المقالات
السياسة
سفسفه في مكتب الوالي
سفسفه في مكتب الوالي
04-14-2014 07:24 PM

ااي سفسفه عديل كده في اي اعتراض؟ وفي مكتب الوالي كمان فيها حاجه دي؟ لكن والله ياجماعه لمن الواحد فينا يشوف والينا دا ماسك المكرفونات, ورافع صدرو, ونضاراتو ماليه وشو, وفي اثناء الكلام يتلفت يمين وشمال بي ثقه شديده, يقول دا بس مافي غيرو. خصوصا لمن الكلام يكون كبار كبار ومطعم بي بهارات جهاديه كده. تطلع ياخ السفسفه في مكتبك؟ قول في المكتب الجنبك, في الدور التحتك او الفوق ليك. قول في البنايه التانيه ولا المدينه النائيه. تطلع في مكتبك عديل كده؟ دي بالغت فيها يامير المؤمنين.
انا شخصيا ماقدرته استوعب الخبر (اتلاقا). انتو ياشباب ناس مكتب الوالي ديل مش بعينهم الوالي ولا بعينوهم ليو؟ بعدين الموظف الكبير الهندس السفسفه دي مش بكون صاحبو ولا من معارفو, لانو اكيد لو ماكان كده ماكان عينو (مش؟). يعني ممكن نقول انو سيادتو كان عارف او حتي حاسي بالموضوع لانو السفسفه بي طبعها بتظهر طوالي في المعارف والاصحاب. عربيه جديده, عماره تانيه, اولاد سافرو يقرو بره او مره بقت بوباره. دا كلو الوالي ماشافو ولا سال منو؟ ولا بس علينا نحنا المساكين ديل.
العجب العجاب انو تعليقو علي الموضوع طلع (عينه). تصفيق حاد للتعليق بلاي. قال شنو؟ قال هو ذاتو مكتب الوالي مافيو مليارات عشان الناس ديل يسفسفوها. بلاااي؟ (واحد قال لي مسطول بلاي, المسطول قال ليو شاي بي لبن). يعني بصفتك ياحارسنا وفارسنا, رايك في القضيه انو مافي سفسفه ولا يحزنون لانو اصلا مكتبك مافيو كاش؟ ياخ والله انته لذيذ. لانو لو بتفتكر انو السفسفه داخل مكتبك بس من القروش الفي الخزنه, يكون الرماد كال حماد بتاع الخرطوم. وكمان بكون كال حماد بتاع القضارف زماااان لمن كنته هناك.
قبل كده الوالي دا ذات نفسو حلف لو طلع كم الف في مظاهره بعتزل العمل العام. وولايه الخرطوم بقت كلما تتطلع مظاهره قالو الناس بقت تعد المتظاهرين. بس سيادتو لمن قال الكلام دا ونزل من المسرح ادي اوامر لي ناسو بي تفريق اي مظاهره يصل عددا عشرات سيبك من الاف. مش الراجل حلف؟ هسع طلع سيادتو بفتكر السفسفه بس في القروش الفي الخزنه. انا والله مستغرب الناس دي بجيبوها لينا من وين. لانو اذا كان السفسفه في مكتب الوالي وهوماعارف طريقتها كيف وولايتنا ماشاء الله ممتده الاطراف, يكون (البلع) ركب (بضم الراء) في الولايه من سبيبة راسا لي اخمص رجلينا. والرجل طلع ماعارف حاجه ياحسره.
ملايين السودانيين العايشين داخل وخارج السودان (بما فيهم انا) بنتمني نشتغل في مكتب الوالي. مش انته عزيزي القارئ بتتمني برضو؟ تعرفو مرات لمن اشوف شخصيات كده يجيبوها في التلفزيون ويقولو ليك دا ماعارف معتمد شنو, ودا مدير مؤسسه وين, وسيادتو رئيس مجلس ادارة الحته ديك, واتامل ليك في مشيتهم وطريقة كلامهم, بسال نفسي, الكيزان بجيبو الناس العينه دي من وين, وبختاروهم كيف. ممكن بلاي زول يورينا الاختيارات للحكومه دي بتم كيف؟ يعني الراجل (السفساف) دا الوالي اختارو كيف. نحنا الزمن دا كلو راجيين لينا وظيفه تعيشنا لمن دخلنا المعاش ماجات. البيت عندنا والعربيه عندنا بس املنا في ماهيه توصلنا لي اخر الشهر بدون ديون وتخلينا نشتري للاولاد بطيخه وكيلو باسطه كل اسبوع. لا واسطه شفعت ولا دكتوراه نفعت ولا حتي كونك ود مولانا. علي الاقل كان تحترمو (المولانيه) دي.
يجي ياخ الراجل دا مدنو مكتب بي فطورو وغداو وعشاو وعربيه بي سواق ليو وللمدام ومستفه بنزين وماموريات واجر اضافي وحوافز وعلاج مجاني وواطه في الخطه الاسكانيه والخطه المااسكانيه وكمان ممكن يكون شغل ليو مجموعه من الاسره الكريمه واسرة السكرتيره المحترمه وابوها واخوانا, واهل المره التانيه وجيرانهم, يقوم يجي يسفسف بعد دا كلو؟ زي مابقول واحد جنوبي صاحبنا في العالم الافتراضي "مابالغتا لكن يافرده".


د الرازي الطيب ابوقنايه
[email protected]


تعليقات 6 | إهداء 0 | زيارات 3224

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#973752 [ZAINCO]
0.00/5 (0 صوت)

04-15-2014 11:36 AM
الوالى كان معروف فى جامعة الخرطوم بعبدالرحمن سفسفة , ناس شمبات قالوا كان اول زول بيدخل السفرة ( الملح ) و آخر زول بيطلع منها , ودولابوا كان مليان بسكويت كرم مخصص لعمل حفلات استقطاب كوادر تنشط قرب فترة انتخابات الأتحاد .

[ZAINCO]

#973601 [الطيب]
0.00/5 (0 صوت)

04-15-2014 09:47 AM
طيب انا ما عرفت السفسفه في شنو لكن يا دكتور.ورينا سفسف شنو؟ولا بتقصد مكتب بي فطورو وغداو وعشاو وعربيه بي سواق ليو وللمدام ومستفه بنزين وماموريات واجر اضافي وحوافز وعلاج مجاني وواطه في الخطه الاسكانيه والخطه المااسكانيه دي السفسفه؟ لو بقت علي دي قايتو انا راضي وما معترض لكن لو في شئ تاني وريناوافضحهم لينا علشان انحنا شايفين وما شايفين.

[الطيب]

ردود على الطيب
European Union [د محمد] 04-15-2014 12:12 PM
يعني ماسمعته بي الفساد الفي مكتب الوالي الملا الجرايد والمقابله الصحفيه العملوها معاهو والراجل قال الجماعه احالوهم للتحقيق. الموضوع فيو مليارات متلتله ولا انته من الجماعه بتتريق ساي


#973532 [تجاني مصطفي]
0.00/5 (0 صوت)

04-15-2014 09:03 AM
الله يكون في عونكم ياناس الخرطوم نحنا كنا قايلين نفستا نحنا برانا ناس الجزيرة الممكونين وصابرين لكن كلنا في الهم شرق مادام يقودنا هؤلاء الحكام الا لعنة الله عليهم اجمعين

[تجاني مصطفي]

#973168 [احد ضحايا الالغاذ]
0.00/5 (0 صوت)

04-14-2014 09:45 PM
ماقلت الا الحقيقة انا زيك وموهلاتي العلمية الوالي ده ما عنده وترددت علي اولاده ديل كثيرا ولم افلح في الوصول له وطنشوني وطنشتهم والله كريم ودوام الحال من المحال

[احد ضحايا الالغاذ]

#973157 [طارق الشريف]
5.00/5 (1 صوت)

04-14-2014 09:26 PM
يا الرازي تخيل الخضر دا لما اشوفو بمسكني طمام من ادعائه الشفافية اعوذ بالله من هؤلاء الابالسة

وفي عهده وبفضله اصبحت الخرطوم اعفن واوسخ عاصمة

[طارق الشريف]

#973152 [algandawi]
0.00/5 (0 صوت)

04-14-2014 09:16 PM
والله ما في أي شهادة تنفع توظفك نحن أوﻻدنا وبناتنا تخرجو من الجامعات وخلصوا الخدمة بالواسطة وﻻفين لهم خمس سنوات الله كريم على مخلوقاته

[algandawi]

د الرازي الطيب ابوقنايه
د الرازي الطيب ابوقنايه

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة