المقالات
السياسة
والي الجزيره وصيام الضب
والي الجزيره وصيام الضب
04-20-2014 12:55 PM


رشح في الاخبار ان السيد الزبير طه والي الجزيره يصوم يومي الاثنين والخميس من كل اسبوع وتقوم الحكومه بتوفير المكان والموارد الماليه لتحضير فطور سيادته علي نفقتها بواقع سبعه مليون ونصف جنيه للفطره الواحده. بتوافقوني ياجماعه لو كل والي عمل كده, فريضه الصيام بتصبح نغمه وليست نعمه علي المساكين الزينا كده؟
اولا, نشكر الله كثيرا ان سيادته قد اصبح مسلما (نص كم) ويصوم يومين في الاسبوع فقط, والا كانت منصرفات فطوره قد بلغت رقما قياسيا يصعب حسابه حتي علي الجلاكسي اس فايف الجديد. ولا ندري ان كان سيادته قد وافق ام لا علي تجهيز الفطور الجماعي له. ولكن وجود اسرته في الخرطوم والتي تعيش (كيري) علي حساب جامعه الخرطوم منذ خمسه سنوات في منزل كهربته حرام وحراسته حرام وحتي ماؤه الطهور حرام, يؤكد انه يعيش (عزابي) في مدني وان هذه العيشه صعبه لدرجه لا يستطيع الشخص العادي فيها تجهيز سندوتش سيبك من فطور رمضاني كامل الدسم. ولكن الشئ المستغرب مقدره سيادته علي غض الطرف عن تلمس الحرام رغم صيامه يومين في الاسبوع. ونستغرب جدا نحن ابناء ولايه الجزيره الذين يعيشون حاله من الفقر لا يعلم مداها الا الله عندما نراه يقدل (باستايل شايقي) في الرقص علي جثث القتلي في جنوب كردفان ابان احتلال ابكرشوله وقد تركنا وراءه نئن من الجوع والمرض وطريحي الفراش. نحن الان في حيره من امرنا لاندري بالظبط ان كنا ولايه مسلمه علي راسها امير المؤمنين ام احد مدن امريكا الجنوبيه التي ولاها الله باناس لا يعرفون عن الدين شيئا. فوالينا الهمام اصبح من متقني العيش علي الاموال العامه حتي اصابنا الشك في ان الدوله اوجدت لخدمته والاهتمام به بدلا من ان يهتم هو بها. وقد تاكدنا من المصادر, ان سيادته يسكن ايضا في قصر الضيافه الخاص بالولايه علي ضفاف النيل الازرق يخدمه جيش جرار من الخدم والحشم وتحرس اسوار القصر مجموعه من الشرطه الشعبيه والدفاع الشعبي وشعبه (حمايه الوالي) وضعت تحت تصرفها ميزانيه كفيله باجلاس جميع تلاميذ الولايه في مدارس تتانق فصولها بكراسي مريحه وساحاتها بحدائق غناء كما الحال عندما كنا تلاميذا فيها.
اشك عموما في وجود شعب في هذه الدنيا يعاني مانعانيه او عاش تجربتنا بسبب وجود والي عليه كوالي ولايتنا الغنيه. فنحن ابناء الجزيره (شاغانا) المغسه عديل كده لتدهورنا من الولايه رقم اتنين للولايه رقم متين. حتي تمثيلنا في الدوري الممتاز اتدهور لغايه مابقينا الطيش والسبب الزبير بشير طه والفاتح الكرنكي واخرين من ابناء الولايه. قال شنو, قال ماهم من اولاد مدني خلاص. هسع بلاي الناس دي بمثلو اولاد مدني؟ الزبير زول خريج فلسفه, والكرنكي ماعارفنو خريج شنو ولا مؤهلاتو شنو, والبقيه جوقه لاهم لها سوي الكسب المادي الرخيص. حررام تحطيم الولايه بهذه الطريقه ياكيزان.
طيله زمن اغترابنا كانت سمعتنا كاولاد مدني يحفها الاحترام لاننا بطبعنا متميزين من حيث الفكاهه والتعليم واشياء اخري . اذكر اول زياره لي لمدينه ليدز في شمال بريطانيا لاحد الاصدقاء وقامو الجماعه اتلمو للكشتينه وفجاه لقيت نفسي محاط بي مجموعه من اولاد مدني اكتشفته انهم عاملين ليهم رابطه مسمنها رابطه اولاد مدني. مع نهايه الزياره صاحبي قال لي "ياخ اصلو انته جاي لي اولاد مدني؟ يوم واحد مانشوفك؟" وتذكرت صديقي هاشم بطري امد الله في عمره وهومن عظماء مدني. فعندما تخرج من الجامعه في اواخر السبعينيات وكان اولاد مدني البقرو او شغالين في الخرطوم مالاقين سكن اجر بيت في منطقه كوبر الحبيبه سماهو (بيت الشعب).
يجي ياخ الزول دا قروش الولايه كلها مبعزقها في الجهاد القاطعو من راسو دا؟ انا غايتو بفتكر حكايه الجهاد القايم لينا فيها دي مسرحيه عشان راسو فاضي وكمان هروب من مسؤولياتو. عشان كده نحنا مادايرنو شيلو لينا وجيبو لينا انشاء الله (ود الفتلي) فعلي الاقل فيو حراره قلب ناس مدني واكيد حيكون زول فنان ولعاب وبعرف (بيت الشعب) يعني شنو.
follow me @twitter elrazi_elrazi
[email protected]


تعليقات 15 | إهداء 0 | زيارات 3261

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#980251 [ود فارس]
0.00/5 (0 صوت)

04-21-2014 06:28 PM
مقالك رائع بس في حاجه عايز اعلق عليها مع كامل احترامي ليك
انا عاشرته كتير من شباب مدينة ودمدني بالذات لمن كانا في الجامعة معظمهم فكينها في نفسهم و مصدقين تلقى الواحد في بيتم يومهه كله مالاقي حق الوجبة ويجيك الجامعة ملبس وعامل شعره كيف كيف ماعارف ومركب ليك مكنة حنكوش

[ود فارس]

#980157 [أنور النور عبد الرحمن شريف]
0.00/5 (0 صوت)

04-21-2014 04:45 PM
المهزلة والبهدلة والمأكلة والضحك على الشعب إن ربك لبالمرصاد يمهل ولا يهمل

[أنور النور عبد الرحمن شريف]

#979493 [سليمان]
0.00/5 (0 صوت)

04-21-2014 06:30 AM
بركاتك ياود شيخنا. كتبته في والي الخرطوم استقال. كتبته في والي الجزيره اقالوهو. اكتب لينا في الرئيس دا شويه..مدد يابقنايه مدد

[سليمان]

#979358 [تجاني مصطفي]
5.00/5 (1 صوت)

04-20-2014 11:43 PM
دا والي شوم .. مرض دا كرهنا مدني .. كل الكيزان زفت وكناسة لكن بتاع الجزيرة دا كناسة الكناسة دا اكل قروش الموظفين بدل طبيعة العمل الليهو 7 سنين لم يطبق حتي الآن في ولاية الجزيرة دوناَ عن كل ولايات السودان .. فرق الشهر بتاع الهيكل لم يصرف حتي الآن اللهم عليك بهذا الوالي وعصابته .. اللهم قد
ضاقت ففرجها اللهم عليك به فانه لايعجزك ... قولوا آآآآمممممممميييييين

[تجاني مصطفي]

#979169 [جبور]
5.00/5 (1 صوت)

04-20-2014 07:10 PM
الزول السالت من مؤهلاتو فاقد تربوي

[جبور]

#979086 [صاحب صاحبو]
3.00/5 (1 صوت)

04-20-2014 05:44 PM
ربما تكون المعلومات غير صحيحة أو على الأقل غير دقيقة، لكن في كلا الحالتين نتوجه للوالي أن يعتبر ما يكتب عنه نصيحة من عامة المسلمين ويعمل بها، إن كان ما كتب صحيحاً فليبرأ إلى الله منه ويتوب، وإن كان غير صحيح فليعتبر ويعلم أنه مراقب من الشعب دعك من رقابة الخالق علام الغيوب، نحن بحاجة إلى قدوة بعيد عن الشبهات، لا تتيح حركاته وسكناته فرصة لمروجي الإشاعات، يمشي عدل ليحتار فيه عدوه. ما كدي يا أبو قناية

[صاحب صاحبو]

#979026 [أبوالكجص]
5.00/5 (1 صوت)

04-20-2014 04:41 PM
صيام والي الجزيرة دا صيام شوفوووووووووني ساااااااااااكت.
كيف يصوم الإنسان لله ويفطر من أموال الولاية التي إئتُمِن عليها؟ هل أذِن له سكان الولاية بذلك.

ياناس الجزيرة عليكم أن ترفعوا أياديكم إلى السماء بعدم عفو الأموال التي فطر بها الوالي خلُّو الرذيل ترِب الرذالة الكيزانية دا صيامو يروح فشوش ساكت جوع وعطش.

[أبوالكجص]

#978986 [بتاع بتتييخ]
2.00/5 (1 صوت)

04-20-2014 04:10 PM
والله يابو قناية قنالكو حمير الوالى عشطانة لاكين ماف زول كان في قلبو رفق بالحيوان ..... الحيوان الى في بريطانيا عندو حقوق اكتر من ناس مدنى بل وناس السودان اجمع

[بتاع بتتييخ]

#978948 [ابو خيرزانة]
3.00/5 (1 صوت)

04-20-2014 03:33 PM
مدني ياخي ابوقناية لم تعد مدني منذ رحيل الصادق ابوعافية وعوض حلاوة وحيدر قطامه وود الفتلي وغيرهم......لوكانوا موجودين كان ضبطوا ليكم الوالي دا وطيروا ليه رقيصه في ساحات الفداء في راسه....اللهم ارحمهم

[ابو خيرزانة]

#978888 [كفاية]
3.00/5 (1 صوت)

04-20-2014 02:37 PM
الصيام دا بغش بيهو نفسو والا بغش رب الكون ؟ زول مطعمه حرام ومسكنه حرام فأنى يستجاب له ؟؟ زول ساكن في بيت الجامعة وهو لا يعمل بها ويستعمل عربات ووقود الدولة اسبوعيا او كل كم يوم للحضور لأسرته في بيت الجامعة وفي نفس الوقت يسكن في منزل حكومي في مدني والعساكر المساكين الكانوا ساكنين في القشلاقات طردوا منها وبيعت اراضيها وعمال السكة حديد ومشروع الجزيرة طردوا من منازلهم وبيعت لكي توفر بثمنها احتياجات الحكام من حوافز ونثريات وسفريات وافطارات جماعية !!!!!!!! والزبير هذا مثلا لحكامنا

[كفاية]

#978875 [انصاري]
3.00/5 (2 صوت)

04-20-2014 02:23 PM
دة لو كان صايم ديمة.. كان قمح العالم..!! مش السودان ..

المهرجان الجهادي .. الصيامي الأكبر .. ولاية الجزيرة .. برعاية المجاهد (الزبير بشير طه) .. تحت شعار: "شعب الحزيرة .. في خدمة الوالي" ... كونو في خدمته حتي يشفع ل7000.000 منكم عند دخوله الجنة بفضل تمويلكم لصيامه ,, وصلاته ,, وقيامه’’ وزكاته,, وحجه.. ساهموا في خدمة واليكم تضمنوا شفاعته.. " فتح عينك تأكل ملبن"... نحن للدين فداء .. نحن للدين فداء .. نحن للدين فداء .. نحن...!!؟؟

[انصاري]

#978814 [الراصد]
1.00/5 (1 صوت)

04-20-2014 01:48 PM
الزبير ده...درويش...ليس الا....

[الراصد]

#978805 [Mohd Magdi Altayeb Abugnaia]
1.00/5 (1 صوت)

04-20-2014 01:43 PM
ياخى والله ديل امثال الناس المتخلفين الجايبين السودان مية سنه لى وره!!

[Mohd Magdi Altayeb Abugnaia]

#978796 [أيام لها إيقاع]
5.00/5 (1 صوت)

04-20-2014 01:30 PM
هو لو بيفطر بـ 7.5 مليون ،، الصايم ليها شنو ؟ ما ياكل ساكت ، مجوع نفسه ليه? ،،،
فويل للمصلين الذين هم عن صلاتهم ساهون الذين هم يراؤون ،،
أعوذ بالله

[أيام لها إيقاع]

#978790 [سليمان]
5.00/5 (1 صوت)

04-20-2014 01:27 PM
ياود اقنايه من زمان قلنا ليك سيبك من سودانير وركز معانا شويه..مدني انتهت يادكتور ومحتاجه لي كتاباتكم.

[سليمان]

ردود على سليمان
United States [مدني الحبيبة] 04-20-2014 04:28 PM
مصيبة ودمدني لايوجد بها كيزان الا مجموعة بسيطة تحسب على اصابع اليد ، اسرة الخطيب (سيد، هاشم ، عبدالدافع ) والجماعة ديل رحلو الخرطوم من زمن بعيد اسرة الكرنكي اسرة الشايقي المعتمد السابق لام القرى الدمياطي والان شكلو ترك الشغلانة دي اسرة محمد عبدالوهاب ، والمرحوم دكتور مصطفي الطيب ، وبابكر حنين ، ة ياهم ديل الكيزان في مدينة ودمدني العظيمة ، الان كل مدراء الوزارات + الوزراء + مدرا جميع المنظمات الكيزانية (الشهيد، الجهاد ، جمعية القران ،الاوقاف ، الاصلاح والمواساة ، الارقم لرعاية المهتدين ، الابرار ، منسقي الخدمة الالزامية ومنسقي الشرطة الشعبية والدفاع الشعبي ) ليست لهم علاقة بمدينة ودمدني كلهم لايمثلون حتى قرى الجزيرة وانما يصنفون كانتهازي تلك القرى الفقيرة ، مسرح الجزيرة الان بعد خرابه انبسط هذا الوالي لانه لايحب الثقافة والابداع ، اذاعة وتلفزيون الجزيرةا من الاوائل والرواد في ذلك المجال ، الان حتى قناة فضائية لولاية الجزيرة لاتوجد وكل هذا بقضل ابداعات ذلك الوالي المهووس ، تخيلوا معي ان الهئية القومية للازاعة والتلفزيون بولاية الجزيرة مديرها الامين وداعة رئيس جمعية القران ، والمقربين منه يقولون انه لايحفظ حتى صور قصيرة من الجزء رقم 30،


د الرازي الطيب ابوقنايه
د الرازي الطيب ابوقنايه

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة