المقالات
السياسة
ماذا لو أصبح ياسر عرمان واليا للجزيره
ماذا لو أصبح ياسر عرمان واليا للجزيره
04-25-2014 09:05 AM

ماذا لو أصبح
قبال ما نضع حيثياتنا امام الملاء باحقيه السيد ياسر عرمان في ان يصبح واليا لولايه الجزيره, لازم نرسل رسالتين بخصوص استقالة الوالي السابق السيد الزبير بشير طه. الاولي للمولي عز وجل نحمده فيها ونشكره بان ازاح من كاهلنا كابوس كنا بنتخيله حايستمر الي نهايه العالم. وبنطلب منو ياخد لينا بي حقنا من الراجل دا نشوف فيو يوم يتعذب ذي ماعذبنا ويبقيو لينا زي مشردي وفقراء ولايه الجزيره الضاقو الويل في زمنو. الرساله التانيه ليو هو شخصيا. اها العز وراح يلا زمن الجهاد الجد جا ورينا فراستك. عربات وبيوت ومال وسلطان انتهو وانته كنته هارينا عديل بي حكايه الجهاد بتاعتك دي. يلا امشي السوق الشعبي وشيل شنطه الحديد حقتك وعلي جنوب كردفان عدل. امشي هناك في معسكر بتاع مجاهدين بياكلو بوش وفته عدس اقعد لينا تلاته شهور واستني الحور العين عشان نحنا زاتو نرتاح من خلقتك دي. وماتفتكر حاننسي حكايه سكنتك في بيت الضيافه في مدني ولا قعدت اولادك في بيت الجامعه في الخرطوم. شاحدين العلي القدير ديل يكونو البرجحو كفه ميزانك السالبه يوم القيامه ويحشروك في غياهب جهنم مع الظلمه والمفسدين الي ابد الابدين.
نرجع لي موضوعنا. انتو مش الوالي الاسبق عبد الرحمن من ناس ولايه الجزيره؟ والوالي السابق برضو؟ طيب ياسر عرمان من ولايه الجزيره كمان. جد جد. الزول اتربي في المشروع وابوهو راضي عنو ولسع عايش هناك. نحنا دايرين نغير شويه من الاسلامويون مع بدايه الحوار الوطني ونضع حجر الاساس للحكومه الانتقاليه. اول خطوه جاده لبناء الثقه يقوم بيها المؤتمر الوطني يجيب لينا ياسر عرمان واليا للجزيره عشان كمان يكون اول مسئول في التغير المنشود. والكلام دا دايرين يقولو ليو السيد غندور في اديس ابابا هسع ويجيبو معاهو في الطياره ويجي عشان تشوفو ولايه الجزيره دي تبقي كيف. بي ميكانيكيه الانتخابات القادننا بيها ناس المؤتمر الوطني الراجل جا نمره 2 من حيث عدد الاصوات؟ يعني مفروض بي اليات الديموقراطيه المديا الرئيس الشرعيه بتديو منصب زعيم المعارضه بلا منازع. يبقي هو احقه من اي زول يكون في منصب بعد الرئيس مباشره. في بعض الدول المحترمه ديموقراطيا ممكن زعيم المعارضه يبقي الرئيس سيبك من والي الهينه دي.
طبعا ناس الاسلام السياسي المنتفعين والحراميه طوالي حينطو لينا وحايفحمونا بي كيف يحكمنا شنو ماعارف ونحنا اولاد القعقاع والهتافات الفارغه دي. نحنا ياجماعه اي زول جابو لينا في ولايه الجزيره طلعت منو ريحه فاسده والولايه بقت في القاع. وما في ولايه الجزيره بس, في كل ولايات السودان الناس الحول المسئول غرقانين في الفساد للطيش. مش كفايه ناس مكتب والي الخرطوم لاهطين ليهم مليارات في وقت الناس حق البوش مالاقنهو. علي الاقل الراجل بي كارزمتو حايقدر يكون راس الرمح في التغير للسودان كلو. تتذكرو حملتو الانتخابيه الفاتت كانت عن التغير؟ علي الاقل نشوف تغير تغير ولا كرت محروق ساي. طبعا الكلام دا لو المؤتمر الوطني جادي في موضوع التغير. اما لو الموضوع بس لووك كلام ساي, سيبونا في فقرنا وسيبو الراجل في غابتو وخلو حراميه المؤتمر الوطني يبقو زي قاروون اصلها بايظه. والله لو جبتو لينا اي متاسلم في الجزيره حتي لو بقي شنو كده ماعارف برضو حايلهط حايلهط. الناس ديل اللهط بقي جاري في دمهم. مش كفايه امير المجاهدين الفات دا.
للاسف الشديد لا مؤتمر وطني ولا حركه اسلاميه حاتقدر تستوعب الكلام دا مع اقتناعهم التام انو ناسهم حراميه. والناس ديل بقي غير نفسهم ماعندهم حاجه. لا شغل للبلد ولا للدين ونتحدي اي زول يجيب لينا اسماء مسئولين في الولايات شغالين بي (هي لله) عشان نوريهو عملو شنو وحالهم اتغير كيف من فقر مضجع لي غني فاحش. عشان كده لازم يحصل تغير حقيقي ويبتدي بي ياسر عرمان واليا للجزيره.
انا وانت وانتي كلنا سودانيين مش بس الكيزان ومن حقنا نقول كلمتنا وراينا بي صراحه شديده. كاولاد للجزيره دايرين تغير حقيقي بي ناس حقيقيين. سيبو الهوس الديني بتاعكم دا وجيبو لينا مسلم حقيقي بخاف الله وياريت لو كان المناضل عفيف اليد واللسان ابن الجزيره ياسر عرمان. سؤال اخير. انتو الفاتح الكرنكي دا شنوووو؟؟
Follow me in twitter @elrazi_elrazi


تعليقات 15 | إهداء 0 | زيارات 2575

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#985963 [kamuzu]
0.00/5 (0 صوت)

04-27-2014 11:17 AM
اضم صوتي للدكتور ابوقناية في ترشيح المناضل ياسر عرمان واليا لهذه الولاية المنكوبة فهو قد تربي بين سيقان قطنها الذي كان ياتعا ةشرب من مياه ترعها وقد كان لي الشرف ان اكون استاذا له بمدرسة الحوش المتوسطة حيث كان من انبغ الطلاب بها
لن يعرف الجزيلرة الا اولادها الذين ولدوا وترعرعوا فيها .....
ام عن تساؤلك ( انتو الفاتح الكرنكي دا شنوووو؟؟) .. فهو احد الخوازيق الذين ابتلانا الله بهم ..وتكفي نظرة خاطفة علي ما آل اليه حال مدينتنا الجميلة ودمدني في عهده ..عفن ووسخ وشوارع مكسرة بعوض ملاريا والكثير الكثير...
ياليت ان يرضي المناضل ياسر عرمان بهذا المنصب لتر ماذا سيقدم لانسان الجزيرة اولا وللسودان اجمع ثانيا...ياليت

[kamuzu]

ردود على kamuzu
European Union [عالم وهم] 05-09-2014 04:40 AM
يعني لازم دائما تطبل لقريبك الاهبل ياودابوقنايه الفي السعوديه


#984811 [سارة]
5.00/5 (1 صوت)

04-26-2014 09:56 AM
مع إحترامي للاخ ياسر عرمان لكنه غير مؤهل لادارة التمنية في أي جزء من السودان ولو كان القتال من أجل نيل الحقوق يكفي لكي تنجح في إدارة البلد لنجح قادته في الحركة الشعبية سلفاكير وباقان ونحن نراهم يفشلون حتى في المحافظة على ما وجدوه من بترول، نعم لكل مرحلة رجالها وياسر قدره أن يناضل من أجل الحقوق ويبتعد بعد ذلك لاشخاص مؤهلين أكاديميا في الادارة و مشاريع التنمية الين يقومون بتشخيص الحالة وأعني به تشخيص فني وليس تعميم والجزيرة بها من البروفسيرات ما يعين على ذلك.

[سارة]

ردود على سارة
[كوشن تود] 04-26-2014 01:19 PM
يا شيخة هو ما حيحكم الولاية لوحده بل سيأتي بالخبراء كل في مجاله .

المطلوب بروفسرات حق وحقيقة ويكونوا مخلصين وما حرمية ذي بروفسرات الكيزان .


#984446 [ابوعديلة]
0.00/5 (0 صوت)

04-25-2014 08:06 PM
ليجعل للكيزان عاليها سافلها .

[ابوعديلة]

#984390 [شهيد مشروع الجزيرة]
0.00/5 (0 صوت)

04-25-2014 06:03 PM
يا دكتور انت ودمدني وودالبلد كيف

تنسب عبدالرحمن سرالختم والمطرود الزبير

طه الى ودمدني؟ معقول يا ودابقناية.

واحد جاي من حجر الطير وواحد جاي من عتمور

ابوحمد.يا دكتور دي كبيرة شوية وانت عارف

مدني شارع شارع وبيت بيت وهل سمعت زول قال

الناس من مدني ادعوهم لمناطقهم هوخير لهم

[شهيد مشروع الجزيرة]

#984387 [مالك الحزين جدا جدا]
4.00/5 (2 صوت)

04-25-2014 06:01 PM
والله نحن راجيين ياسر عرمان ليكون حاكم السودان كله ,,عشان يزيل الغبن من الناس الغبش ديل ,, ويضع الامور في نصابها ,, ويريحنا من الحراميه الما بيخافوا من الله ولابيخافوا من يوم الحساب

[مالك الحزين جدا جدا]

ردود على مالك الحزين جدا جدا
United States [علي الجمالي] 04-27-2014 10:58 AM
ناس الحركة الشعبية في حوبا هل ازالوا الغبن من الناس ووضعوا الامور في نصابها ياخي هم والموتمر الوطني فاقد تربوي واخلاقي ما تخدع نفسك


#984362 [عمدة]
0.00/5 (0 صوت)

04-25-2014 05:22 PM
قدر ده البلد مافيه رجال. أكّان تمنيت ابليس واليا للجزيرة كان أخير لك من الكيزان ومن عرمان

[عمدة]

#984318 [خالد قدورة]
5.00/5 (1 صوت)

04-25-2014 04:26 PM
والله العظيم بأذن الله سوف يحدث هذا وأكثر ,, لا بد أن يرجع عرمان لبيته وأهله ,, ما يحدث فى الجزيرة يا عرمان وأنت ستقرأ هذا الكلام أعظم وأمر من مما يحدث فى الولايات التى تقاتل من اجلها الاااان ,, أرجع يا ياسر فأهلك فى أنتظار جهدك وجهادك ولئن كنت وحدك سابقآ فالااان كل شباب الجزيرة معك وتحت رايتك وأؤكد لك ذلك ,,, ويا أبو قناية كل السودان يحتاج لياسر عرمان وهناك مثل هذا الاسد كثر فى الجزيرة الباسلة الصابرة ,, فقط الصبر الصبر وكل شىء سيتضح وينضج على نار هادئة

[خالد قدورة]

#984212 [الديمقراطي]
1.00/5 (1 صوت)

04-25-2014 12:57 PM
و الله يا دكتور طعنت الفيل في راسو . و قديت عين الشيطان زاتو بي كلامك ده . لانو دا الكلام الصاح لو الناس ديل دايرين تغيير حقيقي . لكين لو دايرين تغيير عدي من وشك اكان يخلو زولهم دا في محلو .
عشان بعد كم سنة كدا نسالو و نقول ليهو ( هودنا يا هودنا ما شبعتا يا جنا ؟ ) لانو لا قدر الله لو جابو واحد غيرو من نفس الفصيلة بيكون داير ليهو خمسة و عشرين سنة من الان عشان بعدها يا دوبك يكون قرب يشبع اما الفاتح الكرنكي دا فيا خوفي انو يطلع قريب عبد المحمود الكرنكي لانو في الحالة دي يكون ( زيتنا طلع في بيتنا )

[الديمقراطي]

#984174 [زروق]
0.00/5 (0 صوت)

04-25-2014 12:10 PM
سؤال من اليوم فصاعدا انتو البشير دا داير يغير شنو ماالامور في امان الله في نضر المؤتمر الوطني

[زروق]

#984156 [الحاج]
2.50/5 (2 صوت)

04-25-2014 11:51 AM
يا دكتور ابوقناية
ياسر عرمان الناس راجنو للسودان كلو
قالو الوالي السابق كان رافض الاستقالة بحجة انو منتخب
منتخب دي ذكرتني حسن سرور عندما كان حارس منتخب الجزيرة مدني
بوشكاش مع منتخب المجر دخل فيهو تسعة ومن وقتها سموهو قون المنتخب(اي حارس المنتخب)
الوالي المجهاد قال ليك في القصر بكري قرب يشلتو لمن قال منتخب وبطيخ

[الحاج]

ردود على الحاج
European Union [هجو نصر] 04-25-2014 09:20 PM
وقالوا ان باك المنتخب جاتو الكورة ووجد امامه لاعبي المجر فما عرف يوديها وين فصفر له بوشكاش مشيرا لحارس مرماه واومأ له برجله ان يباصي له الكرة ففعل ذلك وهو يتراجف ومن يومها عرف السودان التقريش ! قال منتخب قال !


#984127 [ود الجزيره]
0.00/5 (0 صوت)

04-25-2014 11:12 AM
اثني بشده بس عشان الكيزان بموتو بي غيظهم.. الجزيره منتفعين منها ناس كتار مادايرين زول كويس يجي والي.. دايرين زول يكيسو ويتيسو وهم يسرقو. الوالي الفات دا عبيط ماشفته شكلو وبحب العز والنقنقه والبوبار والحراميه متار في الحاميهم جمالي الوالي زي ود فداسي مدير مكتبو وفيهم الفيو عوجه في نفسو. الفاتح الكرنكي اخو عبد المحمود الكرنكي بتاع جريده الصحافه فاقد تربوي وبس حاميو اخو. تعال شوف بيوتو وعماراتو في كل انحاء مدني.

[ود الجزيره]

#984119 [عبدالله بابكر محمد]
5.00/5 (1 صوت)

04-25-2014 10:59 AM
أصل الجزيرة حقل تجارب مرة إهي ............... ومرة إهي .................. والمصيبة الكيزان يسمعون بمقالك هذا بعلاته الإملائية واللاموضوعية فيستجيبون له - نحن ناقصين الحشرة الشعبية والله لو البشير راجل جد أي واحد كان مواليا للجنوبيين وطردوه شر طردة بعد الانفصال ما يجعل له وزناً وينفيه خارج البلاد أو يحاسبه على الجرائم التي ارتكبت أيام القتيل قرنق لأن عرمان كان معه في الغابة وأبناء الوطن الشرفاء قتلوا في الجنوب وأي أسرة تجد فيها إما فقيداً أو شهيداً والسبب المباشر الحشرة الشعبية ....

[عبدالله بابكر محمد]

ردود على عبدالله بابكر محمد
United States [عزوز بن علي] 04-25-2014 04:20 PM
قال:وأبناء الوطن الشرفاء قتلوا في الجنوب وأي أسرة تجد فيها إما فقيداً أو شهيداً والسبب المباشر الحشرة الشعبية ....
أنت بنفسك قلت ماتو في الجنوب الجنوب دا مشوا للرقيص ما مشوا بردو يقتلوا أولا الناس
قلونا من النفاق دا مرة تقلوا شهداء ومرة تقلوا فتايس ولماذا الندم علي الذين ماتوا في الجنوب ما عرستم علهم حور العين وهل هنالك فوز أكثر من دي_


#984113 [abuloma]
0.00/5 (0 صوت)

04-25-2014 10:51 AM
ماذا لو أصبح
قبال ما نضع حيثياتنا امام الملاء باحقيه السيد ياسر عرمان في ان يصبح واليا لولايه الجزيره, لازم نرسل رسالتين بخصوص استقالة الوالي السابق السيد الزبير بشير طه. الاولي للمولي عز وجل نحمده فيها ونشكره بان ازاح من كاهلنا كابوس كنا بنتخيله حايستمر الي نهايه العالم. وبنطلب منو ياخد لينا بي حقنا من الراجل دا نشوف فيو يوم يتعذب ذي ماعذبنا ويبقيو لينا زي مشردي وفقراء ولايه الجزيره الضاقو الويل في زمنو. الرساله التانيه ليو هو شخصيا. اها العز وراح يلا زمن الجهاد الجد جا ورينا فراستك. عربات وبيوت ومال وسلطان انتهو وانته كنته هارينا عديل بي حكايه الجهاد بتاعتك دي. يلا امشي السوق الشعبي وشيل شنطه الحديد حقتك وعلي جنوب كردفان عدل. امشي هناك في معسكر بتاع مجاهدين بياكلو بوش وفته عدس اقعد لينا تلاته شهور واستني الحور العين عشان نحنا زاتو نرتاح من خلقتك دي. وماتفتكر حاننسي حكايه سكنتك في بيت الضيافه في مدني ولا قعدت اولادك في بيت الجامعه في الخرطوم. شاحدين العلي القدير ديل يكونو البرجحو كفه ميزانك السالبه يوم القيامه ويحشروك في غياهب جهنم مع الظلمه والمفسدين الي ابد الابدين.
وحتى هناك نقول آمين والحمد لله على الذي أذهب عنا هذا الكابوس، ونستمر في الدعاء اللهم لا تغضب علينا ولا تولي علينا ياسر عرمان، اللهم انتقم منه هو أيضاً لأنه وكل الساسة سبب مباشر في ما آل إليه الوضع في السودان، أللهم عليك بهما معاً.

[abuloma]

#984080 [المشتهى السخينه]
1.00/5 (1 صوت)

04-25-2014 10:00 AM
المناضل ياسر عرمان هو نصير المظلومين والبؤساء والمهمشين والعدو الاول لاهل الجبهة الاسلاميه الترابيه التى استعمرت السودان ونهبت ثرواته واشعلت الحروب الجهاديه ضد ابناء الوطن مستخدمة دين الترابى الارضى المزور ذريعة للتخويف والتعذيب .ياسر عرمان منارة وامل شعب السودان فى نيل حريته واستقلاله فهو لن يرضى بأى منصب رشوة ليتخلى عن مبادئه ..ابحثوا عن متلقى الرشا فى بيت المهدى والميرغنى واعرضوا المنصب عليهم فهم يسجدون كل يوم على عتبات الرئيس الدائم المقدسة لنيل بركاته ومناصبه .. عاش الزعيم ياسر عرمان بطل الحرية .

[المشتهى السخينه]

ردود على المشتهى السخينه
[ودعمر] 04-25-2014 07:16 PM
انته يازول جادي!!!!!!!!!!!؟ الكيزان الحرامية بيطيرو لكن زولك الساهم في اشعال الحروب في البلد دي اذا مسك منصب البلد ح تتحول لنار لانو كارهينو ملايين من السودانيين ياسر عرمان شنو يازول!!!!!!!!!!

[وهم السخينة] 04-25-2014 11:34 AM
يا وهم انت ما بتعرف قدر ياسر عرمان...لكن ياسر عرمان بعرف قدر الترابي ...لأنو ياسر سياسي محنك وعنده نظر حتى ولو اختلف مع الترابي لكنه بيحترمه وزاره في منزله واستقبله الترابي كما يستقبل اي سياسي سوداني وغير سوداني طالما ان القضية هي الوطن وامشي لياسر اشرح ليك مضمون الكلام ده لأنك ما حتفهمه من الاول ...انت دائما مع الهتيفة والصفيقة وده نضالك يا وهم!!!!!


د الرازي الطيب ابوقنايه
د الرازي الطيب ابوقنايه

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة