مستشار تطوير وجودة
04-17-2014 10:31 PM


الإصطلاح السياسي للتقشف أنه برنامج حكومي ذو طابع اقتصادي، يستهدف الحد من الإسراف من زيادة الإنفاق على السلع الاستهلاكية؛ وتشجيع الادخار، والعمل على مضاعفة الإنتاج؛ علاجاً لأزمة اقتصادية، تمر بها البلاد .. والتقشف والترفق بالمال العام في الدولة الإسلاميه وعدم إستباحة (دينار واحد منه) يحدث حتى وإن لم تكن هنالك أزمة إقتصاديه بل حتى وإن كانت الدولة في أوج عظمتها المادية لأن الإسلام ينهانا عن أكل الأموال بالباطل حتى وإن كانت عامة ..

ولأننا سادتي في عهد (وريتنا جديد ما كان على بال) فهذه مقارنه بين المشروع الإسلامي والمشروع الحضاري في كيفية التعامل مع المال العام واضعين في الإعتبار الحالة الإقتصادية للدولة .
المشروع الإسلامي (الحالة الإقتصادية) :
جاؤوا إلى أمير المؤمنين عمر بن عبد العزيز بأموال الزكاة، فقال: أنفقوها على الفقراء
فقالوا ما عاد فى أمة الإسلام فقراء،
قال: فجهزوا بها الجيوش.
قالوا جيوش الإسلام تجوب الدنيا،
قال: فزوجوا الشباب.
فقالوا من كان يريد الزواج زُوِج. وبقى مال،
فقال: اقضوا الديون على المدينين.
فقضوها وبقى مال،
فقال: انظروا (المسيحين واليهود) من كان عليه دين فسددوا عنه. ففعلوا وبقى مال،
فقال: أعطوا أهل العلم.
فأعطوهم وبقى مال،
فقال: اشترو بها قمحاً وانثروه على رؤوس الجبال لكي لا يقال جاع طير في بلاد المسلمين.
الكلام الفوق ده يؤكد بأن المواطنين في عهد هذا الخليفه كانوا مكتفين تمامن .. طيب تعالو نشوف تعامل الخليفه مع أموال المسلمين :

المشروع الإسلامي : التقشف
( جاء البريد ذات ليلة إلى أمير المؤمنين عمر بن عبد العزيز (الفوق ده ذاااتو) فأشعل السراج ليقرأ الرسائل، ويسأل رجل البريد عن أحوال المسلمين في بلده، ولمّا انتهى من كلّ هذا أطفأ السراج، وسئل في ذلك فقال إنّ زيت السراج من بيت مال المسلمين، وقد أضاءه ليبحث في أحوال عامّة المسلمين ويسأل عن أمرهم ليعرف ما هم وأمراؤهم عليه، وأطفأه لأنّه الآن يبحث في أموره الخاصّة)
المشروع الحضاري : (الحالة الإقتصادية )
الفقر يضرب بأطنابه ، حيث تمتلئ صفحات الصحف بالنداءآت الإنسانية التي تخاطب أصحاب القلوب الـ في شتى مناح الحياة شئ عمليات جراحية بتاعت حياة أو موت وشئ طلبات لأدوية عجز المواطنين المرضي أن يشتروها وشئ تسديد أجرة منازل يخاف شاغلوها أن يقذف لهم بالعفش للشارع وشيئ كراسي لمعاقين حتى يتمكنو من التنقل والحركة وشئ تسديد رسوم لطلاب عجزو عن تسدديدها ويواجهون خطر
الرفد من الجامعات وأشياء وأشياء توضح تماماً سؤ الحال الذي وصل إليه مجتمعنا من فقر وأملاق .
المشروع احضاري (التقشف) :
كشفت مستندات تحصلت عليها الزميلة (اليوم التالي) من مصادرها عن ارتفاع تكلفة فاتورة الاستهلاك الشهري لفاتورة هاتف خضر الأمين مستشار والي الجزيرة لتطوير الأعمال وضبط الجودة عن شهر مارس 2014 م والتي بلغت (10579) جنيها (عشرة مليون ونص وشويه) من بينها قيمة فاتورة محادثاته العالمية والتي وصلت وحدها ـ حسب المستندات ـ مبلغ (8,614) جنيها وذلك حسب الخطاب المعنون إلى المدير العام لوزارة المالية للسداد، والصادر من فضل موسى جادين الأمين العام لحكومة الجزيرة .
إنتهت المقارنة :
بالله عليك عزيزي القارئ قارن بين بلاد يكتفي مواطنيها فلا يوجد من هو بحاجه إلى مال الزكاة فيطلب الخليفة أن يشترى بها قمحاً لينثر على رؤوس الجبال لكي لا يقال جاع طير في بلاد المسلمين والحال هكذا من كفاية ورفاهية لم يشأ هذا الخليفة (المسؤول) أن يعتدي على أموال المسلمين ولو بأخذ (شوية) زيت يستضيء بها وينير بها (منزله) الخاصّ، لم يقل إنّ بيته هو بيت (الحاكم) فيجب أن يكون مضاءاً (24 ساعة) ولم يقل إن (لمبتو) هي (لمبة الحكومة) التي تعمل من أجل راحة المواطنين .
ثم قارن بينه وبين الفقر الذي يرزح فيه شعبنا وفاتورة هاتف خضر الأمين مستشار والي الجزيرة لتطوير الأعمال وضبط الجودة عن شهر مارس والتي بلغت (عشرة ملايين ونص) لتعرف إن الإسلام براء مما يحدث !

كسرة :
ده كووولو كوم وحكاية مستشار الوالي للتطوير والجوده دي كوم تاااتي .. لو عندنا في كل ولاية مستشار والي للتطوير والجوده فدي (كارثة) وإذا الوظيفة دي (إتنجرت) للزول ده براهو فدي تبقى (فجيعة) ونحنا في هذا العهد الميمون كتبت علينا الكارثة والفجيعة .. وأريتنا ما طلعنا منها !
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟


تعليقات 18 | إهداء 0 | زيارات 5011

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#977916 [أبو حسين]
0.00/5 (0 صوت)

04-19-2014 04:47 PM
التطوير والجودة على شنو ولاية ما عندها وجيع ومشروع ميت دي يا أستاذ تكون تطوير وجودة أساليب العذاب وتوزيع خلق الله كلما سألوا عن المشروع وإعادة جزيرتنا لعهدها الأول خرج وزير تطوير الكذب والجودة بأجود المبررات التي تدمر المشروع أكثر فأكثر ، ديل يا أستاذ ممكن يعطوا الطيور والكلام في منازلهم ومزارعهم من مال الشعب ولكن يعطوا الشعب هذا مستحيل وهو متفق عليه بينهم ،،،،

[أبو حسين]

#977718 [ودالماحى]
0.00/5 (0 صوت)

04-19-2014 01:24 PM
يا سيدالريئس هل تريد دليلا على الفساد اكبر واوضح من هذا - فواليك فاسد وحطومته فاسده اتقوا الله اتقوا الله اتقوا الله - فغدا ستعرضون عليه ويسالكم من اين لكم بيتين وشقه ومزرعه هل جهزت جوابك وكذلك كل من وليته منصبا وكل من استفاد من جماعاتكم ومن اتمائه - لكم يونا تقفون فيه امام سينظر الى اعمالكم فاستعدوا لذلك اليوم وحاسبوا انفسكم ومن وليتهم ونهب اموال شعبا مغلوبا على امره

[ودالماحى]

#977585 [osama dai elnaiem]
5.00/5 (1 صوت)

04-19-2014 11:43 AM
أستاذي الجليل--- اذكرك وانت سيد العارفين بان سيدنا عمر بن عبد العزيز بسط كل ذلك العدل و( الشبع) في ولاية لم تكمل 3 سنوات مقارنة بين عمر البشير الذي قضي 25 عاما جف فيها الضرع وانكمشت الدولة الاسلامية والفتوحات صارت انفصالات!

[osama dai elnaiem]

#977340 [ودالباشا]
0.00/5 (0 صوت)

04-19-2014 02:44 AM
انت ما سمعت اسماعيل حسن قال شنو

حتى الطير من اطراف تقيها شبع

حركاتك دى شنووووو

[ودالباشا]

#977303 [اشرف]
5.00/5 (2 صوت)

04-19-2014 12:42 AM
تاعب نفسك ياجبره ..والله فاتوره التلفون دى ولا حاجه..المشكله اكبر من كدا ..الشعب اصبح فاسد ..والفساد اصبح هو السائد والشرف استئناء ..ودى هى المعضله الكبرى ...ولا الوم الكيزان لانو الشعب اصلا كان عندو استعداد للانحراف ..والكيزان دلوه على الطريق ...اللهم الا اصدقائنا من الشيوعين ..هم الوحيدين الحافظو على مبادئهم واخلاقهم الرفيعه ..اما الباقى فتكوزن واصبح فاسدا ..عشان كدا مافى امل من هذا الشعب ..عايز اعاده تاهيل من الاول ..الامل فى الجيل تحت سن 7 سنوات ينفصل عن اهلو ويتربى من جديد.او كل واحد يشيل اولادو يربيهم بره السودان...

[اشرف]

#977152 [عنيد]
5.00/5 (1 صوت)

04-18-2014 09:08 PM
مايركب طياره بى اتنين مليون يمشى يتكلم مع الدابرو وبرجع بدل 8مليون مكالمه///

[عنيد]

#976834 [radona]
5.00/5 (1 صوت)

04-18-2014 12:58 PM
فاتورة خضر الامين وحده يمكن ان تامن عمل لاكثر من 20 خريج عاطل
سيارة برادو واحدة لاصغر دستوري ممكن تامن محلول غسيل الكلى
احتفال واحد او مؤتمر تكاليفه ممكن تبني مدرسة
60 وزير و18 والي وجيش معتمدين وجيش عرمرم من المجالس التشريعية ممكن يمارسوا اعمالا تفيدهم وتفيد وطنهم فقط لا نحتاج الا لاقل من 15 وزير و5 اقاليم للحكم والبقية ياريت يشتغلوا مزارعين ووقيمة العربات التي يمتطونها والوقود تكفي لانقاذ السودان من الانهيار الاقتصادي وتحقيق فائض في الميزانية
والله لو سيدنا عمر بن عبدالعزيز حاضر مع الجماعة ديل لامر بان يرموا من سفح جبل عالي جدا وليس اقل من ذلك ابدا

[radona]

#976672 [صادميم]
5.00/5 (2 صوت)

04-18-2014 09:08 AM
تطوير شنو ياخي الزول ده ما قادر يطور نفسو يعني لو كان طور نفسو و عمل ليهو فايبر ولا تانقو ولا اسكايب في تلفونو كان وفر شوية في المحادثات الخارجية.

[صادميم]

#976632 [كاسبر]
3.00/5 (4 صوت)

04-18-2014 07:18 AM
يكون ببيع الرصيد
لا مكالمات خارجية ولا يحزنون
ده شغل حرامية

[كاسبر]

ردود على كاسبر
[ياسر عبد الوهاب] 04-18-2014 11:57 AM
وحاتك دابو الشغل وقع لي...تسلم..


#976626 [خاطره]
5.00/5 (1 صوت)

04-18-2014 06:32 AM
دا مستشار الوالي فاتورته قدر كده ومال الوالي تكون كم ؟. بعدين بتكلم في شنو ذاته. هم اساسا نشفو الجزيره ومشروعها واذهب وانظر في مدينة ودمدني فهي علي حالها منذ عقود مضت. بل لم يحافظوا علي الاشياء القديمه في مدني الجميله. الله ينتقم منكم.

[خاطره]

#976612 [ياسر عبد الوهاب]
5.00/5 (3 صوت)

04-18-2014 03:45 AM
كسره اولي
عملته لينا شنو في قضية .... ذو النون..
كسره تانيه
تطوير الأعمال وضبط الجوده بالعربي..يعني شنو؟؟؟

[ياسر عبد الوهاب]

ردود على ياسر عبد الوهاب
United States [دا كلام ما صاااااح] 04-18-2014 11:27 AM
الأخ ياسر
متأسف انى ما حاقدر اقول ليك تطوير الأعمال بالعربى يعنى شنو .لأنو الموضوع دغمسة فى الترجمة كالعادة
الأصل هو Business Development
اها اللوم بيجى فى الترجمة .. مرات تترجم تطوير الإدارة .. ومرات تطوير الأعمال
ومرات تنمية الإدارة ..
ولما تكون مضافة ليها كلمة Promotion بتترجم ترقية وتنمية الإدارة
فهو احدث واخر مرحلة وصلت اليها العلوم الإدارية

اما ضبط الجودة .. فهو مصطلح قديم بعض الشىء .. واحدث منه المصطلح بتاع ادارة الجودة الشاملة
وان كان الأخير ، برضو فيهو مشكلة ترجمة حرفية .. والمتتبع لمراحل تطور الجودة مما كانت جودة منتج بس والترجمات المصاحبة .. بيلقى انو الترجمة الأخيرة فيها خلل كبير ..

مازال عندنا مشكلة فى التعريب لبعض المصطلحات واقرب حاجة كلمة ادارة بالعربى ممكن تقوم مقام كلمتى administration & management والفرق بينهم كبيييييييير

يااخوى متاسفين للإطالة .. اصلو خرفنا والزهايمر لحقنا


#976604 [ربش]
5.00/5 (1 صوت)

04-18-2014 03:01 AM
بكره أحلي يا رائع .... ويا يوم بكره ماتسرع تخفف لي نااااار فقري .....

[ربش]

#976587 [خارج الحدود]
0.00/5 (0 صوت)

04-18-2014 02:05 AM
انت تقصد اي خليفة من الخلفاء يا أستاذ جبرا الخليفة عمر ابن حسن ( السوداني ) ام ابن عبدالعزيز في عهد من فيهم ؟

[خارج الحدود]

#976580 [بت البلد]
5.00/5 (1 صوت)

04-18-2014 01:32 AM
أحييي انا من كسراتك دي يا جبرا الأبت تجبر ياخي لو ما اسمك جبرا كان يحصل شنوووووووووووو+ تاني شنووووووووووووووووووووووووووووووووووووووووووووووووووووووووووووووووووووووووووووووووووووووووو

[بت البلد]

#976549 [حد بيعرف احسن م الحكومه!!]
3.50/5 (2 صوت)

04-18-2014 12:19 AM
يعى يا فاتح الحبرا المستشار دا تفتكر كان بيعمل مكالمات خارجيه مع منو ؟ مع اصحابو ولآ مع اولادو البيقرو برأ؟ يعنى الآ يعلن ويوريكم كان بينضم مع منو!! هو موش جابوهو عشان يخدمكم! وطيب !! اهو بيخدم فيكم .. مسكين طول وكتو عمال يشيل ويستشير فى العالمين بألأستشارات الفنيه اللى بتظبط الجوده زى ما الحكومه دايره .. المحكومه عاوزة تقريط على كدا عشان الجوده تتظبّط كدا لأنو دى احسن الطرق للتطوير والجوده فى الجزيره محل المشروع بتاعا حيرجع باسرع وبأجود ما خطط له حسبما يرى الوالى الدباب ..اللى شاف بعيونو نزول القرود لتلقى ألألغام بعد ما سمعوالشجر كبّر .. وجا وحكى الموضوع لهبئة اساتذة الجميله ومستحيله وبعد ما حلف ليهم ورفع اصبعو .. أها لازم تصدقو!! بعدما ألأساتذه صدقوه .. خلاص الحكايه خلصت.. واصبح وزير زراعى .. (واستمر الزبير ماش واضحى وزير داخلى..وتنّو فضل ماش وبعدها وزير تقانى عولمى..مع ما عندو من الفلفسا .. فى زول تانى بيعرف احسن منو فى تعيين مستشارينو البحدموكم..يعنى شنو عشره مليون جنيه كلام استشارات فى المليان ..يعنى انتو ما شايفين اى تطوير حصل.. يا ناس يا ويحكم .. ليت شعرى..الا ترون الجودة امامكم .. انكم لجاحدون ومكابرون واصحاب اجندات وغير وثابين .. وعليكم جنس اندغام غايتو.. ما تستاهلو ألأ ألأسترداف على الماسوره.. يا ناس يا شر بطّلو أ{{{ فى حد بيعرف احسن الحوكومه؟...المهم الفاتوره اندفعت؟

[حد بيعرف احسن م الحكومه!!]

#976521 [الزبير العوام]
0.00/5 (0 صوت)

04-17-2014 11:29 PM
ده مستشار تدمير و فوضي .. عاملآ بمبدأ كان بيت أبوك خرب شيل منه شليعة .. حصاد التمكين الزائف

[الزبير العوام]

#976519 [وحيد]
0.00/5 (0 صوت)

04-17-2014 11:20 PM
في الغالب مستشار الوالي دا لا بفهم في التطوير و لا في الجودة، و سمعنا انو وزير المالية في ولاية الجزيرة كل مؤهلاته انو اخو شهيد ،
بالله اذا كان تلفون مستشار الخيبة دا عشرة مليون و نص في الشهر فكم تبلغ مخصصاته؟ و كم تبلغ نخصصات و تلفوات الوزراء و المعتمدين و المستشارين التانيين؟ و يا ربي عندهم خبراء وطنيين؟
و سمعنا انو والي الجزيرة البروفسور المجاهد عندو واحد ود عم بت خالة شهيد نجر ليهو معتمدية في 24 القرشي ، صحي؟ و بعدين يا ربي عندهم كم معتمد برئاسة الولاية بدرجة وزير؟
بعدين ياخي اذا الناس ديل ما بخافو الله و لا راجين حساب يوم القيامة ما بخافو من الموت؟ ما بخافو من المرض و البهدلة يعني الواحد فيهم يجيه سرطان و لا جلطة تشلو ؟

[وحيد]

#976504 [دا كلام ما صاااااح]
4.75/5 (4 صوت)

04-17-2014 11:03 PM
يا استاذ المكالمات لزوم الشغل .
الراجل متابع وبيبحث فى امور الرعية فى الخارج
عاوز يشوف كراتين الحلومر وصلت الرعية فى الخارج واللا لسه
خلو الناس تشتغل ياااخ

[دا كلام ما صاااااح]

ردود على دا كلام ما صاااااح
[خاطره] 04-18-2014 06:36 AM
ههههههههههه


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة