المقالات
السياسة
حسين خوجلى وحديث المدح والإطراء لحضور مؤتمر المائدة المستديرة
حسين خوجلى وحديث المدح والإطراء لحضور مؤتمر المائدة المستديرة
04-10-2014 11:22 AM


تلقيت عدد من الرسائل والمكالمات من عدد من المتابعين لسلسلة مع حسين خوجلى ( الذم والمدح معا فى حق الحضور بمؤتمر المائدة المستديرة الذى عقد بقاعة الصداقة الأحد 6 أبريل 2014م وطلبوا منى جمع مقالى ( الذم والمدح ) فى مقال واحد حتى يتثنى لهم سهولة متابعة ومراجعة المعلومات وتقييمها تقييما حقيقا وها أنذا ألبى طلبهم
----------------------------------------------------------------------------------
الباب الأول : باب الذم
حسين خوجلى وحديث الذم والتحقير والتجريح والإهانة لكل من شارك فى مؤتمر المائدة المستديرة بمن فيهم فخامة الرئيس عمر البشير
تعرض كل الحضور بمؤتمر المائدة المستديرة الذى عقد فى يوم الأحد 6 أبريل 2014م بقاعة الصداقة بالخرطوم لتيارين هوائين من المدعو حسين خوجلى صاحب قناة أمدرمان الفضائية فى برنامجه ( مع حسين خوجلى ) خلال يومي الأثنين 7 أبريل والثلاثاء 8 أبريل
الأول عبارة عن سيل من الشتائم والإهانات والتحقير لكل الحضور بمن فيهم رئيس الجمهورية
والثانى عبارة عن سيل من الإطراء والمدح والثناء لكل الحضور بمن فيهم رئيس الجمهورية
الأول كان فى أمسية الأثنين 7 ابريل الجارى
والثانى كان فى امسية الثلاثاء 8 أبريل الجارى
المدة الزمنية بين سيل الشتائم والإهانات والذم وبين سيل المدح والثناء والشكر والإطراء فقط 24 ساعة
تحول فيها فكر الرجل 180 درجة – هل هى صحوة ؟ أم قرصة شديدة فى الأضان من الأجهزة الأمنية ؟
سأكتفى هنا وفى هذا المقال لتقديم ملخص لأقوال حسين خوجلى ذما وتحقيرا لكل الحضور بمؤتمر الدائرة المستديرة
ويليه فى مقال آخر ملخص لأقوال حسين خوجلى فى المدح والثناء لكل الحضور بمؤتمر الدائرة المستديرة
وستلاحظون أنه ذو شخصية متناقضة مريضة يقول للترابى أنت خارج التاريخ ثم يعدل عن رأيه ويقول له أنت مدهش Amazing حلوة
كان حديث الذم والتجريح والإهانات فى يوم الإثنين 7 أبريل حار جدا جاف مع غبار كثيف حجب الرؤيا تماما ، فماذا قال حسين خوجلى :
( نحن كلنا عندنا إحساس بأن السودان الأن هش إقتصاديا وسياسيا وفيه حروب وفيه متربصين ولذلك نحن ( من أنتم ؟ لا ندرى ) بنفتكر إذا المعارضة عاقلة مفروض الحكومة تهرول نحو المعقولية بنمرة أربعة ( لا أدرى لماذا لم يستخدم نمرة 5 التى تعطى القوة القصوى ) ومافى زو ل خسران – هسي لو فى حزب قال عاوز يعمل ندوة فى ميدان عقرب والله مائة زول مايمشى للندوة ( يا حسين ما تملأ خشمك بالله بالكضب يقوم ربنا يقلبك قرد - مسرح فى الهواء بيحضره قرابة خمسمائة شخص وزيادة ) حيقولوا شنو ؟ زمان كان الحديث عن ديمقراطية الخبز – هسي بيقولوا شنو ؟ ( ياجماعة حسين خوجلى بيقول ليكم الناس كانت بتعقد ندوات سياسية لمان كانت فى مشاكل ومعاناة زى أزمة الخبز هسي فى الزمن الجميل دا بتاع الإنقاذ وكل مشاكل الشعب محلوله حتقولوا شنو ؟ إنتو ماعندكم مشاكل ومافى شىء ناقصكم تمشوا تحضروا ندوات ليه – يا جماعة حسين خوجلى دا كدى تابعوا برنامجة شبعان عيش لى لوزه ويتجشأ بعد كل 5 كلمات حتىكاد فى إحداهن أن يطرش عشان كده بشوف اليوم مافى مشاكل تستدعى قيام ندوات سياسية – خسئت ) ليتابع – هسي بيقولوا شنو ؟ كل كلام قالوه – أى زول فيهم نحن سمعناه – منو هسي الفى الحر دا بيمشى ميدان عقرب أو يمشى ميدان بانت ؟ حيقولوا شنو ؟ هو ذاتو فضل منو ؟ كل النجوم فاتو وكل النجوم ماتوا – هسي الحزب الشيوعى دا آخر زول ممكن يجيب الناس محجوب شريف ومات الله يرحمه ( طلعت متاخرة منه ) – نقد مات – مافى زول نجم – زاتو مافى لا عند الحكومة لا عند المعارضة ( عاوز يحسن صورته بين الناس لكن قرصوه فى أضانه ) هسي الحكومة دى لو عملت ندوة البيمشى ليها منو ؟ هسي حزب الأمة دا لو عمل ندوة البيمشى ليها منو ؟ الإتحاديين البيمشى ليهم منو ؟ هو الفضل عشان يتكلم منو ؟ هى ذاتها أحزاب هسي لو الحكومة دى قالت ليهم مش الحرية دى هاكم ليها حيسوا بيها شنو ؟ والله مابيعملوا بيها أى حاجة ( تانى يا حسين تملأ خشمك بالله بالكضب ماخايف يقلبك قرد ) يواصل حسين : دى أحزاب تجريدية ( ما خريج جامعة فلسفة ساقط شهادة من منازلهم ) ولذلك ياجماعة أن كلامى دا سيظل أن السودان عاوز ليهو حزب جديد ( حزب حسين حزب السودانين ماخلاص هزلت بلد زعامتها كانت بين الأزهرى والسيد عبد الرحمن والسيد على نسلمها لأب فعج دا – إتق ربك ) ولو الشعب السودانى دا طلع يعبر عن نفسه لقال الأحزاب السودانية دى نت اقصى اليمين الى أقصى اليسار دا طرفنا منها ( بالمناسبة دى طرفى منها دا كلام حريم زمان لمان كن يلبسن التوب ترفع طرفه وتقول لك دا طرفى منه – ثقافة حريم زمان يا حسين بنات هسي لابسات جنز وتى شيرت بودى مافيهو طرف ) يواصل حسين – منو الما إجرب فيهم ؟ الحزب الجديد دا ( حزب السودانين ) ولا نحن مافيهو نحن ذاتنا كبرنا زول جديد شاب جديد ( والله باقى لى الزول دا بيجهز فى شقيقه مولانا عبد الله خوجلى ليحكم السودان – ليهو حق مادام النظام بعد الإنتفاضة أمن ليهو الصحيفة والأن قناة فضائية وإذاعة أف أم ماتقول لى من دكان القماش – دا كان ورثه وبقية الورثة لايملكون شىء – دى أموال الجبهة الإسلامية القومية وأموال المؤتمر الوطنى – يعنى أموال الشعب – ردوا للبنوك حقوقها )
حسين يواصل هجومه : الكهنة ديل نحن مادايرنهم ( حتى البشير يابروتس ) دايرين لينا واحد من أولادنا ديل قيافة وكم وتلاتين سنة ( عزال والله ياحسين داير منو شنو ؟ دا لسع خبرة حكم ماعنده لكن جسده قوى ) نحن ذاتوا مرقنا من اللعب ( هو الدخلك فيها منه – دخلت نفسك ومرقت نفسك واليوم تعلن بكلامك دا حل حزب السودانين وبكره تجى تجشأ وتترع وعاااااااااع عااااع وتقرفنا بالسهلة السودانية وحزب السودانين – ياراجل ماترسى ليك على بر – يا حسين تقول للبشير الكهنة – شوف بكره الجعلى دا يسوى فيك شنو
حسين تانى : دارين لينا ولد قيافه كده ( على الطلاق دى مو سياسة دا كلام مابقدر اقوله إحتراما للراكوبة حبيبتى ) بلا عواجيز بلا قرف (عيب يا حسين منو العواجيز البشير عواجيز تقصد منو ومنو غيره الحاكم البلد دى منذ ربع قرن والله أنت حاقد وكاره للبشير لأنه هد القصر الذى بناه شيخك – طيب إنتظر الراجياك ) يواصل حسين : حاربوا إنهزموا ( لا دا طعن فى القوات المسلحة والقوات المسلحة منذ أن جاءت الإنقاذ مافى راجل قال إنهزموا إلا أنت – يا جماعة حسين دا مش صحفى عادى أو مقدم برنامج عادى – دا مركب مكنة رئيس جمهورية لاخايف من البشير لا من قيادة الجيش ) حاربوا إنهزموا ، إقتصاديا فشلوا ( ماقلت مافى أزمة خبز تمرق الناس لميدان عقرب ترجع وتكضب نفسك وتقول إقتصاديا فشلوا ) يواصل لكن دى كبيرة يا حسين لو الجعلى دا فوت لك كلامك الفات كله دى مش حيفوتهالك : بالله تقول جدول الضرب ما حافظنه ( تانية كتاب ياخى الرجل عمل ماجستير وبيحضر للدكتوراة ولا عاوز تطلع بروفسير عوض إبراهيم عوض برضو كضاب زيك ) آل أيه آل الرئيس والجماعة ديل جدول الضرب ماعارفنه – زراعة فشلوا فيها - ربنا أداهم أى حاجة غلبهم يستثمروها كأن السودان عاوزين يخلوه ليوم القيامة فاضى – نحن دايرين ولد شاب كم و30 سنه لايبلع حبوب ضغط لا عنده سكرى لا شايل ليهو عكاز ( لا لا دى بقت واضحه أنت قاصد البشير لأنه الوحيد فيهم الشايل عكاز ولو كنت فاكره عجوز لا دا بيهش بها على غنمه اللهى نحن وله فيها مأرب أخرى قد يصلك نصها كى تتأدب يا حسين ) يواصل لا شايل ليهو عكاز وحاقظ 3 أجزاء من القرأن ( خلاص وضح ليكم دا عبد الله خوجلى أخوى مرشح حزب السودانيين لرئاسة الجمهورية – الزول دا من حفره داير يرمينا فى دحديره – يا حسين زى ما قال فنان الجزيرة توبة يا ناس من الكيزان توبة - تانى توبه لا كوز لا أخوان لا تمكين لا جوطه لا خطوبة لا ترشيح قطع بس ليبرالى علمانى كلاسيكى إن شاء الله ما حافظ الفاتحة بس يكون إنسان أمين وصادق - يا حسين ربع قرن حكم أخوان شوه صورة الإسلام فى نظر الكثيرين – أمرقوا منها عشان نعيد للبشر ثقتهم فى دين الإسلام التى إهتزت بسببكم وسبب أفعالكم أنت ماقلت حاربوا إنهزموا إقتصاديا فشلوا – زراعة فشلوا عاوزنا نكرر التجربة تانى – دا بعدك ) حسين قال : فى شباب كتير فى حزب الأمة وفى شباب كتير فى الإتحادى الديمقراطى وفى شبا كتير فى المؤتمر الوطنى والمؤتمر الشعبى ( ماذكر شباب الحزب الشيوعى وبقية الأحزاب لأنه بيفتكر ان عددهم لايتجاوز 200 فرد ) ثوروا على القديم دا – ثوروا على الصدق المهدى وثوروا على الميرغنى وثوروا على الترابى ولمان جاء الدور على البشير قال ( ثوروا على المؤتمر الوطنى ) يا جبان ماقلتو مصريون
حسين خوجلى يختم حديث الذم لجماعة المائدة المستديرة قائلا ( هو كل ما الناس تكبر فى السن كلما إزدادوا تشبثاً بكراسى الحكم – المائدة المستديرة الأمبارح ديل على صدقهم هى مجموعة خارج التاريخ ( البشير خارج التاريخ يا حسين والله فجرت وتحتاج تأديب )
هذه دعوة من حسين خوجلى أكررها يا ابناء حزب الأمة أخرجوا على هذه القيادات التى أصبحت خارج التاريخ ، يا ابناء المؤتمر الشعبى أخرجوا على هذه القيادات التى أصبحت خارج التاريخ ( لاحظوا معى فى مقال المدح الذى يلى مقال الذم أن حسين خوجلى قال عن الترابى شخص مدهش وكان قبل 24 ساعة قال خارج التاريخ - يا كوادر المؤتمر الوطنى من الشباب ثوروا على هذه الجدر البلاستيكية – يامن تبقى من اليسار السودانى أخرجوا على هذه القيم القيم القديمة ، يا أبناء النوبة يا أبناء دارفور تطلعوا لمستقبل جديد وقيادات جديدة وبرامج جديدة
هذا ملف القدح والذم فماذا نقرأ من تناقضات فى ملف المدح والإطراء ( لاحظ الفرق بين الملفين 24 ساعة وليس 24 سنة (
------------------------------------------------------------------------------------------------------
الباب الثانى : باب المدح
هذا ملف المدح والإطراء فماذا نقرأ من تناقضات فى ملف المدح والإطراء ( لاحظ الفرق بين الملفين 24 ساعة وليس 24 سنة (
تعالوا لنقرأ سويا ملف تناقضات المدعو حسين خوجلى فى المدح والإطراء والثناء على الحضور بمؤتمر المائدة المستديرة فى برنامجه على قناة أمدرمان الفضائية أمسية الثلاثاء 8 أبريل الجارى
تعرض كل الحضور بمؤتمر المائدة المستديرة الذى عقد فى يوم الأحد 6 أبريل 2014م بقاعة الصداقة بالخرطوم لتيارين هوائين من المدعو حسين خوجلى صاحب قناة أمدرمان الفضائية فى برنامجه ( مع حسين خوجلى ) خلال يومي الأثنين 7 أبريل والثلاثاء 8 أبريل
الأول عبارة عن سيل من الشتائم والإهانات والتحقير لكل الحضور بمن فيهم رئيس الجمهورية
والثانى عبارة عن سيل من الإطراء والمدح والثناء لكل الحضور بمن فيهم رئيس الجمهورية
الأول كان فى أمسية الأثنين 7 ابريل الجارى
والثانى كان فى امسية الثلاثاء 8 أبريل الجارى
المدة الزمنية بين سيل الشتائم والإهانات والذم وبين سيل المدح والثناء والشكر والإطراء فقط 24 ساعة
تحول فيها فكر الرجل 180 درجة – هل هى صحوة ؟ أم قرصة شديدة فى الأضان من الأجهزة الأمنية ؟
سأكتفى هنا وفى هذا المقال لتقديم ملخص لأقوال حسين خوجلى فى المدح والثناء لكل الحضور بمؤتمر الدائرة المستديرة
وقد سبقه نشر لأقوال حسين خوجلى ذما وتحقيرا لكل الحضور بمؤتمر الدائرة المستديرة على صحيفتنا المفضلة الراكوبة
وستلاحظون أن حسين خوجلى ذو شخصية متناقضة مريضة يقول الشىء ونقيضه دون إبداء أى مبررات
حسين خوجلى قال جربنا كل حاجه – جربنا الحرب مانجحت – المقاطعات مانجحت – تظاهرات ما نجحت – حكم الفرد ما نجح – حكم الصفوة مانجح – حكم الليبرالين مانجح – حكم الطائفيين مانجح – حكم الأيدلوجيين مانجح ( حسين مدخله فى الحديث عاوز يعمل عصير كوكتيل للفشل السياسى السودانى يساوى بين فشل الصادق الذى حكم لسنتين تلاته وفشل البشير الذى حكم 25 سنة وفشل النميرى الذى حكم 16 سنة وفشل عبود الذى حكم 6 سنة والأزهرى سنة ونص وعبد الله بك خليل سنة ونص – كيف يا حسين تستخدم كلمة مانجح ومانجحت لكل هؤلاء بالتساوى – مابتخاف من ربك أخشى ما أخشاه أنك بحكم الأيدلوجيين تقصد الثلاثة يوم بتاعت هاشم العطا – يا حسين أنت بتنتحر سياسيا وسيحاكمك التاريخ )
حسين خوجلى يواصل – أنا حقيقة عاوز أوصى بحاجة مهمة جدا ( كمان بيوصى – وصى روحك كدى ) لأن سماعها إبتدارا مع النقاش يجب أن تستوعب تماما – خاصة انه عندنا محاولات جادة هذه الأيام فى التحول من مراحل المدافعة الى مراحل الشرعية أو الإتفاق على مرحلة قادمة نوقعها كلنا مع بعض
مدخل حسين خوجلى فى مدحه للبشير وبقية المؤتمرين أمر ذو غرض ، حين تشوه سمعة البشير وتذمه كما حدث من حسين بالأمس فأنت تمس الجيش الشرطة الأمن لأن البشير هو القائد العام لهذه التشكيلات ، فهل هى صالحة يمكن أن نبقى عليها أم فاسدة يجب أن تفكك ؟ بحديث حسين خوجلى فى البشير أمس يكون الرأس فاسد وخارج التاريخ ويتوكأ على عصاة ولازم يستبدل بشاب فى التلاتين ولازم تعاد معه روح التجديد للجيش الشرطة الأمن لأن حسين اقر بفساد الرأس
تغيير البشير أمر مرغوب فيه بل مطلوب عند حسين وشيخه ، لكن تغيير جيش شرطة أمن البشير فلا لأنه الجيش والشرطة والأمن الذى يحفظ لجماعة التمكين الحفاظ على ماسرقوه ويضمن عدم قيام ثورة شعبية غاضبة تحرق وتدمر بيوت وممتلكات الكيزان وهذا ما يخشونه ويجعلهم يتمسكون بالبشير لأن البشير يشكل لهم الضمانة والبشير يقول لهم حافظوا على رئيسكم حتى لاتقولوا أكلت يوم أكل الثور الأبيض
حسين خوجلى قال ( عشان كده أنا ياجماعة أرى أن الدعوة للمصالحة والإنتقال لمربع الحوار يجب ألا تكون خصما على هذه الأجهزة (الجيش الشرطة الأمن) ولا كسر خاطرها بالإدانة أو الهجوم غير المبرر ( كسر الخاطر دى كنا بنسمعها من نوعية رجال إنقرضوا من زمان ) حسين خوجلى يقول على الجميع أن يدركوا أن أى عمل سياسى ناضج يجب ان يحرس بامن ناضج وشرطة ناضجة وجيش ناضج ( ونحن ياحسين نقول المعارضة تطالب بتغير جيش وشرطة وأمن الأخوان المسلمين بجيش وشرطة وأمن سودانى ناضج – حسين عشان يصلح مشيته الغلط التى مشاها بالأمس كان مدخلة ترضيات للأجهزة الأمنية التى أدته قرصه فى اضانه ) حسين يقول : يجب على هذه الأجهزة أن تصفى صفوفها وتبعد الكوادر الجاهلة لأن الفساد بتجيبه الجهالة والذى لايتحول لخبيث لأن عقله يحميه ( أخبث رجال السودان والمختلسين والحرامية من الأذكياء وحملة رسالات الدكتوراة وعندك بتاع الدي دي آخر وأشرف ناس فى السودان هم البسطاء والقانعين بما يهبه الله وجماعتك ديل يا حسين اللى سرقوا البلد أنت عارفهم ولو الزول ماذكى بيقدر ياخد تسهيلات بنكية يعمل بها ثلاث مؤسسات )
حسين خوجلى بيخترع كلام من راسه يصدقه ويبثه للناس كحقائق – يقول – نحن دايرين هيبة ودايرين ديمقراطية ودايرين حريات وبالمناسبة القصة دى مافيها تناقض – نحن مادايرين يعنى خاطر الديمقراطية ينكسر ولا خاطر الأجهزة الأمنية والشرطية والجيش ينكسر – لو ما حصل تحالف بين القوة الشرعية أصله الديمقراطية مابتمشى لى قدام
ولو ماحصل تحالف بين القوة العسكرية أصله الديمقراطية مابتمشى لى قدام
يا حسين أمانة تقدد عويناتك وتقطع جضيماتك ديل هسع ديمقراطية سويسرا دى محروسة بجيش
حسين خلص من كل هذه الهرجلة والتخبطات لشىء واحد
يا جماعة لامانع تغيروا جماعة الإخوان المدنية الحاليين مع مجموعة من جماعات حزبية وتكونوا حكومة قاعدة أعرض شوية من بتاعت الدقير ومسار والميرغنى
لكن جيش الإنقاذ بقياداته الحالية ، شرطة الإنقاذ بقياداتها الحالية ، جهاز أمن الإنقاذ بقياداته الحالية دا خط احمر لاتقتربوا منه – يوقف برامجنا يصادر صحفنا لكن بيضمن وجودنا وسطكم ولو راح خلاص نحن رحنا فى ستين داهية ، نحن جماعة التمكين الذين ركبنا على رقابكم لربع قرن لو فقدنا حماية جيش وشرطة وأمن الإخوان الشعب سوق يهجم علينا فى بيوتنا ويحرقها على رؤسنا ويدمر مؤسساتنا ويسلب كل مانهبناه منه ودا سماه حسين التحالف بين القوة والشرعية أعملوا ديمقراطيتكم فصلوها زى ماعاوزين عربى أو أفرنجى لكن أجهزتنا الأمنية التى أسسناها بإحالة أتباعكم للصالح العام من رتبة فريق لملازم دى مش حنفرط فيها حتى لانذبح كما ذبح المسلمين فى أفريقيا الوسطى – لكن يا حسين أنت بنفسك قدمت شهادة أن شعب السودان غير ومختلف حين تحدثت عن عودة نميرى وسكناه فى بيته بود نوباوى وهو من قتل ودمر من أهل ودنوباوى والجزيرة أبا – يا حسين الجيش لازم يعود جيش وطنى – والشرطة لا زم تعود شرطة وطنية وجهاز الأمن لازم يعود جهاز أمن وطنى ، وكبار موظفى الدولة فى البنوك والمؤسسات الحكومية يجب أن يكونوا خليط متجانس من كل ألوان الطيف السياسى وكل شىء دمرتوه يجب أن يعاد بناؤه والبداية تكون بالخدمة المدنية ولو لم يعاد بناؤها لن يعاد بناء السودان وكونوا مطمئنين فالسودانيون طيبون متسامحون لا قتله ولا مجرمين – أنتم جئتم بفكر إسلامى متطرف دخيل على السودان – قتلتم وسرقتم وأنت قلت بعضمة لسانك ( الإنقاذ أعلت الباطل وتسفلت عن الحق فوصلنا الى ماوصلنا إليه ) دا كلامك يا حسين أم أرسل لك مقطع الفيديو – عاوزنا نبقى على جيش وشرطة وأمن من أعلى الباطل وتسفل بالحق – كل شىء حدث فى عهد الإنقاذ باطل ودا كلامك أنت إبنهم
بعد أسهب حسين فى حديثه عن الأبقاء على مؤسسات الجيش الشرطة الأمن الأنقاذية كضرورة ( وبالمناسبة ياجماعة لن يحدث أى إستقرار فى ظل المؤسسات الأمنية الإنقاذية وقوات الجبهة الثورية بدون تفكيك – يعاد ترتيب الجيش والشرطة والأمن لما كان عليه قبل ربع قرن ) أتخذ حسين خوجلى من البيان الصادر عقب لقاء الأستاذ فاروق أبوعيسى المحامى رئيس الهيئة العامة لقوى الإجماع الوطنى بالأستاذ مالك عقار رئيس الجبهة الثورية مدخلا لحديث ( المدح ) الذى إستدعته ضرورة الإبقاء على الرئيس البشير كرجل شاب وليس من العواجيز وكرجل صالح وليس بفاسد لأن حسين خوجلى تتبه الى أن البشير هو رأس الجيش والشرطة والأمن ولو فسد الرأس فسد كل الجسد وحسين وكل جماعة التمكين يتمسكون بجيش وشرطة وأمن الإنقاذ لأنها الوحيدة التى تمنعهم من المحاسبة والعقاب
قال حسين خوجلى : أنا موافق على كل ماجاء فى لقاء أبوعيسى عقار ولو طلب منى أوقع نيابة عن حزب السودانين لكان توقيعى عليه رقم ثلاثة – كدى خلو الحرب دى تقيف – دا المهم – ( ياحسين الحروب دى إشتعلت بأسباب مش حبا فى الحرب عاوزها تقيف بس عشان ماتصرفوا مليار تميم عليها وتوزعوه بيناتكم – نحن شفنا أمنك يسجن ورئيسكم يعفى ويطلق وبكره أمنكم يقبض ورئيسكم يعفى – عاوزين حل مشكلة دارفور يبقى زى إطلاق المعتقلين السياسين – أمن يقبض ورئيس يعفى – دى ذكرتنى بنكته – فى الإمارات إمارة الشارقة إسلامية تحرم شرب الخمر وجارتها إمارة علمانية تسمح بكل شىء – وبيناتهم شارع عرضه 30 متر – سودانى سكر فى عجمان وقطع الشارع إتكأ على عمود نور فى الشارقة الشرطة إشتبهت به ودوه سجنوه ورحلوه – قال هيييييييع حسب سكرته ( شيخ يسكر وشيخ يسفر ) هسي إنتو يا حسين أمنو يقبض ورئيس يطلق – لمتين تبقى حجوة أم ضبيبينه دى – النيابة تحقق والقضاء هو من يسجن ويطلق – إنتو متلهفين يا حسين للمصالحة ووقف الحرب عشان القلة البقت فى يدكم قليلة لاتدير دولة بها حروب – إنتو ما حبا فى السلام ولكن حبا للمال هرولتم نحو الحوار
حسين خوجلى : منو الداير الحرب – لا الحكومة دايراها لا الجيش دارها لا الشعب دايرها – لا ياحسين خوجلى فى ناس مستفيدة من الحرب ومن جماعتكم سماسرة سلاح وتجار تموين وغذاءات جيوش ودفاع شعبى هسع وأنا بكتب لك هم شغالين ومليارات كابه كب فى جيوبهم يقتل 200 ألف يقتل 200 مليون مايهمهم المهم الحرب ماتقيف والبربخ المفتوح للأموال الغير محدده مايقيف ويا حسين لمان نعمل تعديل فى أجهزة الجيش والشرطة والأمن من أخوانية لسودانية بنقدر نجيبهم ونجردهم من كل تلك المليارات المغسولة بدم أهلنا فى كل بقاع السودان الموضوع مش سياحة – وعفاى الله عما سلف – لا فى حساب وحساب عسير جدا ولو لم تتم المحاسبة ويعاقب كل مخطىء النفوس مش حتصفى والسلام مش حيحصل
حسين : كلام أبوعيسى وعقار دا كله فيهو 3 حاجات – الحرب تقيف – الجيش دا ( مقال الجيش السودانى قال الجيش دا جيش الإخوان بهذه التشكيلة
الحالية ) نحن معاه – حاكمها البشير – حاكمها نميرى – حاكمها هاشم العطا – نحن مع الجيش دا
إنت كضاب أشر يا حسين بتفتخر بأنك أخو الشهيد عبد الأله خوجلى وبعضمة لسانك قلت جاء داخل الخرطوم شايل كلاشنكوف كان بيحارب فى غردون – كان بيحارب فى نميرى القلت نحن معاه – بلاش تحقير وإستهتار بعقول شعب السودان – إنت ياحسين قلت الخروج على الجيش خيانة وطنية عظمى – يعنى شقيقك لمان خرج على جيش نميرى وشال الكلاشنكوف وقتل مسلمين ومنهم ولدنا الملازم فيصل عدلان من أرابيب بربر فيصل ماكان كافر لكن شقيقك فى النار (ففى حديث صحيح عن رسول الله صلى الله عليه وسلم قال: إذا التقى المسلمان بسيفيهما ، فالقاتل والمقتول في النار . فقيل : يا رسول الله هذا القاتل، فما بال المقتول؟! قال: إنه كان حريصاً على قتل صاحبه. رواه البخاري ومسلم ( طبعا ماتقول لى بسيفيهما لا تعنى بكلاشنكيفهما – فالسيف يرمز لأى نوع من السلاح – أنت بنص الحديث مش شقيق شهيد لكن شقيق كافر فى النار ، عشان تتطاول على سيدك الحبيب الصادق الجده قتل غردون ) تعلم الأدب
حسين يواصل : نحن مع الجيش السودانى تحت إمرة أى نظام ( طيب يا شقيق عبد الأله خوجلى ليه مابقيتو معاه تحت إمرة نميرى – أنت كذاب فأنت مع جيش وشرطة وأمن جماعة الأخوان التى طردت للصالح العام من رتبة فريق لملازم وخلال الفترة من 1989م الى 2014م كل من يدخل كلية حربية أو كلية شرطة أو جهاز أمن لازم يحمل توصية من كوز كارب أو تاريخه السياسى فى الثانوى يرفع تقرير عنه أن كان منظم – أنتم أخترتم الطريق الخطأ والني للنار وبنفسك بالأمس قلت خلاص وصلت الحد داعى الكضب تانى شنو – أنتم تعيشون حالة موت سريرى زى بتاعين شارون الذى أمضى فيه 8 سنوات – الغالبية العظمى الصابرة المحتسبة من الشعب السودانى شعب مسلم يعرف الله لن يرفع سلاح فى وجهكم حتى يذهب للنار مع شقيقك عبد الإله خوجلى عشان كده لا تجد أى قتل أو محاولات قتل إلا فى المناطق التى وصلتم لها واشعلتم فيها النيران والجماعة دى لمان سألناهم وأنا خاصة لدى مخاطبات مع عدد كبير منهم اقول لهم كيف تقاتلون جيش مسلم وأنتم تعلمون أن القاتل المقتول فى النار – الجماعة بتقول نحن لم نقاتل لمجرد حبنا فى القتال هؤلاء الجماعة وصلوا الى ديارنا وحرقوا بيوتنا وصادروا حواكيرنا وجاءوا بأناس غرب وأسكنوهم فى محل أهلنا فكيف لا نحارب – سألت واحد من ناس الحكومة كيف تقاتلون أهلكم فى دارفور وأنتم تعلمون أن المسلم والمسلم لو تقاتلا فالقتال والمقتول فى النار – قال نحن الدولة ونحن الحاكم والجبهة الثورية خرجت على الحاكم – قلت له الحاكم إما ينتخبه الشعب أو تنتخبه الشورى وحاكمكم هذا غالبية أهل السودان لم تنتخبه وإنما مغتصب جاء يركب على ظهر دبابة – قال لى لو لم نقاتلهم فى دارفور لقوى شوكتهم وحاربونا فى شوارع الخرطوم ولدينا سابقة – قلت ألا توافقنى أن رد الفعل كان أعنف من المطلوب وان أخطاء كثيرة قد أرتكبت قال أوافقك ) قلت له لكن حسين خوجلى قال : نحن بنفتكر أىحرب ضد الجيش السودانى ( خلاها عبارة الجيش دا – لقاها بتشبه جيش النظام الأخوانى ) حتى ولو كانت قضيتهم عادلة وهم أقلية ، فهى ظالمة وبيدفعوا فيها الثمن غالى (تخيل حسين بقول لو قضيتك يا عقار ويا الحلو ويا جبريل ومناوى وعبد الواحد لو كانت عادلة فهى فى نظره ظالمة – يعنى يا حسين قضية ناس عبد الأله أخوك تعتبر قضية ظالمة لأنهم أقلية أم أنك حسين كوم التناقضات )
حسين بيطالب : الليلة دى يعلن إيقاف الحرب وترفع البيارق فى كل السودان
ياراجل رئيس الجبهة الثورية مالك عقار محكوم عليه بالإعدام
بس توقف الحرب وترفع البيارق عشان انت تحصل مليار تميم تلهف ليك من شليه
الناس الذين حرقت ودمرت بيوتهم ومزارعهم وسلبت مواشيهم – بس يجيها خبر الحرب وقفت وبس تقيف
صحيح ياحسين وصلت معاكم الحد – على الطلاق غيبوبة شارون 8 سنوات أخير من غيبوبتك دى
يا حسين انت قلت درجة الحرارة الأن 46 درجة والصبى يجيك عرقه زى الصقر – طيب الصيف ماجاء ما تحسموا الحرب والجمعة الجاية تشيل كاميراتك وتنقل لينا الجمعة من كاودا
حسين خوجلى كل اللف والدوران دا عشان يجد مدخل مشرف يمدح ويمجد بيهو الرئيس الممرمطه فى الدغناء فماذا قال حسين : الكلام القالوا الرئيس دا فى مؤتمر المائدة المستديرة حقوا الناس مفروض يجروا وراه جرى عشان يلحقوه – الرئيس دا قلبه محدثه تب ( طيب مادام قال كلام زى دا فى يوم 6 أبريل أنت ياحسين داعى قلت الأدب والتطاول على رئيسك وضيوفه فى يوم 7 ابريل داعيه شنو – لاحظوا فى حديث الأمس الرئيس كان عواجيز وكهنة وماشى بعصاية والليلة قلبه محدثه – ياخى قطعت قلبنا نحن من كلمة عواجيز دى قلنا الزول دا قلبه وقف ضمه – الله يخيبك يا حسين بتاع كسر الخاطر – بالمناسبة دى كلمة مش كويسة والناس الكانت بترددها كثيرا هسي مع فى إلا يكون شباب حفرة الدخان )
من الرئيس إنتقل بالمدح للسيد الصادق
حسين ( السيد الصاد دا قدر ما الناس قالوا ليهو هذا النظام لاخير فيه دايما هذا الرجل يقول الصلح خير وتحمل فى القصة دى كلام كتير مننا (منك أنت وبس نحن واعيين ومابنغلط) ومن ناس المعارضة وناس حزبه وناس بيته ذاتو – وادائما بيفتكر يا أخواننا ان هذا السودان لايحتمل – فهذه كلمة حق تقال فى حق هذا الرجل ) يا حسين الصادق ليس فى حاجة لكلمة حق تخرج من فم كاذب وقبيح
حسين خوجلى بمدحه للبشير والصادق يمهد للدخول لمدح حبيبه الترابى فقال ( الناس محتارين أن دكتور الترابى اصله هو رجل مدهش كده لا تكلم عن حكومة ولا تكلم عن حقوق – ( حكومة شنو وحقوق شنو يا حسين ماقلنا خلاص وصلت معاكم الحد وأنت قلت أن تلامذته ناس البشير وشيخ على قد هدوا القصر – لايوجد مال ولا سلطان ولا قوة ولافكر والإنقاذ فى حالة غيبوبة تامة وموت دماغى والترابى لم يأتى مهرولا من أجل السودان وتحسين وضع إنسانه الترابى جاء مهرولا ليجرى عملية جراحة مخ وأعصاب لمريضه وليعيد بناء القصر الذى هده تلامذته – دا مو كلامك قبل أريعة أيام ولا نسيت
حسين خوجلى قال السودان دا لازم الأن يتلحق – لا يا حسين مو السودان فالسودان لن يضيع المفروض يتلحق إنتو الوصلتم الحد
يواصل حسين خوجلى مدحه لبقية الحضور بالمائدة المستديرة وخراجها : الأستاذ فاروق أبوعيسى رغم إختلافنا معاه زول مو هين – يا حسين أنت القادى شهادة موهين يكون هين فاروق أبو عيسى أنت ماعارف عبارة زول مو هين فى العامية السودانية بتعنى شنو – بتعنى أنى كنت مفتكرك زول هين وتبين لى خلاف ذلك - ويواصل المدح – أبوعيسى دا البيبقى الأمين العام لإتحاد المحامين العرب 25 سنة دون دعم خلفه ( عاوز يعنى إتحاد محامين الإنقاذ يدعمه ) وكونوا العرب يوافقوا عليه 25 سنة معناه الرجل دا عنده تجارب وكفاءة سودانية - إتفقت أو إختلفت معه زول ماساهل ( لاحظ دا والترابى والصادق والبشير كلهم أمس كانوا كهن وعجائز خارج التاريخ – يا مثبت القلوب ثبت قلبنا على الإيمان )
المدح تعدى المائدة المستديرة – وبعدين مالك عقار دا نصالحه يفك مننا نحاربه يفك مننا نحاصره يفك مننا - تقصد شنو يا حسين بيفك مننا كنتو عاوزين تدخلوه التنظيم
حسين يواصل المدح للجميع : برضو إنتو عارفين أن السودان دا أى زول يخرج لك قيادى كارثه زول مو ساهل وعنده كاريزما هسع ياسر عرمان دا والله فى الإنتخابات الفاتت خفنا منو عديل قلنا يفوز على البشير
حسين خوجلى دهن السير للبشير عشان يدخل للصادق ومن الصادق عبر لحبيبه الترابى ومن الترابى دخل على أبووعيسى ومنه لمحطتي عقار وعرمان
أنا بقترح أن يجتمع عدد من علماء النفس مايكونا قادين ثانوية وأقترح إبنى عمى الرباطابى مالك بدرى عشان يقرأوا مقالى الذم 7 أبريل والمدح 8 أبريل ويحللوا لنا شخصية هذا المدعو حسين خوجلى الذى نصب نفسه رئيسا لحزب السودانين ثم خلع نفسه ثم سيعيدها
حسين يواصل مدحه للقيادات السودانية المجتمعة فى المائدة المستديرة
البشير تحتار فيهو – الترابى تحتار فيهو – الصادق تحتار فيهو – أبو عيسى تحتار فيهو – عقار تحتار فيهو – عرمان تحتار فيهو حتى قرنق دا تحتار فيهو – كمان حتى الميتين ماخليتهم من نفاقك – هذا الكيل بالمدح والإحتيار فيهو لم يوضح ممكن نقول تحتار فى قدراته العالية وممكن نقول تحتار فى جهله – المهم الرجل اطلقها تحتار فيهو وكل زول يفشرها كما يود أن يفشرها
حسين خوجلى دا يشبه حسين بتاع مسرحية شاهد ماشافش حاجه
كمل القيادات ودخل يمين بالمدح للأمة السودانية جمعاء
السودان جزء من مشكلته أن أى زول يمرق ليك تحتار فيهو – خليل ابراهيم تحتار فيهو – على الحاج تحتار فيهو – الترابى تحتار فيهو ( الترابى دا يا حسين ماقلته قبيل داعيها تحتار فيهو تانى لى شنو ما نحن محتارين فيكم كلهم لربع قرن ) وتانى رجع – البشير تحتار فيهو – الظاهر قرصة ولدنا محمد عطا كادت أن تقلع الإضان – الصادق تحتار فيهو – تانى كويس برضو – على عثمان تحتار فيهو – فى شنو إلا فى قنبلته الفجرها فى نيفاشا حقيقة يحير – وطبعا خفف دمه وقال الميدان مليان كباتن
ويستمر حسين خوجلى ليواصل نفاقه وتناقضاته – أنا بقول ياجماعة حقوا نستثمر هذه القيادات ونستثمر هذه المواقف وبنفتكر أنخ دا خير
قال يوم 8 أبريل ( نستثنرها ) فماذا قال يوم 7 أبريل (هو كل ما الناس تكبر فى السن كلما إزدادوا تشبثاً بكراسى الحكم – المائدة المستديرة الأمبارح ديل على صدقهم هى مجموعة خارج التاريخ ) نستنثر ناس خارج التاريخ Expired
كانت آخر كلمات حسين خوجلى فى حديث 7 أبريل ( أن الإنقاذ أعلت الباطل وتسفلت عن الحق فأوصلتنا الى ما وصلنا إليه )
كانت من كلمات حسين خوجلى فى حديث 8 ابريل عن قرار البشير السماح لنميرى للعودة للبلاد ( البلاد المحترمه تحترم أسرارها وتحترم رجالها مهما إختلفت معهم ) كيف نخلى زول بالحق أو بالباطل 16 سنة حكم السودان فى ظروف عجيبه جدا يجلس على تل من المعلومات الخطيرة – دا كنز أنا أجيبه بلده أحاكمه أو أحفه – دا لو اصابه مرض الزهايمر كان ممكن يقول كلام لا ليهو أول ولا ليهو أخر
يا حسين نميرى أنتم من شاركتموه فى حكمه فمن ماذا تخافون أن يصرح ؟ قال نميرى يدخل على المسئول ويقفل باب المكتب ويقول ليهو يا فلان لم مراتك – وحسين هنا يطرىء ويمجد فى الحاكم الذى وصل علم بفساد زوجة وزيره ومازال يحتفظ بوزير لم يصلح شأن أهله فهل يصلح شأن أمه – يا حسين إنتو ونميرى كارثة وإبتلاء لا نملك إلا أن نقول ( اللهم لا نسألك رد القضاء ولكن نسألك اللطف فيه )
وأعتذر عن الإطالة



[email protected]


تعليقات 9 | إهداء 0 | زيارات 2174

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#970221 [المهندس سلمان إسماعيل بخيت على]
3.99/5 (20 صوت)

04-11-2014 06:58 PM
سماها حسين خوجلى إرادة المنابر ونحن نسميها وقاحة المنابر
فى جردنا لحساب الربح والخسارة لحسين خوجلى صاحب مقولة ( إرادة المنابر ) وتعرية تناقضاته ووقاحته التى تفوح منها رائحة تجشأته النتنة نلقى الضوء اليوم على ماتجشأ به فى أمسية الخميس 10 أبريل 2014م
تابعوا المقال فقد ينشر مساء اليوم الجمعة 11 أبريل بنافذة جديد المقالات على الراكوبة
وإن عاد حسين خوجلى عدنا
وأن بعد عن السياسة والواحة وذهب لكاره ( حوارى أمدرمان وأيام لها إيقاع جلسنا وأستمعنا إليه بتادب وطرب ) فالرجل رصيده فى السياسة صفر والذين يدفعونه لتجميل صورة الحكومة يخدعونه ويسببون له خسارة كبيرة لا تعوض
فمن يسىء للسودانى بأنه إنسان كسول لا يستحق أن يتحدث عن حزب السودانيين

[المهندس سلمان إسماعيل بخيت على]

#969883 [عارف]
3.82/5 (20 صوت)

04-11-2014 10:14 AM
يا باشمهندس رجاء ركز لينا علي المتذاكي المتظارف الدجال..وامل ان لا تصرف جهدك في الرد علي من يخالفك الراي ...الذي يهمنا هذا الدعي الذي يريد ان يخفي اثار الجريمه

[عارف]

#969419 [الصليحابي]
4.03/5 (19 صوت)

04-10-2014 06:08 PM
لك ألف تحية وسلام يا استاذ سلمان ، ونحن نختصر وننتظر تحليلك الرائع لمعرفة ترهات هذا المضلل حسين خوجلي ، لأنني وصلت إلى قناعة تامة بعدم الجلوس أمام التلفاز لمشاهدة هذا المنافق الكاذب ، وعند قراءتي لتحليلك الرائع اتوقف في كلمة وفي كل فقرة والدهشة تغلبني مما قاله هذا المنمافق الكاذب المفتري ، وتقبل تحيات وشكر عدد كبير من زملاء العمل والأصدقاء وهم يتابعون ويقرأون تحليلك .
أعانك الله على التجشؤ المتكرر بسبب تخمة الغداء الزائدة، واصبر واعتبرها في ميزان حسناتك ، وحتما سوف يزول هذا الكابوس الجاثم على صدورنا ، فلينتظروا إنا منتظرون ...

[الصليحابي]

ردود على الصليحابي
[المهندس سلمان إسماعيل بخيت على] 04-11-2014 11:05 AM
لو طلبت منى إدارة الراكوبة التوقف لن أتوقف لأن هنالك شخص عزيز على نفسى إسمه الصليحابى ومعه عدد كبير من زملائه فى العمل يشدون من أزرى فى مواجهة زير التناقضات الذى خصص يوم 7 أبريل لذم كل الفرقاء ويوم 8 أبريل لمدحهم ويوم الأربعاء 9 أبريل تحدث فى إمور بعيدة عن السياسة حتى تنسى الناس سقطاته وأمس الخميس 10 ابريل عاد لذم الجميع ولكنه خصص الذم للذين يطالبون بالضمانات وتفكيك الأجهزة الأمنية من جيش وشرطة وأمن الأخوان والزول خواف يرتعد لمان يسمع كلام فى تغيير هذه الأجهزة من أخوانية لسودانية
تجدون كلمات حسين خوجلى المتعفنة لأنها تختلط وهى خارجة مع بقايا أكل تقف فى فم المعدة لأنها مزوده زرد شديد وننصحه لتأجيل وجبتى الغداء والعشاء حتى ينهى مرافعته عن نظامه الذى قال عنه النظام دا وصل الحد ونحن السودانين بنفهم فى اللغتين العربية الفصحى والعربية العامية وصل الحد يعنى إنتهى وقال عن راس النظام البشير مالم يقله مالك فى الخمر ولمان عرف أن الذم والتحقير لرأس النظام بالكهنة والعواجيز المابتعرف جدول الضرب الصغير والتى خارج التاريخ مستشاريه من جماعته قالوا ليهو أبعد رأس النظام البشير من النقد لأن فساد رأس النظام يستدعى تغيير الجيش والشرطة والأمن وبقية الأجهزة الأخوانية من دفاع شعبى وجنجويد لأن لو رأس الفاسد فبقية الجسد ستكون فاسده
تابعونا فى الحلقة القادمة حتى يتوقف زير القازورات من رمينا بها
بالمناسبة يا الصليحابى تخيل شخص إسمه ( أبو محمد ) بيقول شنو ( حسين اكثر من مره قال ان كلامه هذا مجرد ونسه فى السهله وليس كلام منزل ولامحاضره ولا درس وهو مجرد طق حنك لااكثر ولااقل من ذلك عليه يصبح التعليق عليه وتكراره مجرد مضيعه للوقت ولاطائل من ورائيه وهو كلام وليد الصدفه وحسين انسان عادى ليس بعالم ولافقيه ولامسئول فى الحكومه وهو الان مجرد مواطن عادى من يستمع اليه يجب ان يضع هذا الاعتبار والا فيمكنك ان تذهب لقناة اخرى والسلام )
أنت تعرف يا صليحابى كلام ابو محمد دا معناه ضوء أخضر لحسين ليقول العاوز يقوله واليوم ينتشر جماعة من ناس الإنقاذ يروجون لبرنامج حسين خوجلى ولعلمك حسين خوجلى يوميا يطلع على ما أكتبه أنا ومايكتيه آخرون على الراكوبة وكان ممكن يكون شجاع ويفتح معانا حوار رأى ورأى معاكس عشان نفضحه من نفس المنبر بتاعه لكنه يتهرب ولايذكر حتى صحيفة الراكوبة الألكترونية خوفا أن يسمع بها من لم يسمع ويبحث عن موقعها ويتعرف على حقيقة حسين واشباهه
أنا عاوزكم زى ماهو عند ناس بتروج ليهو أنتو تتصدوا لناس زى أبو محمد وعادل وكمال حتى يقف كل شعب السودان الذكى الذى يعرف دوره أو المضلل الملعوب عليه الذى لايرى خطوره فى كلام حسين وديل قله أو صاحب الغرض وديل جماعة الكيزان نحن لانعول عليهم لأنهم قلة
يا صليحابى وكل أهل السودان ، السودان أمانة فى أعناقكم
خلصوه من قبضة الأخوان ألم يقل لكم حسين خوجلى أنا عافى منك يا الأنقاذ خليكى راكبه ليهم فوق رقابهم وردينا عليه وقلنا الركوب فوق الرقاب هين حجامة فلاتى بتفكه الكلام الركوب فى حتات لا بتتحجم لا بتتخلى تبقى عادة - ألم اقل لكم هو زير قلت أدب فى زول بيشتم شعبه ليك يوم يا أب فعج


#969319 [ودالدكيم]
2.84/5 (20 صوت)

04-10-2014 04:35 PM
ياحضرة الباشمهندس لك عاطر التحايا.هذا الكوز الشيطاني المدعو حسين خوجلي.هو شديد كل الحرص علي حفظ وصون هذه الأجهزة الأمنية التي تُدين بالولاء لهذا النظام لأنها هي خزينة أسرار هذا النظام.اذا سقطت هذه الأنظمة الأمنية سوف تسقط وزارة الاعلام التي يمتلكها هذا (المعتوه)حسين خوجلي بالمناسبة عندما تساءل السيد الصادق المهدى وقال المدعو حسين يمتلك(دكنين)من أين له هذه الأموال قال هذا(المعتوه)أنا بعرف أستثمر هالك الاستثمار دا ياعندسةهههههههههههههههههها

[ودالدكيم]

#969280 [الصهيونىى]
3.66/5 (20 صوت)

04-10-2014 03:57 PM
يا باشمهندس سلمان ياخى حسنيه بنت خوجلى دى ما جننتها جن لمن الدوره بتاعتا اتلخبطت

[الصهيونىى]

#969277 [usama]
3.22/5 (19 صوت)

04-10-2014 03:55 PM
حزب السودانيين دا شنو ,,,وطني يعني ,,,السودان الوطن الشعب هههههههههههه مالهم بخافو من اسم الإسلام يعني خلاص خلو تسمية الإسلام الي الوطني والشعبي والسودانيين والإصلاح

[usama]

#969219 [ابو محمد]
4.04/5 (20 صوت)

04-10-2014 03:09 PM
حسين اكثر من مره قال ان كلامه هذا مجرد ونسه فى السهله وليس كلام منزل ولامحاضره ولا درس وهو مجرد طق حنك لااكثر ولااقل من ذلك عليه يصبح التعليق عليه وتكراره مجرد مضيعه للوقت ولاطائل من ورائيه وهو كلام وليد الصدفه وحسين انسان عادى ليس بعالم ولافقيه ولامسئول فى الحكومه وهو الان مجرد مواطن عادى من يستمع اليه يجب ان يضع هذا الاعتبار والا فيمكنك ان تذهب لقناة اخرى والسلام

[ابو محمد]

#969063 [عادل]
3.90/5 (19 صوت)

04-10-2014 01:22 PM
مليناااااااااااا منك ومن حسين العامل ليك هوس ده

[عادل]

ردود على عادل
[المهندس سلمان إسماعيل بخيت على] 04-10-2014 09:32 PM
حسين لن يعمل لى هوس ولكن نحن نخاف على السذج من أمثالك يا عادل يصدقوا أن حسين خوجلى مفكر ويمشوا خلفه وفى ناس مش قليله عندها الإعتقاد دا خاصة وأن الرجل بيعمل مداخل لحديثة فيها شىء من العمل الدرامى مره يحكى عن مشهد تراجيدى الولد أحمد الضاع والبت التى أغتصبت ومره يسرد مقطع كوميدى ويعقبه بخفة دم وتقديم هدايا والناس فى السودان قاعده فى بيوتها زهجانة لا شغل لا مشغلة لقت زول بدل الحبوبات الماتن يجى كل يوم يحجبهم
انا بقوم بدور مفروض ياعادل كلكم تقوموا بيهو وهو توعية الشباب من الأنزلاق فى ركب الكيزان
كفاية ربع قرن دمار
لازم الشعب يستعيد وطنه وحقوقه
وخليكم من عبارات ملينا - أنت أصلا ماعندك عقل ولا بتفكر تمل من شنو ؟


#969059 [ابولكيلك]
3.21/5 (20 صوت)

04-10-2014 01:18 PM
يا جماعة الولد حسين لا تذموه لا تعيبوه فكزام الكيزان خرمان لقعدات ايام زمان ايم السودان امبراطورية الشجرة بالفرع ايام الصاح والله افتقدناك يا زمان لا تحزن يا كزام فالافراح قادمة تلوح بشائرها بالافق شمالية غربية وجنوبية شرقية محملة بمطر الشوق والحنين لسودانا القديم .

[ابولكيلك]

ردود على ابولكيلك
European Union [عبد العاطي] 04-11-2014 03:54 PM
اوجه طلب غالي وعزيز لحسين خوجلي في الحلقه القادمه
ان يناقش (من المسؤل عن دماء شهداء سبتمبر ) وله خالص شكري
انا في الانتظار

European Union [Ali] 04-11-2014 01:38 PM
بجد سرد طويل وممل، من رجل يدعي التحليل والمنطقية، ياخ حسين شنو البستحق كلام قدر ده، وبعدين انت موضوع مع حسين شخصي، ما في داعي تقحم فيه معجبي الراكوبه، اكتر من مقال في حسين ياخ عيب صفي حساباتك بطرق شريفة، وبعدين حسين ده برغم اختلاف الناس وانا واحد منهم معاهو، زول مثقف وواضح في الطرح، وبرنامجو عبارة عن ونسة خلتا نعرف البدور في البلد شنو، رغم التناقض البتقولو، طيب انت اطرح بديل المشاهدة، النقد اي زول يقدر ليهو لكن تقديم البدائل يقدرو ليه الأذكياء وما أظنك منهم، كلام ينبئ عن غل وحسد، وسببه انتقاده الشماليين في بعد أحاديثه وهذا هو منطلقك في عداوته. أرجوك ان تبحث عن وسيلة اخري.

[المهندس سلمان إسماعيل بخيت على] 04-11-2014 11:06 AM
أفصح أبن


المهندس سلمان إسماعيل بخيت على
المهندس سلمان إسماعيل بخيت على

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة