المقالات
السياسة
( 6 ) لي ولكم بعد رحيل المحجوب الشريف
( 6 ) لي ولكم بعد رحيل المحجوب الشريف
04-05-2014 04:17 PM

( 1 )
حديقة الحياة ما بتكون
مُخضرة لا العالم وريف
حتى إن قدرنا في يوم نكون
قدام خطى الأقدار صريف
كنا بنموت علي أي حال
من طعنة القوي للضعيف
كنا بنموت زي مابتموت
أحلامنا في الزمن المخيف ..
( 2 )
الموت طريق الدم وكت
مايلقى دربو الفينا لادرب النزيف
الموت ملاذ الروح وكت
تهجم عليها الدنيا تقمعه شان تقيف
الموت أمانة المولى بس
شِن دار نقول غير يالطيف
أدينا قدرة علي الثبات
صبِّرنا في الحُزن العنيف ..
( 3 )
الدنيا كان ضاقت شديد
مازار زرع شوقنا الخريف
وأفكارنا كان حرقت خلاص
وأحزانا جاتنا سموم و صيف
مالينا غير نفتح كتاب
العاش وما مساهو زيف
المات وسيرتو في كل بيت
إنسان شجاع وتقي و نضيف ..
( 4 )
القصدو فينا يدوم حزين
يسهك عقاب عمرو الرهيف
ماهمو باكر كيف نكون
بأوجاعنا والأمل النحيف
لاعندو قدرة علي الثبات
دايماً علي الإحباط خفيف
لو نحنا طاوعنا الحُزن
دايرين نجيب الفاتنا كيف ؟
( 5 )
القصدو فينا يكون دليل
ويعيش مدى الأيام عفيف
محجوب من أصناف النفاق
حاجب من الشر الكفيف
ونصير حقوق الكادحين
الباحثين عن الرغيف
الباحثين عن العدالة
المدمنين الثورة كيف
ماليهو غير يرمي النحيب
ويشيل (عشم ) محجوب شريف ..
( 6 )
قدامنا دربو الدوغري حي
ما نبقى واقفين في الرصيف
يطردنا من بيتنا العوذ
بيت شعرو فاتح لأي ضيف
بدينا ذاد عِزة وطريق
وثبات نضال وحماس كثيف
نوصلبو للوطن النصيح
الشال عشانو الكلمة سيف . !

الشريف الحامدابي
3 إبريل / 2014 .
[email protected]


تعليقات 0 | إهداء 0 | زيارات 529

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




الشريف الحامدابي
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة