يكون من شنووو؟
04-10-2014 04:56 PM

المواطن السوداني أو الفرد السوداني زول نضيف جداً .. نمرة واحد على المستوي العالمي .. مافيش حد في العالم قاعد يستحمي مرتين في اليوم ومرات كمان تلاته مرات .. وكمان بالليفه

والصابون .. ومافيش حد في العالم حريص إنو يتسوك وينضف أسنانو كل صباح ومرات بالليل ذي السوداني .. خليك من الملابس الخارجية الهدوم أو الملابس الداخليه أتحدي أي شعب في العالم يكون بيغيرا كل يوم ده لو ما كان مرتين في اليوم .. خليكم من ده .. معظم السودانيين بتلاقي إنو الواحد لو ضفورو طلعت مليمتر ما يتحملا وتلاقيهو طوااالي جاب الضفارة أو القصافه وواساهم .. معظم الأسر السودانية تحرص على النضافه الذاتيه والشئ الغريب أن هذه المسألة ليست مقصورة على فئه معينه .. كل السودانيين كده .. المرا .. الراجل .. الشاب الشابه .. المتعلم والجاهل .. الوزير والخفير .. الموظف والعتالي .. كل السودانيين بمختلف مستوياتهم التعليميه والمادية والعمرية والمهنية بيشتركو في إنو ناس نضيفين وبيحرصو على المسأله دي وهم رقم واحد في العالم من حيث النضافه الشخصية .. لكن .. وللأسف الشديد والشديد جداً نحنا طيش العالم في مسأله النضافه العامة .. ودي ما عايزه ليها أي أدله أو براهين .. ناخد أمثله ..
- الزول ينضف البيت .. (ما هو زول نضيف وعايز البيت يكون نضيف) .. ويقوم يكشح الوسخ في الشارع (ما الشارع ده حق الناس كووولهم وما حقو براهو)
- ماشه قدامك عربية ممكن تكون (برادو) تمنها مليار جنيه إلا شويه .. تلاقي القزاز إتفتح وشووو قزازة مويه أو عصير أو حتى منديل ورق جاك طاير !! ودي طبعن بتوريك إنو مافيش علاقه بين (السلوك والقروش) .
- وإنت طالع السلم بتاع أي مستشفي أو مؤسسه عامه .. عاين للحيطه ح تلاقيها كووولها مليانه تمباك وشنو ما عارف وشكلها يطمم البطن !
- عاين لأي شارع .. ح تلاقي الأوساخ مشتته فيهو .. يستوي في الكلام ده الشوارع الكبيرة .. شارع الستين .. عبيد ختم .. أو الأربعين أو المورده .. أو شارع الإنقاذ أو شارع المعونه .. دي الشوارع الكبيره أما الشوارع الصغيره فحدث ولا حرج … والأزقه والشوارع الفي الأحياء خليها سااااكت
- أمسك الأسواق .. دي كمان كوم براهو .. ما تقدر تمشي .. شئ كراتين وشئ بواقي أكل وشئ أكياس نايلون وشئ مش عارف شنو؟ والعجب كان جات مطره .. مطرة وااااحده .. كفيله بتنشيط التفاعلات الكيميائية بين كل المخلفات دي وتقوم تطلع ليك كميه من الغازات العجيبه .. وكميه من الحشرات الغريبه في تشكيلات مختلفه شئ طائره وشئ زاحفه وشئ ما عارف شنو؟ ده غير الحشرات معروفه الهويه ذي الضبان والباعوض والصراصير …
- أمشي أدخل أي دورة مياه في معظم المؤسسات والشركات والبنوك ح تلاقي إنو مستوى النضافه فيها تعبان .. وح تلاقي الزول القبلك ما شدا السايفون … يشدو ليه؟ ما هو إنتهي وخلاس !!
- أدخل ليك أي مطعم أو كافتيريا خاصة لو كانت في حته شعبية .. ح تلاقي الضبان حايم .. والكراسي وسخانه والطرابيز ملسلسه والعجب المطبخ جوه محل بيعملو الأكل .. تلاقي الواطه سخنه والعامل البعمل في الأكل العرق نازل منو وبينقط في الحله .. ولابس ليهو قميص أو مريله من الصعب جدا تصدق إنها كانت في يوم من الأيام لونا أبيض .. ده غير إنو بيشتغل بي أيدينو العاريات تمامن .. يحش في البصل .. يقطع في اللحم .. ويخت ليهو سفه .. ويرجع تاني يواصل .. بعد ما يقش أيدو في المريله أم من غير ملامح !!
- أمشي ليك لأي مستشفى حكومي وكمان بعض المستشفيات الخاصة .. عاين للجير بتاع الغرف أو الهولات أو السلالم .. جير شنو؟ ديل إتغطوا بطبقات تانيه ما ليها أي علاقه بالجير والبوهية .. عاين لي كيس المرتبه الراقد عليهو المريض أو كيس المخده .. ح تلاقي عليهم لوحات سرياليه فان جوخ ما يرسما .. وح تلاقي الإستاند البيعلقو فيهو الدرب من كترت هبش الأيدين وعدم النضافه الدوريه ح تلاقيهو ملسلس لسلسة السنين وهو براهو ممكن يجيب للزول مليون مرض !
- طيب نشوف حاجه تانية عجيبه جداً .. لاحظ لأي شارع أو زقاق في أي حي من أحياء العاصمة الشعبية والراقيه . لازم تلاقي ليك يا لوري تراب يا كوم أنقاض.. يا كوم أي حاجه يعني الشارع لازم تكون فيهو حاجه .. لا يخلو أي شارع أو زقاق في كل أحياء العاصمة من (كوم حاجه) .. تراب ، طوب، أنقاض، أوساخ أو أي حاجه.
ليه يا جماعة الخير نحنا على المستوي الشخصي ناس نهتم بالنظافه وعلى المستوي العام (ما كده) ولا نعطي هذه المسألة أي إهتمام .. ده يكون من شنو؟؟؟
كسرة :
بس نعرف للتسميات وإنشاء الكيانات .. قال أيه هيئة تطوير السلوك الحضري .. سلوك مين وحضارة أيه كدي أمشوا السوق المركزي !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟


تعليقات 23 | إهداء 0 | زيارات 4902

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#970941 [احمد]
0.00/5 (0 صوت)

04-12-2014 05:04 PM
العدل وتنفيذ القانون والعقوبات والمساواة .ياناس السودان دا ما بلد .شوفو الناس عايش كيف ..لازم اي زول يغلط يتحاسب .عشان البلد تمشي قدام. كفاية بوبار

[احمد]

#970480 [تينا]
0.00/5 (0 صوت)

04-12-2014 04:18 AM
الأخت (((اختك يا تينا))) لك الشكر ... لا يا حبيبة انتى فهمتينى غلط ومالك اليوم أول مرة تفهمينى غلط ... وكلامى دا ما بقولوا عشان اتفلهمت ... لا دا راى أيى سودانى طلع من السودان ورجع بشوف بلدنا وسخانة ودى حقيقة ... وعلى فكرة أنا ما نسيت انى مقيمة ولو العرب فنشونى حارجع بلدى ... لا انا عارفة الحتة دى وبعمل على حكاية انى حتما لابد يجى اليوم الحاأرجع فيهو والنقطة دى دائما محل خلاف بينى وبين صديقتى ... لأنها عايشة حياتها على أساس انها خلاص حاتعيش طول عمرها هنا وما حا ترجع وانا دائما بزكرها اننا مصيرنا راجعين بلدنا ... وبالمناسبة ما حاستنى اليوم اليفنشونى فيهو العرب لا ... مجرد ما ينصلح حال بلدنا واضمن اننا نلاقى شغل يعيشنا كويس فورا حانرجع ... وبالمناسبة انا بطبعى عوافه ومن زمان قبل الاغتراب والحكاية دى غصبا عنى واهلى عارفنى عشان كدا قالوا لى حاتتعبى لأنو البيئة تردت بصورة فظيعة ... صحيح من زمان فى وساخة وضبان ذى ما قلتى لكن ما كان بالصورة دى وكانت الناس كلها فى الصينية بتهش بايدينا ... لكن الشفتوا فى الحكيتوا دا ما فى زول بهش غيرى والناس بياكلوا عادى فى رغيف الضبان بياكل معاهم فيهو بدليل قالوا لى اتأقلمنا ... ودا دليل على انو الناس خلاص بقوا متحملين كل مصايب البلد وما هاميهم حتى لو كانت وساخة وضبان كثير بصورة مقززة ... وحبى ليبلدى دا خليهو ساكت هو الخلانى اقول كلامى عن الشيىء الحاصل داودا الحيرنى فى استكانة الناس للدرجة دى ... لك الشكر أيضا الأخ (((ود الباشا))) ... تحياتى لكما ...

[تينا]

#970181 [ود الدكيم]
5.00/5 (2 صوت)

04-11-2014 06:00 PM
"المواطن السوداني أو الفرد السوداني زول نضيف جداً"
معليش يا أستاذي الفاتح جبراتماماً
وأكان مكذبني وما مصدقني أمشى صالة المغادرة في مطار الخرطوم وشوف بعض من تجار الشنطة المغادرين لدول الخليج والأسمال(ثياب بالية وقديمة) التي يرتدونها
خليك من ده كله هل تعلم يا عزيزي أن السودان صار بؤرة لمرض التهاب الكبد الوبائي type C الذي انتقل لنا من بلاد الحضارة بشمال الوادي. هل تعلم يا صديقي أن معظم السودانيين مصابون بجرثومة المعدة وهي بكتيريا مقاومة لأحماض المعدة، ويمكن أن تحدث التهابا في جدار المعدة أو الإثني عشر، ويطلق عليها باللغة الإنجليزية Helicobacter Pylori. لمزيد من المعلومات يرجى الرجوع لطبيبك الخاص. و قد تنتقل عن طريق الطعام والشراب والأواني والأكواب الملوثة بهذه الجرثومة(أكل الطعام وشراب الشاي في قارعة الطريق ولكم أن تلاحظوا أسلوب غسل المواعبن وكبابي الشاي) وحتى من موية الماسورة وموية الزير كما قد يأتي التلوث عن طريق براز الشخص المصاب بها. معظم المصابين بهذه الجرثومة لا يشتكون من أية علامات أو أعراض، ولكن في بعض الأحيان يمكن أن يحدث مع الإصابة بالجرثومة ما يلي 1. ألم في البطن. 2. الغثيان. 3. القيء. 4. التجشؤ المتكرر. 5. انتفاخ البطن. 6. فقدان الوزن. 7. الشبع المبكر. 8. الاسترجاع المريئي. لمزيد من المعلومات يرجى الرجوع لطبيبك الخاص.
وبالمناسبة جرثومة عنيدة والشفاء منها يتطلب الصبر والمثابرة على العلاج.
وبرضو مامون حميدة ما منزعج؟؟؟؟؟؟؟؟؟؟؟؟؟؟؟؟؟؟؟؟؟؟؟
ياناس الراكوبة موضوع زي ده أرفعوهو في الرئيسية

[ود الدكيم]

ردود على ود الدكيم
United States [ود الدكيم] 04-11-2014 06:31 PM
تصويب:
معليش يا أستاذي الفاتح جبرا أنا لا أتفق معك تماماً
إضافة:
الخضروات التي تؤكل غير مطبوخة مثل الجرجير والخص والسطة تعج بهذه الجرثومة ويجب غسلها جيداً.


#970162 [كوز كنافه]
0.00/5 (0 صوت)

04-11-2014 05:07 PM
ياخ انتو ماشين بعيد ليه القصر الجمهوري لو الكميرة في الاخبار جابتو تجد التراب والسفايه مردومه في الترتوار والطرق الداخليه وعليك الله عاين لمساجدنا الغبار تجده والحمام نفس القصه عفن

[كوز كنافه]

#969782 [بت ام الحسن]
0.00/5 (0 صوت)

04-11-2014 07:25 AM
الحل يرجعو تدريس التربية الوطنية تانى فى المدارس عشان الناس تعرف انو الشارع اهم من البيت

الشارع بشوفو العالم كلو لكن بيتك مابتشوفو الا انت واهلك والناس عليها بالظاهر00000

ورجاءا الكيزان ديل يخلو قصورهم وسخانة وينضفو الشوارع دى بقروش النفايات بعداك نشوف حكاية

الوثبة 0000الناس تثب فوق الوسخ ياجبرا عليك الله ده كلام ده000 لازم ينضفو الشوارع للوثبة باللوال وللا ماكدى

مستوحاه من مسرح على الهواء

[بت ام الحسن]

#969757 [المقهورة]
0.00/5 (0 صوت)

04-11-2014 05:49 AM
لك التحية.. الأستاذ الفاتح جبرا..الشعب السوداني محتاج بشدة لتأهيل
تربيته الوطنية التي فقدها في وجود هذه الحكومة الغير وطنية..

[المقهورة]

#969717 [حافظ حمد]
0.00/5 (0 صوت)

04-11-2014 03:29 AM
استاذالفاتح لك التحية هنالك تصنيف في علم الاجتماع للمجتمعات ونحن ينطبق علينا تصنيف المجتمع المتخلف والذي يكون فيه الفرد عاطفيا غير عقلاني ويكون انانيا اي يهتم ببيئته الداخلية ولا يهتم بالبيئة من حوله . فاذا نظرنا للاحياء المدعية الرقي تجد شوارعها وسخة والانقاض في في كل ركن واذا دخلت بالداخل كانك في قصر لامير عربي ونحن كشعب لا نتصدى لاي شخص يقوم برمي مخلفاته اما استحياءا او خوف ان تسمع ما لاترضاه من شتائم ما انزل الله بها من سلطان مع وصفك بالقرضمة وادعاء الحضارة مع انك قروي ساذج تتطاول على ناس المدن وسوف احيلك على مجمع سكني يسكنه اساتذة جامعة الخرطوم الذين يفترض انهم اكثرنا علما ومعظمهم نال شهاداته من دول اوربية يعني شافوا وسمعوا والله لا تصدق ما تراه عينيك فاين للشعب المقلوب من قدوة يحتزي بها دا طبعا مرده لغياب دولة القانون والعدل والحرية

[حافظ حمد]

#969678 [telal]
4.00/5 (1 صوت)

04-11-2014 01:41 AM
اليوم ذهبت الي المحكمة لقضاء بعض الامور ' فاندهشت حين رايت الكنب في صالة الانتظار فارغ والناس متكدسون امام الابواب والحاجب يعتصر رزمة اوراق ويضمها الي صدره ينده منها احيانا واحيانا يتفرس !! ومع ذلك انا زاحمتهم ٠
سيدي نحن شعب فوضوي وربما اناني بعض الشئ لذلك لا تنفع التوعية انا اري الخطأ وانت تراه ونرتكبه الف مرة ونقول في بلاهة ان (موت الجميع عرس) لذا لابد من قوانيين لضبط المجتمع٠ وقبل القوانيين لابد من حكومة ديمقراطية

[telal]

#969600 [radona]
5.00/5 (1 صوت)

04-10-2014 11:01 PM
مع ذلك يجب ان نعترف بشئ مهم جدا هو سبب كل ماذكرت يااستاذ جبرة
رداءة وركاكة المناهج التعليمية هي السبب
انتشار الرشوة واتساخ الضمير السوداني والانانية
لذلك تجد ان النظافة شخصية او في البيت ولكن الشارع حق الحكومة
المواطن السوداني لا يحب الحكومة ايما حكومة لانها تعني التسلط والجبروت فلذلك لا تستحق ان تكون شوارعها نظيفة والحكومة نفسها لا تهتم بنظافة الشارع او صحة المواطن وحتى ولو ضبطت مخالفات فان الرشوة هل الحل المتاح
اسوا حكم محلي في الدنيا يوجد في السودان انهم يمارسون الفساد دون ان يرمش لهم جفن
يااستاذ جبرة مدحت الانسان السوداني ونظافته الشخصية ولكن نظافته لا تتعدى شخصه وكلاهما لا ينفصم مع الاخر تبقى النفوس متسخة وقذرة وفاسدة في اجساد نظيفة

[radona]

ردود على radona
European Union [ودالباشا] 04-11-2014 03:19 PM
انت جبت الديب من ديلو زى ما بقولوا اولاد بمبة


#969559 [salama]
0.00/5 (0 صوت)

04-10-2014 09:46 PM
اهلا استاذ جبرا اها فتشت في موضوع طلاب الهندسة المعمارية خريجي جامعة المستقبل والماعندهم رقم هندسي كدي خليك معانع شوية
كسرات جديدة و و و و +و

[salama]

#969544 [رأب الصدع]
5.00/5 (1 صوت)

04-10-2014 09:22 PM
تحية طيبة الأخ جبرا للأسف كلامك الأخير كله صحيح ولكن ضع خط تحت العبارة مشكلتنا الأساسية نحن معشر السودانيين في الجزء الأول من كلامك ، غير صحيح نحن الأول في مستوى النظافة الشخصية ولا يحزنون فهذه من تلك ، وإذا الشخص لم يعرف العلة بالتحديد فلن يحل أي مشكلة فالمشكلة يا استاذ هي في
نحن الأفضل في كذا وكذا وكذا والحقيقة المرة هي انت الأفضل بس من آخر القائمة الله يهدينا نحن معشر السودانيين ( صدقوني مشكلتنا في طريقة تفكيرنا )

[رأب الصدع]

#969516 [أرسطو]
5.00/5 (1 صوت)

04-10-2014 08:19 PM
هناك تصرفات غريبة تشاهدها فى بعض الاحياء بالعاصمة - مثلا عندنا فى الحلة الجديدة والقوز - هناك شارع عرضه تفريبا 6 أمتار - أحد الساكنين قام عمل جنينة(Terrace) أمام منزله تقريبا بعرض 3 أمتار للقيلولة و قعدة العصر - والزول الساكن مقابل ليهو قال لنفسه (مافى زول أحسن من زول ) وقام عمل ليهو برضو جنينة سياحية أما منزله - وكده بقى الشارع بعرض متر أو أكثر بشوية - يعنى لايمكن الاتوس تمر عبره و الركشة يا دوبك تتحكحك حتى تمر - اها زى ده تقول عليهو شنو - مع تحياتى

[أرسطو]

ردود على أرسطو
[ودالباشا] 04-11-2014 03:34 PM
غياب الذوق العام وعدم احترام القانون


وين ناس البلدية.. لو اصلا فى حاجة اسمها بلدية انا غايتو بسمع بشارع البلدية
وين ناس المحلية..طبعا مافاضين من جبايات النفايات وستات الشاى والدرداقات


يا ارسطو الحمدالله ماكانت مزراع مختلطة


#969470 [الحاج]
5.00/5 (2 صوت)

04-10-2014 07:06 PM
في صالة المغادرة وفي مكان جانبي يوجد جردل ماء ( وكوز ) مربووط للشرب
مرة ونحن منتظرين لطائرة الخليج الزمن داك جاءت طائر سودانية قادمة من احدي الدول الافريقية وبعد ان توقفت ذهب نحوها رجل يحمل سلم كسلم نقاشين الجير وتكل السلم علي الجناح وبدأ يعمل في شئء
وعندما سألنا...قالوا
بقيس في درجة حرارة المكنة!!!

[الحاج]

#969459 [habbani]
5.00/5 (1 صوت)

04-10-2014 06:55 PM
والله كلام فى المليان ودا صاح والواحد بكون مستاء من عدم النظافة العامة دى ... بعدين الجماعة فاتت عليهم رسوم رمى الأوراق والقوارير فى الشارع العام دى .. الرسوم الوحيدة الكنت حأوافق عليها

[habbani]

#969444 [komi kokolo]
5.00/5 (1 صوت)

04-10-2014 06:33 PM
صدق يا عم جبرة انا البعجبني فيك انك بتكتب حقائق موضوعية لكن كيف بتقبلها شعبنا التعبان هذا على العموم هناك مثل صيني بيقول: "لو نظف كل واحد امام منزله اصبح الشارع نظيفا" طبعا الواحد بيغير على بلده من كل النواحي مثلا يكون السودان نظيف هذا شيء صحي طبعا .... الخ

[komi kokolo]

#969435 [كاسترو عـبدالحـميد]
3.00/5 (1 صوت)

04-10-2014 06:22 PM
كعادتك دائما يااستاذ توفق فى كتابة موضوع يهم الشعب السودانى بدرجة خطيرة . واعـتقـد بأن أولية الشعب السودانى ليست تغيير نظام الأنقاذ بل يوجـد ما هـو اخطر منه الا وهـو تغـيير سـلوكنا وان نقضى عـلى هـذه السلوكيات المذكورة فى المقال . والله ما فعلته الأنقاذ فى الشعب السودانى يهـون اذا ما قارناه بما نفعله فى انفسنا بالسلوكيات التى نمارسها فى حياتنا اليومية. يجـب البدء فى تغـيير سلوكنا من المدارس . يجـب تعليم اطفالنا من مرحلة الدراسة كيف يكون سلوكهم فى المجتمع وكيف يتعاملون . ثم ايضا يجب ان يشترك الفنانون بالمسرحيات التى تحث المواطنون عـلى السلوك القويم فى الشارع وفى البصات وفى كل مناحى الحياة . شاهـدت فى مترو باريس صـور تحكى السلوك الغير مهذب من الركاب فى داخل القطارات .

[كاسترو عـبدالحـميد]

ردود على كاسترو عـبدالحـميد
[Loae] 04-11-2014 03:27 PM
نعم الرأي


#969433 [لتسألن]
4.00/5 (1 صوت)

04-10-2014 06:22 PM
ما قلت إلا الحق، يا رايع، و الحق ضايع.

[لتسألن]

#969424 [تينا]
5.00/5 (2 صوت)

04-10-2014 06:13 PM
والله صدقت فى كل القلتو ... حكاية نظافة السودانيين الشخصية وعدم نظافتهم العامة دى محيرانى شديييييد والغريبة فى السودان لما تعلق على الحكاية دى بفتكروك مفلهم وكده! لكن بصراحة البعيش بره السودان ويرجع اجازة ويشوف حكاية الأوساخ العامة دى ما بقدر يطيقا لأنو خلاص بكون اتعود على كل شيىء المفروض يكون نظيف وكل قمامة حتى لو قارورة فاضية أو ورقة حلاوة لازم تترمى فى سلة القمامة مش فى الشارع ... أظرف شيىء فى اجازتى الفاتت كان فى عزاء ... فى مواعيد الوجبات الناس كلها بتاكل عادى وانا الوحيدة ما باكل و بقوم جعانة من الصينية ليييييه ؟؟؟ لأنى فى فترة قعادى فيها بعديها كلها (((اهش))) فى الذباب من الرغيف والغريبة كان الذباب كتير بصورة غريبة ... والكان بحيرنى الناس متعاملة معاه عادى وياكلوا وانا غلبنى الأكل كلو كلو وكانوا بضحكوا فينى كلهم وبقولوا لى انتى كدا حاتتعبى ساكت نحن اتأقلمنا على الحكاية دى هههههههههه ... أما حكاية الصعوط دا كوم ثانى قلت ليهم بقيت ماشه فى الشارع وانا مشلقه لأنى ما بقدر اعاين للأرض لأنها كلها بصاق صعوط وبتقرفنى وذى ما قال أستاذ عووضة تكون ماشى جنب الحافلة تجيك بزغة صعوط طايره ههههههههه صراحة شعبنا عاوز حملات مكثفة تنور الناس عن الاهتمام بالنظافة العامة ...

[تينا]

ردود على تينا
European Union [اختك ياتينا] 04-11-2014 05:28 PM
تينا بجى اليوم الفيهو العرب ديل بفنشو ليك انت نسيتى انك مقيمة ومصيرك ترجى للوسخ والضبان وتاخدى مناعة

حبيتو مهما كان لوراكى فيو الضبان ---ده شنو ده السودان

European Union [ودالباشا] 04-11-2014 04:10 PM
انت يا تينا ممكن تتحملى وتقطعيها فى جلدك المشكلة العيال الصقار
عارفه مرة حبوبة العيال جاتم زيارة شهرين وفجأة العيال حصل هرج ومرج من العيال وكل واحد شايل حاجة فى يدو جادين كانهم حيقبضوا حرامى ذاكين زبابة اقتحمت البيت
حبوتهم قالت ليهم يا كلاب تعالوا هناك يشاركم الاكل واللعب


#969420 [بت البلد]
5.00/5 (2 صوت)

04-10-2014 06:08 PM
والله انت يا جبرا ههه اياك أعني واسمعي يا جاره ... ظرييييييييييييييييييف وبتستحم بالليف وكمان جعاااان وما لاقي رغيف وبالسفه بتم الكيف وفوق راسك سيف ...

[بت البلد]

#969405 [المشتهي المـــوليتا]
4.25/5 (3 صوت)

04-10-2014 05:59 PM
والله يا استاذ جبرا للاسف الشديد كل الكلام القلتو دا حقيقة وحقيقة مرة كمان ... واذيدك من الشعر بيت يا استاذ مطار الخرطوم الدولي كدي مر علي (الحمامات) اذا انت كانت حمامات صالة المغادرة او حمامات صالة الوصول اتحداااااااااااااااااك دا انت ح تشووووف وسخ وعفن ماشفتو قبل كده وزي مابقولو الجواب باين من عنوانو ..

وبعد دا يا استاذ جبرة عليك الله يكوون من شنووووووووو !!!!!!!

[المشتهي المـــوليتا]

#969400 [جاكوما]
5.00/5 (1 صوت)

04-10-2014 05:51 PM
صدقت والله

[جاكوما]

#969386 [ابو الشيخ]
0.00/5 (0 صوت)

04-10-2014 05:37 PM
حتى فى أهازيجنا يا جبره

على المستوى الشخصى ( زولاً سنونو برووق فى محكمة زرووق )

على المستوى العام ( حبيبتى كش كشحت الوسخ )

[ابو الشيخ]

#969380 [atif]
5.00/5 (1 صوت)

04-10-2014 05:31 PM
لغاية ان السفير الياباني خجل لينا و لن ينج!.اعوز بالله يا شبونة .تحياتي

[atif]

الفاتح جبرا
  الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة