المقالات
السياسة
المهم الفيك اتعرفت
المهم الفيك اتعرفت
04-28-2014 08:16 AM



صديق عزيز شغال في ولايه الشارقه بالامارات العربيه المتحده يعمل مديرا لاداره تحصيل الديون في بنك مشهور. في خلال كم شهر كده قام رفت ليو عدد لا يستهان به من الموظفين الشغالين معاهو لاسباب مختلفه تتعارض مع قوانين العمل. نائب المدير كتب للمدير وقال ليو شوف لينا السوداني دا جنه ورفت الناس كلهم. المدير لقي انو القانون بديو الحق يرفت اي زول يشك فيو بدون تبريرات شفهيه او مكتوبه حتي للمدير نفسو. يعني زي العندنا في السودان مابنسميا المحاكمه الايجازيه. لمن ناداو في المكتب, المدير سالو ليه عملته كده, قال ليو " شوف. انا مامفروض بالقانون اسجل اي حالة فصلته فيها زول من العمل. بس عشان عارف الناس ممكن تتكلم, سجلته كل الحالات الاتخذته فيها قرارات زي دي. بعد شويه برسل ليك ايميل بي (كوبي) للنائب فيها الاسباب الحقيقيه الخلتني اعمل كده. تاني حاجه, اتحداك جيب اي زول رفتو وادرس حالتو, مش حاتشكرني عشان عملته كده, دا انته حاترحلو عديل كده. تالت حاجه انا مامستعد اشغل معاي زول مفروض يترفت, واذا اجبرتوني اعمل كده مع الاسف حاضطر ارفت نفسي." وطلع من المكتب. بلاي شوفو العلم دا كيف. زولنا دا في العقد الخامس من عمرو ومن حمله الماجستير من جامعه معترف بها دوليا. هسع بلاي السوداني الاصيل منو؟
ممكن اي زول يوريني الفرق بين سودانيه الراجل دا وسودانيه عبد الرحمن الخضر؟؟ يعني الببقي داك والي ماقادر يحسم امر ولايتو ودا مغترب مسكون بي الم الغربه بخدم في بلد تانيه وناس تانين شنو لو ماخاينه ساي؟ لمن عرفته تلفون الراجل اتصلت بيو في الشارقه وسالتو عن الواقعه حكاها لي بي حزافيرا. سالتو من رايو في (اللبع) بتاع ولايه الخرطوم والوالي وناسو الضربو القروش. بي كل ثقه في نفسو قال لي " تعرف ياصديقي. المسئوولين في السودان والناس الحولهم مع فقه الستره الدخيل علينا دا وحكايه احفظ كم سوره من القران, مابتودي البلد لي قدام لانو الناس ديل جلدهم بقي خشن بستحمل اي شي. كنته حا اقبض اي زول عندو علاقه بالموضوع دا واكون لجنه اقعدا في اكبر مكتب في الولايه واقفل عليهم الباب واقيف بره شايل صوت عنج. اي واحد ينتهي من التحقيق ويجي طالع ارصعو ليك 100 صوت افش غبينتي وغبينة الشعب المسكين دا. بعد داك اناديهم واقول ليهم تاني ماداير اشوفكم قدامي, وممنوع تدخلو اي مكتب حكومه ولا تجو ماشين بي جنبو ساي". يعيش المغتربين.
معقول ياجماعه مكتب الوالي بقي زي ميدان جاكسون ختف عديل كده وهو ماعارف؟ ونحنا تعبانين وروحنا طالعه مالاقين ناكل غير الكل يوم معانا؟ والله حرام عليكم. البغيظ, قرينا في الاخبار ناس المؤتمر الوطني قالو الوالي ماحايستقيل وحايظل والي علينا لغايه السنه الجايه. نحنا مادايرنو ياخ حتي لو طلع لينا بترول عديل في ميدان المولد. داير يبقي لينا ذي بتاع الجزيره ويقول منتخب وديموقراطيه ورصه زي دي. مادايرنك يعني مادايرنك حتي لو بقيت القعقاع ابن ابي الصخر برضو بنكرهك و(كجناك). كيف تخلي ناسك ياكلو قروشنا؟ وحكايه انك ماعارف دي مش دليل فشل في اداره مكتبك؟ اها نحنا عرفنا المليارات دي, الماعرفنا كم؟
رساله اخيره للسيد الوالي. اكيد سمعته بي كوريا الجنب الصين البتمشي ليها طوالي ديك. بس سمعته بي العباره الكوريه الماتو فيها الطلبه؟ قالو رئيس الوزرا بتاعم قال ممكن يستقيل لانو فشل في حمايتهم من الغرق. هل سمعته بالاستاذ الانتحر الماقدر يعمل حاجه ينقذ بيها الطلبه المساكين الماتو وقال يحصلهم لانو حرام يكونو ميتين وهو حي؟ دايرين نذكرك انو الناس دي لا بتؤمن بي سيدنا محمد ولا بتصلي الصبح حاضر ولا مشت الحج قبل كده. تجي انته مكتبك اتلهطت منو مليارات متلتله زي دي وبتعاين في وشنا كل يوم بدون خجل وزي الماحصل حاجه وكمان داير تقعد للسنه الجايه؟ ياخ انته قلته لو الناس طلعت مظاهرات بتستقيل, يحصل الاكل دا كلو قدامك تقوم تصهين؟ لو استقلته, خير وبركه. ولو لا كمان, الفيك اتعرفت.
Follow me in twitter@ elrazi_elrazi


تعليقات 8 | إهداء 0 | زيارات 2433

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#987815 [ودالباشا]
0.00/5 (0 صوت)

04-28-2014 08:28 PM
يا دكتور ابوقناية


الله يكتر القنا والكاكيز المضببه للسودانين اذا انفجروا شينين الحكاية قرررربت

[ودالباشا]

#987550 [عدي]
0.00/5 (0 صوت)

04-28-2014 03:52 PM
والله يا دكتور انا في مكتبي دا لو العامل النظافو البرسلو يجيب الشاي والسكر دا لو لهط جنية واحدة وانا م قدرتا اكتشفو بعتبر نفسي فاشل وبستقيل خليك من دا والي ولاية يقود الملايييين ياخي ديل دمهم بقري .

[عدي]

#987281 [مريود]
0.00/5 (0 صوت)

04-28-2014 12:28 PM
اسلوبك الدارجي رائع في التعبير عن لاهاطييييييييييييييييييين الشعوب في مكتب الوالي
دائر الجد يا د/ ابوقناية الشعب السوداني يستاهل اكتر من كدا بكتييييييييييييييييير شدييييييد لانو هو السمح لبشكير وعصابته ولهاطييه ان يعتلوا ظهره
لكن الشعب لو كان بفهم ومثقف وبفكر وبعرف مصلحتوا كويس وين القاها ما كان وافق لتجار الدين ديل ينهبوا خيرات الوطن
الشعب السوداني دا ياكافيء البلاء اصلوا ما شافوا اخوانهم في شمال الوادي دي كنسووووووووووووا الاخونجية ديل جنس كنس من وجه الواطة لانهم شعب بعرف مصلحتو كويس جدا
لذلك نقول اتلم التعيس نع خائب الرجاء

[مريود]

#987247 [ابوكوج]
0.00/5 (0 صوت)

04-28-2014 12:05 PM
لو استقلته, خير وبركه. ولو لا كمان, الفيك اتعرفت
يا دكتور يا رازي وكمان ابن قناية يعني كلك عديل في اسمك وآمل ان تكون د/ مش زي شوة اطباء بهائم او مقلعي اضراس خاطين وراء اسماهم حرف الدال ليوهمو الناس بانهم خلاص دكاترة مع انو كلمة دكتور في الاصل كانت عرف للمهندس وبعدين بالله الخضر تمرجي البهائم ده يطلق عليه دكتور امال دكتور الزويل يبقى شنو المشكلة ربنا ابتلانا بدكاترة اخر زمن طبيب اسنان عامل نفسو دكتور وطبيب بهائم عامل نفسه جاب الديب من ديله تفتكر دول من ورائهم فائدة واحد خادع حتى نفسه وعامل دكتور ما ياكل حق اليتامى سيبك من انو يكون امين على حق شعب وانت عايز دول يمشوا ساكت بدون سؤال ولا حتى عقاب لكذبتهم السنين دي كلها على الناس سيبك من خدع دقونهم وعلامات السجود الفي في وجوهم العملوها في سوق لبيا صدقني لم يك يوما اسخر من احد وكنا طوال حياتنا مترفعين عن الذم والشتم وخاصة من وراء الحجب الا اننا فقدنا حتى ادب النقد والحوار لاننا وجدنا اناس جلودهم مش تخينه وبس دول طلعوا ما عندهم مجرد اجساس املنا في وطن يقبر فيه الجميع ان شاء الله بقنبلة ذرية قاصدين بها بلد زي ايران وتخطء وتضربنا عشان يجينا قوم اخرين بجلود ارفع من ورق السلفان وانقى من ما العين

[ابوكوج]

#987185 [د محمد]
0.00/5 (0 صوت)

04-28-2014 11:13 AM
متابعين عن قرب..واصل والله معاك...بقينا مابنقرا غير رايك لانو ياهو راينا

[د محمد]

#987174 [صلاح محجوب]
0.00/5 (0 صوت)

04-28-2014 11:05 AM
غايتو اتفشيت يا أبو قناية الكلام باقي الشعب الفضل يتفشا كيف وبعدين هم ماكلينها ما كلينها وهسع يكونو وصلوا دبي يعني شلت الوالي خليت الوالي اخير تخليهو لانو يمكن يكون شبع حتجيب واحد يبدا من الأول؟؟؟؟؟

[صلاح محجوب]

#987087 [الراصد]
0.00/5 (0 صوت)

04-28-2014 10:19 AM
يبدو ان والي الخرطوم يفضل (رصاصة في راسه) او جريمة ترتكب في حق (احد ابنائه)... ذلك مافعله منفذي اغتيال الصحفي الراحل محمد طه محمد احمد عندما اغلق المسئولون امامهم ابواب القضاء لأخذ مايعتقدون انه حقهم...

[الراصد]

#987009 [صلاح مصطفي أحمد بخيت]
0.00/5 (0 صوت)

04-28-2014 09:34 AM
أبو قناية بقي زي الفاتح جبرا هضربه ساكت والله ياقريبي شكلك كده حيجيك السكري والضغط اليدالواحدة ما بصفق الله يكون في العون .

[صلاح مصطفي أحمد بخيت]

د الرازي الطيب ابوقنايه
د الرازي الطيب ابوقنايه

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة