المقالات
السياسة
مليون دولار بتاع فنلتك
مليون دولار بتاع فنلتك
04-22-2014 08:04 AM



السوداني الكسب مليون دولار في الام بي سي عمل ضجه كبيره لبرود اعصابو عندما اتصل به الاعلامي الاغا واطلعه علي الخبر. اول حاجه, ونيابه عن كل فقراء بلادي بشكر كل الناس الدافعو عن برود الاعصاب دي وخصوصا الاخوه فيما وراء البحار من سعودين وغيرهم. بس ياجماعه الموضوع اكبر من كده بي كتير. حسب وجهه نظري في حاجتين مهمات كانو ورا البرود القاتل دا. الاولي, حليل زمن الفرح فقد مات جوانا. والتانيه, نحنا ياجماعه لمن ننوم بنكون مادايرين اي حاجه تزعجنا حتي لو دشليون دولار سيبك من المليون الهايفه دي.
بالاضافه للحاجات الكتيره الكتلتا الانقاذ جوانا, كان الفرح من اوائل ممن دفنو في دواخلنا. بدت الحكايه من ايام الخدمه الوطنيه وسك الاولاد في الشوراع وترحيلهم للجنوب. تلقي اسره فقيره تعبت في ولدا لمن اتخرج من الجامعه. فبدل من الفرح بالانجاز دا تتمني امه الفقيره وابوه الغلبان لو ماكان اتخرج حتي لو يصرفو عليو زياده عشان ماتستلمو الحكومه وتسفرو الجنوب. ولا نسيتو؟ جات بعد داك حكايه الشغل. مش لو اتخرج الشاب دا من احسن كليه وكان المعدل التراكمي بتاعو 4.0 , لو بقي انشتاين زاتو ماحايلاقي شغل لانو الوظائف كلها محجوزه لي اولاد الكيزان واذيالهم من مستهبلين ومتسلقين وعبيد السلطان. اها امو وابوهو مرضو من التفكير ومات الفرح الكان مستننو جواهم. في نوع تالت من الشباب اي باب طرقو ماجاهم رد. لاهجره لا شغل لا عرس ولا اي شئ فمات الفرح جواهم اتوماتيكيا. حتي اصحابهم اولاد الكيزان الزاملوهم في المدارس والجامعات فتحو ليهم. الحكايه دي ولدت في نفوس الناس الاحساس بي عدم التصديق بما يقال لهم خصوصا لو كان حاجه مفرحه. فالفرح اصبح سراب في السودان. تجي انته يالاغا, اكون انا نايم في الظروف الاتربينا فيها دي, تقول لي كسبته مليون دولار؟ مش الحمد لله الماقفلته السماعه في وشك؟ عشان كده ياناس الام بي سي ولدنا دا معزور. مش انتو, لو جات ليله القدر (ظاتا) برضو كان حا يتصرف بي نفس الطريقه دي.
الحاجه التانيه, موضوع النوم الكان فيو الراجل. ياناس بره اعرفو انو نحنا ناس جوه في السودان ومما جات الانقاذ بقينا ننوم بامر الحكومه بدريييي وبالرجاله كمان. عجبك عجبك ماعجبك تتلطش زيك وزي اي غنمايه بره القطيع. دا من ناحيه, ومن ناحيه تانيه, النوم ذاتو بقي بالنسبه لينا هروب من الواقع العايشنو. سلخ شديد بالنهار. طبيعه تسلخ فيك وطبيعي مسلوخ. مناتله ومعافره من الصباح للمغرب زي الزول الراكب الحصان الجامح داك البوقع الزول بتاع الغرب الامريكي. عشان كده الواحد مايصدق يخت راسو دقيقه ويكون نام. ومرات بجلي العشا (بكسر العين) وطوالي مجلي العشا (بفتح العين). اها لمن النوم دا يتملكنا بنكون خلاص في عالم الاموات ومادايرين اي زول يجي يصحينا لانو الصحيه بكون وراها مصيبه. فلان مات ولا في المستشفي ولا الحرامي جا لملم موبايلات البيت كلها وشتت. عشان كده استسلام صاحبنا للنوم كان شئ طبيعي وغلطانه طبعا الام بي سي لانها ماسالت عم قوقل قبل الاتصال.
المهم. بلاي ياناس البرامج التلفزيونيه البتدي جوائز ماتحرجونا ساي وتبقونا ملطشه في مواقع التواصل الاجتماعي. في المره الجايه لمن يكون الفايز سوداني ماتتوقعوهو يتعامل مع الموقف كاي انسان عادي حايفرح وينطط. فالفرح ياناس الفرح زمان اتغبر جوانا ونسيناه وبقينا مدهولين في لاشئ ومابنصدق اي حاجه تحصل لينا حتي لو كانت مليون دولار.
Follow me in [email protected]_elrazi


تعليقات 10 | إهداء 0 | زيارات 2559

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#982386 [عشا البايتات]
3.81/5 (19 صوت)

04-23-2014 05:15 PM
مع كامل إحترامي للجميع وأولهم أخونا د-أبوقناية بس ولا مؤاخذة يعني ممكن أسأل أخونا أبوقناية دا الدكتوراه بتاعته دي كان بحثها الرئيسي في شنو؟
ومعليش ياجماعة الخير يعني لو كان سؤالي دا مشاتر شوية...

[عشا البايتات]

ردود على عشا البايتات
[babikir] 04-23-2014 09:05 PM
عندك ليو وظيفه ولا كيف..الراجل قال في المعاش سؤالك دا اهميتو شنو ولا دي لخبطه كيزانيه ساي..لكن لو مصر افتكر في فسادالكيزان. خلاص قمتو لي عوارتكم


#982385 [عشا البايتات]
3.54/5 (20 صوت)

04-23-2014 05:14 PM
مع كامل إحترامي للجميع وأولهم أخونا د-أبوقناية بس ولا مؤاخذة يعني ممكن أسأل أخونا أبوقناية دا الدكتوراه بتاعته دي كان بحثها الرئيسي في شنو؟
ومعليش ياجماعة الخير يعني لو كان سؤالي دا مشاتر شوية...

[عشا البايتات]

#981505 [jackssa]
3.91/5 (21 صوت)

04-23-2014 12:06 AM
... تحياتي للدكتور أبو قناية ... تحليل مبدع سـاخر ...

[jackssa]

#981454 [ڤنچاط]
2.22/5 (20 صوت)

04-22-2014 09:36 PM
مبدع ورائع بصراحه كاتب عبقري

[ڤنچاط]

#981283 [محمد]
3.33/5 (20 صوت)

04-22-2014 04:58 PM
عجائب ومحن

[محمد]

#981279 [Mohd Magdi Altayeb Abugnaia]
4.12/5 (19 صوت)

04-22-2014 04:55 PM
مقال جميل جدا!
وعنوان اجمل!
والكاتب ولا اروع!

[Mohd Magdi Altayeb Abugnaia]

#981214 [أبو حسين]
2.30/5 (20 صوت)

04-22-2014 03:29 PM
أنت عارف يا دكتور الدهشة لها أثر عندما يكون العدم هو المسيطر عليك ويأتيك الأمل بعد عدة مشاركات ومحاولات وكل حلقة تتوقع أن يرن الهاتف ولكن هيهات لا يرن وفجأة يرن في وقت أنت فقدت الأمل مؤكد نبراتك سيكون فيها عتاب لتأخر هذا الأمل والجدية ستكون سيدة الموقف وجوهر الموضوع هو الأساس وبالعربي الفصيح خلصنا ، وكما سأل الوالد كيف نأخذ الفلوس سؤال في محله حسب الحيثيات التي ذكرتها ، ولكن الأغا يريد التفاعل والرقص والثناء والشكر له كأنه هو موزع هذا الأرزاق وهو يحب الأنا كثيرا ألتقيكم أنا مصطفى الأغا وكل يوم يردد هذه المقولة مع غرودة عينين ههههه

[أبو حسين]

#980918 [الحاج]
3.41/5 (21 صوت)

04-22-2014 11:44 AM
دكتور الرازي ابو قناية
تحياتي لك واصل الكتابة ونحن متابعين
في مقالك السابق ذكرت هاشم بطري
الظاهر انت اصغر مننا بشوية
انا اصحابي واصحاب عائلتنا
ناس ميرغني ومحجوب وقاسم ونفيسة بطري وعمهم الرائع الفنان اخو الاخوان حسين البطري
وانت يا دكتور من عائلة كريمة بمدني معروفة فريق القبة نحن فريق السناهير بالقرب من مخزن السكري (لا ادري موجود ولا الكيزان شفطوهو)
المهم تقول لي الزبير بشير طه والي الجزيرة يا خي ده دفعتي في مدني الثانوية وهو من جزيرة الفيل وكان معه الفاضل حسن خليفة والمنكي وعابدين
هذا الزبير لا يصلح تاجر طماطم في الملجة بتاعة سوق مدني
لكن الكوزنة والتمكين اتت بهؤلاء
يا حليل ناس مدني
عبد الرحيم ابوعيسي
احمد دهب
عبد الرحيم محمود
صديق ود البطلوس
مدني احمد عيسي
موسي مراد
يوسف مرغني
واخرين كثر هذه الصفحة لا تسع
ياخي الزبير دا لا يساوي ود العيلفون او موسي اللورد

[الحاج]

ردود على الحاج
European Union [هجو نصر] 04-22-2014 03:57 PM
والله ياخوي ظلمت شخصيتين كل منهما نادر علي طريقته مثل منسي الطيب صالح , ود العيلفون الذي ما انتحل لنغسه الا اشرف مهنة وهي الشعر ومازال اهل مدني في قعداتهم يرددون ال(ريفرين) بتاع قصيدة له وهو (وكش كشح الوسخ ) وحضر عرسه اعظم اهل مدني من المرحوم عبدالرحيم عحمود اعظم الولاة الدين مروا علي الحزيرة واعضاء حكومته الي اقل الناس شأنا . لقد احبته مدني حبها لدرويشها الاشهر خوجلي لنصاعة دواخلهما . اما اللورد فيكفي ان دراجته كانت خضراء كراهية للتضحر وان مدرسته كانت جنة الله في الارض زرعها تلاميذه وتعهدوها بالرعاية وكان يفرض علي كل تلميذ ان يحضر معه من المنزل قارورة مليئة بالماء تجسبا لانفطاع الماء لاي سبب . رحم الله اللورد واطال عمر ود العيلفون .

[ج الرازي الطيب ابوقنايه] 04-22-2014 02:14 PM
الاخ الحاج..مامتعود ارد علي مداخلات القراء لانو اي كلام يكتبوهو من حقهم بس مداخلتك هبشت حاجه حنينه جوانا وشمينا فيها ريحه مدبي..انا اصغر منكم بي شويه بس استمتعنا بي هاشم بطري واخوهو بكري بطري لانهم كانو اصحاب اخوانا الكبار ناس امير وجلال ابوقنايه..ياحليل كل الناس القلتهم ويحليل السينما الوطنيه والخواجه وبتاع الليمون والقطر والجد (رحمه الله) وبعويا ومحمد علي كرار وعمر علي كرار ومحمد ثلاجه وجيبو والهادي الفضلي وزاهر وعباس الفضلي وجلال اجعص وبابا واحمد الشهاوي. تعرف كل واحد من ديل عندو زهره عايشه جوانا..ياحليل ناس مدني وياحليل فريق النيل كمان وشكرا ليك اخوي الحاج للمداخله الحنينه.


#980835 [عبد الرحيم سعيد بابكر]
3.09/5 (19 صوت)

04-22-2014 10:43 AM
شكرن دكتور الرازي..غايتو دي طلعتنا منها "زي العجين من الشعرة"..وبعدين إت قايل نومنا زاتو خزاز..وغالبا نحلم بالعيش..شكرن استمتعنا معك..

[عبد الرحيم سعيد بابكر]

#980813 [السر موسى]
3.66/5 (21 صوت)

04-22-2014 10:27 AM
مليون دولار بتاع فنلتك /////////////////////////////////////////////////////
ههههههههههههههههههههههههههههههههههههههههههههههههههههههههههههههههههههههههههه
عنوان جميل ههههههههههههههههههههههههههههههههههههههههههههههههههههههههههههههههه

[السر موسى]

د الرازي الطيب ابوقنايه
د الرازي الطيب ابوقنايه

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة