المقالات
السياسة
وزارة الصحة عايزة مقشة ...!!!
وزارة الصحة عايزة مقشة ...!!!
04-28-2014 09:28 AM



*** في الماضي القريب كتبنا عن وزارة الصحة وقلنا وزارة الصحة عايزة مقشة دي الحقيقة مافي غيرها والله جنس بلاوي في وزارة الصحة وجنس رباطة ومؤتمرجية بسرحوا وبمرحوا في حيشانها ودي فسروها بطريقتكم بالتعجبكم .
*** طبعا الزول بس يبقي كسار تلج وكوز في وزارة الصحة حقتنا دي ويقوم يرهب الجماعة بالامن الشعبي والحزب الغطس حجر السودان في ستين داهية وطوالي من عامل في الدرجة 17 عمالية لزول دكتور كدي بس وريني يالبروف حنفي الونش دي بفهموها كيف زول من عامل في الباب بتاع دخول العربات والزوار طوالي حتة واحدة كدي مش عمل لافته قدام في الاتحاد بتاع ايدام بالمناسبة دي ايدام خبروا شنو كاتب فيها دكتور يازول انقرع الكورس بتاع تحليل الملاريا ابو تلاتة شهور طوالي بقيت دكتور والله ياجماعة دي زمن المهانة في السودان الله يقطع طاريئ الكيزان ..الموضوع خطير عشان مربوط بحياتنا وحياة اهلنا مابنسكت علية بس كدي قول لي يادكتور زمن الكيزان انت كنت في المستشفي عامل وبعداك محضر معمل مشيت برنامج التجسير بشنو ماعندك شهادة تمريض فنية عشان تخش مدرسة المساعديين الطبيين وتشيل دبلوم المساعديين الطبيين وبالدبلوم دي بتم التجسير بة
*** بعدين كلمة دكتور دي درجة علمية ولا ما كدي ياناس المجلس الطبي القمتو حفرتوا لدكتور صديق جماع ودي دكتور ودفعتو موجودة وخريج جامعة كردفان بس زولكم الكوز دي اسالو جاب كلمة دكتور دي من وين وكيف نال البكلاريوس التقني بتاع التجسير دي ولا الزول دي فوق القانون . ولا الحزب السلطة في ليل بهيم عشان نرضية علي حساب ارواحنا وسلامتنا .
*** الحاجة الوحيدة المافيها هظار ولا مجاملات هي مهنة الطب بكل اقسامها وافرعها عشان اقل خطا في التشخيص او التحليل وبودي الزول طوالي علي مقابر دليل بس الظاهر الكيزان ديل استباحو المهنة بالمجلات والترضيات والطرفة المتداولة في الشارع في العهد المايوي تمت مصالحة مابين نظام جعفر نميري وحركة جوزيف لاقو بدا تنفيذ الترتيبات الامنية والسلطة وفتم استيعاب مقاتلي حركة جوزيف لاقو في المؤسسات العسكرية
ضباط في القوات المسلحة والشرطة والسجون والمطافيئ وحرص الصيد وفي الخدمة المدنية ضباط اداريين وماليين في واحد من القادة الكبار ما اتنسب لي اي جهة فنميري سالوا انت عايز تشتغل وين قال لية انا عايز اشتغل دكتور طبعا رد نميري جاهز قال لو عايز تبقي رئيس ممكن واي حاجة تانية ممكن بس الطب دي بقروا قراية لمن عيونك يتفجقن . الكمندر المسكين دي لو حضر زمنا دي بقي دكتور اسع مافي زول بقي دكتور بالشباك.
كسرة
جاي عليكم ياناس العمارة بتقع غرب الاستوب وجنوب المركز التشخيصي .
انتو الرعاية الصحية الاولية دي تسوفي شنو انا شايف لي فوقها شوفها .
مسئوليين من الخير انتو برنامج التغطية الشاملة لرعاية الصحية الاساسية حصل فوقو شنو . وموضوع الخطابات التحمل نمرة (وص/44/أ/1)
نواصل
kitmas59@yahoo.com


تعليقات 0 | إهداء 0 | زيارات 710

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




عمر محمد عمر ود اب كر
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة