقطت قال النميري دي حلتي واسم جيي من الدومة دي . ورفعت الدومة بحديد . هذة المنطقة اسمها الدومة والحي اسمه الدومة . وبيت ناس نميري يمكن يكون مبني بي اي حاجة اليوم لكن زمان كان زبالة وكل بيوت امدرمان كانت جالوص وده ما عيب ونحن نفتخر باخلاق ناس الجالوص لانه فيه النفاج . وناس الجرصانة مابعرفوا النفاج انا سكنت في الهجرة في النص الاول من الخمسينات . واعرف الحي والنميري كان بيتكلم عن انه من الدومة ومرة مرة بيقول انا من ود نوباوي .


#956096 [البجاوي الوناب]
3.00/5 (3 صوت)

03-28-2014 06:46 PM
المشكلة الاراضي البيوزعوها دي كلها في شرق السودان..بعد مقرسم واراضي سيتيت ونهر عطبرة ودي المدينها لامير الكويت وفي كلام ان البدون الفي الكويت حيحولوهم لشرق السودان واراضي غرب كسلا محتلنها الرشايدة علي حساب الامراء السعوديين..لازم الناس تعرف ان هنالك شغل ماشي ولا عزاء للمغفلين

[البجاوي الوناب]

#956016 [الشايل المنقة]
0.00/5 (0 صوت)

03-28-2014 04:37 PM
...كل شيوخ وصبيان نظام الانقاذ ليست لهم مراتع طفولة فى البندر,لذلك تجدهم يتصرفون كغرباء فى كل جميل للاخر’ويتخلصون من كل ما له صلة بماضى يجب ان يختفى اثره,للاسف نفس هذا النظام ايامه وسنينه اصبحت من ذكرياتنا من طفولة وشباب نعيشه الان ..والخوف ان يكون من ذكريات كهولتنا ايضا..الله يستر..!!

[الشايل المنقة]

#955972 [واحد كان سوداني]
0.00/5 (0 صوت)

03-28-2014 03:16 PM
سلام يا شوقى ولك كل الود والتحية، هل تعلم ان الارض التى بنيت عليها وزارة المالية والقصر الجمهوري هى فى الأصل ساقية جدنا ادريس أبتر، سمعنا تحت تحت انه عزالدين السيد والدرديرى نقد ناموا على الورق وما تحت الورق!!!، جاتك حاجة ولا كدة؟!!
د عبدالرحمن نصر ، ايرلندا

[واحد كان سوداني]

ردود على واحد كان سوداني
European Union [نص صديري] 03-28-2014 08:56 PM
مع احترامي ادريس ابتر ليس لديه تاريخ في المنطقة اشتغل فقط مع غردون وبقية القصة معروفة لك راجع كتاب السودان وكاتبات الاتراك واوارق غردون فيه وصف دقيق حول مجيئ ابتر من الجنوب وقصته مع ود الزبير الخ
اما منطقة القصر وحتى المقرن تاريخ بنائها معروف قبل مرحلة غردون و بعدها لاحقا بعد بناء السور حول الخرطوم او مايعرف بالسرايات الاربعة (لا اذكر منهم سوى سراية اولاد راسخ) ولم تكن هنالك ساقية في المنطقة اما ساقية المقرن فهي بعد الاحتلال الثنائي واقدم السواقي في بري ضمت للمشروع لاحقا
هنالك بعض الصور في الانترنت لفترة اعادة بناء شارع النيل قصته الكاملة من شراء الاراضي لتخطيطها في فترة كتشنر اعتقد في كتاب نظام الاراضي للحكم الثنائي ستجد نسخة منه في ارشيف مكتبة الكونغرس يمكنك تحميلها

[shawgi badrh] 03-28-2014 08:33 PM
عزيزي عبد الرحمن لك التحية . اولا الرديري امه التومة او ام الحسن ابتر وعز الدين السيد امه عشمانة بت ابتر . ابتر جدهم وديل ماممكن يضيعوا حق اهلهم . القصر اتبني في نهاية عشرينات القرن التاسع عشر الزمن داك ادريس ابتر ما اتولد . ادريس ابنر مات في 1882في بارا وهو في طريقه الي مشو. كتاب ابطال السودان المؤرخ محمد عبد الرحيم .
ادريس واخوه اسماعيل وكركساوي واخوه كرم اللة عاشوا كل حياتهم في الجنوب . عز الدين السيد عمل فلوسه في الستينات بعد تأسيس شركة التأمينات . والدرديري . كان مدير النقل الميكانيكي ومرتبه ومخصصاته ضعف رئيس الوزراء وزيادة . كان شريك ابراهيم بدري وآخرين في انجح مشروع زراعي للقطن الذي هو امهاني خارج كوستي كان يدخل عليه حوالي 5 الف جنيه في السنة . وكان رجلا مدبرا وهو صاحب خرطوم كلينك اول مستشفي خاص في السودان الامتداد شارع 35 . الحسد هو اسوأ شئ . الناس بتتكلم ساكت

[المحسي ودتوتي] 03-28-2014 08:01 PM
كذاب. الارض الفيها القصر الجمهوري هي بري القديمه. وانا جدي شخصيا اتولد في منطقه القصر الجمهوري قبل الاستعمار البريطاني. وقبل ماترحل بري الرحول الاول بواسطه الانجليز.
ومعروف تاريخيا ان اهل الارض حول جزيره توتي من كل الجهات هم محس توتي (الخرطوم وبحري) + نسابتهم من المسلميه (علي جهه امدرمان).


#955901 [النخيل]
4.00/5 (1 صوت)

03-28-2014 12:45 PM
لا فض الله فوك فليهدي البشير ما اراد مما يملك وليس من مال الشعب هسي فساد زي ده داير دليل بعدين مجمع كافوري قاعد يعمل شنو ما يهديهوا ليهم ولا ده اللحم الحي رسالة لامير قطر عليه ان يرد الهديه اذا كان هو اصلا رجل الامن والمبادرات وسلام ده مال شعب ما ملك حر هسة احنا في حلايب وقبلها الجنوب نصبح علي بورتسودان صدق المثل زيادة الحبن تالول

[النخيل]

#955845 [ياسر عبد الوهاب]
5.00/5 (1 صوت)

03-28-2014 11:16 AM
ليست هذه افكار البشير ولكنها عوارات الشحاد مصطفي اسماعيل..

[ياسر عبد الوهاب]

ردود على ياسر عبد الوهاب
[shawgi badrh] 03-28-2014 03:25 PM
لك التحية . ماهو ده المحيرنا شحادين ده بعد كل الفاولات والشلاليت ما اتعلم كيف يتصرف . الشلاقة شنو يعزموا الصباح ولن يجي الخرطوم يعملوا ليه كيتة . ويدوه الاوسمة والقصر الجمهوري .


#955815 [الحقاني]
5.00/5 (1 صوت)

03-28-2014 10:31 AM
العم شوقي بدري الخليفة عبدالله التعايشي باع بني شنقول لملك الحبش وهي الأراضي التي سيقام عليها سد النهضة الآن
وحكومة عبود باعت اعرق المدن السودانيه حلفا لذا لاتستغرب

[الحقاني]

ردود على الحقاني
[shawgi badrh] 03-28-2014 03:33 PM
لك التحية . كنا في قعدة في بيت احد ظرفاءامدرمان الفاضل ابحمد طلعت ومعي قط احد اشداء امدرمان وعند زقاق المنفلة شاهنا جماعة وسلم عليهم قط . وعندما رجعنا . كنا متشاكلين . لان قط سلم علي ناس بعد الساعة عشرة في الليل . والليل مافيه كلام ولا سلام . وافتي ود عمسيب بصحة كلامي لان الانسا عندما يسلم في الليل معناها خايف ومنبطح . ولكن قط ليس بجبان ولكن الفي راسه حكمت معاه .
السودان بيسلم علي الناس في الليل وبيوري انه خايف ومنبطح . وكل زول حيركب علي ظهره . والسبب الانقاذ


#955795 [نكد الدولة سخطنا]
5.00/5 (2 صوت)

03-28-2014 10:07 AM
وقد جرت العادة ان مثل هذه الهدايا تقدم للرؤساء عند زيارتهم لدولة اخرى اما الدكتوراة الفخرية في منحها مجلس الجامعة وعادة ما تكون داخل الجامعة ولو كان الامير فى زيارة لجامعة بورت سودان لفهمها ثم من الذى كتب الشهادة ووقع عليها ام ان البشير وحده هو(مجلس الجامعة ومديرها وسكرتيرها الاكاديمى؟).
الم يحمل البشير معه ما يحمله رئيس أولية من هدايا عادة عند زيارته ولة اخرى من أبنوس وخلافه؟ا
والله يا عم شوفى ما عدنا فاهمين حاجة فى البلد.

[نكد الدولة سخطنا]

ردود على نكد الدولة سخطنا
[shawgi badrh] 03-28-2014 03:22 PM
العزيز هجولك التحية . شكرا علي التصويب . اخونا ابراهيم موسي الخير الصحفي رحمة الله عليه كان ساخرا . زاملني في براغ وتوفي هنا في اسكندنافية . كان يقول لاهله عندمايطالبونه بالحضور ويتاخر ,, هو السودان ده لعب ,, طبعا كان يدخل في مشاكل اجتماعية وخلافه . كان يشكو من الحر والناموس والذباب ةالغبار , وكان يقول لاهله مازحا السودان ده لازمتعرشوه نحن لم نرفض السودان لكن رفضنا الانقاذ


#955778 [هجو نصر]
4.00/5 (1 صوت)

03-28-2014 09:46 AM
هلا هلا اكتشفت ان ذاكرتي اقوي من ذاكرة شوقي الاسطورية بس في الشعر اما الباقي فارفع يدي مستسلما . الصحيح :
اتذكر اذ فراشك جلد شاة
واذ نعلاك من جلد البعير
فسبحان الذي اعطاك ملكا
وعلمك الجلوس علي السرير
فجد لي . . . اّلخ
بالله ياخينا نحن دلوقت لاقين قرون شاة ولا ضنب بعير ! ديل كانوا منغنغين ومنعمين . الغربة كافرة ياخوي زي ما بقولوا الاتراك ! تعال شوفنا

[هجو نصر]

ردود على هجو نصر
[shawgi badrh] 03-28-2014 03:18 PM
العزيز هجولك التحية . شكرا علي التصويب . اخونا ابراهيم موسي الخير الصحفي رحمة الله عليه كان ساخرا . زاملني في براغ وتوفي هنا في اسكندنافية . كان يقول لاهله عندمايطالبونه بالحضور ويتاخر ,, هو السودان ده لعب ,, طبعا كان يدخل في مشاكل اجتماعية وخلافه . كان يشكو من الحر والناموس والذباب ةالغبار , وكان يقول لاهله مازحا السودان ده لازمتعرشوه نحن لم نرفض السودان لكن رفضنا الانقاذ


شوقي بدري
شوقي بدري

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة