المقالات
السياسة
حسين خوجلى : الإنقاذ مافيها رجال دولة وكلامهم قدر مرتباتهم
حسين خوجلى : الإنقاذ مافيها رجال دولة وكلامهم قدر مرتباتهم
03-31-2014 05:59 PM


هذه المرة لم أكتب مخاطبا حسين خوجلى ليصصح مسار حديثه فى برنامج ( حسين خوجلى بتاع كله ) لكن لى بعض العشم فى أن يعود بعض شبابنا الذdk غرر بهم حديث خوجلى بتاع كله فى أحاديثه السمجة، أن يعودوا للجادة ويعوا الدرس ويحفظوا السودان فى سويداء القلوب ويعروا حسين خوجلى وأمثاله من تجار الكذب والنفاق والدجل والروايات الدرامية .
حسين خوجلى قال الشيخ تميم دا لمان يصل السودان حيجتمع به رجال الإنقاذ وأظنه يعنى الولد مصطفى عثمان ولمان شيخ تميم بن حمد يسألهم طلباتكم شنو ؟ يقولوا ليهو عاوزين مائة مليون دولار – دى ماتعمل مصنع دقيق – ياجماعة رجال الإنقاذ ديل بتكلموا قد حاجة رواتبهم ، الإنقاذ مافيها رجال دولة ( يا البشير أنت ورجالك كلكم مافيكم رجل دولة والله حسين خوجلى مسح بيكم الأرض ولو عندك كرامة ياتسجنوا وتقفل قناته دى أو تشيل شنطتك وتمشى تقعد فى ود بانقا ) ولا رجل دولة واحد فيكم مافى ..
حسين خوجلى مستفيدا من دروس الفلسفة التى درسها فى الفرع ( والله يا عبد الناصر ماريحتنا قبل ماتفتح الفرع زى المستوى دا كان يامشى عمل ليهو دكان دبلان يا ترزى يا حلاق – كل من هب ودب سويته لينا جامعى ) – حسين خوجلى بتاع كله نسج قصة ضياع شاب عمره 14 سنة فى حلقة السبت وفى حلقة الإثنين لقاه عشان شىء فى نفسه – تابعوا حسين فبركات عشان يبان المستخبى – فى حلقة 30 مارس طرح لنا بإسلوبه المخادع قصة ضياع الولد أحمد وعرض صورته وتانى يوم قال إتصل بى المقدم عوض الذى كان يجلس فى السهلة السودانية تحت الشمس وما أن رأى حسين يعرض صورة الولد حتى صورها بكاميرا الموبايل – وطوالى بالحس الشرطى إستعمل الإمكانيات فى الإنتشار والمعلومات – قال ضرب لى واحد من عساكرى العاملين معى قال لى سعادتك الولد دا أنا لمحته فى الغابة والغابة دى ياجماعة غابة السنط قريبة من المقرن مش فى الكلاكلة – لكن الأن مش موجود – وبدأت شبكة التواصل تتحرك – فى لمحة كده ظهر فأستلمه المقدم عوض وسلمه لأهله
يا حسين على الطلاق أنت فت أرسين لوبين زاتو – الطبيعى ياجماعة أو المفروض أن أهل أحمد بعدما ينقضى اليوم الأول ولم يجدوا له خبر فى المستشفيات والحرسات أن يمشوا النيابة ويفتحوا بلاغ ضياع إبنهم – دى مش شنطة ولا موبايل دا ولد وفى سن نفع – 14 عام – ومفروض يزودوا شرطة الكلاكلة بصورة له لكن حسين خوجلى عشان الكسب المادى الرخيص عاوز يحول قناته لنيابة ونقطة بوليس ولو فى زول عاوز عملية يتصل بمولانا عبد الله خوجلى – بلد هايصه دولة مافى ورجال دولة مافى – حسين عاوز يقول ليكم أنا الدولة والدولة أنا – خسئت يا أب فعج تمصمص فى شلاليفك وتترع عاع عاع لحد ما قرفتنا
شرطة الكلاكلة هى من يستعمل إمكانياته فى الإنتشار والمعلومات والرائد عوض يبلغ من مركز عمله حتى لو كان فى أمبده – ضياع شاب مش كضياع حقيبة ملابس – دا إنسان – ولمان المعلومات تصل عبر منافذها الشرطية الصحيحة للرائد عوض محمد أدريس عوض مابيمشى لبيت أحمد ويسلمهم إبنهم – عوض بيرسل الولد أحمد الضائع بمحضر تدوين الحالة لشرطة الكلاكلالة التى نشرت المعلومة والبلاغ مفتوح لديها – تحقق مع الولد ويتم الكشف عليه – قد يكون مدمن وقد يكون يعانى من مشاكل عقلية أو أى أسباب قاهرة أخرى - وبعد أن تتأكد من الأسباب التى دعته للهروب مقبولة يستدعى ولى أمره فى مركز الشرطة وتتخذ إجراءات ضد الوالد لو كان هو المتسبب فى الهروب لأن الشرطة لديها قانون يحمى الأسرة من زوجة وطفل – لكن ناس حسين خوجلى ماعاوزين الشعب يفهم إلا مايجود به حسين خوجلى بتاع كله وحسين عشان يكسب قيمة إتصالاتكم به يريد أن يقول لكم أى زول يضيع ليهو ولد أو غنماية أو كلب مايمشى للبوليس – بوليس شنو – هو نحن عندنا بوليس – طوالى تتصلوا ببابا حسين – مش بتاع الفول فى الرياض لا دا بابا حسين بتاع مصميص الشلاليف – وحسين خوجلى من ضياع ولدك يؤلف قصة عشان تجلسوا حول قناته فى السهلة السودانية تستمعون لها يا حزب السودانين تحت الشمس
لاحظوا الخطأ الكبير – الضابط لمان وجد أحمد فى الغابة وداه لى أهله بدون الرجوع للشرطة التى فتح فيها البلاغ أم ياترى اهل احمد كانوا قنعانين من خيرا فى الشرطة ومافتحوا بلاغ من أصله ورموا حملوهم بس على حسين بتاع كله – كان لازم تؤخذ اقواله وتعرف الظروف والملابسات التى تستدعى طالب فى سن 14 سنه لترك مقعده فى المدرسة وسريره مع أفراد اسرنه – قد يكون جزء من شبكة ترويج وتوزيع مخدرات – ياحسين لو أنت عندك قنبور نحن لا
طبعا تذكرون أن حسين بتاع كله قبل كده قدم حلول لكل المرضى السودانيين المحتاجين عمليات وماعندهم حق العملية قال بروفسير مأمون حميده وجه الناطق بإسمه دكتور المعز عمر بخيت يتصل بحسين خوجلى أن توجيها صدر لجميع مستشفيات ولاية الخرطوم أن أى مريض يأتى يحمل ورقه من حسين خوجلى يدخل طوالى ويعمل العملية فورا ولأن حسين باشا مشغول قال بنوع من الترفع والتباهى ( فقد وجهت مولانا عبد الله خوجلى بجريدة ألوان لتحمل هذه المسئولية نيابة عنى وليصدر صكوك الغفران لكل مريض ) مولانا دا العرفه بنوع المرض شنو كان تتولاها أنت رجل علمك غزيز وبتاع كله – ومن يومها لم نسمع بمريض واحد دخل مستشفى بصك من مولانا عبد الله خوجلى
حسين يهزأ من حكومة البشير لقاها مريضة وشاخت وخرفت قال يلعب بيها – يحرقها يسبها مافيها رجال دولة تسلم مسئولية وزارة الصحة والطباء فى من يدخل ويعمل عملية وفى من لا يدخل – الضايع ليهو ولد أو بقره يتصل بحسين
طيب حسين بتاع كله بيرمى لى شنو
حسين يريد أن يرسل رسالة يقول فيها أنه فى غياب الدولة يباشر كل مهام الدولة
عندك مريض عاوز عملية تمشى لحسين خوجلى
ولدك ضاع ليس أمامك إلا حسين خوجلى
عندك بقره ضاعت مالك إلا حسين خوجلى
عشان كده سميناه حسين خوجلى بتاع كله
حسين تانى يوم جاء مخاطبا شعب السودان فى السهلة حقته تحت الشمس ليقول يا جماعة نحن ما دام أستعدنا أحمد خلونا نعمل أو نصوغ من عودة أحمد دا الى عودة السودان – هو يا حسين السودان صحيح برضوا ضاع ؟
ياجماعة أفهموها بقى – مادام أحمد ضاع وحسين خوجلى بتاع كله رجعه ليكم ، نحن ممكن نرجع السودان
حسين خوجلى يعترف بأن السودان ضاع ولكنه لم يذكر لنا فى القصتين من المتسبب فى ضياع الولد أحمد كما لم يذكر من المتسبب فى ضياع الرجل السودان ؟ ياربى السودان دا لمان نمشى الشرطة ندى أوصافه نقول شنو ؟ مليون ميل مربع مشرومه من تحت فيه تلاته حروب و20 حرب بين الإخوة من مسيرية وسلامات وغيرها – به حكومة مافيها رجال دولة – بلد تدخله وفى جيبك واحد دولار أمريكى تستبدله بـ 9887 جنيه تطلب فنجان قهوة لازم تفك دولار تانى عشان تشرب قهوة ، سودانى ولو معاك ريال سعودى تستبدله بـ 2635 جنيه ، وحسين خوجلى يتبجح ويقول لو عملنا وحده مع السعودية هى الكسبانه – يا أخى دولة فى قدرات وإمكانيات سلطنة عمان رفضت توحيد العملة عشان إقتصادها لا يجارى مثلث السعودية الكويت الإمارات – حسين دا منفوخ كده فوق شنو – يا ناس بنك السودان ماتتحصلوا من العلوج دا قروش الشعب عشان ينقطنا بسكاته
حتى الأن حسين تحدث عن ضياع أحمد وضياع السودان وماورانا السبب فى ضياع أحمد كان منو ؟ والسبب فى ضياع السودان كان منو ؟
دخلنا فى الفلسفة بقى
حسين ودون مقدمات وشروحات يدعوكم لأن تعملوا وتصوغوا من عودة أحمد دا دعوة لعودة السودان – وقام إتفلسف ووضع ليكم نقاط أو قول حجارة تمشوا عليها عشان ملابسكم ماتتوسخ وأنتم تبحثون عن السودان الضايع – اللى ضيعه مين ؟ ما أعرف – ضاع براهو سودان شبع وقام هجه لحد ما الحته اللى تحت إنفصلت منه وبقى مافيهوش حاجه خلاص من تحت – تعالوا نتعرف على الحجارة والطوب الذى وضعه لنا حسين بتاع كله – المعلومة – الإشكالية – الإنتباهة – الحب – اليقظة – الحذر – الإستعداد ( عليكم الله فى إستخفاف أكثر من كده – الكيزان ديل يسرقوا وطن بكامله ويسوه قصور ومحطات فضائية وحسابات بنكية فى الداخل والخارج ويجوا يقولوا لينا تعالوا نبحث عن السودان الضايع وبعدين أنتم يا متصفحى الراكوبة فهمتم شنو من ( المعلومة – الإشكالية – الإنتباهة – الحب – اليقظة – الحذر – الإستعداد ) على الطلاق ولا كلمة مافهمتها – الرجل بيطبق فينا دروس الفلسفة بتاعت الفرع – ليواصل حسين بتاع كله – يعنى دى تجى بعد الإستعداد طوالى – الإحساس بأن البلد بلدنا – البنات بناتنا – الأولاد أولادنا – المستقبل مستقبلنا ( الجماعة ديل لهفوا الماضى والحاضر وخلوا السودان عضم لحد ماضاع بشهادتهم وكمان عاوزين ياكلوا المستقبل – البنات بناتكم تعرسوهن مثنى وثلاث ورباع دى عرفناها الأولاد عاوزين منهم شنو – ديل ما خلاص ضاعوا مع السودان وإتشردوا بين غابة السنط ومدن دول الخليج – الله يحسن أخرتهم دنيا هقلتوهم فيها
ليواصل حسين بتاع كله
نحن نستعيد السودان ( نحن دى تقصد بيها منو ؟ إنتو ناس التمكين أم نحن معكم نمرق نفتش للسودان – لمان كان اللهف والبلع بلعتوا براكم لحد ما خنقتوا ووقف ليكم عضم متعارض فى زوركم ولمان السودان ضاع فى الغابة عاوزنا نمشى نفتشه ونجيبه تانى – خلى ناس أم جرس يدقوا الجرس ويفتشوا عليه
طبعا بعد مقدمة ضياع أحمد وضياع السودان حسين بتاع كله لازم يؤلف قصة جديدة
أنا قابلنى رجل عالم ( حسين دا أصله ما قابله إلا رجل فاضل أو رجل عالم – سبحان الله ) قبل يومين فى صلاة الجمعة دكتور من السعودية – يقصد سودانى بيعمل فى السعودية – قال لى دكتور محاضر فى جامعة كندية بالمملكة العربية السعودية عمل محاضرة قال السودانيين ديل باقل جهد من الإنتباه ( الله لايسامحك يا الطيب مصطفى عكرته دمنا بالإنتباهة دى ) لإمكانياتهم الموجودة فى الشخصية السودانية وإمكانياتهم على الأرض فى 7 سنوات بس ممكن يبقوا أغنى من كندا – تكلم بمنتهى الوضوح قال السودانيين ديل لو إنتبهوا لإمكانياتهم الشخصية وكوادرهم وأرضهم والإمكانيات الموجودة فيها فى 7 سنوات يمكن ( المرة دى دخل يمكن ) أن يكونوا أكثر ثراء من كندا – نعمل شنو ؟ نزرع شنو ؟ نربى شنو ؟ نعين منو ؟ نديرها كيف ؟
حسين بتاع كله دايش عديل زول ماعارف يعمل شنو ولا يزرع شنو ولا يربى شنو بعد 7000000 سنة مش حيكون زى كندا ، وبعدين يا حسين نعين منو ؟ دى دايره فهم – تعينوا القوى الأمين الكوز المتمكن ناس الشريف ودبدر ودكتور سلاف الدين وأولاد المصارين البيض – أنا تديروها كيف ؟ ديروها كيفما أتفق – تلتين ليكم وتلت لأولادكم والشعب يموت عشان ما يكلفكم مرتبات
يواصل حسين تناقض
نحن أثرياء جدا ومن بؤس الفكرة ومن بؤس الإدارة نمتلك هذا الثراء مش نصبح سلة غذاء العالم بل نصبح قرعة شحاد
حسين ختم القصة الدرامية
عاد أحمد فهل سيعود السودان ؟ ومن يدريك أن أحمد قد عاد إذا لم تضح الأسباب وتعالج ولكن حسين خوجلى يريد بالربط بين أحمد والسودان ليرسل لكم رسالة مفادها أن عودة أحمد حدثت فى عهد الإنقاذ ، فإن السودان الذى ضاع ( لم يذكر أسباب ضياعه ) يمكن أن يعود مرة ثانية لمجده فى عهد الإنقاذ – ما يشجع حسين خوجلى ويجعله متفائل بأن السودان سيعود هى عودة شيخه حسن الترابى والتقارب الذى يحدث حاليا بين الترابى والبشير وجلوسهما سويا فى إجتماع أم جرس – ويا حسين لو بتفتكر أن فكر الترابى سيعيد السودان مرة ثانية تكون حالم بل غارق فى النوم – فيا حسين ليس من بؤس الفكرة أو من بؤس الإدارة فقط ولكن من بؤس الحكم وبؤس الحكام وبؤس رجال الدولة الذى قلته أنت ، فهلا غادرتم السلطة ونعدكم بمحاكمات نزيهه وعادلة ليست كالتى نفذتموها فى شهر رمضان بنفر من شبابنا ..
والله أول مرة فى حياتى أسمع بقباحة ونشاف وشى وشحاده لوحده بالعافية – يقول حسين بتاع كله – هسع أنا لو أعلنت وحدة مع السعودية الخسران منو ؟ ( أنا أتبرع بالإجابة يا حسين : خسرانه السعودية – السعودية فيها رجال دولة وأنت عارف كده وأنت قلت السودان مافيه رجال دولة – كيفن توحد بين بلدين واحد فيها رجال والثانى مافيها رجال – الراجل البيفهم لا يشنف بنته ولا ولده عشان لمان يجى يطلبها واحد مايقولوا البت دى أبوها قال فيها وفيها – أنت شنفت بضاعتك وجايي تعرضها للوحدة – لعنة الله عليك ) حسين قال لو عملنا وحده مع السعودية ما فى زول خسران – يا حسين يا أبله يا أرعن الوحدة دى لها أركان وفرائض وسنن زى العبادات – دول مجلس التعاونى الخليجى لم تستكمل كل بنود الإندماج وفى نقاط وقفت عندها ومن بينها توحيد العملة – لكن ممكن توحد السياسات الجمركية – ممكن توحد الربط الكهربائى – ممكن توحد الربط المائى – لكن لكل دولة خصوصياتها – عاوز تقفز طوالى لوحدة إندماجية مع السعودية – ياخى قول تشاد قول اريتريا – بعدين إنتو حكومتكم حكومة أخوان مسلمين – تنكر ذلك – والجماعة دى مصنفة فى السعودية كجماعة إرهابية عاوز تمشى تدخل ليهم الأرهاب فى حكومتهم – قال مافى زول خسران – طبعا الزول ماخسران لكن الزلمى خسران – زول يفضح بلده ويعريه ويقول مافيه رجال دولة ويشبه وطنه بالولد أحمد الضايع ويجى يطرح وحدة مع مين ، مع السعودية
حسين خوجلى بيفهم فى كل شىء – قال – بالحساب كده السعودية مش أغنى منى – ماقال من السودان قال منى لأن الخير اللى فى السودان ماشى ليهم براهم – عندها بترول عندى مويه عندها ثروة ناضبة وانا ثروتى ممتدة ليوم القيامة – لو فى رؤية إستراتيجية مفروض نحن نعلن وحده – نعلن وحدة مع أريتريا ماعندنا مشكله مع أثيوبيا ماعندى مشكلة مع ليبيا ماعندنا مشكلة ( لا حظ حسين خوجلى لم يذكر مصر ) والله تعلن وحدة بين السودان والسعودية الكلاكلات وأمبدات والحاج يوسف والثورات دى كلها تفضى ويقطعوا المالح دا عوم لجده – ياحسين أكيد أنت مش مريض أنت مجنون عديل - حسين قال – ياجماعة القيامة دى خلاص قربت – عرفتها كيف يا حسين ؟
حسين قلب من السعودية توجه صوب قطر
لمان الشيخ تميم بن حمد دا يجى بعد يومين نقول ليهو نحن نتشارك – إنتو منو يا حسين ؟ جماعة التمكين أم شعب السودان ؟ أكلتم كل شىء وعاوزين تبيعوا نص السودان لشيخ تميم – الله يلعنك ويلعن أفكارك – حسين خوجلى قال : نقول ليهو ياشيخ تميم بن حمد دى أرضنا ودا نيلينا جيب الكفاءات بتاعتك وبالنص وقبل شوية قلت فى عالم من كندا قال السودانيين ديل باقل جهد من الإنتباه لإمكانياتهم الموجودة فى الشخصية السودانية وإمكانياتهم على الأرض فى 7 سنوات بس ممكن يبقوا أغنى من كندا – تكلم بمنتهى الوضوح قال السودانيين ديل لو إنتبهوا لإمكانياتهم الشخصية وكوادرهم وأرضهم والإمكانيات الموجودة فيها فى 7 سنوات يمكن أن يكونوا أكثر ثراء من كندا - ترجع فى كلامك فى القدرة على بناء السودان بسواعد أبنائه وترجع للكلام المخزل ( يا شيخ تميم جيب مصارفك وأموالك وكفاءاتك ففتي ففتي البتصدره شيل نصه وأدينا نصه ) طبعا نص لشيخ تميم ونص لى جماعة التمكين يا أهل السودان ماتحلموا تشموا منها قدحه
حسين عاوز وحده مع السعودية ووحدة مع قطر الأكلوه من مال بترول الجنوب ما كفاهم عاوزين يلهفوا مال بترول الخليج – يا حسين السعودية سحبت سفيرها من قطر لو لم تسمع ولن يعود وتميم والإخوان المسلمين يأكلون فى صحن واحد – السعودية البحرين الكويت والإمارات – جميعها كان مهدد بأعمال إرهابية يقودها فكر الأخوان المسلمين الأرهابى وتنفذها أذرعه الإرهابية التى تعرفها أنت إن لم تكن عضو فيها – سيبك من وحدة إندماجية مع السعودية وأبحثوا عن حلول ومعالجات نهائية للمشكل السودانى
تلاحظون أن حسين خوجلى توقف من الهجوم على السيد الصادق أو الميرغنى ودا مش معناه أنه مؤدب ولكن لا أستبعد أن تكون وصلته رسالة من القصر ومن الفريق بكرى بالذات ، لكن حين منع من مهاجمة الداخل نجده مازال فى نفسه شىء من حتى تجاه مصر وجيش مصر حين قال ( الجيش المصرى بيفتكر أن الفرعون لازم يكون منه ) بينما نجده فى الداخل يمجد ويطرى على شيخ على عثمان تعليقا على خبر على عثمان يمسك بملف الحوار ويلتقى أبو عيسى حين قال والحديث لحسين خوجلى ( أنا بفتكر أن دخول الأخ على عثمان فى الحوار مع القوى السياسية فيه كثير من الإضافة ، فالرجل له قبول كبير جدا وسطوه سياسية ويعرف ماذا يقول وماذا يفعل ) – كذاب ومنافق فالرجل قاد حوار السلام فى نيفاشا ولم يعرف ماذا فعل وهو الأن خارج القصر لأخطاء كبيرة أرتكبها أدت لفصل الجنوب بل ان الرئيس يحمله كامل المسئولية – ومافى داعى للنفاق الرجل لم يعد يملك شىء يعطيه لك يا متملق

[email protected]


تعليقات 17 | إهداء 0 | زيارات 2873

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#960682 [تفتيحة لمن فضيحة]
0.00/5 (0 صوت)

04-02-2014 10:39 AM
يعني كدا خلاص؟!! الراجل دا بقي كاتب معتمد في الراكوبة؟!! معقولة تبقو علينا انت وحسين خوجلي؟ .. بصراحة انا ماقريت مقالك لاني صدمت من اول سطر ( هذه المرة لم اكتب...)حسبنا الله ونعم الوكيل.

[تفتيحة لمن فضيحة]

#960552 [كمال]
0.00/5 (0 صوت)

04-02-2014 07:58 AM
المهندس سلمان إسماعيل
لماذا صرت متخصصا فقط في الكتابة عن حسين خوجلي ؟
يا أخي الرجل اتفقت أم اختلفت معه فهو صاحب مبادرة في تقديم برنامج تلفزيوني فريد من نوعه، وبصراحة أسلوبك فيهو ريحة حسادة،...أعوذ بالله ناس تخصصها تبادر وناس تخصصهاتناقر

[كمال]

ردود على كمال
United States [المهندس سلمان إسماعيل بخيت على] 04-02-2014 04:55 PM
ياكمال أنا صنفتك وأمثالك مابين مرحلة الديك والجمار ولم تسألنى لماذا ؟ حسين خوجلى قال ليكم أحمد ضاع ولقيناهو والسودان ضاع تعالوا نفتش عليه ونعيده ؟
أنت كان بدل ما تهاجمنى وتقول الرجل صاحب مبادرة فى تقديم برنامج تلفزيونى فريد من عونه ، كان عليك أن تسأل حسين خوجلى هذه الأسئلة :
من المتسبب فى ضياع الولد أحمد ؟ ودا موضوع مهم عشان كل أب يعرف أن تصرف بعينه يجعل شاب عمره 14 سنة يترك بيته ويعيش فى غابة السنط وقد يكون الأمر خطير ومرتبط بشبكة مخدرات أو اسوأ من ذلك
حسين لم يقدم عمل يرفعه لدرجة فريد وفريد دى درجة عالية ورفيعه UNIQUE
من المتسبب فى ضياع السودان ؟ حسين لم يضع السؤال ولم يجيب عليه قال السودان ضاع وكلام ذى دا عندنا نحن لن يمر بأخوى وأخوك - ضاع متى ؟ وضاع كيف ؟ واللى ضيعه من ؟ ولو لقيناها السودان دا نودي لأبوه زى ما الرائد عوض ودى أحمد لأبوه ؟ والسودان دا أبوه ؟ جماعة المؤتمر الوطنى وجماعة التمكين برضو ؟
ياكمال إنتو يظهر عليكم صغار فى السن أو أخشى أن تكونوا من خريجي جامعات ابراهيم أحمد عمر
وإلا زول بيفهم تلت التلاته مابيقول حسين خوجلى فريد من نوعه - فريد فى شكله - فريد فى مصميص والتجشؤ والعاع عاع واصوات تانية ماعارف مصدرها لكن كلامه بيوحى بأنه بيلعب دور خبيث لصالح جماعة الإخوان ولكن لياقته وفهمه والقراية التى قراها فى الفرع وسوق أمدرمان لم تسعفه وتوقعوا مقال يفضح ضحالة وجهل حسين خوجلى بأبسط ابجديات السياسة - يا كمال أنا لعلمك كنت بجلس وأنا طالب ثانوى أستمع للشريف الحسين الهندى ولأقطاب إتحاديين كبار كانت علاقتى الأخيرة قوية بعمنا المغفور له حاج مضوى محمد أحمد عليه ألف رحمه ونور فى قبرة قال لى سمع أضانى دى ما كلمنى زول أن إسماعيل الأزهرى طلب من الشريف الحسين الهندى يراقب ليهو زين العابدين أخوه لأن الأزهرى يشك فى صدق إنتمائه للحزب وأنه مزروع بواسطة حزب أخر فى خاصرة الإتحاديين وهو ليس إتحادى ولكنه قد يكون عميل لحزب آخر وأتضح فيما بعد بأنه مزروع من قبل جماعة الأخوان المسلمين وعشان كده يا حسين قولة زين العابدين فى حكومة الديمقراطية الثالثة ( الحكومة دى لو خطفها كلب مافى زول بيقول ليهو جر ما تتفتح بيها كتير فالرجل لم يكن يمثل الإتحادى الديمقراطى ولكنه كوز مأجور وظهر من بعده ناس كتار زى عبد الله محمد أحمد سفير الكيزان فى روما وكان من رجال حزب الأمة وأحمد سليمان المحامى بتاع الشيوعى وإبراهيم عبيد الله القيادى بالشيوعى طلع كوز الأحزاب عندها مخابرات وبتزرع جماعتها فى أحزاب أخرى وزين العابدين نحن راميين طوبته وناس الدقير لو كانوا إتحاديين نضاف ما بيدخلوا فى حكومة القاعدة المشروطة وناس الإتحادى الديمقراطى جماعة السيد محمد عثمان لايمثلون كوادر الحزب الوطنى الإتحادى ناس أحمد زين العابدين ويا على السيد تستاهلوا اريتوا كان ضربوك طلقه رامين نفسكم وراخصنا لى حوش سيدى وجنينة سيدى لحد ما خلفتوا لينا شباب مسطح ضحل التفكير زى ناس كمال وهجام والسر موسى ( السر دا أبوه ختمى ) وأخوانهم - ولولا التوجيه السماوى بذكر محاسن الموتى لقلنا كل ما نعرفه عن بعضهم وعن كلهم
السودان مش ضاع يا حسين مافى بلد بيضيع هو طائرة ماليزية
السودان فى مفترق طرق فى ناس حتغادر نهائى وفى ناس حتركب وتقود القطار وأنت خايف من هذا الأمر تلف وتدور
نافع على نافع فول على نفسه - قال لينا عاوزننا ننزل من قمرة قيادة القطار ونمشى نقعد ليكم فى الفرملة - عشم أبليس فى الجنة
اليوم فتشنا فى الفرملة مالقينا لا نافع لا على عثمان - بقوا يمشوا يفتشوا فى الصلح من الشيوعين والشيوعين رفضوهم
يا شباب أصحى وتحمل مسئوليتك وطنك مش ضايع وطنك فى مفترق طرق وأنت ياشباب السودان تحدد أن كان السودان يسلك طريق التطرق فى أقصى اليمين أم طريق التطرق فى أفصى اليسار أو طريق الإعتدال والوسطية والحكومة المدنية والفكر الليبرالى الكلاسيكى فى الطريق الوسط المعتدل طريق يسير فيه كل أهل السودان دون تمييز فى السحنات واللون واللغة والقبيلة ينعم الكل بمساواة فى الحقوق لا تسلط لجماعة على جماعة
أقروا الكلام دا كويس إستوعبوه ثم أكتبوا بعقولكم لا بأناملكم
ويا كمال كلما تحدث حسين خوجلى عن الشأن السودانى بأى عبارات تجير فى صالح نظام الأخوان المسلمين سأتصدى له وأرجو ألا يلمح تلميحات بأن هنالك قله تكتب فى الظلام ضده - نحن الغالبية وليفتح قناته لكل خصومه فى السياسة حتى يستطيع أن يعرف حجمه الحقيقى
أبشركم فقد سعدت بسماع أخبار تتحدث عن أن شباب فى مكان ما لا أدرى ولكنه بين لندن ودبى يعدون العدة لإطلاق قناة فضائية تكون منبر حر صادق ونزيه ونصيحتى للبشير يسارع بأن يغلق هذا الفم قبل أن يخرج لنا فضلات الطعام من خلال مشكلات صحية يعانيها فى صمام فم المعدة

United States [المهندس سلمان إسماعيل بخيت على] 04-02-2014 02:18 PM
يا كمال أنت أكيد على قائمة التلت الأول - كيف يحسد شخص يعمل فى السعودية فى مجال المساحة رجل إعلامى فى السودان - لوكنت أملك قناة فضائية أو صحيفة أو إذاعة أو حتى كنت صحفى يبحث عن عمل وتقدم لحسين ورفضه
مشكلتنا مع حسين أن حسين خوجلى بيحاول تسويق الإنقاذ ويبشر بعودة الإنقاذ ويرى فى تقارب البشير الترابى علامة من علامات ذلك
ويا كمال لو أنت بتشوف برنامج حسين برنامج فريد من نوعه تكون أسوأ من الجاهل
ونحن صنفنا شبابنا الى ثلاثة فئات الفئة الأولى فئة الحمار والثانية فئة الديك والثالثة فئة الإنسان المدرك الواعى - أنت تصنف مابين الحمار والديك نسأل الله أن نتحسن من قدراتك وترتقى لفئة البشر


#960476 [هجام]
0.00/5 (0 صوت)

04-02-2014 02:08 AM
لا حول ولا قوة الا بالله.
انتخابات شنو يا باشمهندس،هذا المثل قيل بعد حريق اسماعيل باشا
فى شندى وحضور الدفتردار من كردفان لديار الحسانية.لكن لزومو
شنو تهاجم الزول بالاسلحة الثقيلة دى .الزول قال رأيو فيما
تكتب هدى بالك شوية ولم يهاجمك شخصيا مثل اثمان وارباع
ام انت لا تخطئ وفوق النقد (دا يكون موضوع اخر)
عزيزى الا ترى انك تشخصن الامور دائما!!!!؟

[هجام]

#960432 [هجام]
0.00/5 (0 صوت)

04-02-2014 12:12 AM
-ثم ما الفرق بينك وبين حسين خوجلى وجماعته بهذه النظرة
الاستعلائية والشوفينية وتصنيف الاخر على مقامات الجهل
والغيبوبة واعطاء من يوافق صكوك الفهم والعغة.
-(الكلام بخور الباطن) نعرفك من خلال ماتكتب ولا غير ذلك
وعندما علقت انا على ما أستمرأت ان تكتبه الذى تعدى حدود
النقد بكثير ووصل لحدود الكراهية احسست انى كقارئ لا
أشمئز من هذا الاسلوب وغيرى كثر واصبح لا فائدة من
متابعة ما تكتب حاولت تنبيهك بذلك من غير سب ولا شتيمة
غير انى فوجئت بتصنيفات غريبة لاجيال كاملة من شباب البلد بربأ
بها ان تاتى من شخص محسوب على النخبة(التى ادمنت الفشل
فى ادارة البلد،بشهادة منصور خالد).
-عموما الحمد لله الخليت حسين خوجلى وقبلت على ناس هجام

[هجام]

#960416 [هجام]
5.00/5 (1 صوت)

04-01-2014 11:39 PM
يا سبحان الله ما كل هذا الفجور فى الخصومة.
لا يغلبنى الرد بنفس الاسلوب ولكن:
-احترامى لنغسي
-احتراما لسنك
-كون انى لا اعرفك شخصيا
-كون ان الناس لا تستفيد شيئا من هذا الاسلوب
كل هذا منعنى من الرد على هذه التصنيفات الوهمية التى
صنغت بها شباب السودان بصورة مضحكة جدا وكل هذا نتج من
تعليق على مقال فى الشأن العام تناوله الكاتب بصورة نضحت
من خلالها كراهية لا نستفيد منها شيئا بل اصبحت بصورة
يومية زى تناول اركان النقاش فى الجامعات يأتها الناس
للاستماع للمهاترات وفش الغبائن.
ثم ما الذى يعطيك حق نقد حسين زفت هذا بحجة انه
يتكلم فى الشأن العام بل والوصف بأقذع الالفاظ،ويسلب هذا
الحق من ناقدي مقالاتك وانت تتكلم فى الشأن العام ايضا

[هجام]

#960028 [السر موسى]
5.00/5 (1 صوت)

04-01-2014 02:59 PM
ياخ كرهتونه حسين قال حسين فعل حسين ترك الصادق قال الصادق فعل عيسى قال موسى فعل
يا جماعة الخير فكونا من المقالات البايخه دى . الناس فى شنو والحسانيه فى شنو .

[السر موسى]

ردود على السر موسى
United States [المهندس سلمان إسماعيل بخيت على] 04-01-2014 03:53 PM
الناس فى شنو والحسانيه فى شنو .

المثل دا ضرب لمان قيل للحسانية تعالوا للإنتخابات يوم السبت وقالوا نحن يوم السبت مش فاضيين عندنا سباق حمير
المثل دا يا السر موسى يضرب عليك أنت وعلى أشباهك من أثمان وليس أنصاف المتعلمين البلد غرقت وضاعت وحسين خوجلى بيسوف فى نظام الأخوان عشان يواصل حكمه للسودان لربع قرن أخر وأنت وأمثالك لم تستوعبوا الدرس وبقلمكم المكسور هذا لن تتصدون له وكل ما يمكن أن يصدر منك عبارت زى ( ياخ كرهتونه حسين قال حسين فعل حسين ترك الصادق قال الصادق فعل عيسى قال موسى فعل
يا جماعة الخير فكونا من المقالات البايخه دى ) ياخ غلط كرهتونه غلط وكلك على بعض مركب غلط وأنت تصنف فى التلت الأول لشباب السودان بين الحمار والديك شوف الذى يناسبك وألبسه


#959800 [المشروع]
0.00/5 (0 صوت)

04-01-2014 12:12 PM
حسين خوجلي بيعاني من ازمة نفسية ومن وخزة ضمير شديدة
فحسين وجد نفسه انه جزء من العصبة التي ادت الى تدمير السودان وسيول انهار من الدم ليل نهار وان ما حققه من امبراطورية اعلامية كان من ورائها حزب فاشي وجد نفسه انه لازم يفضفض فهذه الدماء وهذه المقاتلات التي تجوب فضاء السودان يوميا تحصد ارواح الغلابة وكل من يطالب بحقه وكل من يقول البغلة في الابريق ... عشان كدا يا جماعة والله حسين خوجلي تعبان نفسيا عايز يستمع بهذه الاموال وهذه الامبراطورية في بلد معافي ولكنه شاعر ان كل هذه الانهار التي تجري من تحته سيفقدها قريبا اما بالموت او بضياع السودان وعشان كدا لازم يبكي ويتباكي على السودان ليس من اجل السودانيين ومن اجل السودان من اجل ان يعيش بقية عمره يتنعم بالمال والجاه والسلطة وهو شايف ان الحكومة دي ماشة تقضى على الاخضر واليابس وهو شايف ان الحكومة دي وضعته عليه مسئولية دماء تسيل وهو يتحمل جزء منها لذلك لازم يفضفض وكلما تشتد الحرب فهو سوف يفضفض اكثر واكثر

[المشروع]

#959652 [محمد داواد تاور]
0.00/5 (0 صوت)

04-01-2014 10:26 AM
يا جماعه حسين ده مطرطش ؟؟؟؟؟؟؟؟؟؟؟؟ افهمو مطرطش دي ؟؟؟؟؟؟؟؟؟؟؟؟؟ اعزرو ؟؟؟؟ يا غبش ؟؟؟؟؟؟

[محمد داواد تاور]

ردود على محمد داواد تاور
United States [المهندس سلمان إسماعيل بخيت على] 04-01-2014 01:47 PM
يا جماعه حسين ده مطرطش ؟؟؟؟؟؟؟؟؟؟؟؟ افهمو مطرطش دي ؟؟؟؟؟؟؟؟؟؟؟؟؟ اعزرو ؟؟؟؟ يا غبش ؟؟؟؟؟العبارات دى جات من شخص يدعى محمد داود تاور
يازول انت ماعندك شغلة غير حسين خوجلى
هو البيحضر ليهو منو اساسا
ثانيا لو فى مشاكل بينكم نحنا زنبنا شنو ياخى
قديتنا عديل ياخى
والعبارات التى تليها جات من شخص يدعى ( عادل )
الجماعة الإثنين ديل ضيفوهم لتلتكم الأولانى
لو فيكم شخص بيفهم وعنده عقل إستمع لحسين خوجلى فى حديث الأثنين 31 مارس لأكتشف دون عناء أن حسين الذى يدعى بأن قناته لا تتبع لدولة ولا لحزب ولا لسفارة بحديث الأمس إنكشفت عريتها وبانت سوءتها القبيحة
فى مقال جديد يجرى أعداد فترقبوه - جماعة الإخوان المسلمين بعد البيان السعودى يتمترسون جميعهم بمركزيتهم خلف قناة أمدرمان وحسين خوجلى لتحسين صورة النظام وأنا لا أستبعد أن ماقاله حسين خوجلى أمسية الأثنين 31 مارس جاء من بنات أفكار حسين خوجلى لأنه كلام عميق وخطير ولا أستبعد أن تكون التعليمات قد صدرت من جهات عليا لجميع مفكري حركة الأخوان المسلمين أن يساعدوا حسين خوجلى بإعداد سيناريوهات تجمل شكل حكم الأنقاذ فى وجه الشعب السودانى حتى يغفر لها كل أخطائها ولمان نستعيد مكانتنا بين السودانين ممكن نتعاتب ونتحاسب نحن أبناء الحركة الإسلامية
كلام حسين بتاع أمس كلام خطير يلخص السياسية فى السودان من العام 1954م الى 2014م ويقول فى خلاصته أن أخطاء السودان توزع بالشيوع بين كل من حكم السودان والبشير وحكومته لا يتحملان تلك الأخطاء لوحدهما - وبدأوا التبرير بأن أول حكومة وطنية لو قبلت مقترح الجنوبين بقيام حكومة فيدرالية لما أنفصل الجنوب ودا كلام باطل اريد به حق - جنوب السودان جزء اصيل من السودان ولم يكن فى يوم من دولة قائمة بذاتها بينما دارفور كانت دولة وسنار كانت دولة وجنوب النيل الأزرق كان دولة لو منحنا اقيلم جنوب السودان حكم فيدرالى من باب اولى أن نعطى اقليم دارفور وأقليم سنار ومملكة الفونج وممالك كثيرة - من باب سد الذرائع رفضت الفكرة حتى لا تكون الفيدرالية مدخل لتفتت السودان وجيئتم انتو يا الشطار سلمتوها ليهم فى طبق من ذهب
فى المقال التالى سيجد حسين خوجلى الرد على كل تلك التساؤلات التى طرحها والتى رمى من ورائها لنعمل شير ونتقاسم الخيابات السياسية - NO SHARING نحن مو خايبين ومو فاشلين ولن نشارككم فى فشلكم والتاريخ سيكون الحكم بيننا
يا جماعة أنا لا أستبعد أن خطاب حسين خوجلى بتاع الأثنين 31 مارس أعد بواسطة الجماعة الأرهابية مجتمعة فتشتم فيه رائحة مفكرى الجماعة - الترابى - مهدى ابراهيم - سيد الخطيب - أمين حسن عمر والمحبوب وبقية الجماعة - الناس دى من يوم ما صدر البيان السعودى الذى صنف جماعة الأخوان كجماعة إرهابية وهم فى حالة إرتباك وعدم توازن - الأن نزلوا الميدان يتقلهم خلف حسين خوجلى وبدأت الصحافة الصفراء تنشر على قنوات فضائية
قال ايه قال لو ناس الأزهرى أعطوا الجنوبيين حكم فيدرالى الجنوب ما كانش اتفصل
والله كان السودان دا اليوم تسع اقاليم فيدراليه وكان الجنوب بمساعدة أمريكا وكينيا ويوغندا أنفصل كدولة مستقلة واقليم كسلا بمساعدة اريتريا بقى دولة لحالها والقضارف بمساعدة اثيوبيا دولة ودارفور وكردفان والشمالية ونهر النيل مع بورتسودان وحلايب والشلاتين انضموا لمصر ليضمنوا حماية جيش مصر لهم من الدول العشرة الجديدة - كدى يا حسين لمان افضى ليكم واكسر كل مقاديفكم - لن نخدع بمعسول الكلام


#959629 [عادل]
5.00/5 (1 صوت)

04-01-2014 10:10 AM
يازول انت ماعندك شغلة غير حسين خوجلى
هو البيحضر ليهو منو اساسا
ثانيا لو فى مشاكل بينكم نحنا زنبنا شنو ياخى
قديتنا عديل ياخى

[عادل]

#959368 [فنجال السم]
0.00/5 (0 صوت)

04-01-2014 01:13 AM
..
التنبوبر
لوري مكوَّش أقمشة ..سكر ...
حتى الفوفو ... وعتل تؤجر
وأمحي المنكر بي معروفو
بلة الطاهر علي بلاع ...
أكرمناهو .... أكرمن ضيوفو
يشبه مرت الشيخ في وشيهو ...
لولا الدقن الدشدش صوفو اتذكرونا بله الطاهر علي بلاع في رائعة جميد الجابريه ذاك المسخ المدور كالعجل المدوعل انه هو انه حسين خوجلي فاتي الاخوان المسلمين الاملس انه هو بعينه بعثوه ليبيع لاهل السودان عجل السامري ويبشرهم بالثوب الجديد للاخوان المسلمين ليحكموا هذه المره ما تبفي من السودان بشفافيه ان العجل المدوعل مرسوم له دور بعد ان استشعرت الجماعه ان حكمهم افل افل ولكن يريدون ان يتجملوا بريشة الفاتي الاملس يريدون ان يلونون لنا افق حكمهم الاسود بلون تتخلله الشفافيه فيتكلم عن الفساد هنا وهناك ولكن هنالك خطوط لا يمكن له ان يتخطاها انه هو بله الطاهر علي بلاع صاحبنا صاحب الصوت المرخرخ في قصيدة الجابريه فالي مضابطها:::


بلة الطاهر علي بلاّع
كانت أول مرة نشوفو ...
يومنا الشفنا اللاندكروزر
اللونا مخطَط
والبنوت الراسا مرَبط ..
بلة خبارك ما بتشبهنا وعامل زولنا
تاني نقول الزول برانا نغيير قولنا
إلا كبار الحلة بقولوا ...
بلة دا هولنا
بلة دا أصلا من ها الحِلة
إلا أنربى وقرأ في الخارج
رافق جدو الفتح التركي
وسيرتو انقطعت في المهدية
وررَرَة سمعنا أستوطن برة ...
وقام إنزوج من مصرية
جابت علي ... علي جاب الطاهر
حتى الطاهر خلَّف بلة
جدو انشيطن أخير ما لانا
بلة أنسركن وبقي مولانا وجاء وبرانا
أقرب واحد لي حاج بلة ....
أقرب واحد شيخ الحلة
بلة الطاهر علي حسب الله
أول مرة يصلي معانا ...قدمناهو وقم أمَّانا
صوتو مرخرخ لامن يقرأ
يقرأ ويقطع .. زي البطرا
لامن يركع جسمو متختخ
عند السجدة سجودو ممخمخ
شيخ الحلة بقول عن امرو
زول غرقان في الدين من عمرو
ستة سنين .. قابض في جمرو
وما فكاهو طريق الله ...
صوتو وِدِر من كترة ذكرو
وجسمو التختخو.. شدَة صبرو
قلنا حقيقة الزول بي عذرو
وفتنا قناعة.. ومااااانا قناعة
إلا الستة.. الصاروا جماعة
قالوا .. دا زول تربايته مياعة
ما يشبهنا ورفعو وضاعة
زول زول دنيا ودنيا صياعة
قصة دينو ودقنو بضاعة
وإحنا أصواتنا ... يا إما مباعة
يا إما جهالة وناس متباعة
وفي الحالتين آمالنا مضاعة
وخارم بارم
كونها بوسطة ... ومدرسة وسطى
والشفخانة وموية ونور
كونو يجيبا دا ما منظور
وزيادة الحصة ... الزول زول سوق
زول من جدو يلف ويدور
ويا الجابرية دا مطلب عادل ...
كونو تطيبي ... تكاتبي وتقري
ضوك يشلع ... دشك يرشع
ونحن دفعنا ضرايب بدري
ولسه بندفع ... لسع ... لسع
بس يا جماعة ... إن قضينا حياتنا تباعة
وصنيت رادي ... وقول في الفاضي
خوفنا نقوم ما نلقى أراضي
ونحن أساسنا وراسنا زراعة
والجابرية إن دايرة شفاعا
ما بيشفعلها إلا ضُراعا
عبو ضراعكن يا رجَالا ...
وخلو بصركم دغري وسالم
عبو ضراعكن آ رجالا ...
شيخ الحلة أضلَّ وضلَّ
وأسألوا بُرَّة وحاجة السُرَّة
عن التيبان وحكاية الصُّرة
شن لمه بلة وشيخ الحِلة مع شرع الله
والناس ديل العارضين برة
جربناهن كمين مرة
وتاني نجرب شان ننضرَّ؟!
ويا الجابرية معاكي سلامة ...
كان الفوقك ما فات مرة
كان كلماتن ناشف ريقا ... كانت مرة
إلا حقيقة ... وغلبنا نطيقا ...
وين في الصُرمة ... وقِل القدرة
وسكتناهن بس ما صنو
وقاطعناهن تاني المرة
وما من واحد فيهن ترَا

وبلة
كان هو طريق الناس وخيارا
فوزناهو.. وجانا زيارة
كرمنالو التور وعرضنا ...
وخليناهم برة الدارة
دايرن بوسطة ومدرسة وسطى ...
موية وكهربا والشفخانة ...
زيادة الحصة وسوق منضبطة
وصدو كلاب الحلة يهووا ...
ينضم بلة يهووا معاهو
نهتف نحن يزيد هوهيوا
مافي شهر جاتنا الخرسانة ...
جانا السيخ ... الطوب ... الرملة ...
جا الأسمنت شكارة شكارة
عديناهن ألف شكارة
وكرمنالن خيرا جانا
وكل كلاب الحلة الهوَّن ...
طفشناهن بالجبخانة
وفي صنانا تدودي الزانة
إنغالطنا كتير في بعضنا ...
أولى المدرسة واللا البوسطة ؟
أولى المدرسة
والشفخانة ؟؟؟؟
الشفخانة محل النقطة
ونان النقطة؟؟؟؟؟..
.نحن أهالي ... وودنا صافي
بيننا معزَّّة جرائم مافي ...
وما بنحتاج لي شرطة ونقطة
تحصل عِلة في شيخ الحلة
ونان النقطة؟؟؟؟
نحن الإيدنا بنت للنقطة ...
والجيَرنا زبالة أطيانا
ناس السلطة إن دارو النقطة ...
يمشوا بكان أرض الشفخانة
وما طالبانا خلاف زنزانة
مدرسة بوسطة ... مدرسة بوسطة
ستين طلبة وعشرين أوسطى
شغالين ما ملَو سخانة
مدرسة بوسطة ...
وقلنا غُنانا:-
يا الجابرية الله أدّانا...
حاج البلة المبروك جانا
جاب المدرسة جاب البوسطة
وبكرة يرجّع للشفخانة
نصحى نصابح موية الدُّش
نمسي نلاقي الضوْ عمّانا
مدرسة بوسطة ... مدرسة بوسطة
وتاوق ... وتاوق ... وتاوق ...اخ
وفجأة تبين تتضخ الخرطة
وكب تنتصب الميضنة ...أخ
أخ من حظك يا الجابرية
سابع جامع في الجابرية
سابع جامع وبالجبرية
وصدوا كلاب الحلة يهووا ...
أخ يا الناس الحالن قطَا
في البلدان الحظها فاجع
بق يا الصاح الماك متراجع
وحرِّق دبش الدنيا الغلطة
بق وانفرَق في الجابرية
بق في أرحامنا في شافع نافع
ترفعو أمو في حيطة الجامع
يكتب .. (يسقط دجل السلطة (
ويسقط بلة وشيخنا التابع
كشّفناك وكشفنا الخطة
تحيا كلابك يا الجابرية
ويحيا ضراع الزيتن طالع
والبيصارع مُر الواقع
تحيا ترابك والطورية
الجابرية تحيي الشارع
دايرين كهرباء
دايرين موية
دايرين سلطة وسوق منضبطة
دايرن هسة زيادة الحصة ..
الشفخانة بديل النقطة
دايرين بوسطة ومدرسة وسطى
والله بنعبدوا في ايت حتة
دايرين بوسطة ومدرسة وسطى
والله بنعبدوا في ايت حتة

[فنجال السم]

#959214 [الصليحابي]
0.00/5 (0 صوت)

03-31-2014 08:36 PM
الأستاذ المهندس سلمان بخيت ، لك تحياتي واحترامي ، صدقني أصبحت لا اهتم ببرنامج حسين المضلل ، بل أحاول الخروج من البيت في وقت إذاعته، فقد عرفت وفهمت معنى أن تكون خسيسا كاذبا منافقا في كل كلمة في كل التفاتة في كل نحنحة وفي كل تجشؤ ارى ظلاً متخماً بالضلال والتضليل ، لن أتابع بعد اليوم برنامج هذا المنافق ، سوف اكتفي بتحليل ومقالات كتابنا الأعزاء الأوفياء في صحيفة في الراكوبة وأنت واحد منهم يا أستاذ سلمان تعري لنا هذا الكذاب الأشر وتكشف لنا عوراته النتنة أمام الملأ ,, تحياتي لك مرة أخرى ومزيد من تحليلك الرائع الذي نعيشه واقعا كل يوم من خلال ما يتجشأ به هذا المضلل .. وفقك

[الصليحابي]

#959198 [عبود]
5.00/5 (1 صوت)

03-31-2014 08:01 PM
طيب يا باش مهندس !!! صدقنا ان حسين خوجلي متفلسف و كذاب حسب ذعمكم . لماذا لا تكتب لنا
عن عن طرحكم العلمي و الهندسي لحل مشاكل البلد .. الناس مستعدة تقرا, تسمع او تشاهد الطرح البديل .

[عبود]

ردود على عبود
[مدني الحبيبة] 04-01-2014 09:39 AM
حسب زعمكم دي لذيذة ، دي ياها شغلانة الكيزان والناس الساكت ، انت لو جادي في الحلول للامانة وزالتاريخ الحزب الشيوعي السوداني قدم كثير من البرامج والاطروحات لحلحلة كثير من القضايا اليومية والاستراتيجية من قبل كوادره المؤهلة والامينة ، لكن المشكلة الزيكم ديل بارائهم المسبقة وانتمائهم الاعمى الذي يقيم الامور من نواحي عاطفية بحتة ، لاينظر لحلول الاطراف الاخرى ، السيد الباشمهندس في نقده للمنافق الضال حسين خوجلي يريد ان يفند كل مايعكر ويغبش وعي البسطاء من ابنائنا الشرفاء ، فالمقام هنا ليس طرح افكار وبرامج ايها السازج الكوز

United States [المهندس سلمان إسماعيل بخيت على] 04-01-2014 06:52 AM
يا عبود لو سمعت بشيخ على عبد الرحمن الضرير كبير أقطاب الحزب الإتحادى الديمقراطى فى الديمقراطية الأولى والثانية كانت فى مشكلة بتناقش فى البرلمان لمان جاء خارج قابله رجال الصحافة : ياشيخ على ماهو الحل ؟ قال ليهم الحل فى الحل ، وأنا بعيدها لكم ياعبود الحل فى الحل هذا النظام لايمكن إصلاحه من وجود رجال زولهم حسين خوجلى ديل مش رجال دولة يعنى كيف نبنى دولة بدون رجال - يمرقوا خالص ويأتى رجال دولة من الطراز الممتاز وحواء السودان ودود وولود ماعقرت وبعدين دا لاطرح علمى لاهندسى دا طرح سياسى اجتماعى - الطرح البديل اسمه التغيير أمسكوا فى الكلمة دى وبس التغيير


#959187 [ود البلد االممقوص]
0.00/5 (0 صوت)

03-31-2014 07:41 PM
ياجماعة الخير نحن ماشفنا في السودان الا حكومة الانقاذ وصدقوني شكلها كدي أفشل حكومة مرت على السودان منذ الاستقلال وحسين خوجلي ده شكلو كسار تلج كبيييييييييييييييييير ومايع وداير اساعد في تمكين حكومة الانقاذ . عشان كدي الشعب حاانتفض ويتم محاسبة كل الارزقية والانتهازية والذين تسببو في دمار وفقر السودان الغالي الي قلوبنا ،

[ود البلد االممقوص]

#959181 [الصليحابي]
0.00/5 (0 صوت)

03-31-2014 07:31 PM
الأستاذ المهندس سلمان بخيت ، لك تحياتي واحترامي ، صدقني أصبحت لا اهتم ببرنامج حسين المضلل ، بل أحاول الخروج من البيت في وقت إذاعته، فقد عرفت وفهمت معنى أن تكون خسيسا كاذبا منافقا في كل كلمة في كل التفاتة في كل نحنحة وفي كل تجشؤ ارى ظلاً متخماً بالضلال والتضليل ، لن أتابع بعد اليوم برنامج هذا المنافق ، سوف اكتفي بتحليل ومقالات كتابنا الأعزاء الأوفياء في صحيفة الراكوبة وأنت واحد منهم يا أستاذ سلمان تعري لنا هذا الكذاب الأشر وتكشف لنا عوراته النتنة أمام الملأ ,, تحياتي لك مرة أخرى ومزيد من تحليلك الرائع الذي نعيشه واقعا كل يوم من خلال ما يتجشأ به هذا المضلل .. وفقك الله ...

[الصليحابي]

#959163 [الصليحابي]
0.00/5 (0 صوت)

03-31-2014 07:12 PM
الأستاذ المهندس سلمان بخيت ، لك تحياتي واحترامي ، صدقني أصبحت لا اهتم ببرنامج حسين المضلل ، بل أحاول الخروج من البيت في وقت إذاعته، فقد عرفت وفهمت معنى أن تكون خسيسا كاذبا منافقا في كل كلمة في كل التفاتة في كل نحنحة وفي كل تجشؤ ارى ظلاً متخماً بالضلال والتضليل ، لن أتابع بعد اليوم برنامج هذا المنافق ، سوف اكتفي بتحليل ومقالات كتابنا الأعزاء الأوفياء في صحيفة في الراكوبة وأنت واحد منهم يا أستاذ سلمان تعري لنا هذا الكذاب الأشر وتكشف لنا عوراته النتنة أمام الملأ ,, تحياتي لك مرة أخرى ومزيد من تحليلك الرائع الذي نعيشه واقعا كل يوم من خلال ما يتجشأ به هذا المضلل .. وفقك الله ...

[الصليحابي]

#959153 [البعشوم]
0.00/5 (0 صوت)

03-31-2014 07:04 PM
يا باشمهندس بالله اتخصص في الزبالة دهـ لانو بطنا بقت تطم من خزعبلاته دي .. وخلي الموضوع يكون مسجل على مقطع فيديو عشان تعم الفائدة ويعرف الناس مدى كضب ونفاق شوال القطن دهـ

[البعشوم]

#959138 [هجام]
5.00/5 (3 صوت)

03-31-2014 06:40 PM
يا باشمهندس سلام عليك أخشى ان تبقى عليك مقولة (لو ما فى قبب ما حيكون فى انصار سنة فى السودان)حسين خوجلى دا حقو تشكرو يوميا لانو اداك موضوع تتكلم فيهو وبالمناسبة اكتر زول بيروج ليهو انت بدون ما تشعر.بعدين الناس واعية الا بتمشى.

[هجام]

ردود على هجام
United States [المهندس سلمان إسماعيل بخيت على] 04-01-2014 06:10 PM
أما شبيهه مصطفى فى التلت التانى بتاع الجهلاء وبرضه منو العوض وعليهو العوض

United States [المهندس سلمان إسماعيل بخيت على] 04-01-2014 06:08 PM
هجام قال (لو ما فى قبب ما حيكون فى انصار سنة فى السودان)
وأنا صنفته فى التلت الأول من شباب السودان تلت المساطيل والمحششين ومنه العوض وعليه العوض

[البعشوم] 04-01-2014 01:03 PM
يا مصطفى وهجام .. لو عاجبكم كلام حسين خوجلي دهـ، مبروك عليكم، فعلى قدر أهل العزم تأتي العزائم .. وما عايز أقول الطيور على اشكالها تقع !

[ع] 04-01-2014 12:42 PM
صدقني يا بشمهندس كل مخازيهم ونتانتهم شاقه الفريق ما محتاجه ابصرو بيها احد الا منتفع ومستفيد من الفضائح دي
وزولك حسين خوجلي ده مفتكر ذي زمن الوان في الديمقراطيه يملك جريده وهو الوحيد الذي يستطيع ان يتحدث ويضري عيشه وفات عليه ان 2014 غير 1988 من حيث شعبيه الاعلاميه وتوفره للكثير
باختصار حسين خوجلي بحرق في نفسو وضميرو واخلاقو ووطونو
دعه..خبيث يدافع عن خبثاء

United States [المهندس سلمان إسماعيل بخيت على] 04-01-2014 10:50 AM
عارفين مشكلة أولادنا ناس هجام والزيهم شنو ؟ THE SHALLOW MIND
طبعا لو شرحنا مخ أنشتاين أو مخ أى عالم كبير سنجد خلايا المخ زى بيت العنكبوت متداخلة مع بعضها البعض ومتشابكة حتى لاتكاد تعرف أتجاهاتها
ولو شرحنا مخ حمار أو ديك سنجده عباره عن خطوط متوازية زى خطوط السكة الحديد وبينها مسافات
بعض شباب اليوم مش كلهم حتى لا أظلم اصحاب القدرات ، أقول بعضهم أمثال هجام ومصطفى وأخرون كثر البعد بين الخطوط المتوازية يزيد عن تلك التى فى مخ الحمار أو الديك
ولو عاوز تعرف النوعية دى أعطيه كتاب ليقرأه وأحرص أن تكون بجواره حتى يخلص القصة - خذ منه الكتاب وأعطيه ورق فلسكاب فاضى أو ورق A4 وقلم وقول ليهو لخص لى ما قراءته ؟
لو كان الكتاب من 50 صفحة لن يتمكن من كتابة أكثر من سطر أو سطرين
ديل فى رأسهم لا توجد رامات يخزنوا فيها كلام - ديل لا يجيدون إلا لغة الشات فى المواقع ولغة النبذ والشتائم - لكن لو رجعتم للمقال الذى كتبته انا أعلاه - طرقت فيه تشبيه حسين خوجلى بضياع الولد أحمد وضياع السودان وقال وجدنا أحمد تعالوا نبحث عن السودان دون أن يذكر لنا من هو المتسبب فى ضياع الولد أحمد ، هارفين ليه ؟ عشان مانسأله عن من هو المتسبب فى ضياع السودان - بس السوان ضاع ودا بيذكرنى بمقطع من مسرحية المشاغبين ( الطورته جات مين اللى جاب الطورته لحوار سعيد صالح مع يونس ) أنا عاوز هجام ومصطفى يعطونا رايهم هل سيبحثوا عن السودان الضائع ؟ ولمان يجدوه هل سيسلمون للكيزان لربع قرن تانى ؟
حسين خوجلى ترك السودان الضايع وبدأ فى وضع خطط لحل مشكلات السودان
مره بطرح الوحدة الإندماجية من السعودية
مرة لمان يجى تميم نقول ليهو يا أنكل تميم دى أرضنا ودى نيلنا جيب ملياراتك وكفاءاتك الأجنية وأزرع السودان ففتي ففتي
مره قال : قال لى دكتور محاضر فى جامعة كندية بالمملكة العربية السعودية عمل محاضرة قال السودانيين ديل باقل جهد من الإنتباه لإمكانياتهم الموجودة فى الشخصية السودانية وإمكانياتهم على الأرض فى 7 سنوات بس ممكن يبقوا أغنى من كندا – تكلم بمنتهى الوضوح قال السودانيين ديل لو إنتبهوا لإمكانياتهم الشخصية وكوادرهم وأرضهم والإمكانيات الموجودة فيها فى 7 سنوات يمكن أن يكونوا أكثر ثراء من كندا
لكن حسين خوجلى طرح أسئلة ومنتظر إجابة منكم يا هجام ويا مصطفى
الراجل بيقول – نعمل شنو ؟ نزرع شنو ؟ نربى شنو ؟ نعين منو ؟ نديرها كيف ؟
هو مضيع وإنتم ضعين أكثر منه
والله نحن بنخاطب فى شباب تلته ساطل وتلته جاهل وربنا يجعل لينا البركة فى التلت اللى فضل لينا
هسع يا فنجان السم وليس فنجال الفنجال ما بيشيل ليهو سم - الكلام الكتير الكتبته دا علاقته بموضوعنا دا شنو - وهسع نصنفك مع تلت المسطولين أم تلت الجهلاء لا تحاول أن تضع نفسك مع تلت ناس الصليحابى والبعشوم ديل الفضلوا لينا ومنه العوض وعليه العوض يا فنجال السم ففنجال لا يوجد لها أى معنى فى قواميس اللغة العربية وأنت ليس لك أى معنى وأختار لنفسك موقع فى واحد من التلتين بتاعت شباب السودان يا الأول مع المساطيل والمحششين وبنعالجك أو مع الجهلاء وسنجتهد لأن نعلمك ولكن أبتعد من تلت العليهم التكل والوكل ناس الصليحابى والبعشوم وأنصحك أن تكثر من القراءة لتقدم رؤيتك الشخصية مش الـ COPY & PASTE بدون فهم - يا فنجان ، فالفنجان يعنى كوب كأس أو خمرة القربان المقدس ومن لم يحسن إختيار إسمه لن يحسن أى شىء

United States [المهندس سلمان إسماعيل بخيت على] 04-01-2014 06:57 AM
لكن لى بعض العشم فى أن يعود بعض شبابنا الذين غرر بهم حديث خوجلى بتاع كله فى أحاديثه السمجة، أن يعودوا للجادة ويعوا الدرس ويحفظوا السودان فى سويداء القلوب ويعروا حسين خوجلى وأمثاله من تجار الكذب والنفاق والدجل والروايات الدرامية وبعض الشباب الذين ولدوا فى هذا الظلام ولم يروا النور فى حياتهم أمثال هجام ومصطفى - مصيبتنا كبيره فيهم لاعلم لافهم لاشغل لا مشغله ولو جيلنا دا انقرض يا مصطفى لن تجدوا معلم واحد

United States [مصطفى] 03-31-2014 10:37 PM
يا هجام المهندس بخيت ماعارف يسوي شنو طبعا هو زول فارغ ماعند شغل والسعودية مافارق معاها المرتب والمشكلة ان بعض السذج اثنوا على بعض كتاباته الفارغة فما صدق وظن انه كاتب من الكتاب وبعد شوية سيظن انه من مفكر من المفكرين وهكذا.. صدقني البلد ماحتطور لو ماانقرض هذا الجيل السبعيني..


المهندس سلمان إسماعيل بخيت علي
المهندس سلمان إسماعيل بخيت علي

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة