أيها المجرم : نفذ تسلم
04-29-2014 11:51 AM


كان العبدلله إلى عهد قريب يظن وليس كل الظن إثم ان حالات الفساد التي يتم إكتشافها بصورة شبه يومية
في كافة أرجاء بلادنا السعيدة والتي أضحت ذات أرقام فلكية سوف يتم القضاء عليها بشكل شبه نهائي في ظل ما يصرح به كبار المسؤولين في الدوله بمحاربة الفساد (والشنو ما عارف) لكنه بعد تصريح السيد وزير العدل في البرلمان مؤخراً وهو يستعرض قضية الأقطان والذي صرح فيه بأن هنالك جهات نافذه مارست عليه بعض الضغوط من أجل الإنحراف بسير القضية هنا أيقن العبدلله بأن القصة (بايظه من كبارا) فكيف لمسؤول متنفذ (أعلي مرتبه من وزير العدل) أن يضغط عليه من أجل إجهاض العدالة والتستر على محاكمة من نهبوا ملايين الدولارات؟
كيف نطمئن أن هذا المسؤول قد أسكت وأخرس العدالة وهي في بداياتها وهدد وتوعد صغار المستشارين ووكلاء النيابة وجعلهم ينحرفون عن جاده الطريق وهو هنا يضغط على أعلي سلطة عدليه بالبلاد ؟ أن من يمارس الضغوط على (وزير) بالطبع يمكنه وبسهوله أن يمارسها لمن هم دونه وبهذا يجب أن تقام للعدالة مأتماً (ونحنا نتولي حكاية العويل) !
وحيث أنه لم تجر أي عملية إقالات أو إستقالات أو خروج من الخدمة منذ خطاب وزير العدل الذي كشف فيه عن ممارسة ضغوط من جهات عليا لم يسمها فذلك يعني أن هذه الجهات لا زالت (بالخدمة) تمارس دورها في حماية الفساد والمفسدين ! وكشئ بديهي يمكننا أن (نخمن) بأن هنالك العشرات من ملفات الفساد تم قبرها دون أن تري النور بفضل (أخوان نسيبه) المتنفذين هؤلاء !
وبما أن هؤلاء المتنفذون الذين عناهم السيد وزير العدل يمارسون الضغوط على العدالة والتستر على الفساد فلابد لقضية مثل قضية (مكتب الوالي) أن تكون مخرجاتها صادمة لكل قانوني ولكل مسلم ولكل مواطن على الرغم من أن أفراد اللجنة التي أصدرت قرارها صرحوا في مؤتمرهم الصحافي وهم في كامل (ماء وجوههم) بأنهم إنما ينفذون القانون وإن كانت هنالك ثغرات في القانون فهذا شأن آخر !
وهنا يسأل العبدلله أعضاء اللجنه سعادة المستشارين الذين نالوا قسطا وافراً من دراسة القانون وشهاداته العليا سؤالا منطقيا وهذه الزاوية مفتوحة على مصراعيها لنشر ردودهم (بس ما يقولو لينا ما إتفتح بلاغ بلاغ جنائي وشنو ما عارف).. والسؤال هو :
وقائع الأحداث تثبت وعلى لسان المتهمين وما توصل إليه التحري أن المتهمين قد قاموا بقصد بأفعال يعاقب عليها القانون الجنائي فهم قد حصلوا على الأختام والورق الحكومي المروس لمكتب الوالي من أجل تنفيذ مخططهم (خيانة أمانة) ثم قاموا بمخاطبة جهات حكومية رسمية بخطابات (إنتحال شخصة) ثم قامو بالتوقيع على تلك الخطابات (تزوير) ... نفترض إنو (الموظفين اللصوص) ديل شايلين الخطابات وماشين على وزارة التخطيط العمراني (إتقبضوا) يعني قبل أن يكملوا تنفيذ الجريمة ويتحصلوا على الأراضي فهل كانو سوف يحاكموا وفق هذه المواد الجنائية وما تقرره من عقوبات ؟ بالطبع الإجابه هي نعم ... (ده لو ما شافو ليهم صرفه ههههه) ..
طيب يا عباقرة القانون في بلادي البائسة الحزينة .. كيف يحاكم الشخص عند شروعه في الجريمة ويطلق سراحه عند تنفيذها وإكمالها ؟ ياتو قانون فى السماء أو الأرض يمكن أن يكافئ من ينفذ الجريمة ويسقط عنه العقوبة الجنائية ويعاقب من يفشل في أكمالها وتنفيذها !! ( فهمونا بس دي تجي كيف)؟
و(إذا أصلو القصة كده ) فإننا نطالب وزارة العدل بعمل ملصقات لتوعية المجرمين والفاسدين من شاكلة :
- أيها المجرم فشلك في إكمل تنفيذ الجريمة يعني عقابك !
- أكمل الجريمة بنجاح ودع لنا الباقي
- أياك ,ان تكتشف في نص الطريق
- أكمل الجريمة .. المكافأة في إنتظارك
- لو فشلتا أسأل روحك ما تسألنا
- نفذ ... تسلم

ولتبسيط هذه القاعدة القانونية الجديده لنج لأهلنا البسطاء نقول في هذا المثال :
1- حرامي تلب بيت ناس شايل معاهو عدة الشغل (عتلة) و(فرار) ومفكات قام سيد البيت صحى من النوم قبضوهو ودوهو البوليس .. وإتحاكم .. سنة سنتين !!
- نفس الحرامي.. دخل وشال الملايات ولقط (الموبايلات) وفتح الدولاب شال (دهب المرا) وطلع ... زول صحى بيهو مافي .. وبعد شهر شهرين قبضوهو بيبيع في الملايات في (الدلاله ) ... قامو قالو ليهو :
- تتحلل !
- أيوه إتحلل
- طيب جيب الحاجات السرقتها دي سلمنا ليها وأمشي !!

كسره :
تنبيه لأهلنا الطيبين : المثال الفوق ده مثال سااااكت .. سامعني مثال سااااكت .. الحرامية السغار وما عندهم ضهر ديل تحلل ليهم مافي .. لكن بس قلنا عشان نشرح ليكم وكده !
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

[email protected]


تعليقات 32 | إهداء 1 | زيارات 7594

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#997761 [عبد الملك]
1.50/5 (2 صوت)

05-09-2014 12:13 AM
يارفقاء صلاة الفجر مثل هذا الكلام يقال فى السمر والونسات مع الأصدقاء اما عبر الإعلانات الصحفية فهذه بدعة جديدة ..

[عبد الملك]

#990136 [salma]
4.13/5 (4 صوت)

04-30-2014 09:01 PM
لاستاذ الفاتح جبرا
ارجو التكرم بلبحث والتقصي حول الموضو ادناه
موضوع طلاب الهندسة المعمارية كالاتي
كل الدفع بضم الدال من خريجي كلية هندسة العمارة من جامعة المستقبل رفض المجلس الهندسي منحهم الرقم الهندسي وهو الرقم الذي يخول لكل مهندس معماري رسم الخرط واجازتها من وزارة التخطيط العمراني والاشراف علي المباني من بناء وهد وخرصانة وغيره جاء الرفض بحجة ان الكورسات التي درسها الطلاب لاتتوافق مع المناهج في الجامعات التي بها كليات هندسة معمارية كجامعة الخرطوم وغيرها
توصلت وزارة التعليم العالي والمجلس الهندسي والجامعة الي حل وسط وهو عمل كورسات اضافية للطلاب تحت اشراف المجلس والجامعة والوزارة ورضخ الطلاب لذلك وجلسوا للكورسا ت وللاسف الاسيف لم يكن هناك اتفاق بين الجهات الثلاث حول من يعد الامتحانات ومن يقيمها ومن يصححها ولا كيف تكون طريقة اعدادها وهكذا رجعنا الي المربع الاول
نحن كاولياء امور نحمل الجامعة برئسها الدكتور ابوبكر مصطفي اولا هذه المسئولية والمجلس الهندسي ووزارة التعليم العالي مسئولية مستقبل ابنائنا ونسال الله ان ينتقم منهم جميعا
نحن نتالم عندما نري الحسرة والالم في اعين ا بنائنا دون مستقبل ودون وظائف علما باننا كنا ندفع الرسوم كاملة بالملايين ( دون تقسيط ) كشرط اساسي للقبول واستمرار الطالب في الدراسة
اللهم ارنا فيهم يوما اسود كيوم عاد وثمود وفرعون وقوم لوط
علما باننا ومع ابنائنا نعمل علي رفع قضية علي كل هذه الجهات حتي ينال ابناءنا حقهم
نحن اولياء امور الطلاب نعول عليك ونامل ان تاخذ هذا الموضوع علي محمل الجد
وحسبنا الله ونعم الوكيل

[salma]

#989961 [طه]
4.00/5 (4 صوت)

04-30-2014 05:31 PM
يا ناس كدي نعمل معادلة بسيطة .... الزاني وإن قرر أن يتزوج من الزانية ( يحلله بالطريقة البشيرية الجهنمية لجديدة ) بالزواج .. رغم ذلك تكون ثمرة هذا الزني ابن لقيط .... طيب القروش اللهطوها الجماعة ديل فوائده ما(ابن لقيط) كيف الناس ديل حللوها وبقى الزاني متحلل أأأأأي رجع القروش بس الولدته القروش دي نسميها شــــــــــــــــــنو .. ( واكيد هي في البنوك ) .

[طه]

#989790 [المجنون]
3.63/5 (4 صوت)

04-30-2014 02:46 PM
يا عمي الفاتح انا مجنون لكني اعقل منك

يا راجل بدل تقعد تتكلم في خط هيثرو كل يوم

ومافيش حد سامعك لان الفاسدين كلهم اعادوا الثقة فيهم

مش كان افضل لك تسرق معاهم خط هيثرو وهسي كان اتحللت

وبكدة تقدر تدفع حق الكهرباء ومرتك تلبس دهب

قال عاقل قال

[المجنون]

#989669 [ابومحمد]
4.25/5 (3 صوت)

04-30-2014 01:11 PM
والله قد اهتزت ثقتنا في القضاء السوداني الى الأبد

[ابومحمد]

#989505 [عيسى الفكى عمر]
3.00/5 (2 صوت)

04-30-2014 11:50 AM
التحلل عبقريه حديثه فى قاموس حرامية الانقاذ طيب حللولنا ناس ولاية سنار والزكاة والحج والاوقاف وووووووووووووووووووووووووووووووو نشوف التحلل ده بيرجع كم لكن الموكد ولا شك فيه ما غادر الى دبى ومليزيا والصين وسنغافوره وعمان ووووووووووووو لن يرجع وخط هيثرو طبعا ده اتبلع واتهضم انشاء الله ماينفعهم ويدخل ود بدر بلاساحق والماحق ةالبلاء المتلاحق فى جسمهوفى جسم كل من نهب هذا الشعب المغلوب عللى امره

[عيسى الفكى عمر]

#989311 [ابو خالد الدمام]
3.75/5 (3 صوت)

04-30-2014 09:33 AM
ياوزير العدل خليك واضح وقول لينا من الذي مارس عليك الضغط ما تخلينا في نص الطريق نور الشعب الغلبان ده بالحقيقة وخليك صنديد ما تخاف بكرة حتمشي من الوزارة دي

[ابو خالد الدمام]

#989245 [كاسبر]
3.25/5 (3 صوت)

04-30-2014 07:50 AM
وفساد الجهاز القومى للاحصاء
اكتشفوهو واتحللوا
ولا لسه؟

[كاسبر]

ردود على كاسبر
[كاكا] 04-30-2014 11:18 AM
منطقتهم،،، الله يجازي محنك يا جبرة ويزيل محن البلد ويقتص ممن عذبوا أهلها وأذلوهم،، آميييين


#989239 [Awad Mahgoub]
3.00/5 (3 صوت)

04-30-2014 07:39 AM
رجعوا المال فهل رجعت الارض الى الحكومه ولا مشت لزول تانى وا داير يجعها طيعا ثمنها اكتر بكتير من الرسوم الرجعت وما بنى على باطل فهو باطل افيدونا عن مصير الارض محل القضيه ماذا حل بها هل رجعت الى مصلحة الاراضى ام بعد

[Awad Mahgoub]

#989228 [hasco]
2.50/5 (2 صوت)

04-30-2014 07:03 AM
عمك المشكلة اكبر من ملايين ومليارات الدولارات المشكلة الاخلاق التي فسدت فكيف لاحد ان يتجرا ياخذ شئ ليس له حتي وان كانت ابره .مانحن عليه الان من تجليات التوجه الحضاري الاسلامي الانقاذي الذين يعاقبون الضعيف ويعفون عن انفسهم ماهو الا احد الادلة علي قرب افول هذه الطائفة الجهوية.
بعدين الشغلة واضحة انو كان مشت القضاء بتجرجر ناس كبااار.يعني دايره درس عصر.

[hasco]

#989085 [عبداللطيف]
4.38/5 (4 صوت)

04-29-2014 10:56 PM
محن سودانيه علي قول شوقي بدري. اين هذه الشخصيه الظريفه لم نقرا له من مده؟

[عبداللطيف]

#989011 [ودالباشا]
2.50/5 (2 صوت)

04-29-2014 08:23 PM
الايام دى كتر الحبوب بس

[ودالباشا]

#988970 [أرسطو]
3.75/5 (4 صوت)

04-29-2014 07:12 PM
أقتباس ( كيف يحاكم الشخص عند شروعه في الجريمة ويطلق سراحه عند تنفيذها وإكمالها ؟)-
يا حبيبنا جبرة - أحكام قوانين سبتمبر الشهيرة - أيام العدالة الناجزة - كانت عقوبة الشروع فى الزنى أكبر و أشد من عقوبة الزنى كامل الاركان !!!يعنى الزول البقبضوه حايم بره البيت عقوبته أقسى و أقوى من عقوبة الزول القاعد شغال جوة البيت - أها ده تقول عليهو شنو ؟؟؟ - و لك تحياتى .

[أرسطو]

#988940 [ابو نصر الشمالي]
3.13/5 (4 صوت)

04-29-2014 06:28 PM
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟
يا حبذا لو دونت التاريخ بين هيثرو وشنو عشان الناس تعرف تنفيذ توجيح الرئيس بياحد كم سنة دا لو اصلو ح ينفذ

[ابو نصر الشمالي]

#988900 [ابوكمال]
4.25/5 (5 صوت)

04-29-2014 05:47 PM
يا استاذ الناس ديل ما كانت نيتهم سيئة حسب فقه التحلل يعني بعد ده الواحد يسرق ليهو ناقه بالقانون الجديد ممكن يرجعها نعجه

[ابوكمال]

ردود على ابوكمال
European Union [Wadalfa7al] 04-30-2014 03:21 AM
ههههههههههههههههه


#988865 [اسير الشوق]
4.00/5 (5 صوت)

04-29-2014 05:04 PM
والله يا استاد جبره انا لا اتبع لاي جهه سياسيه ولا احب الساسيه ولم انتمي لي حزب في حياتي لكن والله يا جبره الناس ديل حيرو الفصاح والعجم بعد ابليس لا يستحون وانا يا جبره متحير الي اي دين ينتمون هولا القطط السمان البلد اصبحت طارده بوس في كل نواحي الحياه قرف لدرجة الغثيان انت عارف الواحد مالاقي كلمات يوصف بيها الحاصل الناس دي معجونه من ياتو طينه والله يا جبره غايتو الواح اموت مطمن انو في ناس حا اتحاسبو اكتر منو بعد ابليس تبا لهم

[اسير الشوق]

#988862 [jangy]
4.50/5 (2 صوت)

04-29-2014 05:03 PM
يا الفاتح اخوى الغباء ليك شنو انت عارف البعمل انقلاب وينجح يبقى رئيس جمهورية والبيفشل يروح الدروة دا ما خلوهو يتمناها

[jangy]

#988834 [غريب ديار]
4.07/5 (5 صوت)

04-29-2014 04:39 PM
ياالفاتح اخوي انت لسع تعبان مع خط هثرو ؟؟ الان ظهرت ملفات ثانيه واختلاسات


وسفسفه خط هثرو ميمثل 25 % منها ؟؟ اها والي الجزيرة قوة عين شالوه واجبروه


علي الاستقاله ولسع بيمارس سلطاته وبقوة عين شديده امس كان بيتكلم في ندوه

وكمان فاتورة غسيل ملابيسه 32 مليون جنيه وفاتورة تلفون موظف بالولاية 10 مليون


وجماعة الخضر (( ممكن شويه كده يقول لينا انه النبي الخضر )) وذلك لعدم محاسبته


نسينا (( كلكم راع وكلكم مسؤول عن رعيته )) وكمان الراجل المحنن دقنه بيتاع


شركة الاقطان وشركة منكوت والله المفسدين اصبحوا اكثر من اللذين يخافون البله.؟؟


وجماعة والي الخرطوم المفروض كل رئيس بكون مسؤؤل عن الموظفين اللي تحت ادارته


يعني معقول البيطري الاسمه الخضر ماشايق ولا حاسي ولا بيسمع عن الفساد في مكتبه


لالالالالالالالالا دي كبيره ؟؟؟ حاسبوا الخضر قبل ماتحسيبو جماعته اللذ1ن خارجوا انفسهم


بقانون التحليــــــــــــــــــــــــــــــــل

[غريب ديار]

#988806 [الفاتح الاسد]
4.00/5 (4 صوت)

04-29-2014 04:12 PM
يا أخوانا معشر قبيلة القانونيين : سؤال مباشرلكل من لديه ضمير منكم : ماهو موقع تصريح وافادة وزير العدل الهمام الذي أفاد فيه بأن هناك جهات مارست عليه ضغوط ؟ طبعا يشكر على هذه الصراحة والجرأة ، ولكن أليس من واجبه بل من المفروض عليه الان أن يكشف عن أسماء هؤلاء حتى تطالهم يد العدالة وتكون سنة حميدة في التأسيس للشفافية الغائبة.ألا يعتبر عدم الافصاح عنهم مخالفة للقانون وجناية في حق الوطن المنكوب؟؟؟؟؟؟.؟أفيدونا أفادكم الله ، بكلام قانوني مؤسس .

[الفاتح الاسد]

#988778 [صبري فخري]
4.50/5 (2 صوت)

04-29-2014 03:49 PM
ما في حرامي ما عندوا ضهر الا يكون سرق حاجة بسيطة جدا ما بتأكل زول معاهو

[صبري فخري]

#988737 [كوز كنافه]
3.50/5 (3 صوت)

04-29-2014 03:12 PM
انت ماشي بعيد مالك القصر الجمهوري ومجلس الوزراء ده فيه ناس بتقدم خدمات بتلهط ملاين في هدمة لاتساوي جنيهات ولو عايز كرتونه ورق اضرب سعرها في الف والفوق يبلع وكلهم مافيا وفواتير تطلع بااسعار خرافيه وناس الماليه يقوليك دي مواقع سياديه نحن ندفع بس والبند مفتوح يعني كثر من الفواتير واعصر ليه وانا اوقع ليك

[كوز كنافه]

#988671 [واحد من الناس]
4.07/5 (5 صوت)

04-29-2014 02:18 PM
طيب يا عباقرة القانون في بلادي البائسة الحزينة .. كيف يحاكم الشخص عند شروعه في الجريمة ويطلق سراحه عند تنفيذها وإكمالها ؟ ياتو قانون فى السماء أو الأرض يمكن أن يكافئ من ينفذ الجريمة ويسقط عنه العقوبة الجنائية ويعاقب من يفشل في أكمالها وتنفيذها !! ( فهمونا بس دي تجي كيف)؟
يا جبرا دى جريمة الانتحار بس اذا شرعت فيها بحاكموك ولو نفذتها بتكون رحت فيها وحسابها قدام

[واحد من الناس]

#988653 [بربندي]
4.50/5 (2 صوت)

04-29-2014 02:10 PM
يقوم علي ادارة الدوله طرطور وفاسد وزوجاته فاسدات واخوانه فاسدون ونائيبه مسطول وحزب واعضاء حزب من قوم لوط فاسقون وشاذون فناذا تتوقع الحصاد يكون ولسع وماخفي اعظم ولاتغرنك التكبيرات والصلوات فنها لزوم الشغل

[بربندي]

#988644 [opti]
2.00/5 (2 صوت)

04-29-2014 02:03 PM
اقتباس:
تنبيه لأهلنا الطيبين : المثال الفوق ده مثال سااااكت .. سامعني مثال سااااكت .. الحرامية السغار وما عندهم ضهر ديل تحلل ليهم مافي !
الكسرة دي اهم حاجة في المقال. الماعندو ضهر يتقبض و يتحاكم و يتجلد و يتسجن و يتخرب بيتو حتي لو سرق سفنجة اما العندو ضهر من اولاد الكلب ديل فعندهم قانون براهم: لو ريحة فسادك فاحت و اتفضحت داخليا (في اطار العصبة) نطبق عليك قانون فقه السترة و حفظ سور القرأن و لو اتفضحت و الناس جابو خبر نطبق عليك قانون التحلل.
رغم اني متأكد انو قصة حرامية مكتب الوالي و حرامية الاقطان دي تم تسريبها لغرض في نفوس الاباليس اولاد اللذين ديل يعني تصفية حسابات و خساسات بيناتهم و شغل للرأي العام و تلميع لصورة العصبة و ليس بدافع حب الوطن او الامانة الخ.

[opti]

#988591 [radona]
4.16/5 (6 صوت)

04-29-2014 01:19 PM
يااستاذ جبرة يبدو ان معرفتك بعلم الفساد السوداني صفر للاسف مع انك رجل يشهد له بالذكاء الخارق
ولكن لا باس دعني اشرح لك ما فات عليك معرفته من علم الفساد وثقافته
اما عن قضية شركة الاقطان فليس من اختلس الاموال هما الشخصين الفاسدين المعروفين انما هنالك شبكة وهنالك نقاطعات وملابسات وهذا سبب الضغط على وزير العدل باعترافه في وسائل الاعلام
ان الفساد مولود شرعي من رحم سياسة التمكين وهؤلاء قد فتحت لهم كنوز الارض السودانية يفعلون بها ما يشاؤون
اما موضوع فساد مكتب والي الخرطوم
هؤلاء يقعون من ضمن الفقرة 101-د من علم الفساد وهي تنص انه في حالة ضبط المفسد باختلاس المال العام يتم الدفاع عنه بموجب قانون شيلني واشيلك واستر علي استر عليك وهو مايعرف بفقه السترة وهو التحلل
على الشعب السوداني ان يحمد الله على اعادة 1% من مختلسي مكتب الوالي وهذا ان دل انما يدل ان هؤلاء الفاسدين قد تعاملوا باخلاق ينهى عنها علم الفساد
التحلل والتحكيم هي من المفردات الحديثة في قانون الفساد التي يفتقر اليها القانون الجنائي السوداني الذي يفتقر الى مواد تحاكم مرتكبي الابادة الجماعية ( الجنوسايت)

[radona]

#988587 [kareem]
4.15/5 (8 صوت)

04-29-2014 01:15 PM
ما فيش فساد يا عباد الله. بل هناك سوء ظن بالمؤسسات الحكومية.

[kareem]

#988576 [اللدر الفوق ضهرو الخبوب والطين]
3.00/5 (3 صوت)

04-29-2014 01:09 PM
استاذي الفاضل جبرة
لاتندهش كثيراً لمسألة اطلاق صراح المتورطين في مكتب الوالي أو شركة الأقطان
اذا أدين هؤلاء فسيجعلونها علي وعلى أعدائي وسيضعون الحبل على الجرار وتسقط رؤوس كبيرة والغة في هذا المستنقع الآسن . هذا السبب ببساطة حماية الرؤوس الكبيرة من اعترافات الأسماك الصغيرة

[اللدر الفوق ضهرو الخبوب والطين]

#988574 [دا كلام ما صاااااح]
2.50/5 (5 صوت)

04-29-2014 01:08 PM
يا استاذ انت معلوماتك قديمة
القال ليك منو الحرامية الصغار ما عندهم وجيع؟؟
ما سمعت بلاعب الكورة الكتل الحرامى جووووووة بيته؟؟
حكموا عليهو بالسجن والدية "دية لى زول جاك جوووة بيتك ، يعنى يا يسرقك يا يقتلك"

الحرايى للحرامى بيحن

[دا كلام ما صاااااح]

#988568 [FadlAllah]
3.00/5 (2 صوت)

04-29-2014 01:04 PM
إذا فلتوا من عقاب الآن فكيف بعقاب من يمهل ولايهمل
غايتو يا أستاذ الشكية لأبو يداً قوية
من أهلك عاد وثمود وقوم لوط وفرعون
دعوة المظلوم ليس لها حجاب من الله

[FadlAllah]

#988553 [نضحك والا نبكى]
1.00/5 (1 صوت)

04-29-2014 12:59 PM
ورونا يا اخوانا نضحك والا نبكى نبكى والا نضحك ؟
اذا اصيب القوم فى اخلاقهم فأقم عليهم مأتما وعويلا
لكن فى ماتم يستمر 25 سنة ولسع ما رفعوا الفراش

[نضحك والا نبكى]

#988510 [ابوبكر]
2.75/5 (3 صوت)

04-29-2014 12:28 PM
الله يحل لباسهم كلهم ... هو وزير العدل كان فيهو ذرة عدل كان بقى راجل وقدم استقالته كمان ما بيخل يقول ضغطوني !!! ده ضغط جنسو شنو يا ربي ؟

[ابوبكر]

#988489 [الهواري]
4.25/5 (5 صوت)

04-29-2014 12:15 PM
عن عائشة رضي الله عنها - ان قريشا اهم شأن المخزومية التي سرقت فقالوا من يكلم فيها رسول الله صلي الله عليه وسلم فقالوا من يتجري عليه الا اسامه بن زيد حب رسول الله صلي الله عليه وسلم فكلمه اسامه فقال اتشفع في حد من حدود الله ثم قام فأختطب أنما أهلك الذين من قبلكم انهم كانو اذا سرق فيهم الشريف تركوه واذا سرق فيهم الضعيف اقاموا عليه الحد وايم الله لو أن فاطمه بنت محمد سرقت لقطعت يدها .
صدق رسول الله صلي الله عليه وسلم

[الهواري]

ردود على الهواري
United States [fadeil] 04-29-2014 04:23 PM
هذا هو العدل يا هوارى، فأين لنا نحن منه؟.


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة