المقالات
منوعات
جيب كيسك واقيف في الصف !!
جيب كيسك واقيف في الصف !!
04-16-2014 07:58 PM


• يا جماعة أقيفوا كويس، ومافي زول يخرب الصف ، يا عسكري بالله أي واحد يعمل فوضى خليهو يقيف آخر واحد، بس لاقين الملح دهـ جايين جارين، هسع لو الحكاية فيها دفع، ما كان عملتو لينا الفلقة دي في راسنا ...
• مواطن1: يا ولدي ممكن بس تستثنيني أنا مستعجل وتعبان والله، وصفكم دهـ ما بقدر أقيف فيهو ؟؟
• لا ياحاج ما في طريقة ، أقيف زيك وزي الناس الواقفين ديل، يا عسكري شيل جردل عمك دهـ ووريهو آخر الصف وين ..
• يلا ياجماعة واحد واحد وبدون عفصتني ودفرتني وعضيتني ، كل واحد يملا الاستمارة دي، إسمو وعمرو وعنوانو وقبيلتو ومنطقتو وحزبو و( المغصة ) حقتو بإختصار في المربع التحت دهـ ، والجهة ( الممقّصة ) و يشيل الاستمارة دي بعد التعبئة ويوديها للعسكري داااك شايفنو ؟ عشان يعلق عليها ويوقع ويختمها ويجيبها راجعة هنا عشان نصرف ليهو ..
• يا حاجة سلامة نظرك، صف النسوان هناك
• مواطن2: يا أخ أنا مشيت للعسكري، صدّق لي بس بي اتنين كيلو
• ومالهم يعني الاتنين الكيلو ؟ رحمة .. أحمد الله عليها، انتا كنتا لاقيها؟؟ ... وين كيسك ؟؟
• مواطن2: لاكن ياخي اتنين كيلو دي بسوي لي شنو ؟؟
• إنتا مغصتك شنو ؟
• مواطن2: داير أتكلم في (المعتمد) حقنا
• نوع الكلام شنو يعني ؟؟ نبذ ولا شتيمة خفيفة ولا نصيحة ولا إتهام ولا داير تدقو ولا داير تسوي شنو يعني ؟؟
• مواطن2: والله داير أقول ليهو، لينا تسعة شهور ما شفنا الماهية .. دايرين نلدي عديييل كدا من المقصة
• خلاص يا حبيبي اتنين كيلو بتكفيك، ولو ما كفتك تعال الاسبوع أجازف ليك ربع كيلو كدا من العسكري ده ، قصرّت معاك ؟؟ يلا يا جماعة البعدو ..
• مواطن3: بالله بسرعة يا أخ عشان أنا تعبان جدا وداير أتفجر
• انتا إسمك فضل حماد فضل حماد فضلين ؟؟
• مواطن3: أيوا ياااخي، إسمي مالو ؟؟ أديني خليني أمشي
• لا مافي حاجة بس إنتا نسيت تخت النقاط حقت حرف ( الضاض ) ، المهم ما مشكلة بمشيك،،، جيب كيسك، عندك سبعة كيلو..
• موطن3: خلاص كدا ؟؟ مافي زيادة شوية ؟؟
• لا يا أخوي شيل كيسك دهـ وأتطلب الله
• مواطن3: شردتو الناس يا كيزان يا ( تييييت ! ، تييييت !، تييييت !! ) ....
• خلاص تعال الاسبوع الجاي عشان تكمّل كلامك ! البعدو ..
• موطن4: يا خي أدي الراجل حاجة بسيطة عشان يكمل الجملة ..
• إنتا مسئول منو ؟؟ ومين أداك الحق تتكلم ؟؟ على العموم مخصوم منك كيلو، ولو عندك أي إعتراض أرجع للعسكري التاني القاعد في الطربيزة التحت الشدرة هناااك، شايفو ؟؟ أمشي قول ليهو أنا معترض
• مواطن4: لا لا ما معترض ولا حاجة، أديني حقي بس خليني أمشي
• طيب عندك عشرة كيلو ناقص كيلو الباقي ليك تسعة ، جيب أكياسك .. البعدو
• مواطن5: يا أخ، ياخي أنا مشيت للعسكري قال لي إنتا ما عندك
• خلاص يا أخوي، ماعندك ماعندك، نسوي ليك شنو ؟؟ إتطلب الله، البعدو
• مواطن5: طيب كويس يا ( تيييييت! ، تييييت! ، تيييت ) ...
• مواطن6: أنا برضو مشيت وقال لي نفس الكلام، ياخي عليك الله وعليك ( النعمة ) الوراك دي، شوف لي حاجة بسييييطة أتفشّ بيها .
• قول ماشاء الله يا أخ، وده من فضل ربي يا حقود، لكن مافي مشكلة يا أخوي، بس إنتا إنتظر، لو في حاجة فضّلت بديك منها شوية، بس إنتا قول يا رب وبطّل الحسد .. يلا البعدو يا جماعة دايرين نمشي ..
• مواطن7: يا أخ، أنا مصدّق لي بي خمسة وعشرين كيلو، لكن ممكن يعني أستلف من أي زول تاني ؟؟
• ممكن إذا كان الزول التاني الداير تشيل منو دهـ موافق، ربنا قال ( تعاونو على البر والتقوى ) ..
• مواطن7: كدا ريحتوني شديد يا جماعة وتبرعاتكم لي بحصصكم وأكياسكم دي براها بالدنيا وبي كدا حنتكلم بكل أريحية وجرأة وأول ما نطالب به هو التحقيق والقصاص من قتلة ( تيييييت! ، تييييت! ، تيييت ) ...، فك يا عسكري، فك ..
• مسكين ما قرا التسعيرة المكتوبة ورا الاستمارة !! ..

[email protected]


تعليقات 3 | إهداء 0 | زيارات 2091

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#976108 [مدثر الطيب]
0.00/5 (0 صوت)

04-17-2014 02:51 PM
عجبني المواطن رقم 5 .. قطع الخط قبل إكمال الجملة ( طيب كويس يا ... تيييييت تييييت ) ، ياخي يمكن داير يقول ( طيب كويس يا راجل يا طيب ) !!

[مدثر الطيب]

#976031 [حنان الشيخ]
0.00/5 (0 صوت)

04-17-2014 01:57 PM
( الحريات ) اليوم منحة من البشير، لكن الخوف بكرة تدخل السوق الاسود !! وتكون زي الاغاثة القطرية إبان السيول والامطار الأكلوها الجماعة ودخلوها السوق ..

[حنان الشيخ]

#975901 [د. عمر القاضي محمد تيراب]
0.00/5 (0 صوت)

04-17-2014 12:04 PM
البشير يمنح الحريات بالكيلو ، يعني الحرية بقت زي بطاقة الشحن، والمكالمات زاتا فيها الخفيف والتقيل وانا زاااتي خايف هسع الخط يقطع لي ( تييييت ... تيييت .... تيييت ) ..

[د. عمر القاضي محمد تيراب]

حسين الفكي
حسين الفكي

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة