المقالات
السياسة
حسين : الأكثرية من الوطنى مقتنعة بالحوار لكن فى ناس متنفذين
حسين : الأكثرية من الوطنى مقتنعة بالحوار لكن فى ناس متنفذين
04-13-2014 09:09 PM

حسين خوجلى يقدم أكبر هداياه لشعب السودان والمعارضة ويكشف عن كتيبة متنفذة متمكنة فى المؤتمر الوطنى لن ولم تنصاع لنداء البشير وهى التى تصادر الصحف دون علم جهاز الأمن لأنها تملك نفس آليات وبطاقات الجهاز وتحت يدها السلاح من دبابات وطائرات ومدفعية وهى التى ترسل أتباعها لفض أى ندوات وحسين خوجلى يقول ماتخشو ما تقيموا ندواتكم والمتنفذين يشكلون خطرا على الدولة وعلى شعبها
حسين خوجلى فى حديث البارحة السبت 12 أبريل يسرج الحصان ويزود أهل السودان بمعلومات خطيرة عن جناح خفى يقود الإنقاذ على هواه وليس حسب ماتقتضيه ظروف الإنتخابات القادمة
هل البشير على علم بهذه المجموعة الخفية التى تفض الإجتماع وتصادر الصحف اليومية دون علم جهاز أمن البشير ؟ من هى هذه المجموعة ؟ لو كان البشير على علم بها وقادر على تفكيكها ومحاسبتها ولكنه يريدها أن تنجز له مهمة إنتخابات مزورة قادمة كما زورت إنتخابات اللجنة الشعبية سورى من قرى القولد ثمانين فارس غلبوا ستمائة ، فإن البشير يقود بلاده لحماقات ستسيل لها دماء غزيزة تضاف لدماء حرب دارفور ويكون البشير لا يستحق أن يكون رئيسا للجمهورية ، ولو كان البشير لا علم له بهذه المجموعات الخفية كعدم علمه بجامعات النيغرز تكون المصيبة أفدح ، فكيف تكون رئيس جمهورية ولك أكثر من 7 مؤسسات أمنية والبلد تدار فى الخفاء بواسطة جماعات متطرفة ستدخلنا فيما دخلت فيه ليبيا عما قريب ولا نستبعد أن يكون من بين الجماعة المصرى والليبى والخليجى – فالى أين يتجه بنا قطار البشير ؟ اللهم لا نسألك رد القضاء ولكن نسألك اللطف فيه
المعارضة حين تطالب بإلغاء القوانين المقيدة للحريات هى تتحدث عن ضرورة جيش وطنى ، شرطة وطنية وجهاز أمن وطنى
ما يخيفنا ليس هو جيش البشير وشرطة البشير وجهاز أمن البشير ولكن من هم خارج بيت طاعة البشير – الأمن المتفلت – لاكبير له لاقائد له والأنباء التى ترد أدناه تؤكد كل ذلك
حسين خوجلى فى حديث الخميس 10 أبريل إستهجن وتهكم على طلب المعارضة بإلغاء القوانين المقيدة للحريات وقال : الأيام الفاتت دى الرئيس جاء قدام عشرات الملايين من السودانين وقال عندنا مائدة مستديرة – نعمل دستور جديد – نتفق على واقع سياسى جديد – إعلام جديد – إنتخابات جديدة بالتراضى ترصد من الأمم المتحدة ومن الدول الأفريقية – الإعلام فكيناهو – حاملين السلاح أديناهم الأمان – أى زول من أقصى اليمين الى أقصى اليسار المؤمن الكافر المشكك كلهم يجو – كلام شهد عليه العالم - طيب ياجماعة انا بفتكر نحن ما عاوزين غير كده – كونه نكون وصلنا الحكومة الدرجة دى بلسان الرئيس قدام العالم وتبدأ خطوات عملية – يادور الأحزاب إشتغلوا بندواتكم فى الداخل والخارج – جرايدكم – أى حاجة إتقالت – خلاص ورونا جهدكم – النقابات – الإتحادات دوائركم
حسين بيفتكر أن الرئيس كلمته ماشه فى البلد والمعارضة تفهم حقيقة الوضع والوضع خطير جدا ، لمان نقول تعهد شفهى من الرئيس لايكفى لأنه لايتبع بالعمل والقول مش كفاية – تقول كده يقولوا عليك أنت كافر
حسين خوجلى فى حديثه مع نفسه وعلى قناته لليلة أمس السبت 12 أبريل أسرج الحصان وزود المعارضة بحسام سيل من المعلومات التى تؤكد أننا نواجه عدو خفى قادر على تزييف الإنتخابات كيف لا وهو قد زيفها الذى تقارع به النظام الحجة بالحجة مؤكدة ضرورة وجود ضمانات حقيقية وفعلية على الأرض لإلغاء القوانين المقيدة للحريات ، فكلام البشير فى قاعة الصداقة يروح مع نسمات النيل الأزرق العليل ، فلا أحد ينصاع لها فالبلد تحكمها مراكز قوى ( خفية ) وخفية دى حطوا تحتها مائة سطر ..
المعارضة تقول ، قبل أن ندخل للحوار لازم نجرى زراعة لإستئصال أعضاء مريضة بنظام الإنقاذ ، أعضاء مازالت تظن أنها تملك القوة ويمكن أن تواصل الحكم منفردة ومن اراد مشاركتها يدخل كما دخل الدقير ومسار وجماعة الميرغنى تتمت عدد وتوسيع لحكومة القاعدة العريضة كما يدعون وبس ، أما مشاركة ند لند وكتف لكتف وحساب ومحاسبة وحقوق وواجبات فلا ... الجيش جيش الأخوان – الشرطة شرطة الأخوان – الأمن أمن الأخوان – الدفاع الشعبى حق الأخوان – الجنجويد جنجويد أخوان – وقوات التدخل السريع حقت الأخوان ومليار تميم حق الأخوان والمليار دا ليهو تمن – الأخوان مش أخوان السودان وبس – يا البشير أمسكوا عليكم أخوان مصر وأخوان سوريا وأخوان ليبيا وأخوان مالى وأخوان أفريقيا الوسطى وأخوان دول الخليج- هذه الحشود الأخوانية غالبيتها فقيرة ومعدمة ولكنها تقوى على القتال أينما وجهت وقلة منها ثرية ويمكن أن تدعم بمالها النظام -
فما الجديد الذى أتى به حسين خوجلى وأتت به الأخبار ، دعونا نتابع :
الأخبار ( الراكوبة ) شهدت جامعة النيلين أمس أحداث عنف عقب اقتحام مجموعة مجهولة الهوية لمنبر نقاش نظمته رابطة الطلاب الاتحاديين الديمقراطين ـ الفصيل الطلابي للحزب الاتحادي الديمقراطي الأصل ـ أصيب بموجبها الطالب صديق المرسي والطالبة تسابيح البشير في وقت اتهم فيه طلاب الاتحادي طلاب الوطني بالاعتداء على كوادرهم بالضرب واقتحام منبرهم وقال كادر الاتحاديين صالح حسن إدريس إن مجموعة ملثمة تحمل السيخ والعصا قامت بطرد الطلاب من مباني الكلية واعتدت على منبر الاتحاديين إلى ذلك نفت حركة الطلاب الإسلاميين الوطنيين بجامعة النيلين ضلوعها في الأحداث وتبرأت من المجموعة التي اعتدت على منبر الاتحاديين وأدان طلاب الوطني مسلك المجموعة واتهم الطالب مصطفى سعيد المحسوب على المؤتمر الوطني بالجامعة جهات لم يسمها ( طيب ماتسميها عشان نعرف )
الأخبار ( الراكوبة ) افادت مصادر من منطقة سوري ـ محلية القولد التي شهدت اشتباكات بالاسلحة النارية بين مجموعتين في المؤتمر الوطني بالولاية الشمالية ادت لمقتل شخص واصابة عشرات آخرين بجراح ان عضو المؤتمر الوطني ، عبيد ادريس علي ، لقي مصرعه واصيب عدد آخر بجروح عندما قامت مجموعة تتبع لاحد اجنحة المؤتمر الوطني بمهاجمة مجموعة اخري كانت تعقد مؤتمرا رسميا للحزب بالاسلحة النارية والبيضاء.
واشارت المصادر الي ان اعدادا كبيرة من قيادات وعضوية الحزب تم منعهم من حضور الاجتماعات بدعوي انتمائهم لتيار الاصلاح الذي يقوده غازي صلاح الدين وهو مادفعهم لاقتحام المؤتمر بالقوة
الأخبار ( حسين خوجلى ) الصيحة : مصرع مواطن فى إشتباكات بين منسوبي المؤتمر الوطني فى الشمالية
الأخبار ( حسين خوجلى ) وثائق تكشف ضلوع معتمد ابو حمد فى فساد مالى وإدارى
حسين خوجلى : أنا حقيقة إستمعت لشهادة مجموعة من الإخوة ضربوا لى من قرية سوري بالقرب من القولد فى متأخر من ليلة أمس الجمعة وحدثونى عن الإشتباكات بين منسوبي المؤتمر الوطنى – قالوا لى دا مو صراع بين أحزاب لكنه صراع بين فئتين من المؤتمر الوطنى – فئة متمكنة وفئة مغلوب على أمرها – فى مواطن قتل وفى جرحى حالتهم خطيرة – شنو يا جماعة الحاصل ؟ قالوا لى ياخى الإنتخابات دى لأختيار اللجنة الشعبية بقرية سورى وفى وجوه أغلب القرية دى ضدها لكن القيادات الفوقية مصره تجيبهم – فقمت قلت ليهو طيب ماتسقطوهم فى الإنتخابات – قال لى الجماعة ديل جو - دخلوا تمانين فى المدرسة وقفلوا أبوابها – وحرسوها بالشرطة ( شرطة النظام الخايفين نحن منها ) والأكثرية خارج سور المدرسة - وخراج لعبة الممارسة الديمقراطية ذاتها - وكلهم شايلين بطاقات المؤتمر الوطنى – فقال لى التمانين ديل طبخوا النتيجة ودى المجموعة العايزنها الناس أهل المصالح وأغلبية أهل القرية بره المدرسة وبره اللعبة الديمقراطية والهتافات – قلت ليهو هسع اللعبة دى لا فيها شيوعى لا أمة لا إتحادى ديمقراطى – قال لى لا – زيتنا فى بيتنا – وصلت القصة لدرجة أنه تطلق الغازات المسيلة للدموع والأعيرة النارية ومات مواطن وجرح إثنين –
تعالوا نتابع تعليق حسين خوجلى على مطالب المعراضة بإلغاء القوانين المقيدة للحريات
حسين : الأن الحكومة قالت كل دا مفتوح – إستغرب وأنا بقرأ من يوم اللقاء الكبير فى يوم الحد 6 أبريل والقرارات التى تتالت يقرأ منها لمجموعة القادة السياسيين على طريقة الكسل حتى فى النضال – البيقول ألغوا لينا القوانين المقيدة للحريات – اليرفعوا لينا شنو كدى – ياخى أنت عريس رافع يديك عشان يحننوك
طيب يا حسين رايك شنو فى الحصل فى سورى بالقولد لى ناس تحمل بطاقات المؤتمر الوطنى ، أنت باقى ليك الجهاز الخفى الذى يدير أمر البلاد بيسمح لى واحد شايل بطاقة حزب شيوعى أو أمة أو إتحادى أو بعثى أو ناصرى أن يصل لصندوق الإنتخابات ولو وصل هل لا تستطيع هذه الجماعة من تزوير إرادته – هم بيفتكروا العمل دا خدمة للإسلام ومش حرام وأنت شاهد على خدمتهم للإسلام وفشل مشروعهم الحضارى
حسين خوجلى منذ يومين قال : يادور الأحزاب إشتغلوا بندواتكم فى الداخل والخارج – جرايدكم – أى حاجة إتقالت – خلاص ورونا جهدكم – النقابات – الإتحادات دوائركم - الرئيس قال كلامه والعالم كله سمعه
حسين خوجلى أمس قال : ياجماعة من الأشياء المهمة الداير اقولها لو قريتوا جرايد الليلة دى أو أمبارح فى إعتداء على ندوة فى الأهلية – يا حسين ندوة أم مظاهرة بدون تصديق – طيب وين كلامك يلا دوروا ندواتكم – أها دورناها النتيجة شنو – خلونا نتابع عمكم العلامة حسين خوجلى : فى إعتداء على ندوة فى الأهلية – اللى هو الجامعة الأهلية ما خلوا الإصلاح الأن يقيم ندوة - وفى إعتداء على ركن نقاش فى جامعة القرأن الكريم ضرب وكسير ما معروف ليهو معنى – هنالك مصادرة لصحيفة الميدان جهاز الأمن أصدر بيان قال نحن ما صادرناها – ولكن بقى السؤال الأكبر من البيان : من الذى قام بصادرة صحيفة الميدان ؟ يا حسين الإجابة عندى (جهاز الأمن ألف بتاع البشير مابقى باء) هنالك منع واضح جدا وصريج جدا لندوة بالبحر الأحمر لأحد الأحزاب – هنالك حجب ومنع لخمسمائة مواطن بقرية سورى بمركز القولد من أنهم يؤدوا سوطهم لصالح 80 صفوى ومقتل محتج وجرح آخرين – فى كادقلى تم إعتقال أمين الحريات بإتحاد الصحفين – ياجماعة دايرين نقول بمنتهى الصراحة اصله الباب اللى إتفتح دا – يقصد باب الحوار – البيجيب رياح الحرية ما بيتقفل تانى – وصحيح القصة حارة جدا لحزب حاكم 25 سنة حارة جدا – صحيح حصلت تجاوزات حتى من أجهزة أمن الإنقاذ مع المعارضين – تاريخ الإنقاذ دا فيهو كتير من التجاوزات المبررة وغير المبررة – لكن دا كله مابيدى فرصة يسدل عليها الستار – الديمقراطية تانى مابتقيف - وأنا بفتكر الكلام القالوا الرئيس دا هو مقتنع بيهو وحزبه مقتنع بيهو وكوادره الحقيقية ؟؟ مقتنعه بيهو – والأكثرية من الحزب مقتنعة بيهو – لكن فى ناس متنفذين (؟؟؟؟ كلام خطير إنتبهوا له فى ناس متنفذين ؟؟ من هم ؟ ) وأقلية قد تكون عندها غرض قد يكون موضوعي أو غير موضوعي بتقاوم – نحن نحتكم للشعب والذى يريده الشعب هو من يحكم ( وين الكلام دا هنا فى سودان الإنقاذ أم فى سويسرا )
يا حسين فى ظل جيش أخوان مسلمين متطرفين متمكنين منتفعين وشرطة أخوان مسلمين متطرفين ومتكنين منتفعين وجهاز أمن أخوان مسلمين متطرفين متمكنين منتفعين 80 فارس فى سورى غلبوا 500 ، فهل ياترى من يريده الشعب سيحكم ؟ أشك فى ذلك
حسين يواصل حقاراته التى بدأها بحلقة الخميس الماضى : ولذلك يا جماعة الناس مايفتكروا - وانا قلت الكلام دا فى حلقة الخميس - المعارضة دى تبقى عريس كدى محنن ومجرتق ويبخ اللبن على وش الناس – لازم المعارضة تخش معركتها ويوسع الحريات
ويا حسين لو شرطة النظام قفلت باب المدرسة تانى ورينا نسوى شنو



المهندس سلمان إسماعيل بخيت على
[email protected]


تعليقات 5 | إهداء 0 | زيارات 979

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#973703 [فرح الأمين بخيت]
0.00/5 (0 صوت)

04-15-2014 10:57 AM
تسلم يمينك يا باشمهندس وما عليك من الرمم زي ناس مجدى ومن لف حولهم ومعهم فهم سبب المصائب كلها يتركوا الموضوع ويمسكوا في القشرة وبقصد مفضوح عشان يطلعوا الناس من لب الموضوع إلى القشرة فما عليك منهم فهم عاجز الطير كما يقولون لك التحية

[فرح الأمين بخيت]

#973679 [ود الحاجة]
0.00/5 (0 صوت)

04-15-2014 10:38 AM
....... هذا الموضوع يعتبر .... حسين خوجلى قال ( وأنا بفتكر الكلام القالوا الرئيس دا هو مقتنع بيهو وحزبه مقتنع بيهو وكوادره الحقيقية مقتنعه بيهو – والأكثرية من الحزب مقتنعة بيهو – لكن فى ناس متنفذين ) حسين لم يوضح من هى هذه الجماعة المتنفذة التى تصدر جرايد وتفض إجتماعات وتقتل ناس ؟ البشير بيعرفهم وساكت تبقى مصيبة ولو البشير مابيعرفهم المصيبة أكبر ......

تعليق :

هل يعقل أن يكون الرئيس مقتنعا و اغلبية الحزب مقتنعة و الكوادر الحقيقية مقتنعة و في جماعة متنفذة و تعرقل جهود هؤلاء؟!!!!!!!!!!! هل هذه الجماعة المتنفذة هي الدول الكبرى أم بنك النقد الدولي أم- لمن يعتقدون في الجن - هي الجن الازرق؟

هذا الكلام دجل و و استخفاف بالعقول !و من يصدقه ساذج و مغفل !

[ود الحاجة]

ردود على ود الحاجة
United States [المهندس سلمان إسماعيل بخيت على] 04-15-2014 09:02 PM
هي الدول الكبرى أم بنك النقد الدولي أم- لمن يعتقدون في الجن - هي الجن الازرق؟
والله يا ود الحاجة حيرتنا بنك دولى بتاع شنو ؟ أنت رجل أكيد تعانى من لوثة فى عقلك الجماعة المتنفذة دى ماقلتها أنا أنت بتفتكر أن سلمان قال ذلك لا ياشاطر دى عمك حسين خوجلى قال فى أقلية متنفذة ولمان يقال لك أقلية متنفذة دى معناه من نفس جماعة الحركة الإسلامية فى جماعة فى عددها هى الأقل لكنها تحتل مراكز أمنية خطيرة وموقعها مؤثر هذا الجماعة لا ترغب فى الحوار وعاوزه الإنقاذ تسير فى خطها المتشدد فى الحرب والحوار مرفوض
هذا الكلام دجل و و استخفاف بالعقول !و من يصدقه ساذج و مغفل !
دجل شنو يا ود الحاجة الموضوع وصل حد أن هذه الجماعة هى التى فى يدها السلاح من دبابات وطائرات ومدفعية وهذه الجماعة هى التى فضت ندوة فى مدينة بورتسودان وندوة فى جامعة النيلين وندوة فى الجامعة الأهلية وركن نقاش فى جامعة القرأن وتقول إستخفاف بالعقول هو أنت عندك عقل من أصله عشان نستخف به
أنت هجومك دا كله مفتكر أن هذا الكلام مصدره سلمان عدوك اللدود لا ياشاطر دا كلام حبيبك حسين خوجلى أرجع لحديث مع حسين خوجلى ليوم السبت 12 أبريل الجارى وستجد حسين يقول ( لكن فى ناس متنفذين ) نحن فقط نقلنا الخبر وبنسأل هل البشير يعرفهم ؟ تكون مشكلة لو بيعرفهم وساكت عليهم ، لو مابيعفرهم تبقى المشكلة مشكلتين والموضوع سيتحول للغم سينفجر
ركز يا ود الحاجة كل مرة تأخد ليك نومه اسبوعين تلاته وقبل ماتفهم الموضوع تتلب فى نصه بدون وعى


#972908 [ودالدكيم]
0.00/5 (0 صوت)

04-14-2014 04:18 PM
ياسعادة الباشمهندس سلمان لك التحية.قبيلة الأطباء تقول أحياناً يصبح التدخل(الجراحي) ضرورة.هذا النظام لاأمن ولاأمان هذا مرضي خطير لابد من اجتثاث هذا النظام من جذزوره.حتي لا نبك علي وطن عظيم حبيب اسمه السودان.قرارات (بشبش)الأخيرة لكسب الوقت.لحظة التطبيق العملي يكفي النمازج التي استشهدت بها في مقالك.حسين خوجلي من أبواق وحارقي البخور لهذا النظام هو فتي هذا النظام المدلل.سقوط هذا النظام الجائر الظالم الامبراطوية الاعلامية التي يمتلكها هذا (المعتوه)لحظة سماعنا للراحل المقيم الأستاذ وردي(بلاء وانجلي)بمشيئة الله سوف تصبح مايمتلكه ودخوجلي للشعب السوداني

[ودالدكيم]

#972801 [سوداني حر]
0.00/5 (0 صوت)

04-14-2014 02:20 PM
الشعب يريد اسقاط النظام الشعب يريد تطهير الاعلام من امثال هذا الخوجلي والرويبضه الهندي عزالدين ولك كل الاحترام ياباش مهندس سلمان

[سوداني حر]

#972559 [الصليحابي]
0.00/5 (0 صوت)

04-14-2014 11:10 AM
شكرا لك باشمهندس ، كفيت ووفيت ، وإن شاء الله نهيتهم قربت ، وآمل من حسين خوجلي وبقية الشرزمة المنافقة قد اطلعوا على الصور المرفقة في الخبر الرئيسي

[الصليحابي]

ردود على الصليحابي
United States [المهندس سلمان إسماعيل بخيت على] 04-14-2014 07:59 PM
يا من تدعى بمجدى نحن لا نعرف كتابة اللغة العربية لأننا عجم ( سودانيون ) ولكن نعرف شىء فى نظرنا أهم من معرفة اللغة وهى أن تعرف الله تعرف الصدق ولو كتبت الصدق بالسدق المهم تكتب فى الصدور بصدق نحن نحب السودان وأنتم يا أيها الكيزان تحبون أنفسكم أنظروا ماذا فعلتم بوطن كان إسمه السودان وأصبح اليوم إسمه الثودان بالثاء - يا مجدى لو كنت تكتب الذا زا قد تتعلم ولكن أن تسرق المال العالم وتكون منحرف أخلاقيا فلا أمل فى شفائك - أترك قطار اللغة وأركب قطار وطنك السودان حتى لا يتجاوزك الزمن - نحن على الراكوبة نعبر فى بعض الأحيان بعربى جوبا وفى بعض الأحيان بالعامية البسيطة كأن تقول قلت ليهو والصحيح قلت له - نحن لسنا فى حصة عربى - نحن فى حصة أخلاق وسلوك وبما أنك لا تملك الأخلاق السودانية السمحة ولا يهمك مستقبل السودان والسودانين ويهمك مستقبل الكيزان والمتمكنين لآنك تجد وظيفة عند أحد سادتك فليحرق السودان - نحن سنتصدى لكم كلكم حتى لايحرق ويضيع السودان

هذا الموضوع يعتبر من أخطر المواضيع التى طرقت على الراكوبة وأن يصرح شخص قريب من صانع القرار إسمه حسين خوجلى قال ( وأنا بفتكر الكلام القالوا الرئيس دا هو مقتنع بيهو وحزبه مقتنع بيهو وكوادره الحقيقية مقتنعه بيهو – والأكثرية من الحزب مقتنعة بيهو – لكن فى ناس متنفذين ) حسين لم يوضح من هى هذه الجماعة المتنفذة التى تصدر جرايد وتفض إجتماعات وتقتل ناس ؟ البشير بيعرفهم وساكت تبقى مصيبة ولو البشير مابيعرفهم المصيبة أكبر
أنت يا من يدعى بمجدى وبينك وبين المجدى محيطات هل حين تقرأ خبر بهذه الخطورة تستطيع أن تدرك معناه أم أنك كلب مأجور من ضمن الجماعة المتنفذة التى قد تدخل السودان فيما دخلت فيه ليبيا والله العظيم والله العظيم لو لم يرحمنا الله بهذه الحركات المسلحة ( الجبهة الثورية وغيرها ) وكان كل أهل السودان فى سلوك المهدى والميرغنى لفعل فينا الكيزان مالم تفعله النازية فى اليهود - فى ناس فى هذه الجماعة الإسلامية بيفتكروا نحن كفار وقتلنا جائز - لكن أن الله ينظر إليهم من فوق سبع سموات وهو اللطيف الخبير
تب لربك يامجدى وأنحاز لجانب الغالبية من أهل السودان الطيبون

[مجدي] 04-14-2014 03:38 PM
الصليحابي معذور كل العذر لجهله قواعد الكتابة لأن أستاذه او باشمهندسه نفسه يجهـل هذه القواعد خصوصا كتابة حرفي الذال والزاي فيجعل الذال زاي والعكس لذا فاللغة العربية بالنسبة لهما هي لغة (الذال) وليست لغة (الضـاد).. سـميت لغة الضاد نظرا لصعوبة نطق حرف الضاد بالنسبة للأعاجم وصـدق المثل القائل (الطيور على أشـكالها تقع) (صليحابي وبخيت)..
المهم كلمة (شرذمة) تكتب هكذا وبخيت يكتبها مثل تلميذه صليحابي وهذا هو سـر الإعجاب والمودة بينهما!!!!


م. سلمان إسماعيل بخيت على
م. سلمان إسماعيل بخيت على

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة