المقالات
منوعات
سوء تفاهم بين فراش ووردة
سوء تفاهم بين فراش ووردة
05-14-2014 08:18 AM


الورد دايمـاً بيــبسم
جوّ قلب النّاس بيرســم
صورة لِروعة جمــــالو
لرشاقتو وإنفعــــالو
سر عظمتو واكتمـــالو
برضوواضع في احتمـالو
إيه بنقّـص من كرامـتو
لمّا يكشف عن وســامتو
ويهدي للنّاس إبتسامتو
....................
الورد خــات في ضميرو
إيه بضيرو ..........
لو مصيرو يفـوح شذاهو
ويهــدي للأحباب عبيرو
....................
ديمة في أعماقو شـايل
لهفة الشّوق والرّسـائل
خاتي دايماً في اعتبارو
إنّو درب الحـــب مسارو
في شعــــارو الإعتيادي
الورد لابعرف إكره لابعادي
....................
مرّة طلّت وردة قـــالت
من رحيقها الدّمع سالت
تشكي من روعة صِبــاها
من جمالها ومن بهـاها
تبكي من حُرقَة حشــاها
من فراش مغرور غِشـاها
جرح خدودها رشف نداها
....................
ديمة شايله جمالي غُنيا
قلبي فاتح أبوابو دُنيا
ماني فاكره في ناس بتقسَي
وللمحبـة كمان بتنـَـسي
عارفه إنو خدودي واحـة
وقلبي دايما ليها مرسي
زي نضــاري واخضــراري
حبي ظاهر في احمــراري
لا مظــنّة ولا مدسّـــــة
.....................
الفراش كايس طريقــــة
يسكت الوردة الرّقــيقة
" يا وردة يا متــورِّدة
أصلاً بدايـــة الحب كدا
لما شُفــتِك إنزهلـــتَ
وبِجمالك إنبهرتَ
قلـبي رفّ
وحلقي جفّ
قُلت لو ألمس خدودك
من رحيقك شلت رشفة
لاني خاين مرة خـنتَ
لاني غدار يوم غدرتَ
إلاّ بس أغراني حسنك
قُلتً اقاوم ما قِدرتَ
منو البقاوم لِجمَـالك؟
كل زول في قلبو شالِك؟
في المناديل والأغاني
مرة في كروت التّهاني
مع الاماني ؟؟؟ .....
ياوردة مالموضوع غرور
لمسة خدود رشفة نـدي
ياوردة ما جربتى حـب
ولا عيونك سهّدا ؟؟؟؟
الحب دا نار مُتوقِـدا
رويحتي بالشّوق مُجهدا
من يوم بدا .......
قلبي لا ارتاح لا هَـدا
مرات بيسرح في المَدي
يرجع يكلِّم في الصّـدي
يا وردة يا متــورِّده
الحب دا حال متفـرّده
لا عندو ساس لا قاعـدة
ناس تقصدو وناس يقصدا
ناس تزهدو وناس يزهدا
ناس تعبدو ويستعبدا
ناس تكتمو ويسهدا
ناس ترفضو ويتوددا
ناس تنكرو ويهددا
ناس تقربو ويستبعدا
ناس تبعدو ويتوعدا
ناس تقبلو ويوحدا
ناس تجبرو ويحايدا
ناس سارحه فيهو مشرّدا
ناس ساكنة بيوه مقيّدا
ناس في سعاتو ممددّا
ناس للجحيم متوسـّدا
يا وردة يا متمردة
اصلا حكايةالحب كدا؟
.................
الوردة ملّت للجِــدال
يا فراش ما فيش مجال
للملام والإنفعـــــال
ماانت عارف فى المثال
زي الغمامة لِقاي مُحال
لو كنتَ عاشق للجمــال
أغزل وأنسج في الخيال
...................
الفراش أصبــح وجــيع
ياوردة خوفي بلاك اضيع
كيف استطيع..........
بعدك احلّق في الغمـام
وافرح واغني مع الرّبيع؟؟
ماانتي عارفه هواي دفين
وقلبي في حُبـك سجين
لو رفض قلبِك يليــن
بقبل هلاكي مع اليقين
يا وردة يا متوردة
معقولة بس للحدّي دا
تصبح حياتي مهــددا
..................
مرّالنّسيم والدّنياغيم
شاهد الجـّــو متطرب
الدّنيا زي ساحة حرب
الوردة تبكي وتنتحب
الفراش واقف حــزين
مجــروح قلب
يشــكي ويسب
في الحبّ يوم
أو عايز يحب
............
النّسيم سمع
الحكاية من البــداية ،،
قال للفراش خليك بعيد،
وشوش علي الوردة
ومسح دمع الخِديد .....
" معذورة يا ست الجّمال
يالفي الحسن ما ليك مثال
أصل الفراش مغرور بليد
وكمان عنيد ..
تعال ياغبي..!؟
نادي الفراش بانفعال
أديك كدا..!!!؟؟
خلاص شِفت ومقدده
وعامل صبي ؟
بئر التّفاهة محدذِده
وفي الحب كمان عامل نبي
الحب دا حالة مجردة
يسري في الرّوح يسعده
ناس تعرفـو ومتـأكده
ناس تجهــلو زيك كده
الحب دا ما لعبة حشر
ولا كمان حالة سعر
منو العَلّمك
خلاك عنيف وملاك شر؟؟
ردّ الفراش في صوت حزين
" تعلمـت من
فعل البشر
تعلمت مـن
فعل البشر
تعلمت مـن
فعل البشر "

عوض شيخ إدريس حسن
ولاية أريزونا أمريكا
[email protected]


تعليقات 1 | إهداء 0 | زيارات 1087

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1003252 [عاصم منس]
0.00/5 (0 صوت)

05-14-2014 10:40 AM
عفوا..استاذ عوض ...واعتزر عن هذا الخطأ الغير مقصود...انت رجل مبدع والله وبالجد حوار القصيدة حلو وجميل وهاااادف

[عاصم منس]

عوض شيخ إدريس حسن
عوض شيخ إدريس حسن

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة