المقالات
السياسة
هل سوف يفعلها هذا الشعب ويسقط هذا النظام ..؟؟
هل سوف يفعلها هذا الشعب ويسقط هذا النظام ..؟؟
04-29-2014 02:52 PM


الخوف بقى ذى الكالسيوم فى تراكيب العضام ومافى زول شغال بالحاصل الانقاذ ارهقت الشعب بارتفاع الاسعار فى السلع الضرورية وارتفاع سعر تعريفة المواصلات العامة وارتفاع فى كل شئ ..
الناس حيلها انهد من الجرى الواحد يقوم من الصباح يكابس فى المواصلات عشان يحصل الدوام وبيكون مهموم بحق الفطور للعيال ومصروفات المدارس من رسوم واداوت مدرسية من كتب وكراسات وغيره .. وهذا غير حق الايجار وفواتير الكهرباء والماء ..
بالله الواحد من كترة الهموم لمن جاهو ضغط فى الدم وفى الاعصاب وفى كل شئ ..
ياجماعه .. نحنا منتظرين شنو ؟؟ده سؤال مطروح للكل ..؟؟؟النظام كما نرى منهار و متخّبط ، عايز دفرا عشان يسقط
نطالب جميع القيادات السياسية ان توجه دعوه كبرى للخروج الى الشارع وهو (( المخرج الحقيقي )) لازمات هذا البلد المنكوب للحفاظ على ما تبقى منه من تخريب هؤلاء اللصوص والقتله .....
.. و الدعوه موجهه للنخب والمثقفين وللشرفاء في قواتنا المسلحه وللنقابات التي تحررت من النظام وللنشطاء وحركات التغيير وللشعب السوداني (صاحب الوجعه ) القابض على الجمر .
هناك مؤشرات مبشرة وحركة دؤوبه وحديث جاد لحتميه التغيير (الآن) لدى جميع قطاعات الشعب السوداني ، يجب ان تتحد المعارضة ران ننبذ دعوات التخزيل والتخوين ، فى هذا الوقت تحديدآ لا نريد مزيدآ من الخلافات ..
اخلفوا كما شئتم حول برامجكم و اهدافكم المطروحة والمنشوده .. فليكن الاتفاق حول المخرج من هذا النفق هو الهدف هوالهدف يبقى المطلوب من كافة احزاب المعارضة التى ترى فى نفسها الكفاءة ان تدعوا جماهيرها وقواعدها فى مختلف مدن السودان الى الخروج الى الشارع والمطالبة برحيل هذا النظام ..
يبقى الخروج الى الشارع هو الحل .. لان كل الخيارات التى استخدمت مع هذا النظام سوى على مستوى طاولة الحوارات او على مستوى الميدان عبر الحركات المسلحة لم تجدى نفعآ مع هذا النظام .. أنا بعتقد ان كل الانظمة الديكتاتورية والشمولية لا تجدى معها لغة البنادق لان لغة البنادق سوف تمد فى عمرها وسف تزداد معاناة الأبرياء من قتل وتشريد وغيره وأيضآ الخيار العسكرى سوف يخلق لنا نظامآ ديكتاتوريآ آخر يكون أفظع من سابقه .. لذا أنا بفتكر أن الخيار السلمى عبر المسيرات الشعبية والعصيان المدنى هو الذى سوف يسقط هذا النظام .. لأن خلاث لقد بلغ قطار الثورة والغضب الشعبى محطته الآخيرة ..
لابد من التنسيق الجيد بين كل الطبقات المستنيرة من عامة الشعب وكل الحركات الشبابية التى تسعى الى التغيير ومنظمات المجتمع المدنى الاتفاق على خطط وبرامج واسس لترسيخ مفهوم الثورة ونشر الوعى بين الجماهير عبر الندوات الفكرية فى النوادى فى الاحياء والمدن والحارات وتفعيل الحراك الجماهيرى ورفع الحث الثورى بين فئات هذه الشعب حتى نصل الى ما نصبوا اليه وهو اسقاط هذا النظام ..
alharamain_ismail@yahoo.com


تعليقات 3 | إهداء 0 | زيارات 903

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#988823 [كتكوت]
0.00/5 (0 صوت)

04-29-2014 04:25 PM
والله كان بتضمن لينا انو ال الميرغني والمهدي ما يمسكوا زمام اللمور بنطلع ونموت كمان!
ولو ما بتضمن لينا خلي الرجال ديل قاعديين ويصرفوا الميرغنية والمهدية من، اموالنا
بالله في واحد بدوهوا مليارات كل كم شهر بطلع الشارع!!! والله دا كلااام قال القوي السياسية قال!!! م

[كتكوت]

#988746 [al wasbah]
0.00/5 (0 صوت)

04-29-2014 03:18 PM
احرموني ولا تحرموني
سنة الإسلام السلام
المجد لله في الأعالي
وعلى الأرض السلام ..

قدلة يا مولاي حافي حالق
في الطريق الشاقِّي الكلام ..
في الفؤاد ترعاه العنايه
ملء ُ روحي وعزَّ المنام ..
لو هزمت بلملم ُ غنايا
ما بخونو وأبيع الكلام ..
ما بسلم شرف الدوايه
للهواجس وليل الخصام ..
غير ذلك ما عندي غايه
غير ذلك بئس الختام ..
مني شايف شابت مفارق
ماني خايف ولاَّ انهزام ..
العزايم قط لم تفارق
والأماني تمام التمام ..
لو علي أنا بس ماهو فارق
الدوام لله الدوام ..

تهنا بين هوَّات الفوارق
ياخي ديلك ناس أم هوام ..
كم وكم هم في القلب عالق
كم جراحًا تحت المسام ..
المسالك صبحت مهالك
والحلال في إيد الحرام ..
البخونك لا شكَّ هالك
البجيك في جنح الظلام ..
نحن منَّك ما من هنالك
أيُّ هذا الشعب الهمام ..
نحن منك حقًَّا لذلك
مستحيل أن نقبل تضام ..

كنت ماهل يابوي وساهل
كل دربًا بي ناسو آهل ..
ياحنونًا دافي المناهل
مالو زولك ممكون وناحل ..
وأنت عندك يابا السواحل
والسهول غاباتك مراحل
والشمس والنيل والغمام ..

ياحفيف أنفاس البيارق
في الشوارع ودفء الزحام ..
مشتهنَّك مالك مفارق
لفته منك تشفى السقام ..
الملامح كانت تسامح
والجلوس للحق والقيام ..
والحناجر ليست خناجر
والمنابر ذات احترام ..
كل مايك ولا سلك شايك
بين جموع الناس والكلام ..
يا جلوسًا فوق الأرايك
والمسدس تحت الحزام ..

نحن شعبًا للفجر حايك
دربتنا أيادي الصدام ..
حصُّلوهم حتى الأجنَّه
وصِّلوهم عتبة سجنَّا ..
كنتو إنسًا أم كنتو جنَّا
سوف نصمد مهما حزنَّا ..
لو نلاقي الموت
سنَّه .. سنَّه ..
وكل قطرة دم تبقى حنه
الليالي لكي تمتحنَّا
علمتنا مسكنا الأعنَّه
مافي ُحر ًا حريتو منَّه ..
والببايع قط ليس منَّا
والبخون الشهدا الكرام ..

أحرموني ولا تحرموني
سنة الإسلام السلام ..
المجد لله في الأعالي
وعلى الأرض السلام ..

[al wasbah]

#988740 [جيقجاو]
0.00/5 (0 صوت)

04-29-2014 03:14 PM
نحن نريد ثورة حقيقية وليست مجرد ثورة وهمية فقط يقوم بها اصحاب الوجعة من الفقراء والمساكين وفي نهاية المطاف نتفاجا بانتهازيين من السياسيين كما حدت في ثورات الربيع العربي التي اجتاحت معظم الدول العربية . واتمني من الكل ان يتجهوا الي شئي واحد هو السودان فقط لا للمصلحة الشخصية والحزبية الضيقة فانا شخصيا يائس من كل القوي السياسية السودانية لان برامجها مما قمنا ضعيفة وهشة . ونتمني اذا وفقكم الله وقمتم بازاحة الطغاة الذين جثوا لربع قرن من الزمان ينهبون ويكذبون علي الشعب السوداني اولا ان تقوموا بوضع دستور شامل لحل كل قضايا السودان .

[جيقجاو]

اسماعيل الحمودى
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة