لزومو شنووو
05-08-2014 01:42 PM


في سابقة لم تحدث في العالم ولن تحدث تم نشر إعلانً مدفوع الثمن يشغل صفحة كاملة بإحدى الصحف اليومية لمجموعة سمت نفسها (رفقاء صلاة الصبح) في إشارة لأن هذه المجموعة التي لم توضح أسماء أعضائها هم أشخاص يؤدون صلاة الصبح بالمسجد مع السيد (والي الخرطوم) الذي شهد مكتبه مؤخراً عمليات تزوير وإحتيال وإنتحال بمليارات الجنيهات .
وقد كان الإعلان (المليوني) تحت عنوان ” تهنئة وتحية بدافع الوفاء" وقد عددت (المجموعة) في هذا الإعلان محاسن وأعمال (الوالي) الخيّرة من سعيه لأداء صلاة الفجر في ” الظُلَم ” دون حراسة أو حاشيّة أو سائق وملاطفته للشباب ومداعبته للأطفال ومسحه على رؤوسهم وزيارتة للمرضى عقب الفجر وعدم مغادرته المسجد مهرولاً كما يفعل البعض (ديل منو يا ربي؟) بل يقف يحادث الناس ويتبسط مع الجميع ، وأعربت ” المجموعة ” عن قلقها لتداعيات الأخبار وتوالي الإتهام وتوسيع دائرة الظن حتى طالت صاحبهم ( على حد قولهم ) الذي حسبوه انه فوق الشبهات لم يعرفوا عنه إلا دماثة الخُلق ووضاء السيرة ونقاء السريرة فهم يعرفون عنك ما لايعرفه الإعلام المتربص لايتقصد غير الإثارة ولايرى الكوب إلا فارغاً كما جاء بالتهنئة .
وختمت المجموعة ( إعلانها المدفوع) بالتهنئة للرجل الذي تم تتويجه من قبل الرئاسة التي وجدته الأصلب والأنقى والأكثر إنجازاً فجددت ثقتها فيه .ولم تنس (المجموعة) أن تتوجه بالشكر لفخامة الرئيس ومساعده راجية من الله أن يوفق الوالي للقيام بأمانة التكليف .
في محاكاة لما يحدث في دولتنا (الإسلامية) والأمر هكذا لن يكون مستغرباً أن نطالع في أحدى الدول (الكافرة) أعلاناً من شاكلة هذا الإعلان حيث تعلن مجموعة تسمي نفسها (رفقاء قعدة الخميس) في إشارة إلى أن هذه المجموعة التي لا توضح أسمائها هم أشخاص تجمعهم (قعدة الخميس) فيقومون في الإعلان بتعديد أعمال (المعلن له) الخيرة مؤكدين على أنه حريص على أداء واجباته لا يتنصل عن أدائها فهو ملتزم بدفع نصيبه من (الشيرينق) مهما كانت ظروفه المادية كما أنه هادئ الطبع بشوش مهما إحتسى من (كميات) وأنه لا يأبه لأي (إستفزازات) ولا يعيرها أهتماما وأن البسمة وعلامات الرضاء لا تفارق وجهه حتى إن قامت الشرطة بتجفيف (المنابع) والناس (راسا ضرب) وإنه أمين نزيه عفيف شريف لم يحدث أن قبض عليه وهو يتعدي على ممتلكات الغير وأنه لدماثة خلقه وتواضعه يقوم بغسل (العدة) بعد نهاية القعدة ويساعد في تنظيم وترتيب المكان وأنه هادئ الأعصاب ومتماسك في أشد المواقف صعوبه مدللين على ذلك بأنه يركز عند (الجلد) في حالة (أتقبض عليهو) فهو يتحمل لهيب السياط ولا (يتجرس) كما يفعل البعض .
وفي ختام ” التهنئة ” الإعلانية تنشر الصحيفة صوراً (للمعلن له) وهو يقف وسط (الشلة) وهو يمسك بباغة وأخري وهو يقوم (بتوضيب المزة) وثالثة وهو يقوم بتحريك حلة (القطر قام) !!
أو نطالع أعلانا لمجموعة تسمي نفسها مجموعة (رفقاء كونكان الجمعة) في إشارة إلى أن هذه المجموعة التي لا توضح أسمائها هم أشخاص يجمعهم كونكان الجمعة (الحريق) فيقومون في الإعلان بتعديد أعمال (المعلن له) الخيرة مؤكدين على أنه هادئ الطبع بشوش مهما كان (ورقو كعب) أو تكاثر عليه (الدبل) وأنه لا يأبه (بتجلية الدوهات والترايز) ولا يعيرها أهتماما وأن البسمة وعلامات الرضاء لا تفارق وجهه حتى وأن (دخل الزون) وإنه أمين نزيه عفيف شريف لم يحدث أن قبض عليه يوما وهو يغش في اللعب وأنه في حالة (أتقبض فوق) فهو لا (يشتت الورق ويجدعو) كما يفعل البعض ..
وفي ختام ” التهنئة ” الإعلانية تنشر الصحيفة صوراً (للمعلن له) وهو يقف وسط (الشلة) وهو يمسك بجوز (كوشتينة) وأخري وهو مبتسم (مع إنو مقبوض فوق) وثالثه وهو يضحك مع إنو عندو (3 دبل) !!

كسرة :
وصلنا مرحلة صعبة والله هسه الإعلان ده لزومو شنوووو؟
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و؟

[email protected]


تعليقات 24 | إهداء 0 | زيارات 6959

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1042062 [العصيان المدنى]
4.07/5 (5 صوت)

06-22-2014 10:57 PM
والله يا جبرا اتمنى ان يكون الجماعه ديل مستفيدين واخدوا نصيب من الكعكه بس الايام دى فى كسارين تلج الواحد فبهم واقع شكر فى سيادتو بمناسبه وبدون وديل ما بشبهوا السودانين.

[العصيان المدنى]

#998777 [ياسين]
0.00/5 (0 صوت)

05-10-2014 11:31 AM
ياجبره دي بلد غريبه عشان كده طفشنا منها خليهم يشبعوا بيها

[ياسين]

#998691 [الحقيقة المرة]
2.50/5 (2 صوت)

05-10-2014 09:59 AM
استاذنا جبرا .... بعد التحية والسلام..
بالله عليك أيهم أحق بأن يكتب عنه ... الطفل الذي يحضر صلاة الصبح مع والده في المسجد أم الوالي الذي لا يظلم عنده أحد كما قال أخونا الصحفي الذي يشن حملة شعواء ضد الوالي ... وأصحاب الإعلان لو لم تكن لهم مصالح معلقة ( أكرر معلقة) عند الوالي لما تكلفوا كل هذا العناء والصرف وبهذا الإعلان يأملون أن تنتهي معاملاتهم علي خير لأنهم ولضيق افقهم ونظرتهم للأمور يتوقعون أنهم وبهذا الإعلان سينهون معاملاتهم ناسين أن الوالي ومكتيه تحت المراقبة اللصيقة(man to man) من كل الاتجاهات خاصة الصحفيين ...
السؤال استاذنا ... من هم رفقاء صلاة الصبح ؟؟ ألا يمكن معرفتهم من الصحيفة التي أصدرت الإعلان ؟ بالتأكيد لانهم عند سداد قيمة الإلان لا بد من كتابة اسم صاحب الإعلان ... ما ممكن واحد من الصحفيين الهمام يشمشم لينا الخبر ...
مع كل الود والتقدير ...

[الحقيقة المرة]

#998151 [julgam]
3.75/5 (3 صوت)

05-09-2014 02:11 PM
والله محنك تجنن وتحنن..بس غايتو نحن ناس حزب البهجه والمسره قام اتقبض مننا واحد وكانت مشكلته بسيطه قلنا نخت خته عشان نعمل إعلان زى حق المدلجين بالأسحار بتاعين الخدرونشهد ونتشهد أن صاحبنا من قام صافى السريره منطلق الأسارير لا يكدره مكدر وىبتهج بهجه لو قسمت على كل المكشرين لوسعتهم وبعد ما إكتملت الخته كوولهم الأصحاب أجمعوا بأن نأخد الباغه ونعبيها بلاش إعلان فى الجريده وبلاش الأيادى الحريفه فى التوزيع وجر الخمسين ..المهم صاحبنا طلع من ورطته ديك وماصدق دردم ليه شامة صلاه بخمسين ألف وإلتحق بمجموعة الأيادى المتوضئه نكاية فينا..ولكنه لم ينسى العشره فكان يجادعنا ببغه باغتىن كده على فترات..ويجعله عامر

[julgam]

#997808 [المقهورة]
3.25/5 (4 صوت)

05-09-2014 01:48 AM
هؤلاء القوم منافقون وقد صدق فيهم قول الله تعالى في سورة النساء
"بَشِّرِ الْمُنَافِقِينَ بِأَنَّ لَهُمْ عَذَابًا أَلِيمًا (138)"
".....إِنَّ اللَّهَ جَامِعُ الْمُنَافِقِينَ وَالْكَافِرِينَ فِي جَهَنَّمَ جَمِيعًا (140)"
" إِنَّ الْمُنَافِقِينَ يُخَادِعُونَ اللَّهَ وَهُوَ خَادِعُهُمْ وَإِذَا قَامُوا إِلَى الصَّلَاةِ قَامُوا كُسَالَىٰ يُرَاءُونَ النَّاسَ وَلَا يَذْكُرُونَ اللَّهَ إِلَّا قَلِيلًا(142)"
"إِنَّ الْمُنَافِقِينَ فِي الدَّرْكِ الْأَسْفَلِ مِنَ النَّارِ وَلَن تَجِدَ لَهُمْ نَصِيرًا (145)"

وقوله تعالى في سورة "المنافقون"
"إِذَا جَاءَكَ الْمُنَافِقُونَ قَالُوا نَشْهَدُ إِنَّكَ لَرَسُولُ اللَّهِ وَاللَّهُ يَعْلَمُ إِنَّكَ لَرَسُولُهُ وَاللَّهُ يَشْهَدُ إِنَّ الْمُنَافِقِينَ لَكَاذِبُونَ (1)"

[المقهورة]

#997726 [عصمتووف]
3.50/5 (4 صوت)

05-08-2014 11:09 PM
لو عرفنا لزومة بانهم ا لصوص الشلة هر الوالي الحرامي يقبل ليه من المؤكد قام الوالي بدفع قيمة فضيجة القرن

[عصمتووف]

#997595 [ابوبكر]
3.63/5 (4 صوت)

05-08-2014 07:53 PM
"وأنه لدماثة خلقه وتواضعه يقوم بغسل (العدة) بعد نهاية القعدة"
ههههههههههههههههههههههههههههههههههههههههههههههههههههههههههههه

دي بااااااااالغتا فيها يا جبرا

[ابوبكر]

#997594 [كديس]
3.38/5 (5 صوت)

05-08-2014 07:52 PM
يا أستاز جبره.... انت الناس ديل أكيد ادوك كرتونه من الحاوية بتاعت بورت سودان .... بقيت تطلع درر الأيام دي ما شاء الله صنف نافع جدا.

[كديس]

#997570 [abo sami]
2.50/5 (4 صوت)

05-08-2014 07:12 PM
زمان في قعدة الخميس كان عندنا واحد بتاع ملح قلنا له كترتها بعدها بيوم شفناهو من بعيد وايدينو خلف ظهرو وبدانا خمن شايل نص لا شايل قزازه لحدي ماوصلنا وقام ختا ليهو جداده حيه صحنا في صوت واحد معقوله قام لي ساعتين ساكيها من تحت بنبر لي عنقريب لمن قبضتها وخنقتها عشان ما تكورك تقوم الحاجه تقول لي فك الجداده يا ولد

[abo sami]

#997533 [الصاحب]
4.00/5 (4 صوت)

05-08-2014 06:22 PM
انتا اقعد اتعاور كده لمن الاراضى تكمل وممكن قبر ذاتو ماتلقاه الا بالايجار.(ده عندو الفته)

[الصاحب]

#997516 [فيصل]
3.50/5 (3 صوت)

05-08-2014 06:00 PM
لاحظت كثيرا عند الذهاب للمقابر عند دفن المراحيم ان الذين يعملون بهمة شديدة ونشاط وقوة في حفر القبور وستر الموتي والمناشدة بالله كثيراوترديد الصلاة علي الرسول ( بالله عليك - اديني الكوريك - صلي علي النبي - تفك الازمة شوية - سألتك بالله ناولني الطورية دي - وسع القبر علي اليمين شوية - غرق ود اللحد شوية - وسبعة تمانية أشخاص اتناتلوا في حبل الواسوق - صلي علي النبي صلي علي الرسول ..... الي ان يتم ستر الميت ( هم رفقاء قعدة الشراب - العرقي ) - سألت احدهم يوما انت يافلان الله ما بتتذكروا الا لامن تشوفوا ليكم جنازة جايبنها المقابر ؟؟؟؟ قال لي والله انا لامن أشوف لي جنازة شايلنها بقول - وكت شفتك شعرت الرعشة من صوف راسي لي كرعي - عشان كدي يا ولدي بننسي السم ده والشية والكمونية دي ونجي جارين دايرين الاجر والله يتوب علينا .

[فيصل]

#997512 [ود احمد]
4.07/5 (5 صوت)

05-08-2014 05:55 PM
انحنا غير كسير التلج والتملق ماعندنا حاجه

[ود احمد]

#997507 [Salah E l Hassan]
4.19/5 (6 صوت)

05-08-2014 05:45 PM
الأعلان دة اسمه فلق الصباح و الاخوة الشركاء فى الصلاح وفى فقه النكاح وفى الضرب المباح و العاجبو عاجبو و الما عاجبو يموت او ينتحر او يشرب من البحر ويرتاح .!!!!!
او كما قال المرحوم الذينكو عليه الرحمة وعلى نفس الوزنة والرمية ... يونيو الهناء يونيو المنى الغنى غنى و الما غنى يركب .........؟؟؟

[Salah E l Hassan]

#997470 [هيثم الحلاوي]
4.25/5 (5 صوت)

05-08-2014 05:13 PM
أنه حريص على أداء واجباته لا يتنصل عن أدائها فهو ملتزم بدفع نصيبه من (الشيرينق) مهما كانت ظروفه المادية.
دي بالغت فيهاههههههههههههههههههههههههههههههههههههه.

[هيثم الحلاوي]

#997430 [حد بيعرف احسن م الحكومه]
4.00/5 (3 صوت)

05-08-2014 04:39 PM
لعلك يا اخ يا اللى لسا فاتح الجبرا.. متين حتقفل الهندسه؟ لعلك نسيت زول مهم شارك بصورة فاعله فى تجديد ثقة الرئتسه فى الوالى .. ذكرت شكر مجموعة رفقاء الصلاه للرئيس ومساعدو ود الأمام الحبيب الرمز!! وبس !!لازمة كمان كان شكر الجماعه يمتد ويشمل مذيع التلفزيون اللى اذاع خبر تجديد التقه فى مقدنة نشرة "أخر الليل" وافاض البهجة فى النفوس والجماعه ماشين على الراحة من بعد رفث بهيج ..

[حد بيعرف احسن م الحكومه]

#997415 [الغلبان]
4.00/5 (4 صوت)

05-08-2014 04:24 PM
هههههه برنجية كيتا في جنوبي ، ومن ناس ديل واآآآآآآآآآسفاي ومن زي ديل وآآآآآآآآآآآاسفاي

[الغلبان]

#997393 [علي]
3.75/5 (3 صوت)

05-08-2014 04:03 PM
إن كان هذا صحيحاً ، فهي قمة الإتجار بالدين ، يا اتباع تُجار الدين اتقوا الله وتذكروا يوم لا ينفع مال ولا بنون ، ولا من ترافقونهم في صلاة الصبح.

[علي]

#997367 [ابوعديلة]
3.75/5 (3 صوت)

05-08-2014 03:36 PM
الصديق الجاهل .

[ابوعديلة]

#997362 [ود الزين]
3.00/5 (2 صوت)

05-08-2014 03:29 PM
الجماعة فى قعدة الخميس و الباغة فيضت كل واحد الز فى التانى قوم انت قوم انت الكل تكاسل

الا واحدا كلس قال ليهم خلاص انا بلعن ابليس و بجيب ليكم

[ود الزين]

#997285 [osama dai elnaiem]
3.63/5 (4 صوت)

05-08-2014 02:26 PM
الاعلان لزومة انه احنا نصلي الصبح في جماعة وبرضه نسرق عادي لانه احنا لمن جيناكم جيناكم بكضبه (هي لله) وبعدين بدينا نسرق طوال 25 عاما وانتو رضيانين اغتصابا او مشاركة لنا في اللغف بعد ما كبرنا الماعون من (جماعة) الي (مؤتمر وطني) عشان القدح يكون كبير وبعدين قصة (اسلامي)عملة دولارية في السودان ( البلد الطيب اهله) يعني مجرد ما قلنا ليكم احنا حنكم باسم الشريعة صدقتوا طوالي واحنا في بالنا شريعتنا احنا مقابل شريعة حمورابي يعني انتو الغلطانين صدقتونا ومع كل لغفة احنا نتحلل ونسال الله يفك حبسنا ونجيكم مرة ومرات وكمان نعمل اعلانات مدفوعة مرة باسم الدفاع عن العقيدة وطبعا هنا نقصد (عقيدتنا ) في الجماعة التي نشات في (الاسر) ومرة ( الايادي المتوضئة) وده لزوم التمكين عندما نريد تمكين واحد من جماعتنا في مكان دسم وتارة (جماعة صلاة الفجر) وده لزوم المخارجة من (زنقة) اراضي استثمارية.

[osama dai elnaiem]

#997281 [كوز كنافه]
4.25/5 (4 صوت)

05-08-2014 02:22 PM
انت عارف الوالي ده مش قبضوه ورقو كله اولاد والجوكرين فوق لكن بعد بجرنا خمسين لانه كوز وهو سيد البيت والتربيزه وهو من اشتري الجوز والقلم والوقه تبعه

[كوز كنافه]

#997267 [A. Rahman]
4.25/5 (3 صوت)

05-08-2014 02:10 PM
إيه رأيك يا استاذ الفاتح انه المجموعتين الأخيرتين افضل مائة مرة من مجموعة الوالي، لان ما يقومون به لم ينسبوه للدين بل لتصرفات شخصية تمسهم هم و ليس غيرهم. اما ان تفعل ذلك رياء كما تفعل مجموعة معرصي الوالي، و باسم الدين كمان. لي صديق عندما يشاهد مثل هذا التلاعب بالدين يقول لك " دحين دي بتفوت على الله؟" فجماعة الإنقاذ و العياذ بالله يعتقدون ان كل فسادهم و سرقاتهم و ظلمهم للآخرين حتفوت على الله.

[A. Rahman]

#997252 [اب شنباً كليقة]
3.50/5 (3 صوت)

05-08-2014 02:01 PM
عشان تعرف ان الوالي بصلي الصبح

يعني لزوم هي لله

ما زال القوم يتاجرون باسم الدين

وكأن ما حدث لا يعرفه الله ويجهله الشعب

الم يقل على مضض السيد/ امين حسن عمر ان الشعب واعي

اها نحن بنقول شوفوها عند غافل كلنا بنصلي الصبح حاضر وفي المسجد

ويا عمنا الفاتح ما يهمنا المهم الا يكون اعلان جماعة الصبح من قروش الولاية

صدق في ناس بتسرق ملاية وناس بتسرق خروف السماية وصدق في ناس بتسرق ولاية

وانت اقعد في خط هيثرو حتى تكون حرضا او تكون من الهالكين

[اب شنباً كليقة]

ردود على اب شنباً كليقة
United States [ودالزين] 05-09-2014 12:35 AM
ياخي مالك عليهو ....الراجل داير يموت علي دينو ومكنكش في الخط


#997245 [Nureldin Ahmed]
3.63/5 (5 صوت)

05-08-2014 01:56 PM
هذا تذكر للخضر بنصيبهم من الاموال المنهوبة -

[Nureldin Ahmed]

ردود على Nureldin Ahmed
United States [الحقاني] 05-08-2014 03:39 PM
اكثر تعليق منطقي واقرب للواقع


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة