حكاية ذوالنون
04-10-2014 12:27 AM



تخيل عزيزي القارئ لو أن موظفاً قد قام بإكتشاف فساد في المؤسسة التي يعمل بها وقام بكتابه تقريراً موثقاً لرئيسه في العمل بهذا الفساد وليكن ذلك في أشد البلاد كفراً وإلحاداً .. ماذا سيحدث؟ .. سوف يتم تقديم الوالغون في الفساد إلى مجلس تحقيق ومن ثم يتم فتح بلاغ جنائي في مواجهتهم ويحاكمون جراء ما إقترفت اياديهم الآثمة ..

في دولة المشروع الإسلامي الحضاري (في كلام تاني) .. يبقي الفاسدون في أماكنهم (ليرتعوا أكتر ما القصة هاملة) لا ومش كده وبس .. يتم الإستغناء عن خدمات (الموظف الشريف) !!
قرأ العبدلله بمنتهى الحزن والأسي (والطمام) ما نشرته الزميله (الصيحة) بالوثائق الدامغة قصة الفساد المالي والإداري بمفوضية نزع السلاح هذا الفساد الذي قام بكشفه المواطن السوداني (النضيف الشريف) ذو النون بخيت عبدالرازق مدير إدارة التدريب بالمفوضية .. نشوف القصة شنو؟ كما وردت في تقرير الزميله الصيحة :
أخونا (ذوالنون) مدير أدارة التدريب بالمفوضية كان في مأمورية خارج البلاد وعندما عاد أكتشف إنو في تجاوزات ، وقد قام برصدها ليتضح الآتي :
1- قامت إدارة المفوضية بإصدار خطاب تطلب فيه من الجهات المسؤوله الموافقة والتصديق بسفر ثلاثة موظفين إلى تركيا لجضور ورشة (وهمية) بعنوان – تطوير الهياكل التنظيمية والوظيفيه لمواكبة المستجدات والمتغيرات – (شفتو الإسم كيف؟ نجر صاح) وذلك بعد أن جاءتها دعوة من الدار العربية للتنمية الإدارية (برضو نجر ساااكت) !
2- صادقت الجهات المسؤولة بناء على خطاب المفوضية على سفر المذكورين وقد قام المذكورون باستلام المبالغ التالية من وزارة المالية وهي :
قيمة تذاكر سفر ذهاب وإياب إلى تركيا
مبلغ 6000 دولار رسوم إشتراك (للفرد الواحد)
مبالغ كنثريات وإعاشة
بعد ما مواعيد الدورة إنتهت .. ولأنو أخونا (ذوالنون) بيشتغل (بالقانون) وحسب ضوابط السفر الخارجي الصادرة من المجلس القومي للتدريب قام أخونا (ذوالنون) وللتعترو بمخاطبه المتدربين (التلاته) وذلك عبر (المدير الإداري للمفوضية) طالباً منهم مده بتقرير عن الدورة وشهادات الدورة وإيصالات تسديد رسوم الدورة بالإضافة إلى صورة من جوازات سفرهم تشمل المغادرة والقدوم وذلك حسب ضوابط المجلس القومي للتدريب (يعني الكلام ده ما جايبو من راسو) !
لا المدير الإداري وللا الجماعة المذكورين إشتغلو بخطاب أخونا (ذوالنون) ده شغله الشئ الخلاهو يشك في المسأله وفي قصة سفرهم (ذاااتا) ليكتشف الأتي :
- ليست هنالك دورة تدريبية من أساسو ولا يحزنون
- المعلومات التي أرسلتها المفوضية إلى وكيل وزارة المالية بخصوص نثرية السفر والتذاكر ورسوم الإشتراك كانت غير صحيحة إذ أن درجاتهم الوظيفية المذكورة في الخطاب غير صحيحة (الخطاب ده الطلعو منو يا ربي؟) وقد تم رفعها حتى ترتفع النثرية (ما مال سايب وكده)!
- قد سافروا بجوازات سفر رسمية من وزارة الخارجيه رغم أن درجات وظائفهم لا تسمح بذلك إذ أن الجوازات الرسمية لا تمنح إلا لموظفي الدرجه الأولى (ودرجاتهم بين السابعة والتامنة يا عيني .. تزوير راسو عديل)
طيب .. اخونا (ذوالنون) بصفته مديراً للتدريب عمل شنووو:
قام طوااالي خاطب المدير الإداري والسيد المفوض العام (وما أدراك ما المفوض العام) وأخطرهما بهذه التجاوزات التي تمت مطالباً بإسترداد المبالغ التي تسلمها (هؤلاء اللصوص والمزورين) وأعادتها إلى خزينة الدولة لكن المدير الإدارى والسيد المفوض لم يستجيبا (يستجيبوا ليه؟) وعندها قام أخونا (ذوالنون) بتصعيد الأمر إلى جهة أعلي (عل وعسى) وهي المجلس القومي للتدريب بصفته الجهة المسؤلة غن السفر الخارجي جاء الرد من المجلس بإسترداد المبالغ (المنهوبة) من المذكورين ومحاسبتهم ولكن مع ذلك لم تتم محاسبتهم ولم يتخذ ضدهم أي إجراء (ما عصابه وكده) !
هنا وفي محاولة أخيرة قام (أخونا ذوالنون) بمخاطبة المدير الإداري للمفوضية والمفوض العام (وما أدراك ما المفوض العام) رسمياً طالباً منهما مرة أخرى إعمال القانون ومحاسبة المذكورين ولكن بدلاً من ذلك شكلا له مجلس تحقيق بتهمة الإساء لموظف شئون العاملين (شفتو كيف؟) !
ولما لم تجد (شوف تاء التأنيث) مدير الشئون الإدارية ما تقوم به حيال (الزول العكليته ده) قامت بتسليمه خطاب بإنهاء خدماته من المفوضية (النوع ده بقى ما بنفع) !!
وبقيت مدير الشئون الإدارية في منصبها .. وبقي المدير الإداري في منصبه .. وبقي المفوض العام .. وبقوا (الحرامية والمزوراتيه التلاته) في ظائفهم (واحده فيهم جابت شهادة تدريب من مصر بينما الدورة قالو في تركيا) … وذهب (ذوالنون إلى الشارع) !!
إلتماس :
بكل الإحترام والتبجيل نحن الشعب السوداني الفضل .. نلتمس (شوفو الأدب ده) من السادة ولاة أمرنا .. إعادة السيد/ ذوالنون بخيت عبدالرازق إلى عمله (مع ترقيته) لنزاهته .. وتقديم هذه (العصابة) إلى القضاء (أعملوها مرة واااحده الله يرضي عليكم) وإعادة هذه الألوف من الدولارات التي تم الإستيلاء عليها (تزويراً وبهتانا) والإستفاده منها في شراء أدوية لمرضى السرطان .. أو الفشل الكلوي .. أو السل الرئوي .. أو إلتهاب الكبد الوبائي .. أو أي مرض من الأمراض التي يعاني منها هذا الشعب المنكوب الما عارف يلاقيها من وين؟ وللا من وين؟
كسرة :
البلد دي قروشا ما بتكمل؟
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟


تعليقات 37 | إهداء 0 | زيارات 5453

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#971531 [قرفان]
0.00/5 (0 صوت)

04-13-2014 11:26 AM
قال الرسول صلي الله عليه وسلم: اذا سرق القوي فيهم تركوه واذا سرق الضعيف فيهم اقامو عليه الحد...

[قرفان]

#970174 [كاسبر]
0.00/5 (0 صوت)

04-11-2014 05:36 PM
سلاف الدين سفاها
اااااعععع ضكر

[كاسبر]

#969753 [mansour]
0.00/5 (0 صوت)

04-11-2014 05:34 AM
ولا مرضي القلب لان اساس مرضهم هي الحكومه

[mansour]

#969449 [ودالباشا]
0.00/5 (0 صوت)

04-10-2014 06:37 PM
هبرا فوق هبرا
وبكل عين حمرا
خللوا البلد غبرا
جاريا بس لى ورا
مرضونا ياجبرا
ومن الجنون نبرا بقينا شعراء الله لا بارك فيهم زهجنا خلااااص

[ودالباشا]

#969375 [دابويس]
0.00/5 (0 صوت)

04-10-2014 05:25 PM
والله ياجبرا اضفت اوجاع على اوجاع ج في زمن صعب والله احسست بالعبرات تخنقني ونكاد حين نكرر السطور ان ينساب الدمع من اعيننازلك الله يارجلا جاءفي زمن لم يتخيله كتاب الدراماوكاتبي قصص الاسى والالموياصاحب النون عليك بسورة الصافات والدعاء عند الله في الثلث الاخير من الليل

[دابويس]

#969334 [حسن سليمان]
0.00/5 (0 صوت)

04-10-2014 04:47 PM
لو عايز تعرف الفساد الجد في مفوضية نزع السلاح وبالمليارات عليك متابعة محاكمة جارية الآن للمسؤول الكبير بالمفوضية الدكتور سلاف الدين.

طبعاً محاكم الكيزان زي غسيل الأموال ... يتم تقديم المسؤوليين من الكيزان للمحاكمة صورية بعد اطلاق سراحهم بالضمانة ويتم اصدار حكم بالسجن وغرامة **** وطبعاً يقضي فترة السجن في بيته لتنفيذ حكم التنظيم عليه بحفظ القرآن والغرامة تدفع عنه

طبعاً يتم تقديمه للمحاكمة لقتل القضية حيث لايمكن تقدم شخص للمحكمة مرتين في نفس القضية والتي سبق وصدر فيها حكم. شفت كيف الشغل الصح

[حسن سليمان]

#969326 [محمد احمد]
5.00/5 (1 صوت)

04-10-2014 04:40 PM
يا جبرا يا حبيبي انت خليت الهبرو خط هيثرو كلو وجيت للغلابة العاوزين يسد رمق اطفالهم او يكملو بيت الطين
جات علي الدولارات البسيطة
شوف الهوامير ولا ما تقدرو عليهم جيتو علي الضعاف الشالو ملاليم من الدولارات
شوف موضوع هيثرو الفيه 75 مليون دولار وخليك من ال ـ 6 الف دولار

[محمد احمد]

ردود على محمد احمد
[قرفان] 04-13-2014 11:08 AM
انت مع الجماعة الهبرو ولا شنو


#969293 [كفاية]
5.00/5 (2 صوت)

04-10-2014 04:04 PM
جريدة الصيحة دي معقول ما في مسئول ولا قاضي ولا رئيس ولا واحد من هيئة علماء الكيزان ولا جماعة الامر بالعروف والنهي عن المنكر ديل كلهم ما ف ي زول قراها مافي واحد فيهم ود حلال يتولى الموضوع دا ؟
لكن لان الفساد اصبح سائدا فالكل خائف ان يتصدى للموضوع فتشهر في وجهه كروت صفراء وبعدها حمراء فهم يعملون بالمقولة الشهيرة من كان منكم بلا خطيئة فليرمها بحجر وخلوها مستورة الكل ملوث عشان كدا خلوها مستورة
وبعدين ذو النون دا خلص ضميرو وواجبات وظيفته كمسئول التدريب يحتم عليه استلام تقارير عن الزيارة وشهادات الحضور للدورات وكذلك كعوبات تذاكر السفر وايصالات رسوم الاشتراك وبدلا عن الامتثال لطلباته اخرج عن طوره حتى دخل في مشادة مع مسئول شئون العاملين اخذت كمبرر لمحاسبته وابعاده عن وشهم
يا اخوانا اخبار نقيب الشرطة الذي سلم ملفات الفساد لرئيس الجمهورية اخباره شنو ؟ هل افرج عنه ام لا زال في الحبس ؟ ما قلنا ليكم الفساد اصبح غولا يفترس كل من تسول له نفسه الوقوف في طريقه تلميحا او تصريحا والله المستعان

[كفاية]

#969241 [صابر مصبر]
5.00/5 (2 صوت)

04-10-2014 03:21 PM
الأن عرفنا الحاصل الواحد تلقي عرس وبنا بيت مسلح وهو مجرد موظف في الحكومة أو منظمة حيرونا ذاتو بس الان عرفنة الناس دي بجيب القروش من وين ..........!؟ يعني الحكاية كلها محتاجة ليها خدعة مالية

[صابر مصبر]

#969170 [ابوهاني]
5.00/5 (2 صوت)

04-10-2014 02:38 PM
هذه قطرة من بحر من الفساد

[ابوهاني]

#969119 [صبحي حسين]
5.00/5 (2 صوت)

04-10-2014 02:04 PM
يا جبرا .. أخبار إعادة ذو النون إلى وظيفته وتقديم العصابة إلى العدالة شنو(وووو وووو وووو وووو وووو وووو وووو)+و؟

[صبحي حسين]

#969111 [kiku]
5.00/5 (2 صوت)

04-10-2014 01:57 PM
رسالة الماجستير تحت عنوان ياهم قاعدين يطبقوها الناس زعلانة فى شنو لو ما دايرين يطبقوا فيكم شريعتهم ثورو يرحمكم الله

[kiku]

#969039 [الباشا]
5.00/5 (1 صوت)

04-10-2014 01:03 PM
أنا عايز أعرف تاء التأنيث دي راجعه لمنو؟ وليس لمني !

[الباشا]

#969036 [habbani]
5.00/5 (2 صوت)

04-10-2014 01:01 PM
يا جبرا ناس علماء السودان قالوا حرام ؟ ÷نت شن عرفك بالحلال والحرام ؟ مادام ما قالوا حرام إبقى حلال !! وذنون أخونا لا يعرف نفسه هو أسير فى الدولة الإسلامية والأسير ليس له حق التدخل فى إدارة الدولة الإسلامية وهو ذاته ما مسلم لأنه ما مؤتمر وطنى وبعدين ما هم شعب الله المختار وليس اليهود يعنى مش السودان وشعبه ولكن الدنيا دى كلها بجمادها وأحيائها خلقت من أجل شعب الله المختار ..
ما كل مرة رافع ضغطنا !! أنا بكرة بشتكيك لى دوسة وبلاطه وشيش وبيش عشان تشوف الدش ..

[habbani]

#969007 [دجانقو]
5.00/5 (4 صوت)

04-10-2014 12:40 PM
طول ما نحن بنسخر بس و نضحك بس و نستهتر بس و نقول اي كلام يريح وبس

و طول ما حدنا و مقدرتنا و شجاعتنا حدها الكلام و القول و التعليق بس

يبقي يا بخت الكيزان و المنتفعين و الكتسلقين و الانهازيين بنا ...

اسرقو و انهبو و استحلو اموالنا و تاجرو و اشترو ما تخلو ليكم ارض فاضيه

ف الشعب مغيب و لا يملك غير الكلام و السخريه ....

و ههههههههههههههها و هههههههههها و هههههههههها انهم ياكلون السحت و الشنو ما عارفو داك

و ههههها ههههها وده المشروع الحضاري .

وههههها هههههها و الكيزان حراميه ..

و ههههههها هههههها وبس ..

اها تاني شنو ..

[دجانقو]

ردود على دجانقو
United States [ابو عمر] 04-13-2014 05:22 PM
ما أهو إنت برضو يا ديجانقو بتعلق و بتتفاصح و بس عملت شنو ؟ شعب مغلوب على أمره ودة الحل البيعرفو عايز تكتم أنفاسه عشان يموت قهر ؟؟؟؟؟


#968991 [إلا الحقارة]
4.50/5 (2 صوت)

04-10-2014 12:26 PM
يا استاذ والله تاعب نفسك ساكت مع الجماعة ديل ديل فاتو علي بابا والاربعين حرامي زمااااان الله يستر عليك من بلاويهم ما هم شعب الله المختار ينهبوا ويلغفوا وعندهم فقه السترة وكدة

[إلا الحقارة]

#968864 [salma]
5.00/5 (3 صوت)

04-10-2014 11:17 AM
سلام عليكم استاذ جبرا اها موضوعنا ماشي كيف .موضوعنا الرقم الهندسي لطلاب هندسة العمارة في جامعة المستقبل
كسرة رقم اربعة ( و + و + و+ و ]

[salma]

#968833 [سوداني وبس]
5.00/5 (2 صوت)

04-10-2014 10:53 AM
يا جبره الناس ديل بعملو بالقران ( على حسب فهمهم)
وإذ ذهب ذ النون مغاضبا اي واحد اسمه ذ النون يعمل فيها مجنون يودوه الكركون

[سوداني وبس]

#968783 [خالد]
5.00/5 (3 صوت)

04-10-2014 10:23 AM
تلقاها عند غافل يا جبرا الزمن ده الا تشيل حقك بي يدك قانون بتاع شنو هي البلد فيها قانون في زول يقدر يقول للحرامية ديل قانون كفاية قتل اخوان نافع لمواطن وحبسه وضربه حتى الموت لا لشي غير انهم اخوان نافع - اما اخوان الرئيس وكل من له علاقه به عندهم حصانه

[خالد]

#968772 [داوودي]
4.50/5 (3 صوت)

04-10-2014 10:16 AM
زولك ذا النون دا عايش وين معقول ما شايف الحاصل في البلد ولا قايل لما كرمو الراعي عشان خاطر امانتو ..

[داوودي]

#968766 [الضقل]
5.00/5 (4 صوت)

04-10-2014 10:15 AM
والله يا جبرة ياخوي
الواحد بقي يقراء كلامك و يموت بالضحك, كأنو القصص دي في الواق الواق

ياخوي و الله احترنا عديل و غلبنا البنسويهو

الهم لا نسألك رد القضاء و لكن نسالك اللطف فيهو

ياخي ذو النون دا - ما عارف قصة ضابط الشرطة - الكشف فساد الجماعة بالمستندات تصديقا لكلام ريسنا المبجل الذي قال العندو دليل علي فساد يقدموا
اصحابك كلام الريس دا و لا هببو ليهو - جابو صاحبك الضابط و جنبلوقك في الرج ههههه
ذو النون دا يحمد الله انو حايم لسة بكرعينو من مكان لمكان
الناس ديل كويس الما ربطوهو

قسس و الله

[الضقل]

#968765 [الكاهلية]
5.00/5 (1 صوت)

04-10-2014 10:14 AM
لا حول ولا قوة الا بالله

انت عمك البشير ده لا بسمع لا بشوف

ولا موافق من الخوف

[الكاهلية]

#968753 [مشتهى السودان]
5.00/5 (3 صوت)

04-10-2014 10:10 AM
انا لو محل ذو النون لو رجعونى مابرجع ، خليهو يهج يمرق خارج البلد، ياذو النون ياتبقى حرامى يا تتخارج مافى حل وسط.

[مشتهى السودان]

#968707 [صلاح مصطفي أحمد بخيت]
5.00/5 (2 صوت)

04-10-2014 09:47 AM
حسن التربية سوف يجد عند الله ماهو أحسن و( وعسي ان تكرهو شيئ فهو خير لكم ) وصدقني حقك لا يضيع حتي ولو ضاع في الدنيا في الآخر موجود وسوف يحاسب كل واحد منهم بما أغترفته أيديهم من تنديس للوظفه التي أؤتمنوا عليها ـ ربك يمهل ولا يهمل ـ ومن يتقي الله يجعل له مخرجا)

[صلاح مصطفي أحمد بخيت]

#968702 [مجدي]
5.00/5 (2 صوت)

04-10-2014 09:43 AM
المفوض هو سلاف الدين صالح لقف مبلغ **** بسيط كدا زي 9 مليار دي الثبتت عليه و كم مليار كدا طلعت تفاتيف قريشات و مصاريف........يا ناس ما تخافو الله الناس شغالة ليكم في المشروع الحضاري نهار و ليل و انتو تتهموهم في شرفهم حرام عليكم يا جبرا

[مجدي]

#968696 [abu shawarib]
5.00/5 (1 صوت)

04-10-2014 09:39 AM
الناس ( كل الناس ) الذين يخاطبهم رئيسهم
المدعو عمر حسن أحمد البشير يطلبون من
سيادته النظر فى هذا الأمر ( الموضوع اللى
كاتبو الفاتح جبره فوق ده ) عشان ماتقولى
ياتو موضوع واعمال القانون فيه . انت قلت
عاوز مستندات عشان تحاسب .. صاح؟! أها ده موضوع بى مستنداتو يلا ورينا شطارتك وما تتوثب لينا ساى ذى قرد الطلح

[abu shawarib]

#968651 [وحيد]
5.00/5 (1 صوت)

04-10-2014 09:11 AM
يا استاذ جبرة : ما تحشر نفسك بين البصلة و قشرتها، و الزول العكليتة دا احسن يشوف ليهو شغلة ... الجماعة ديل دا " رزق ساقه الله اليهم" و تم دفعه من " غنائم التمكين" و حسب فقه الانقاذ و التمكين فدا حلال بلال و حق لكل " المجاهدين" و " اخوات نسيبة" جزاءا وفاقا نظير مجاهداتهم .... و ذلك ليس في المفوضية دي فحسب بل كل مؤسسات الدولة التمكينية .

[وحيد]

#968634 [ود بحرى]
5.00/5 (3 صوت)

04-10-2014 08:52 AM
تكمل كيف يا استاذى جبره والتحصيل مدور من الدرداقة الى البرادو .انت صاحب البرادو عمل شنو .

[ود بحرى]

#968629 [جلكساوي]
5.00/5 (3 صوت)

04-10-2014 08:50 AM
ياقلبي لا تحزن

ياأستاذنا إذا كان رب البيت بالدف ضارب ..........

الشغلة خربانة من كبارا .... ولذنون رب يحميه .... ورزق حلال ينتظره خارج هذه المنظومة

وعسى أن يكره شيئاً وهو خير له ...

ولكن هؤلاء اللصوص سيأتي اليوم الذي يتعلقون فيه من بطونهم وأيديهم وسيأتي اليوم الذي

يعرف فيه العالم أجمع زيف الإسلادموييين وسيعلم الذين ظلموا أي منقلب يبقلبون

[جلكساوي]

#968627 [abu ahmed]
5.00/5 (1 صوت)

04-10-2014 08:49 AM
عادي بيحصل في كل وزاره ومصلحه في زمن المشروع الحضاري ل 25 سنه وما خفي اعظم

[abu ahmed]

#968604 [osama dai elnaiem]
3.50/5 (2 صوت)

04-10-2014 08:28 AM
استاذي العزيز-- لك التحية --- يعني قلت لك قبل كده انو جاء ملييييار دولار داخل البلد وانت عاوز تقرطها علي الجماعة و(ذا النون) بتاعك ده يشوف له بطن حوت من الحيتان الحايمه تاكل في المليارات دي ويندس فيه ويريح الناس لانه الزي ده صار عملة قديمة يعني انت ما سمعت بانه العملة الجديدة تطرد العملة القديمة ولا ازيدك من الشعر بيت يعني (هو ذاتو) لمن جاء يسوي عملته ما كان باورنيك طبي مزور جاء به من مسرح العمليات والانقلاب تم تزويره للعالم ومصر بالذات الي ان سوقته للعالم بعدين تم نزع القناع وظهر الارهاب في البر والبحر وتم فتح ابواب السودان لكارلوس وبن لادن والمتردية وما اكل السبع وبعدين الجماعة (وغلوا) في المال الحرام ودرقتهم(هي لله) معلقنها زي حجبات الحركات المسلحة البتشوفها حتي ملبسنها لعربات الدفع الرباعي عشان ما تتاذي لمن تجيها دانة ياستاذ الكذب و(المداراة) صارت خطب في المساجد لحماية عورة فرعون القال عنه الصبي وبعدين انت ما عندك شغله احنا نمشي بعيد ليه امسك الكضب في مجال الاستثمار يروح الوزير يقول ليهم انه في 3 مليارات تستثمر في نيالا ونسي انه الثلاثة مليارات دي ما تكفي ليها ثلاثة وجبات لمعسكر واحد من كمييين معسكر وبعدين عاوز اسالك المعسكرات دي ما يحولوها الي اراضي سكنية ويجيبوا المحامين وسماسرة الاراضي من الخرطوم ويبيعوا الاراضي لزعماء الحركات المسلحة وبعدين اقول لك فيها مناجم ذهب يعني كما الولاة في دارفور عندهم مناجم ذهب برضه يكون لزعماء الحركات المسلحة مناجم ذهب ومافي حد احسن من حد والكلام ده كله عشان اثبت لك انه صاحبك (ذا النون) عايش في كوكب اخر او كما يقول الفلم طار فوق عش المجانين-- مع التحية.

[osama dai elnaiem]

#968601 [ابو ابراهيم]
0.00/5 (0 صوت)

04-10-2014 08:25 AM
وقال حوار قال يحاوروا علي شنو؟ ولا يمكن يحاوروا لاقتسام ما بقي من النبقه لو بقي بقي قيها حاجه

[ابو ابراهيم]

#968593 [حافظ حمد]
4.00/5 (2 صوت)

04-10-2014 08:20 AM
والله يا استاذبتنفخ في قربة مقدودة عارف ليه لان القروش الحايمة في البلد ما حقت الشعب دي قروش جابوها (الاخوان) بشطارتهم مرة من قطر ومرة من ايران واخرى من الصين يعني ما تحكها شديد وشيل الواواااااااااات بتاعتك دي لانهم ما بقدروا يقولوا ليك ياخي دي ما قروش الشعب السوداني وما تتعاطف مع زنون لانو هو بقا مدير اداري دي كيف طلع نفسك منها ودي تيران بتتناطح في زريبة اتفرج من فوق الحيطة

[حافظ حمد]

#968585 [محمد شرف]
5.00/5 (2 صوت)

04-10-2014 08:10 AM
يا جبرة انتا يوم حتجيب لينا الجلطة والسكتة ذاتا يا أخي .

[محمد شرف]

#968581 [علام]
5.00/5 (3 صوت)

04-10-2014 08:06 AM
كبير النصابين هو البشير لانه ساكت على الفساد ولايستجيب لنداء الغلابة - سيلاقى جزاءه فى الدنيا والاخرة .

[علام]

#968548 [شاديه]
5.00/5 (2 صوت)

04-10-2014 06:43 AM
أستاذ جبره أطال الله عمرك ، أرجوك ترفق بينا نحن أساس قروش الدواء ما عندنا وجارى تزيد لينا أمراض جديده فششيت كبدنا وماصارينا الله يرض عنك أبعدنا من الحكاوي دى كفايه الشايفينوا المدرسوس ابعدوا عنا، اللهم ترفق بنا ولا تهلكنا انه قدير وعليم بالأمور،

[شاديه]

#968512 [wad alfa7al]
0.00/5 (0 صوت)

04-10-2014 03:02 AM
نشرته الزميله (الصيحة)??????????

[wad alfa7al]

ردود على wad alfa7al
[مرقنا... وادسينا تاني] 04-10-2014 06:20 PM
أخي ود الفحل
هذه الصحيفة هي جلد جديد للآتي اسمائهم((رئيس مجلس الإدارة الباشمهندس الطيب مصطفى ، رئيس التحرير الدكتور ياسر محجوب ، مدير التحرير أحمد يوسف التاى)) واللبيب بالاشارة يفهم.
تنفيس وتفقيس ويا حليلك يا بلد
بلا كسره .. بلا تنفيس ، أعجبني للنخاع تعليق الاخ ديجانقو فوق


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة