المقالات
السياسة
نفسي ابقي وزير ياخ!!
نفسي ابقي وزير ياخ!!
05-08-2014 08:08 AM



الحكايه ابسط مما تتخيلو. كدي في الاول نشوف السودان فيو كم وزير؟ مممم 17 ولايه وكل ولايه فيها ممممم كم هايل من الوزير, زايد تيم من المستشارين بي درجه وزير ياطويل العمر ااااااا نضيف ليهم بعيد عنك مممم الوزراء (البدون) يبقي التوتال تقريبا زي ممم سبعه الف وزير. دا طبعا رقم تقريبي. معقول ياجماعه لا انا لا زول من دايره اصحابي ومعارفي القريبين ما نكون من الجماعه ديل؟ اي في كم قنايابي كده بقو وزراء بس ياحسره كان في اختلاف بيناتنا ايدولوجيا عشان كده مافكرو فينا وانا ماختيتهم في بالي عشان كده قلنا احسن نجيبا بي ضراعنا عديل كده.

طيب نشوف الناس البختارو الوزراء بختاروهم كيف عشان امكن الحكايه تضرب المره دي؟ انتو بالمناسبه السعيده دي, منو البختار الوزراء؟ ناس المؤتمر الوطني؟ اوكي طيب بختاروهم كيف؟ بصلو الصبح مع بعض مثلا, ولا شلليه, ولا الواحد بقوم الصباح بلقي نفسو (برعي)؟ طبعا حكايه الزول يصلي الصبح حاضر دي اسهل حاجه لاننا متعودين عليها من ايام ابوي الشيخ. بس ترتيبات الصلاه في حاله الوزاره كيف ماعارفنها. يعني الواحد يجي متزحزح من الصف الورا لمن يصل المسئول الببقي الناس وزرا في الصف القدام ويقعد بي يمينو ولا شمالو عشان لمن يسلم يقوم يحضنو ويبكي ولا كيف؟ الزحزحه ساهله بس البكاء دا صعب ومامعانا ياخ. مرات كده مره صاحبت امك تحضنك لمن تجي من السفر وتقعد تبكي وانته مخك مدورمع الفيس بوك والوتس اب ماتعرف تعمل شنو. انسونا من البكا دا بليس. موضوع الشلليه برضو صعب لانو خلاص الكوته بتاعه الاصحاب شطبت ومافي طريقه الا لي عابري السبيل. وزي ماقال واحد صاحبنا, صعب الزول بعد دا يعمل اصحاب الا اسفيريا. وشلتنا الهسع دي كلهم بتاعين تنظير ساي. اما حكايه تقوم من الصباح وتلقي نفسك بقيت (برعي) دي سابع المستحيلات. ياخ ديل الواحد فيهم قابض في الكرسي زي الكأنو خلقو ليو. فيهم واحدين ليهم طاشر سنه, وواحدين نقل بس من كرسي لي كرسي زي كمساري الحافله. ولا الجوعارين ديلك. مره ياعمك في واحد شالو من الوزاره عزف منفردا زي بتهوفن, تقول لي تقوم الصباح تلقي نفسك برعي؟

اها الدباره كيفنها ياجماعه؟ لازم ابقي وزير خصوصا لانو الحكايه خمرت في الراس والعمر كمان سرح والركب ساحت. وماابقي ليه ياخ وبتكلم تلاته لغات؟ هسع البنشوفهم كل يوم في التلفزيون ديل احسن مننا في شنو. ظني لغه واحده في تلتله. سوداني سوداني. ابو وام سودانيين (اندي). فوق للاربعين مامشكله. حسن سير وسلوك برضو تمام. طيب المشكله في شنو؟ تعليم وكملناهو ومن اسره محافظه (ويتيم كمان). اكتر من كده نحننكم كيف؟ تعرفو اكتر حاجتين ممكن يقيفو في الطريق شنو؟ الحاجه الاولي يقولو ليك انو الاختيار في الاونه الاخيره بقي الزول (الف) بعرف الزول (باء) يقوم يرشح الزول (جيم) يختارو وزير. وانته تكون لا لامي في لام الالف لا في الياء. الحاجه التانيه يقولو ليك الاختيار بقي من القرايب عديل كده. والقرايب دي كمان ما للوزاره بس, دي حتي لو نفسك في وظيفه عليا, برضو قرايب بس. مش مدير سودانير عينو قريبو؟ ولا في زول كمان داير يقنعنا انو الزول دا اختارو للوظيفه دي عشان كفاءتو. والله الكفاءه ماعارفنها انتو ساي. يبقي الموضوع (قرايب بس). سيبكم من دي ونجي للوزاره. مش في وزير عندو حزب صغيروني كده من الاحزاب الصديقه للمؤتمر الوطني ادوهو عدد محدود من الوزارات الاتحاديه والولائيه, قام ادي اخو الصغير واحده منهم؟ وزيرين اخوان في الحكومه؟ بلاي مش مبالغه. الراجل لارجف ولا خجل بس قال لي اخو تعال هاك الوزاره دي. متشوفنا نحنا يابتاع لندن انته. هسع معقول تكون في مناسبه في بيت العائله الكبير تتلما عربات وزارتك مع عربات وزارة اخوك في بيت واحد دي مش ازمه باركنق للجيران ساي؟ طيب مادام كدا ليه نحنا من اساسو بنفتكر الوزارات دي صعبه؟ خلونا نكب خيال ونشوف نبقي وزرا كيف. وعشان الحته دي انا نفسي ابقي وزير. تعرف عزيزي القارئ انو في وزرا بقو بي طريقه الذه من طريقة الاخونه دي؟

تصدقو مره في حكومتنا دي اختارو وزيره بالغلط وقالو انو الزول الاختارا كان بقصد اسم تاني مشابه لي اسما. والوزيره ياخال دخلت في الدور زي (بيتر اوتول في فلم بكيت) لاقالت ياجماعه الحكايه شنو ولا حتي اندهشت. طوالي لبدت وبقت كمان تعمل لقاءات صحفيه وبرامج في التلفزيون. كل زول من الجماعه كان بشوفا بفتكر رشحا زول تاني لغايه ما الزول العمل الحكايه كشف الموضوع ونضم طوالي لانو كان واصل. المحظوظه طبعا ماقدرو يغيروها, وقررو ينتظرو التعديل الوزاري الجاي. المهم الست الوزيره اتجدعت ليك في الوزاره بي مزاج كم شهر كدا, عربات وسفر وابهه لغايه ماجا التغير الجاي قامو شاتوها ليك. هسع وزاره بالطريقه دي مالا عيبوها لي. انشاء الله 3 شهور بس عشان نعمل كم سفريه للخليج نتجدع برضو علي اصحابنا الهناك واهو الاولاد يقولو ابونا الوزير وبعد داك يازول سجن سجن غرامه غرامه. بلاي اتخيلو معاي الفارهه والسواق والمدام لابده تحت مكيف العربيه متقول بتحب الفشخره والبوبار, والاولاد مقتقتين في البيت من الاسبلت الكهربتو المجانيه والماخمج, والسواق تاني يوم علي المدارس القرانيه الخاصه. والحاله الماهيه. لااابده في الحساب مابتنهبش خالص. والشغل اجتماعات بس وقبض واكل من امواج ساي. وحكايه السندوتشات بتاعة سلطه الدكوه والفول والطعميه الطالعه منها ريحه ورق الجرايد الهارننا بيها كل صباح ديك تكون راحت في الباي باي.

المهم ياناس الحوار الوطني اعرفو نحنا بنمثل شريحه الطبقه الوسطي الذابت بس ماماتت فطيسه. اعتبرونا منظمات مجتمع مدني, جمعيه صلاة الصبح او لجنه استقبال شهر رمضان. وانا لازم تبقوني وزير لازم تبقوني وزير!! ولو ما انا ممكن تبقو محمد بتاع هولنده ولا ياسر بتاع الشارقه اوعثمان الفي الرياض ولا علي الفي لندن اومحمود بتاع نيويوك ولاالدكتور داك الفي استراليا ولا اي واحد هنا في الخرطوم مافارقه معانا, بس لو بقيت انا تبقي باسطه عديل كده.
Follow me in [email protected]_elrazi


تعليقات 7 | إهداء 0 | زيارات 1419

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#997304 [الحامدي ود الحبوبات]
0.00/5 (0 صوت)

05-08-2014 02:38 PM
يا دكتور.....مابالغت ياخييييي....تعرف اوريك اقصر طريقة ...صاحب لي سبدرات وانا بضمن ليك وزارة في اقرب تعديل وزاري جاي....وماتسالني كيف؟؟؟؟

[الحامدي ود الحبوبات]

#997177 [حلم الجعان عيش]
0.00/5 (0 صوت)

05-08-2014 12:58 PM
يا دكتور خلاص نعملك وزير الطيران المدني أصلو قالوا انت من ناس سودانير القدام واول حاجة تعملا تشوف لينا مطار مدني المعصلج ليهو عشرين سنة ما عايز يبقى حقيقة .. ولومك على كان ما تميت 5 سنة في الوزارة ما تفارق الكرسي إلا في سفرة مضمونة النثريات .. وبعدين بصراحة كدة أنا اليومين دي خالي شغل .. ممكن أكون مدير مكتبك وما تشيل هم ولاي عندي خبرة ما بطالة في الإدارة وتوزيع الزوار اريحك راحة تامة زول ما عايزو كان طار ما يدخل عليك .. أما موضوع احتياجات البيت وطلبات المدام والأولاد فدي خليها على ما تتوقع تتصل عليك وتزعجك بي طلباتا والسواق اتأخر والنانة لسه ما جابوها لي نوم قفا .. وبعدين تمشي البيت تلقى التلاجة ملانة وشوال السكر متكول والأولاد غيرنا ليهم تلفوناتهم وايباداتهم وما تسال من وين ده شغلي أنا .. وغير كده انت بس قول فلان داك عندهم وفاة ولا راقد مستشفى أجيهو ليك قبل روحي وارفع راسك وسط البلد .. أما الناس العايزين واسطتك ديل يجوني مباشرة ختمك معاي وتوقيعك بكون للوكت داك بكون حفظتو أجيهن ليك جيهة تمام واتجيه على حسهم يا صاحبي .. بعدين بعد تعمل لينا مطار مدني تاني أولادك لا طريق الموت لا شارع الشرق حرمانات عليهم .. بس هم يقولوا ماشين مدني يلقوا نفسن جوه الطيارة وأول ما ينزلوا في ود المهيدي بلقوا عربية صاحبي منتظراهم توصلن لحدي البيت .. قصرت معاك ؟ بس انت ما تقصر وأنا ما بفسر

[حلم الجعان عيش]

#997159 [أبوالكجص]
0.00/5 (0 صوت)

05-08-2014 12:35 PM
مممممم معناها شنو؟

[أبوالكجص]

#996946 [مصطفي سعيد]
0.00/5 (0 صوت)

05-08-2014 10:21 AM
وانا عاوز أكون تاجر عطور ياأستاذنا ....

[مصطفي سعيد]

#996894 [الحاج]
0.00/5 (0 صوت)

05-08-2014 09:52 AM
يا دكتور
قالو احمد عباس الشين بتاع سنار شاتوهو لحقو والي الجزيرة الغبي
حصل الموليد عسي ولعلي وسنار قريبة من مدني ارض المحنة

[الحاج]

#996839 [AMJAD]
0.00/5 (0 صوت)

05-08-2014 09:22 AM
يا دكتور لو صحيت الصبح و لقيت عربه الوزارة منتظراك قدام بيتكم و قالوا عينوك وزير و دخلت الوزارة ماذا تعمل؟ قول اى وزارة صحة او تعليم , صناعه او زراعة بتاعة المتعافى ساط ولات فيها زى ما كان زمان بيبيع الطايوق فى سوق الدويم , الوزير مهمته وضع الاستراجيه و البرامج لوزارته و عرضها على البرلمان حتى تكون برنامج دوله تحاسب علية الوزارة فى حالة عدم التقصير فى البرنامج , كنا نتوقع من بايع الطايوق ادخال المكننه الزراعيه و الاعتماد على الاله الزراعيه فى الزراعه و التوسع فى تحديث برامج للزراعه المطريه و ادخالها فى برامج انتاج مدروس بشقيه الزراعى و الرعوى , النهوض بالابحاث الزراعيه و نستفيد من حصتنا فى مياه النيل و نعمل بحيرات للامطار بدل طلب اغاثه كل سنه , الذى لا يملك قوته لا يملك قراره , وزراء الانقاذ لا يصلحون حتى غسالين عربات , وزير منهم فى احدى المطارات شرب ماء من زجاجه و القى الزجاجه على ارضية صالة المطار بكل جلافه برضو تقول عاوز تكون منهم , قال مشروع حضارى قال

[AMJAD]

#996757 [بت سودانير]
0.00/5 (0 صوت)

05-08-2014 08:36 AM
ياعسل انته. شفتو ناس سودانير القدام بنقطو عسل كيف

[بت سودانير]

د .الرازي الطيب ابوقنايه
د .الرازي الطيب ابوقنايه

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة