المقالات
السياسة
حسين خوجلى وحديث الذم والتحقير لحضور مؤتمر المائدة المستديرة
حسين خوجلى وحديث الذم والتحقير لحضور مؤتمر المائدة المستديرة
04-09-2014 10:38 PM

حسين خوجلى وحديث الذم والتحقير والتجريح والإهانة لكل من شارك فى مؤتمر المائدة المستديرة بمن فيهم فخامة الرئيس عمر البشير
تعرض كل الحضور بمؤتمر المائدة المستديرة الذى عقد فى يوم الأحد 6 أبريل 2014م بقاعة الصداقة بالخرطوم لتيارين هوائين من المدعو حسين خوجلى صاحب قناة أمدرمان الفضائية فى برنامجه ( مع حسين خوجلى ) خلال يومي الأثنين 7 أبريل والثلاثاء 8 أبريل
الأول عبارة عن سيل من الشتائم والإهانات والتحقير لكل الحضور بمن فيهم رئيس الجمهورية
والثانى عبارة عن سيل من الإطراء والمدح والثناء لكل الحضور بمن فيهم رئيس الجمهورية
الأول كان فى أمسية الأثنين 7 ابريل الجارى
والثانى كان فى امسية الثلاثاء 8 أبريل الجارى
المدة الزمنية بين سيل الشتائم والإهانات والذم وبين سيل المدح والثناء والشكر والإطراء فقط 24 ساعة
تحول فيها فكر الرجل 180 درجة – هل هى صحوة ؟ أم قرصة شديدة فى الأضان من الأجهزة الأمنية ؟
سأكتفى هنا وفى هذا المقال لتقديم ملخص لأقوال حسين خوجلى ذما وتحقيرا لكل الحضور بمؤتمر الدائرة المستديرة
ويليه فى مقال آخر ملخص لأقوال حسين خوجلى فى المدح والثناء لكل الحضور بمؤتمر الدائرة المستديرة
وستلاحظون أنه ذو شخصية متناقضة مريضة يقول للترابى أنت خارج التاريخ ثم يعدل عن رأيه ويقول له أنت مدهش Amazing حلوة
كان حديث الذم والتجريح والإهانات فى يوم الإثنين 7 أبريل حار جدا جاف مع غبار كثيف حجب الرؤيا تماما ، فماذا قال حسين خوجلى :
( نحن كلنا عندنا إحساس بأن السودان الأن هش إقتصاديا وسياسيا وفيه حروب وفيه متربصين ولذلك نحن ( من أنتم ؟ لا ندرى ) بنفتكر إذا المعارضة عاقلة مفروض الحكومة تهرول نحو المعقولية بنمرة أربعة ( لا أدرى لماذا لم يستخدم نمرة 5 التى تعطى القوة القصوى ) ومافى زو ل خسران – هسي لو فى حزب قال عاوز يعمل ندوة فى ميدان عقرب والله مائة زول مايمشى للندوة ( يا حسين ما تملأ خشمك بالله بالكضب يقوم ربنا يقلبك قرد - مسرح فى الهواء بيحضره قرابة خمسمائة شخص وزيادة ) حيقولوا شنو ؟ زمان كان الحديث عن ديمقراطية الخبز – هسي بيقولوا شنو ؟ ( ياجماعة حسين خوجلى بيقول ليكم الناس كانت بتعقد ندوات سياسية لمان كانت فى مشاكل ومعاناة زى أزمة الخبز هسي فى الزمن الجميل دا بتاع الإنقاذ وكل مشاكل الشعب محلوله حتقولوا شنو ؟ إنتو ماعندكم مشاكل ومافى شىء ناقصكم تمشوا تحضروا ندوات ليه – يا جماعة حسين خوجلى دا كدى تابعوا برنامجة شبعان عيش لى لوزه ويتجشأ بعد كل 5 كلمات حتىكاد فى إحداهن أن يطرش عشان كده بشوف اليوم مافى مشاكل تستدعى قيام ندوات سياسية – خسئت ) ليتابع – هسي بيقولوا شنو ؟ كل كلام قالوه – أى زول فيهم نحن سمعناه – منو هسي الفى الحر دا بيمشى ميدان عقرب أو يمشى ميدان بانت ؟ حيقولوا شنو ؟ هو ذاتو فضل منو ؟ كل النجوم فاتو وكل النجوم ماتوا – هسي الحزب الشيوعى دا آخر زول ممكن يجيب الناس محجوب شريف ومات الله يرحمه ( طلعت متاخرة منه ) – نقد مات – مافى زول نجم – زاتو مافى لا عند الحكومة لا عند المعارضة ( عاوز يحسن صورته بين الناس لكن قرصوه فى أضانه ) هسي الحكومة دى لو عملت ندوة البيمشى ليها منو ؟ هسي حزب الأمة دا لو عمل ندوة البيمشى ليها منو ؟ الإتحاديين البيمشى ليهم منو ؟ هو الفضل عشان يتكلم منو ؟ هى ذاتها أحزاب هسي لو الحكومة دى قالت ليهم مش الحرية دى هاكم ليها حيسوا بيها شنو ؟ والله مابيعملوا بيها أى حاجة ( تانى يا حسين تملأ خشمك بالله بالكضب ماخايف يقلبك قرد ) يواصل حسين : دى أحزاب تجريدية ( ما خريج جامعة فلسفة ساقط شهادة من منازلهم ) ولذلك ياجماعة أن كلامى دا سيظل أن السودان عاوز ليهو حزب جديد ( حزب حسين حزب السودانين ماخلاص هزلت بلد زعامتها كانت بين الأزهرى والسيد عبد الرحمن والسيد على نسلمها لأب فعج دا – إتق ربك ) ولو الشعب السودانى دا طلع يعبر عن نفسه لقال الأحزاب السودانية دى نت اقصى اليمين الى أقصى اليسار دا طرفنا منها ( بالمناسبة دى طرفى منها دا كلام حريم زمان لمان كن يلبسن التوب ترفع طرفه وتقول لك دا طرفى منه – ثقافة حريم زمان يا حسين بنات هسي لابسات جنز وتى شيرت بودى مافيهو طرف ) يواصل حسين – منو الما إجرب فيهم ؟ الحزب الجديد دا ( حزب السودانين ) ولا نحن مافيهو نحن ذاتنا كبرنا زول جديد شاب جديد ( والله باقى لى الزول دا بيجهز فى شقيقه مولانا عبد الله خوجلى ليحكم السودان – ليهو حق مادام النظام بعد الإنتفاضة أمن ليهو الصحيفة والأن قناة فضائية وإذاعة أف أم ماتقول لى من دكان القماش – دا كان ورثه وبقية الورثة لايملكون شىء – دى أموال الجبهة الإسلامية القومية وأموال المؤتمر الوطنى – يعنى أموال الشعب – ردوا للبنوك حقوقها )
حسين يواصل هجومه : الكهنة ديل نحن مادايرنهم ( حتى البشير يابروتس ) دايرين لينا واحد من أولادنا ديل قيافة وكم وتلاتين سنة ( عزال والله ياحسين داير منو شنو ؟ دا لسع خبرة حكم ماعنده لكن جسده قوى ) نحن ذاتوا مرقنا من اللعب ( هو الدخلك فيها منه – دخلت نفسك ومرقت نفسك واليوم تعلن بكلامك دا حل حزب السودانين وبكره تجى تجشأ وتترع وعاااااااااع عااااع وتقرفنا بالسهلة السودانية وحزب السودانين – ياراجل ماترسى ليك على بر – يا حسين تقول للبشير الكهنة – شوف بكره الجعلى دا يسوى فيك شنو )
حسين تانى : دارين لينا ولد قيافه كده ( على الطلاق دى مو سياسة دا كلام مابقدر اقوله إحتراما للراكوبة حبيبتى ) بلا عواجيز بلا قرف (عيب يا حسين منو العواجيز البشير عواجيز تقصد منو ومنو غيره الحاكم البلد دى منذ ربع قرن والله أنت حاقد وكاره للبشير لأنه هد القصر الذى بناه شيخك – طيب إنتظر الراجياك ) يواصل حسين : حاربوا إنهزموا ( لا دا طعن فى القوات المسلحة والقوات المسلحة منذ أن جاءت الإنقاذ مافى راجل قال إنهزموا إلا أنت – يا جماعة حسين دا مش صحفى عادى أو مقدم برنامج عادى – دا مركب مكنة رئيس جمهورية لاخايف من البشير لا من قيادة الجيش ) حاربوا إنهزموا ، إقتصاديا فشلوا ( ماقلت مافى أزمة خبز تمرق الناس لميدان عقرب ترجع وتكضب نفسك وتقول إقتصاديا فشلوا ) يواصل لكن دى كبيرة يا حسين لو الجعلى دا فوت لك كلامك الفات كله دى مش حيفوتهالك : بالله تقول جدول الضرب ما حافظنه ( تانية كتاب ياخى الرجل عمل ماجستير وبيحضر للدكتوراة ولا عاوز تطلع بروفسير عوض إبراهيم عوض برضو كضاب زيك ) آل أيه آل الرئيس والجماعة ديل جدول الضرب ماعارفنه – زراعة فشلوا فيها - ربنا أداهم أى حاجة غلبهم يستثمروها كأن السودان عاوزين يخلوه ليوم القيامة فاضى – نحن دايرين ولد شاب كم و30 سنه لايبلع حبوب ضغط لا عنده سكرى لا شايل ليهو عكاز ( لا لا دى بقت واضحه أنت قاصد البشير لأنه الوحيد فيهم الشايل عكاز ولو كنت فاكره عجوز لا دا بيهش بها على غنمه اللهى نحن وله فيها مأرب أخرى قد يصلك نصها كى تتأدب يا حسين ) يواصل لا شايل ليهو عكاز وحاقظ 3 أجزاء من القرأن ( خلاص وضح ليكم دا عبد الله خوجلى أخوى مرشح حزب السودانيين لرئاسة الجمهورية – الزول دا من حفره داير يرمينا فى دحديره – يا حسين زى ما قال فنان الجزيرة توبة يا ناس من الكيزان توبة - تانى توبه لا كوز لا أخوان لا تمكين لا جوطه لا خطوبة لا ترشيح قطع بس ليبرالى علمانى كلاسيكى إن شاء الله ما حافظ الفاتحة بس يكون إنسان أمين وصادق - يا حسين ربع قرن حكم أخوان شوه صورة الإسلام فى نظر الكثيرين – أمرقوا منها عشان نعيد للبشر ثقتهم فى دين الإسلام التى إهتزت بسببكم وسبب أفعالكم أنت ماقلت حاربوا إنهزموا إقتصاديا فشلوا – زراعة فشلوا عاوزنا نكرر التجربة تانى – دا بعدك ) حسين قال : فى شباب كتير فى حزب الأمة وفى شباب كتير فى الإتحادى الديمقراطى وفى شبا كتير فى المؤتمر الوطنى والمؤتمر الشعبى ( ماذكر شباب الحزب الشيوعى وبقية الأحزاب لأنه بيفتكر ان عددهم لايتجاوز 200 فرد ) ثوروا على القديم دا – ثوروا على الصدق المهدى وثوروا على الميرغنى وثوروا على الترابى ولمان جاء الدور على البشير قال ( ثوروا على المؤتمر الوطنى ) يا جبان ماقلتو مصريون
حسين خوجلى يختم حديث الذم لجماعة المائدة المستديرة قائلا ( هو كل ما الناس تكبر فى السن كلما إزدادوا تشبثاً بكراسى الحكم – المائدة المستديرة الأمبارح ديل على صدقهم هى مجموعة خارج التاريخ ( البشير خارج التاريخ يا حسين والله فجرت وتحتاج تأديب )
هذه دعوة من حسين خوجلى أكررها يا ابناء حزب الأمة أخرجوا على هذه القيادات التى أصبحت خارج التاريخ ، يا ابناء المؤتمر الشعبى أخرجوا على هذه القيادات التى أصبحت خارج التاريخ ( لاحظوا معى فى مقال المدح الذى يلى مقال الذم أن حسين خوجلى قال عن الترابى شخص مدهش وكان قبل 24 ساعة قال خارج التاريخ - يا كوادر المؤتمر الوطنى من الشباب ثوروا على هذه الجدر البلاستيكية – يامن تبقى من اليسار السودانى أخرجوا على هذه القيم القيم القديمة ، يا أبناء النوبة يا أبناء دارفور تطلعوا لمستقبل جديد وقيادات جديدة وبرامج جديدة
هذا ملف القدح والذم فماذا نقرأ من تناقضات فى ملف المدح والإطراء ( لاحظ الفرق بين الملفين 24 ساعة وليس 24 سنة )



المهندس سلمان إسماعيل بخيت على
[email protected]


تعليقات 8 | إهداء 0 | زيارات 2218

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#969360 [كمال]
0.00/5 (0 صوت)

04-10-2014 05:07 PM
مقال يفوح بالحقد والحسد والكراهية
أعوذ بالله

[كمال]

ردود على كمال
United States [المهندس سلمان إسماعيل بخيت على] 04-10-2014 09:02 PM
الحقد والحسد والكراهية أنتم أهلها يا ناقص فأنت لا تستحق إسم كمال فالكمال لله والصحيح أن يسمى الرجل المسلم بكمال الدين ولكنك ككوز دينه ناقص لم تقل كمال الدين والصحيح كان تكتب ( ناقص )
هذا المقال لم أكتب فيه حرف واحد نقلته بالحرف كما خرج من شفاه مقدمه وهو من قال كل عبارة فيه هو من ذم وحقر وتفه حتى رئيسه وشيخه الذى علمه السحر وأنت ككوز مأجور كم دفع لك لتكتب هذه المداخلة الرائعة - لو كان أمر الرجل يهمك تقرأ الموضوع جيدا وتبحث عن عبارات فيه لم ترد ضمن افادات حسين خوجلى فى الذم وتقول لى يا سلمان انت رجل حاقد وحاسد وكاذب والكراهية تفوح من مقالك لقد قلت كذا وكذا وسي حسين ماقالش الكلام دا وبينى وبينك تسجيل على اليوتيوب أما أن تمسك بالكيبورد وتكتب
مقال يفوح بالحقد والحسد والكراهية
أعوذ بالله
طيب ورينا شميت رائحة الحقد والحسد والكراهية وين ؟
أخشى تكون شميت رائحة التجشؤات النتنة وأفتكرتها منى أنا
أنا أرحب بأى نقد موضوعى هادف حتى لو يخطئنى أتحمل مسئولية خطىء
أنصحك تعيد قراءة حديث الذم الذى ورد على لسان حبيبك ورب نعمتك يا مأجور يوم الإثنين 7 أبريل كما ننصحك أن تقرأ مقال المدح ليوم الثلاثاء 8 أبريل ومؤتمر المائدة المستديرة يوم 6 أبريل
وجاوب على هذا السؤال الذى حير الكثيرين : كيف تمكن المدعو حسين خوجلى من الإساءة والتجريح والتحقير والذم لهذا النفر الذين نعتبر من علية القوم وممثليه ثم عاد بعد 24 ساعة ليكيل لهم المدح والثناء والشكر والتقدير حتى وصل المدح لمالك عقار وياسر عرمان المحكوم عليهما بالإعدام. فهل هنالك أحقر وأتفه من هذا يا ناقص ؟


#969154 [عمو]
0.00/5 (0 صوت)

04-10-2014 02:30 PM
بس للمعلومة البشير ليس جعلى هو بديرى ... حسب ما قال شقيقةعبد اللة ..

[عمو]

ردود على عمو
United States [المهندس سلمان إسماعيل بخيت على] 04-10-2014 09:08 PM
أمه جعليه وابوه بديرى يا عمو الراجل منكم ماتتملصوا منه بعدما نظام وصل الحد ألم تسمع بالفنانة ندى القلعة تقول فيهو بديرى وجعلى رأس دولة - لكن الأيام دى بطلت ماهى لمان تديك قفاها حتى الغنايات يقفن عن مدحك - بالمناسبة منطقة الجعليين دى فى ناس مش جعليين ولدوا واتربوا فيها وصاروا جعليين بالميلاد كان عندى جار قبطى من شندى حتى حليفته على الطلاق شهم وكريم لايمكن ياخدك شك فى انه جعلى لولا لون بشرته كذلك تجد كثير من النقادة بتوع الفراد وشايقية وعرب حسانية زى ناس نافع وحلنقه زى ناس مجذوب الخليفة المنطقة دى بعد قتل اسماعيل باشا بحريق المك نمر ومابعدها أصبحت شبه خاليه وتم ترحيل مواطنين سودانين وغير سودانين لملء الفراغ


#969153 [عمو]
0.00/5 (0 صوت)

04-10-2014 02:30 PM
بس للمعلومة البشير ليس جعلى هو بديرى ... حسب ما قال شقيقةعبد اللة ..

[عمو]

ردود على عمو
United States [المهندس سلمان إسماعيل بخيت على] 04-10-2014 09:08 PM
أمه جعليه وابوه بديرى يا عمو الراجل منكم ماتتملصوا منه بعدما نظام وصل الحد ألم تسمع بالفنانة ندى القلعة تقول فيهو بديرى وجعلى رأس دولة - لكن الأيام دى بطلت ماهى لمان تديك قفاها حتى الغنايات يقفن عن مدحك - بالمناسبة منطقة الجعليين دى فى ناس مش جعليين ولدوا واتربوا فيها وصاروا جعليين بالميلاد كان عندى جار قبطى من شندى حتى حليفته على الطلاق شهم وكريم لايمكن ياخدك شك فى انه جعلى لولا لون بشرته كذلك تجد كثير من النقادة بتوع الفراد وشايقية وعرب حسانية زى ناس نافع وحلنقه زى ناس مجذوب الخليفة المنطقة دى بعد قتل اسماعيل باشا بحريق المك نمر ومابعدها أصبحت شبه خاليه وتم ترحيل مواطنين سودانين وغير سودانين لملء الفراغ


#969151 [عمو]
0.00/5 (0 صوت)

04-10-2014 02:30 PM
بس للمعلومة البشير ليس جعلى هو بديرى ... حسب ما قال شقيقةعبد اللة ..

[عمو]

ردود على عمو
United States [المهندس سلمان إسماعيل بخيت على] 04-10-2014 09:08 PM
أمه جعليه وابوه بديرى يا عمو الراجل منكم ماتتملصوا منه بعدما نظام وصل الحد ألم تسمع بالفنانة ندى القلعة تقول فيهو بديرى وجعلى رأس دولة - لكن الأيام دى بطلت ماهى لمان تديك قفاها حتى الغنايات يقفن عن مدحك - بالمناسبة منطقة الجعليين دى فى ناس مش جعليين ولدوا واتربوا فيها وصاروا جعليين بالميلاد كان عندى جار قبطى من شندى حتى حليفته على الطلاق شهم وكريم لايمكن ياخدك شك فى انه جعلى لولا لون بشرته كذلك تجد كثير من النقادة بتوع الفراد وشايقية وعرب حسانية زى ناس نافع وحلنقه زى ناس مجذوب الخليفة المنطقة دى بعد قتل اسماعيل باشا بحريق المك نمر ومابعدها أصبحت شبه خاليه وتم ترحيل مواطنين سودانين وغير سودانين لملء الفراغ


#968752 [راجع للوطن]
4.00/5 (1 صوت)

04-10-2014 10:10 AM
دايما فى بيت الفراش يثرثر من لايوجعه المرحوم...حسيت خوجلى يثرثر فى بيت العزاء لاجل الوجاهة الاجتماعية.
ليس اصحاب العزاء باغبياء او بلم وانما هنالك حدث جلل يجعلهم صامتين غير مستمعين.

[راجع للوطن]

#968671 [د.هشام]
5.00/5 (1 صوت)

04-10-2014 09:24 AM
ما معنى "فعج" و بالتالي "أب فعج"؟؟؟؟؟

[د.هشام]

ردود على د.هشام
[المهندس سلمان إسماعيل بخيت على] 04-10-2014 09:24 PM
هذه كلمة ضاربة فى العامية السودانية
بعض الناس تجد لديهم كرش كبير ككرش الحامل فى شهرها التاسع
البعض تجد كرشه على بها ثلاثة نتؤات أو قل طبقات الطبقة التى فى المنتصف تكون بارزة بروز شاذ لذا الرجال أصحاب الفعج لايحبذون لبس القميص والبنطلون والجلابية ستره حال


#968534 [منصور محمد صالح محمد العباسي]
0.00/5 (0 صوت)

04-10-2014 05:19 AM
يستحق الصادق المهدي لقب ابن السودان البار عن جدارة ،،،لقد عمل الصادق المهدي طوال حياته منةاجل شعبه وامته باخلاص وتفاني ،،،السياسيون في قامة المهدي لوكان يعيش في اروبا لاقامو له التماثيل في الميادين العامة ،،،اطال الله عمرك يا سليل المههدي ومتعك بالعافية،،،

[منصور محمد صالح محمد العباسي]

#968507 [سوداني حر]
0.00/5 (0 صوت)

04-10-2014 02:40 AM
تفوح الراكوبة عطرا بمقالاتك ياباش مهندس ونتمني ان تسلط الضوء اكثر عن سد النهضة هل هذا السد في مصلحة السودان ام في دمار السودان والاهم من ذلك اراضي السودان المحتله ( حلايب.شلاتين.ابو رماد)لانو حسين خوجلي عندو تعليمات من اسيادو مايتكلم في ملفات ذي دي هذا الخوجلي مضلل افاك اشر وشكر

[سوداني حر]

ردود على سوداني حر
United States [المهندس سلمان إسماعيل بخيت على] 04-10-2014 09:10 PM
تفوح الراكوبة عطرا بمقالاتك ياباش مهندس
هذا تعليق مواطن سودانى شريف يهمه أمر الوطن
مقال يفوح بالحقد والحسد والكراهية
هذا تعليق خارج من صدر كوز مريض إسمه ناقص
شكرا جزيلا لسودانى حر
ولا شكر للناقص


م. سلمان إسماعيل بخيت على
م. سلمان إسماعيل بخيت على

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة