المقالات
السياسة
قصيدة _ ناس .. وناس
قصيدة _ ناس .. وناس
04-22-2014 10:34 AM


ناس .. وناس

ناس عايشين وناس دايشين

وناس في الدوشة ما لامين

وناس ميتين وما حاسين

وناس عايشين زي الميتين

وناس بالعِيْشَة مهمومين

وناس تاكل العنب والتين

وناس يوماتي مديونين

وناس ما ضاقوا طعم الدْيْن

وناس في (وثبة) ملمومين

وناس يوماتي مسحوقين

وناس تلعب باسم الدِين

وناس بالدِين ملانة يقين

وناس سكنت بيوت الطين

وناس في أيجار سنين وسنين

وناس في عشة مستورين

وناس ما بستُرُمْ قصْرين

وناس طالعين وناس نازلين

وناس زايدين وناس ناقصين

_ _ _ _ _ _ _ _

وناس ماشين وناس وافقين

وناس سايقين وناس راكبين

وناس قايمين وناس قاعدين

وناس طاقشين وناس زاحين

وناس دارسين ومجتهدين

وما لاقينّو نُصْ تعيين

وناس صينية بس لافين

وناس بالواسطة شغالين

وناس كايسين وما لاقين

وناس لاقين وما كايسين

وناس بالركشة مدعوكين

وناس مهلوكة بدوامين

وناس فطَّت سطر سطرين

وناس درداقة درداقتين

وناس درداقتم كرعين

وناس جوة البلد نازحين

_ _ _ _ _ _

وناس بالريدة مشغولين

ناس (واتساب) وناس بي (زين)

وناس لي بختهم راجين

وناس تحت الشجر قاعدين

وناس دايرين وما جاهزين

وناس جاهزين وما رايدين

وناس محجوزة لي زولين

وناس روح واحدة في جسدين

وناس اتوحدوا القلبين

وناس ادوها نار البين

وناس بي طبعهم سمحين

وناس بي طبعهم شينين

وناس ناعمين وناس خشنين

وناس نايرين بدون تلوين

وناس طاعمين وناس مرين

وناس باردين وناس سخنين

_ _ _ _ _ _ _



وناس ما عرفنا جو من وين

وناس ميلاد وناس تسنين

وناس نكِرات ومسئوولين

وناس همباتة معروفين

وناس بالسُلْطة مهروسين

وناس قسموا البلد نُصّين

وناس بالسُلْطة محروسين

وناس محروسة بي ياسين

وناس رفعوها بالتمكين

وناس ممكونة ليها سنين

وناس دبلوم تجارة الدين

وناس بنزين وناس جازولين

وناس في سُكَّر التموين

وناس في حُقنة المسكين

وناس تخزين وناس تعدين

وناس بدل الوزارة اتنين

وناس بدل الكرش كرشين

وناس بدل الوشيش وشين

واكيد مَرَتين .. وتاني اتنين

وناس مَرَة واحدة ما طايلين

وناس من اللهْ ما خايفين

وناس ... مجهولة الابوين




ضياء الدين مدثر رجب

برلين

[email protected]


تعليقات 2 | إهداء 0 | زيارات 2135

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#981459 [ناقد أدبي]
3.54/5 (21 صوت)

04-22-2014 09:54 PM
قصيدة دمها خفيف وفيها تصوير للواقع.. وموسيقا خفيفة وجميلة.. أنا متخصص لغة عربية وقريت قصائد كتييرة.. (قصيدتك سمحة يا ضيا الدين.. عشان مكتوبة في برلين).. وحتكون أجمل إذا وقفت بنفسك أمام الجمهور وألقيتها عشان فيهاصور ومشاهد درامية.. بالتوفيق

[ناقد أدبي]

ردود على ناقد أدبي
[ضياء الدين مدثر] 04-23-2014 12:15 PM
مشكور كتير أخي (ناقد أدبي).. وان شاء الله تتحقق أمنيتك والقيها أمام الجمهور في سودان ينعم بالحرية وتكون انت ضمن الحضور... ونذكر بعض بالتعليق دا.... الله يحفظ العباد والبلاد ..

تحياتي ..
وكل الود

ضياء الدين


#981276 [kamuzu]
4.00/5 (20 صوت)

04-22-2014 04:50 PM
ذكرتني بقصيدة ناس وناس لكاتبها (سوس) بقهوة النشاط بجامعة الخرطوم اواخر السبعينات ومطلعها
ناس تحيا الحياة روقة وناس حيعانة مريوقة
وناس مبسوطة بالميلاد وناس يوماتي مدقوقة
وناس تاكل كباب بالسيخ وناس بالسيخة مفلوقة
وناس تشرب مريسة عيش شوف ناس شربوا جون وووكر

الي آخر القصيدة

تحياتي لك

[kamuzu]

ردود على kamuzu
[ضياء الدين مدثر] 04-23-2014 12:05 PM
الشكر الجزيل أخي ( كازومو) علي التعليق

أقجبتني كثيراً كلمات قصيدة الشاعر (سوس) ... وتمنيت لو أنك أكملتها حتي النهاية فهي ساخرة بحق ... وقد نسمع قريبا يالأستثمار في مريسة العيش الخالية من الكحول وغزو الأسواق العالمية بها..


تحياتي..

وكل الود ..

ضياء الدين


ضياء الدين مدثر رجب
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة