ثلاثيات عامية
05-06-2014 10:05 PM


• رزع : تستخدم دائماً في حالة قفل الباب بشده يقال : رزع الخريج الباب بعد المعاينة كناية على صعوبة الأسئلة التي طرحت عليه (من شاكلة عدد المسلمين الماتو في موقعه بدر كم)
• شلع : شلع الشخص أي أحتسى الخمر وشخص (شالع) أي واقف لمبة

• طبز : تستخدم عند أدخال السبابة في العين .. والطبزه هي الفعل الذي يأتي برد فعل سيئ وغير متوقع كطبزة (التحلل)
• شخت : شخت السائق بوهية العربة أي انه (حكاها ) – ما حكومية زكده والشخت هو بقايا لحم الذبيحة وهو لا يؤكل (لكن الأيام دي ناكل ابوهو)
• طفش : أي ترك المكان وتوجه إلى جهة غير معلومة وهي تتلازم وكلمة (خلى) كقولهم : الراجل طفش وخلى للمرا البيت أو كقولهم : معظم الأطباء طفشوا وخلوا البلد .
• ظبط : ظبط أي قبض بالثابتة كقولهم تم ظبط هيئة مياه الشرب وهي تبدد 20 مليون دولار .. وقد كان في زمان غابر يقال لقسم الشرطة (الظبطية) .. والتظبيط يعني الإتقان كقول الموظف للمواطن : خلاس (ظبطتا ليك الموضوع) طبعن بعد ما أخد المعلوم
• تكل : تكل الشئ أي (أداهو سنده) وختاهو على جنبه كقولهم : تكل الموظف الملف (ما لازم يتكلو؟ هو إنتا دفعتا؟)
• كضم : كضم الشخص أي وقع مغشياً عليه وأصبح (لا بيودي ولا بيجيب) كقولهم : مما المدير عرف بالإختلاسات وقع كاضم .. كما أن (الكضم) – بضم الكاف والضاد- هو (الخد) والجماعة أبان (كضوم) أي ذوي الجضوم المنتفخة المتورده كناية على إنتفاخ خدودهم وتوردها من الأكل .. (الحلال طبعن )
• كشم : الكشمة هي الإبتسمة الصغيرة في غير موقعها للتشفي كقولهم : مالك يا زول بتتكشم فيني كده
• قرم : قرم الشئ أي أطبق عليه أسنان فكيه كقولهم : قرم الجقر رجل المريض وهو بالعنبر (حصلت في مستشفي الدمازين)
كما أن الشخص القرمان هو الذي لم يتناول اللحم منذ فترة طويله (يتناولو كيف والكيلو بالشئ الفلاني) والقرمة (بضم القاف) هي جزء من جزع شجرة كبيرة يقطع عليها الجزار اللحم (لما كان في لحم)
• خمش : الخمش هو أخذ الشئ بملء اليد والخمشة من مزاياها أنها تكون مرة واااحده ثمينه (وعلى ماليزيا)

• زعط : تقال عند نزع الصوف أو الشعر كقولهم : زعطت الفنانة عوضية باغات شعر زميلتها حنان رصيد (أختلفوا في النقطة) .. كما يسمي للشخص قليل القيمة للتقليل من شخصيته (زعيط)
• معط : كما زعط غير أن الشخص يسمى ( معيط)
• سهك : أي أزال النتؤ .. عملة معدنية مسهوكة أي لا تبين معالم رسومها .. وسهك فلان (مركوب النمر) أي مشي بيهو أكتر من النمر ذاااتو
• قطم : قطم الشئ اي قطع جزءاً منه بأسنان فكيه وشرطي مرور قطيم أي (ما بتفاهم) !
• لخم : أي شتت الإنتباه .. واللخمه هي حالة من الحالات التي تصيب المواطن عندما يأتيه بتاع العوائد مع بتاع النفايات مع بعض
• كبس : كبس الجزار اللحم في المصران أي أدخله بالضغط عليه عشان يعملو سجق (يا حليلو) .. كما تقال أيضاً عندما يغضب الشخص لدرجه التفوه (بي كلام كعب) كقولهم : الشارع كولو نفايات قام جانا المتحصل والله كبستا ليهو لمن آمن !
• غمت : أي دس داخل اليد كقولهم : الموظف دااااك كان ما غمتا ليهو شغلك ما بمشي
• خرت : تستخدم في لعب الميسر بمعني إستولي على المال كما تستخدم بمعني إزالة كقول إحداهن وهي تخاطب زوجها الذي طلب منها إعداد الطعام : إنتظرني لمن أخرت الحنة دي
• هبر : الهبر هو الأكل بكميات كبيرة (في المرة الواحدة) كهؤلاء الذين (هبروا) مكتب الوالي
• لغف : ك (هبر) غير أنها تستخدم للأشياء السائلة كالسيولة النقدية واللغف والهبر يعتبران من مهددات بقاء الأمم وإرتفاع سعر الولار مقابل عملتها الوطنية
• لهط : اللهط هو الأكل بلا رحمة حتي لا يتبقى في المائده شئ كقولهم : لهط المسؤول أموال المحلية (يعني ما فضل ليهم تعريفه في الخزنه)
• لفح : اللفح هو (الحتف) في سرعة وخفة يد كقولهم : لفح الشماسي الموبايل من الفتاه عندما كانت تتحدث به وعند القبض عليه قال ليهم : يا جماعه أهو ده موبايلكم أنا عاوز أتحلل فكوني ! …. فكوني قال !!

كسرة :
• طنش : بمعني صهين (ذى طناش وصهينة المسؤولين من الواوات التحت دي)

• كسرة ثابتة (قديمة) :
• أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و؟
• كسرة ثابتة (جديدة) :
• أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و؟


تعليقات 8 | إهداء 0 | زيارات 5040

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#997384 [محمد علي مصطفي]
3.75/5 (3 صوت)

05-08-2014 03:57 PM
انا احلف صادق ياجبرة انك بتتناول ليك حاااااجه عشان تكتب عمودك ده

[محمد علي مصطفي]

#996726 [ودالباشا]
3.88/5 (4 صوت)

05-08-2014 07:29 AM
قايتو الطاهر هبش ليك خط هيثروا والباقين ااااخر طناش

[ودالباشا]

#995971 [ابو محمد]
3.50/5 (2 صوت)

05-07-2014 12:20 PM
يااستاذنا جبرا رشيديه عيانه وراقده مستشفي زوجها معاها بقوليها طبعا بلغتهم أعطيك تأكلي هي تقول لا أعطيك عصير لا أعطيك عنب لا أعطيك برتقال لا المهم زهج منها قال ليها طيب أطرحك(أجامعك) ضحكت وقالت والله ضحكتني وأنا وجعانه

[ابو محمد]

#995750 [جاقوم]
3.13/5 (4 صوت)

05-07-2014 10:13 AM
جبره مقالتك حلوة تفك الدبرسة لكن للمفسدين ما بتجيب في راسهم خبر

ياخي ديل دايرين متين الشمس تشرق واليوم يبدأ عشان الواحد يلهط ويهبر

الهبر دباببي تتخيل دكتور الخضر ماعارف الهبر نائم مصنقع 900 مليار والله

لوعارف جمعت من فين من ست الشاي وصاحب الكارو والقبانة والنفايات والعوائد

ليش ولاية الجزيرة دائما يتعاقبوا عليها مفسدين دباببين ياخي الازهري مات
مديون لبشير النفيدي وعبود عرف عنه انه كان برجع العملة الحديدة للخزينة

الفساد خشم بيوت انت عارف موارد السودان كلها ما بتكفي ليها 10 مفسدين


الله يستر علي خديجة ان تصل مستشفي الخرطوم حتي تتناول اوكسجين لانو الازمة قائمة عليها

والله ياجبرة انت راجل طيب دا فساد دباببي قلمك ما بقدر عليه وكلامك دي نسمة باردة

عليهم

[جاقوم]

#995614 [MUTTASIM]
2.50/5 (2 صوت)

05-07-2014 08:21 AM
كشكر اي ترك الشي بين حالين نحو قول الام يا بت كشكري الحلة اي ازيحي غطاء القدر قليلا و تختزل للتعبير عن موقف غير جاد نحو فلان بكشكر ساكت او الرئيس يوجه بتقديم اي مستندات تدل علي الفساد (كشكرة)

[MUTTASIM]

#995552 [السم الهاري]
4.25/5 (3 صوت)

05-07-2014 02:32 AM
خبط يعني شنو ونمو الخبط منو ؟
برم يعني شنو ؟
منو البرم منو؟
شفط يعني شنو ؟
ومنو الشفط منو؟

[السم الهاري]

#995509 [واحد كان سوداني]
2.00/5 (1 صوت)

05-07-2014 12:49 AM
القرم عندو معنى تانى برضو

[واحد كان سوداني]

#995454 [الكلس]
3.13/5 (6 صوت)

05-06-2014 11:04 PM
مش عيب عليك تنكت (النكيت-كما وردت عند حبوباتنا البحيت فى الأماكن الغير مرغوب فى البحث فيها)ومش التنكيت والتبكيت بتاع أهلنا ناس السافل،لمن تجيب ضقلها يتلولح اهو كشفو ليكم الفساد بالكوم فى سنتر الخرطوم وما قدرتو عليهو وأنت ماسك لى فى خيت هيثروا و نايم فى الخط أصلو خيت بشير الحبشى؟

[الكلس]

الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة