المقالات
السياسة
حسين خوجلى:حديث الفساد مجرد كواريك وبخور حتى لايرى الفجر
حسين خوجلى:حديث الفساد مجرد كواريك وبخور حتى لايرى الفجر
05-17-2014 03:03 PM


حسين خوجلى : الحديث عن الفساد مجرد كواريك وبخور حتى لايرى الفجر من وراء حجب - أنت منتظر من جماعتك ديل بزوغ فجر جديد
معلم الشعب السودانى يواصل تفاهاته : هسي اليومين ديل مافى زول بيتحدث عن الحريات ولا فى زول بيتكلم عن لجان الوفاق الوطنى ولا الإجتماعات ولا الإتفاقات ولا الحكومة القومية ولا الديمقراطية ولا الدستور ولا الإنتخابات متين دا كله مافى زول يتحدث عنه – إستراتيجية الإصلاح الإقتصادى والإصلاح السياسى والإصلاح مع دول الجوار والعالم والسياسة الخارجية وسياسة الحرب والسلام – دى كلها نضيعها فى قطعة أرض 400 أو 300 م.م. دا كله بيجى – لكن لو أصبحت دى المعركة الحقيقية أنا بفتكر النظام هو الكسبان
شايفين يا أخوانى ظلمتوا الوالى ووليداته وظلمتوا وكيل العدل ومدير المساحة وبقية حرامية الأراضى الموضوع عند بابا حسين لايعدو كونه قطعة أرض 400 أو 300 م.م. وبتجى - بابا حسين تعهد أن يرجع لكم قطعة أرض 350 م.م. لأن ماسرق كله بين 400 الى 300
والله إنتو شعب متعب وبتاع وشاعات وشاعات ساكت كلها 300 متر وحنديكم 350 متر ويا شماتت آبله ظاظا فيكم يا سودانيين
نلخص لكم أدناه فى هذا المقال أهم ماتطرق إليه المدعو حسين خوجلى فى حديثة لأيام الثلاثاء 13 مايو والأربعاء 14 مايو والخميس 15 مايو للعام 2014م فكان أخطر ماقاله أن الناس إنصرفوا عن حديث الحوار والحريات والتلاقى الى الحديث عن قضايا الفساد وقال مستهترا دى كلها قطعة أرض 400 او 300 متر مربع وبتجى راجعه - يعنى بعدما نشيل مئات المليارات دى ونشغلها نشيل أرباحها التى وظفناها فى تجارة السلاح والمخدرات ولكم يا أهل السودان رؤوس أموالكم – هكذا يرى حسين خوجلى حجم فساد جماعته – تعالوا نشوف قال شنو : ( أنا عاوز أقول أنه الأن هنالك سانحة للوفاق الوطنى – فى ناس دايرين يضربوا الكوراك ويطلقوا البخور والعيتنوبه زى مابقولوا حتى لايرى الفجر من وراء الحجب – أنا بفتكر أنه لاتفوتوا هذه الفرصة على الشعب السودانى ( يا حسين كم مرة قلنا ليك تحدث عن كيزانك وماتجيب طارى الشعب السودانى على لسانك دا – خليك فى جماعتك الإسلامية وبس ) – دى ما مرحلة بتاعت معارك صغيرة ودى ما مرحلة بتاعت تصفية حسابات ليس فى وقتها – كل الحاجات الصغيرة دى الناس البيحلموا بيها لتصفية الحسابات مافى زول قال لا لكن خلوها تأتى فى زمانها وفى أوانها وفى مكانها – نحن ياجماعة لمان أطلقت المبادرة من السيد الرئيس للحوار الوطنى سعى كل الناس عشان يرتبوا الميس السودانى – حرية كاملة – ديمقراطية كاملة – منابر مفتوحة – تكوين لأحزاب سياسية – مرحلة إنتقالية – دى أشراف الأمور ( طبعا يا جماعة لاحظتوا أن حسين بنتقى من القاموس كلمات زى أشراف الأمور عشان يصبغ على نفسه صبغة المثقف وهو قادى شهادة ثانوية – بعدين حريات شنو يا حسين إذا كان وكيل وزارة العدل نفسها بيوقف صحيفة من النشر ويعتقل رئيس تحريرها ودى مش صحيفة عادية دى صحيفة خال الرئيس – يا حسين إتكلم لكن ما تتكلم عن حرية وديمقراطية فى ظل نظام أخوانى – فى واحد إشترى ليهو لباس فيهو 5 ضراع دبلان ومثلث أخضر وتكه بعبلها ومشى لصديقه يشكر ليهو فى سرواله الجديد – قبل ماينتهى – صديقه قال ليهو يازول أقصر كلامك وماتشكر لى السروال أنا قبل كده دقونى رباطين طريق وهارى وبايل فيهو – فأنت ياحسين ماتشكر لينا السروال نحن لينا ربع قرن هارين وبايلين فيهو وشاربين المر بكيعانه منه )
حسين يواصل : أنا بفتكر القصة بتاعت دا خطف ودا عنده قطعة أرض ودا كده كان من النظام أو كان من أصحاب الأهداف الصغيرة – أنا بفتكر دى محاولة للوى .. صمت ولم يوضح لوى ماذا – يمكن داير يلوى عمة ترباس الفوق راسه دى ... ماقلنا تقيف لكن تكون هى الغاية دون تحقيق أشراف الإمور ( ياخى قديتنا بأشراف الأمور دى ) أنا بفتكر دى معركة إنصرافية ( يا شعب السودان المعلم حسين خوجلى بيقول ليكم الحديث عن الفساد عشان زول شال ليهو قطعة – قطيعة أرض صغيرة دى إمور إنصرافية – عرفتوا الأن حسين دا شغال لحساب مين – قاتلك الله يا حسين )
حسين أب عفج يواصل حقاراته : يعنى مافى زول زى قال المتنبى من أتقى البحر إستقل السواقيا – إنت أدوك بحر داير بالسواقى داير بالنواعير شنو داير بالشواديف شنو ( تعالوا يا شعب السودان – حسين بيقول ليكم هرولوا نحو الحوار وأنسوا قضايا الفساد فهى قضايا **** وتقارن بنظره بالسواقى مقارنة بالبحر – ولسع فى شباب ما وعوا الدرس ويدفعوا عن هذا المنافق المأجور – يا حسين نحن كده بتاعين نواعير وسواقى ما بنحبش البحر بنخاف نغرق خلينا فى سواقينا ورجعوا لينا قطيعة الأرض أم 400 متر مربع السرقتوها – يا أخى كيف تقابل ربك – والله أنت مقبل أو مدبر شين لا تواجه )
حسين يواصل عفنه : فأنا ما أخلى الصغار يلوا عنق الكبار عن الحقيقة المرة – نحن حقيقتنا الكبرى التى يمكن أن نكشف بيها النظام ونمتحنه هى الحريات ( عارفين حسين عاوزكم تصلوا معاه لشنو – تخرولوا بنمرة 4 وهو ماعارف فى عربات عنده نمره 5 و6 – تهرولوا نحو الحوار وتدخلوا إنتخابات والجيش يظل كما هو أخوانى أخوانى لآنه خط أحمر – الشرطة أخوانية أخوانية برضو خط أحمر – جهاز الأمن أخوانى أخوانه زى أخويه الجيش والشرطة والخدمة المدينة أخوانية والمالية فى بيت مال المسلمين الأخوان لأنهم مؤتمنين عليها ومطبعة العملة الورقية تحت يد الكيزان لطباعة مليارات الجنيهات عشان لمان تجى الإنتخابات نشترى ذمم مشايخ الطرق الصوفية ونضمن أصوات كل من حشر نفسه فى زريبتهم – وياجماعة دى أشراف الأمور – أما سفاسف الأمور كونه مسئول فى المؤتمر الوطنى إستورد 5 حاويات مخدرات – موظفو المكتب التنفيذى للوالى من بينهم إبنه وزوج بنته وشقيق الرئيس وشيخ مهدى إبراهيم وضعوا أيديهم على أراضى إستثمارية وسيارات فارهه مملكوكة للدولة ( الشعب سابقا ) وحولوها لملكيتهم الخاصة – فساد واضح فى قضية تحكيم الأقطان يكلف محمد أحمد دافع الضريبة بدفع 100 مليار لجماعة محسوبة على النظام ناس دكتور عابدين محمد أحمد الغاطس فى شركة الأقطان لربع قرن حتى غطس حجرها – شبهات تدور حول وكيل وزارة يفترض أن تكون للعدل – فساد مدير عام مصلحة المساحة بالولاية وإمتلاكه لعشرات قطع الأراضى – فساد فى ولاية الجزيرة وسنار والنيل الأبيض والحبل على الجرار – فدى كلها سفاف إمور أنسوها دخيلكم أنسوها وأمشوا شوفوا أشراف الأمور عاوزين نشوف الرئيس دا منتخب لفترة حكم جديدة بصورة تكون مشرفة خاصة وأن الرجل غير ركبته عشان الوثبات القادمة ) بس خلاص تانى مافى زول يتحدث عن أى قضية فساد كما طلب منا أستاذ حسين وأن نتحول ( لأشراف الأمور ) – على الطلاق يا حسين لن أتوقف حتى يحاكم كل مفسد ويرد الحق لأهله – آل أشراف الأمور آل – وقال هو من الشرفه وكمان بيدعى كذبا أنه من اقارب الشريف حسين – أنت قد تكون من أشباه زين العابدين أما فالحسين فلا فهو ذو مكانة عالية فى قلوبنا ونفوسنا فلا توسخه بحديثك عن أشراف الإمور
يواصل : نحن حقيقتنا الكبرى التى يمكن أن نكشف بيها النظام ونمتحنه هى الحريات والديمقراطيات وإكتشاف أراضى جديدة فى المنافسة ( أنافس لى زول راكب دبابة وشايل صاروخ وعنده طيران والمال كله بمطبعته فى جيبه – إلا أكون مجنوب أو سكران طينه ) ويواصل صحين : وحق التعبير وبعدين ياجماعة لمان يكون فى زحام وفى كواريك وعدم إنتباه تتساوى حقائر الإمور وأشراف الأمور ( تانى رجعنا لأشراف الأمور – عارفين المعفن دا بيرمى لى شنو من العبارة دى – يا جماعة الخير يا أهل السودان الكواريك والزحمة والكلام الكثير عن الفساد والمفسدين بالخضر قيت وحاويات المخدرات قيت والأقطان قيت والقيتات الكثيرة دى حتكون سبب فى أن تضيع عليكم أشراف إمور كثيرة فأنتم مبشرون بعهد حريات وديمقراطيات بشر بها الرئيس فلا تضيعوه – طيب ياحسين الرئيس بشر ساكت عصام الدين عبد القادر الزين وكيل وزارة العدل ما لغاها برضو تصر على أنها أشراف الإمور )
حقير يواصل :و أنا بالمناسبة كلامى دا أبدا نحن أنا شخصيا بفتكر لايصح إلا الصحيح – العنده وثيقة والعنده مظلمة دا كله يمشى المحاكم ويمشى للصحف وفى المنابر وفى الليالى السياسية – لكن ماتبقى دى الحجة الوحيدة التى نتوقف عندها ( يا حسين أنت عاوزنا نقيم دولة بجماعة فاسدة بس لأنهم من جماعتك ولأنكم لا ترون جريمة فى المفاسد حسب فكركم – يعنى لو عارف أن فلان الكوز المتمكن مفسد أمشى أفتح عليه بلاغ فى النيابة والنيابة تتبع لعصام الدين عبد القادر الذى منع نشر اللقاء وساق ياسر محجوب للحراسة - يا شعب السودان المعلم حسين بيقول لكم كدى أجلوا قضايا الفساد والمظالم حقتكم دا لحد ما الإنتخابات تعدى على خير وهو يعلم أن إعلاء الحديث فى الفساد والمفسدين سيهدم حزبه المؤتمر الوطنى وتلاحظون أنهم كدولة قرروا الصمت عن الفساد وأصدروا قرارات بعد الحديث عن الفساد وعندهم وزارة عدل تلبى كل طلباتهم حتى الأن لم تبدأ التحقيق فى جرائم قتل شهداء سبتمبر 2013م عاوزنها تفتح ملفات فساد تدمر نظام حكمهم – لن يحدث وعشان كده المعلم حسين بيقول ليكم أمشوا شوفوا أشراف الإمور )
حقير بكسر الحاء يواصل : ياجماعة دى جزئيات والجزئيات أبدا لن تكون أولى بالإهتمام من الكليات – فساد مكتب الخضر قيت جزئيات – مسئولين كبار بالدولة عندهم شركها إسمها الحلول المتكاملة عرفت بجريمة حاويات المخدرات قيت جزئيات – جريمة تحكيم شركة الأقطان التى حكمت على الإنسان السودانى بدفع 100 مليار لمنتسبين للنظام دى جزئيات – وتهرولوا نحو الحوار مع المفسدين أهى دى هى الكليات ولا بلاش
المعلم حقير يواصل : هسي اليومين ديل مافى زول بيتحدث عن الحريات ولا فى زول بيتكلم عن لجان الوفاق الوطنى ولا الإجتماعات ولا الإتفاقات ولا الحكومة القومية ولا الديمقراطية ولا الدستور ولا الإنتخابات متين دا كله مافى زول يتحدث عنه – إستراتيجية الإصلاح الإقتصادى والإصلاح السياسى والإصلاح مع دول الجوار والعالم والسياسة الخارجية وسياسة الحرب والسلام – دى كلها نضيعها فى قطعة أرض 400 أو 300 م.م. دا كله بيجى – لكن لو أصبحت دى المعركة الحقيقية أنا بفتكر النظام هو الكسبان وتبقى زى يعنى هيلمانه كده بتاعت تصفية حسابات صغيرة ومحاولة مقصودة أو غير مقصودة لكى ينسى الناس الأفكار الكبيرة التى جمعت الناس والتى جزء منها هذه الخبطات وهذه الإيضاحات حول الفساد والمفسدين سياسيا أو إقتصاديا او غيره ألاف الأشياء وبعدين ( حقير خوجلى عاوز يبحث عن مبررات للفساد تابعوه ) إذا كان اصله فى تاريخ عمره 25 سنة ( دى عمر حكم الأخوان ) وفيه فترة بتاعت شرعية ثورية وفى حرب وفى وفى نظام ... ثم تعثر وقلب الموجه ... عشان يهرب لأنه خرم بشارع غلط .. يواصل : يومته مبارك الفاضل دا لمان جابوه هنا بيتكلم قالوا ليهو عندك علاقات بالمخابرات المصرية قوية جدا – قام قال ليهم انا ما كان عندى طريقة إلا يكون عندى علاقات قوية مع المخابرات المصرية لأنه مدخلنا لازم يكون عبر المخابرات – قطع شك مبارك الفاضل ماداير يبقى جاسوس لكن السياسة فرضت عليه أن يتعامل مع المخابرات ودى حاجات مره الزول يا يستحى منها يا يخفيها – لكنه إضطر ومانكر قال ايوه عندى صله بيهم - أنا بفتكر البيتطرنا لكل الحاجات دى حقه نخليه عشان نجى لجوه بلدنا – انا بفتكر الترحاب اللقوه كثير من الناس هسي جوه بلدهم لو طلعوا بره حيضطروا يبقوا حجارة شطرنج لكثير من المؤسسات الخارجية ......... بمداخلة مبارك الفاضل طرطش الموضوع لمان شعر بالحرج ودخل كعادته قصة بعيدة عن صلب الموضوع - زول يبدأ كلامه عن الفساد والمفسدين ثم يأتى بعبارة (إذا كان اصله فى تاريخ عمره 25 سنة وفيه فترة بتاعت شرعية ثورية وفى حرب وفى وفى نظام ) طوالى نتوقع أن يكمل الحديث لتوضيح الأسباب التى أدت لفساد الجماعة الإسلامية التى ينتمى إليها – مالقاش إجابة ودخل جملة إعتراضية عن مبارك الفاضل حاولت أنا جاهدا أن أربط علاقة مبارك الفاضل بالمخابرات المصرية مع مسببات فساد الكيزان فلم أجد اى سبب
ولمان حسين لقى قصة مبارك الفاضل ما لافقه مع فساد الكيزان دخل بينا على قصة أخرى جديدة عن تجار سوق أمدرمان وزول صوته عالى ولكن رصيده من القروش ضعيف وبرضها ما لفقت لأن حسين بيفتكر أن الرصيد المالى الذى يتمتع به حزب المؤتمر الوطنى هو من يحدث الغلبة فى النهاية ويهزم الجماعات المعارضة الكثيرة الفقيرة – ونقول لحقير خوجلى المال دا مال الشعب ونحن قبل ماندخل معاكم فى حوار لازم كلنا نتحلل من المال العام لكن مو زى تحلل عيال الخضر من 690 مليار تصفى على 17 مليار– يا حقير ماتحاول تجمل وجه جماعتك دا حريق من الدرجة الأولى والزول الكلام قليل وقروشه كتار أكان بقى زى المؤتمر الوطنى بكره لمان يتم تجريده بيبقى لا عنده كلمة لا قرش لا عضوية لأنهم كلهم ملمومين حول جيفة المال
حسين عاوزكم تدخلوا وتكونوا حكومة قاعدة عريضة تانى مع الكيزان وهم بوسخهم قبل ان يغتسلوا ويتطهروا من مفاسدهم
عبارة إذا كان اصله فى تاريخ عمره 25 سنة ( دى عمر حكم الأخوان ) وفيه فترة بتاعت شرعية ثورية وفى حرب وفى وفى نظام ... ثم تعثر وقلب الموجه للحديث عن مبارك الفاضل ... يا حسين نحن لمان نجى نأكل أول شىء بنعمله بنغسل أيادينا وبنغسل المواعين التى سنأكل فيها ونغسل كاسات الماء التى نشرب بها وننظف محل ما بنقعد نأكل ونسمى بالله ونبدأ نأكل – أنت عاوز الناس يدخلوا عليكم بى وسخكم دا من خضر قيت وحاويات مخدرات قيت وأقطان قيت وهثرو قيت والجزيرة وواليها قيت وسنار وواليها قيت والنيل الأبيض قيت وأوساخ كثيرة تلوثتم بها تصيب الإنسان بالكرونا والأيدز والسرطان والفشل الكلوى ونقعد معاكم بى وسخكم وعفنكم دا نأكل معاكم ونشرب – بكره حتعلومنا الوسخ والفساد إنت ماعارف البصلة العفنة الواحدة بتبوظ جوال كامل والجوال لمان يبوظ يبوظ معاه شحنة لورى ودا كله من عفنة بصلة ويا حسين أنت حقير جدا لأنك تحتقر وتهزأ بهذه الشعب الذى تدعى كذبا أنك رئيس لحزبه حزب السودانين – مفاسد ناس الإنقاذ دى كلها قطعة أرض 400 متر مربع معقول 400 متر حصلت فى الخرطوم 690 مليار جنيه – أنا أملك قطعة مساحتها 640 م.م. ملك حر عاوزك تعرضها لى للبيع نص بالنص كدى خلينا نتعلم العفنه منك يا بصله يا عفنه – معليش ليك يوم وحسابك مع السودانين سيكون عسير جدا – كلامك دا مسجل صوت وصورة فلن تستطيع ان تنكره وخلى البشير والمؤتمر الوطنى ينفعوك
المعلم حقير يبحث عن مسبب للفساد ولم يعثر عليه – الخضر كان أذكى منك يا حسين حين قال الشيطان لعب بعقولهم والله الكوز الواحد يلعب بعقل ألف شيطان هو فى شياطين أخطر منكم
حقير خوجلى بيقول المقام دا مقام قروش حقوا الزول حتى لو فصيح يتكلم قدر قروشه
طيب يا حسين أنت دخلت عشان تبرر لنا أسباب الفساد ثم هربت لمبارك الفاضل وتانى دخلت لسوق أمدرمان وتانى هربت لأحزاب الديمقراطية التالته والأحزاب العندها مقعد واحد والما عندها مقعد – دا مش المهم – المهم ورينا أنت ماهو السبب الحقيقى الذى يجعل شخص يدعى أنه مسلم يؤمن بالله ورسوله وأنه شخص رسالى من اشراف الرجال أن يسرق ؟؟
دا السؤال الذى يحتاج لإجابة خلينا من مبارك الفاضل والإستخبارات المصرية وتجار سوق أمدرمان أساتذتك الذين علموك الفصاحة وقلت الأدب وخلينا من أحزاب الديمقراطية التالتة ، نحن فى الصحن الوسخان دا العاوزنا ننزل ايدنا فيهو – كيف إتسخ ؟ والوسخة منو ؟ وكيف تتم عملية نظافته ؟
زول رفع صوته يطلب معاقبة المفسدين فى النظام يجى حسين يقول الناس البيرفعوا صوتهم ديل بدون مقدرة بكره يحصل شرخ فى صوتهم وكل زول يتكلم قدر قروشه يعنى يا حسين نسكت ونخلى الحرامية السرقوا المليارات هم يتكلموا والمفسدون الذى إستولوا على تسهيلات البنوك وأقاموا إمبراطورية إعلامية هم بس البيتكلموا وباقى الشعب يكون تابع لكم – ما أظن دى تلقوها من سودانى – الإنسان السودانى الإنجليز ما روضوهم لحد مايروضهم كيزان
حسين قال : أى زول يخرج عن دين الناس وإسلامهم أغلبية ماحتكون عنده – يا حسين هسي إنتو ماعلاقتكم بالإسلام عشان الشعب يكون معاكم – ماخلاص تم فضحكم وإتعريتوا وإنتو خايفين من فتح ملفات الفساد ليه – أفتحوا المواعين وغسلوا النفوس وإطهروا وإغتسلوا من ألأثام وجرائم القتل والنهب للمال العام والخاص – لكن تريدون تأييد الشارع الكاسح مع كل هذا الكم من المفاسد – يا حسين الشعب السودانى خلاص عرفكم على حقيقتكم
أما إستشهادك بأقوال عبد القادر جوده وهو من كبار جماعتكم الذى أعدمه عبد الناصر عليه الرحمة – وحديث القاضى جوده ( عجبى لهذا الدين ما اراد به رجلا دنيا إلا نالها ) جماعة الإخوان المسلمين فهموا المعنى الخطأ فأندفعوا نحو الدنيا ينهبون ويسرقون ويبنون مثنى وثلاث ورباع ويتزوجون مثنى وثلاث ورباع ويستشهدون بـ ( اللهم أغننا بحلالك عن حرامك – بمعنى أن تستولى على المال الحرام وتتحلل بجزء منه ويصبح مالا حلالا ) أن هذا هو المدخل الصحيح لتنالوا الدنيا فكانت الخسارة الكبرى واليوم أنتم خجلون وتطلبون من الجميع قفل ملفات الفساد والجلوس والأكل معكم فى صحن متسخ ولغ فيه كلابكم
الهدايا : حسين خوجلى شخص غريب الأطوار تجدونه فى هذا المقال يمجد النظام ويدعو الناس للهرولة نحو الحوار ووقف الحديث عن الفساد والمفسدين – حسين خوجلى فى حديث اليوم التالى فتح مواضيع عن الفساد كعادته فى مقدمة حديثه عشان يورى الناس أن قناة الحرية والجمال ليست قناة دولة ولا حزب ولا سفارة ونحن عرفنا بما لايدع مجالا للشك من هى الدولة ومن هو الحزب ومن هى السفارة التى تسدد فاتورة القمر الصناعى



[email protected]


تعليقات 8 | إهداء 0 | زيارات 1842

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1008895 [محمد جلال فتح الرحمن محجوب]
0.00/5 (0 صوت)

05-19-2014 02:44 PM
اضرب يا عم سلمان .... حسين خوجلي الحاسد ابناء جلدته من المغتربين بالخليج والذي يوصي بعدم قبولهم في الجامعات .... حسين عبارة عن الة تسجيل يتم تشغيل ما سجل عليها الساعه العاشرة في قناة ام درمان

[محمد جلال فتح الرحمن محجوب]

#1006987 [كاسبر]
0.00/5 (0 صوت)

05-18-2014 07:26 AM
ونحن قدر ما رجوناهو يتكلم عن الفساد فى جهاز الاحصاء
سكت ولم يستجب

[كاسبر]

#1006941 [ahamed]
0.00/5 (0 صوت)

05-18-2014 04:45 AM
بس مبارك الفاضل صرح انو البلغ المعلومة عن مصنع الشفاء ما هو لكن واحد من وسط الكيزان

[ahamed]

#1006630 [الساكت]
0.00/5 (0 صوت)

05-17-2014 09:07 PM
والله صدقت يا باشمهندس ... حسين خوجلي للأسف خرج من الخط الذي كان الجميع يحلم به .. في بداية حلقاته بشر بمتابعة الفساد والآن يتخلى تماماً عن كشفه للمفسدين بل يصانعهم بكلمات مثل (العدليين) لوكيل وزارة العدل .. ثم أنه يقرأ جرايد الخرطوم ويصرف النظر عن الحديث الذي يتعلق بالمفسدين .. يقرأ المانشيت التي تحكي عن الفساد ويحجم عن التعليق (وهذه كارثة) ثم يتمسك بالتعليق على أشياء أقل شأناً من الفساد ويخوض فيها خوضاً ويضيع الزمن فيها هباء ... وعندما تكون مسألة الفساد في المحك يقول لنا إنها ظاهــــرة عالمـــية ... وفي كثير من كلامه يضحك على عقولنا بحزب السودانيين ... بل أنه يأتي بكلام اليوم وينفيه في حلقة قادمة ... قول ما تقول يا حسين خوجلي ولا تنسى أن الناس لها عقول.

[الساكت]

#1006509 [كاكاو]
0.00/5 (0 صوت)

05-17-2014 05:57 PM
الجماعه منتهين في نظرنا والفيهم انعرفت
ما هو شعورك بواعظ في مسجد ويحدث الناس بكلام الله ورسوله وقد شاهدته قبل خطبته تقطر لحيته خمرا وعائث في الارض فسادا

[كاكاو]

#1006466 [الصادق]
0.00/5 (0 صوت)

05-17-2014 04:52 PM
برافو باشمهندس سلمان... نحن الان تحولنا من مشاهدة حسين خوجلي لقراءة موضوعك الراتب عن الجيفة حسين خوجلي بالوعة الاخوان المسلمين في السودان ...واصل يا زول واصل

[الصادق]

#1006455 [المهندس سلمان إسماعيل بخيت على]
0.00/5 (0 صوت)

05-17-2014 04:41 PM
ق قطع شك مبارك الفاضل ماداير يبقى جاسوس لكن السياسة فرضت عليه أن يتعامل مع المخابرات ودى حاجات مره الزول يا يستحى منها يا يخفيها – لكنه إضطر ومانكر قال ايوه عندى صله بيهم - أنا بفتكر البيتطرنا لكل الحاجات دى حقه نخليه
العبارة دى حسين جابها عشان يوريكم زى ما مبارك الفاضل فى ظروف قاهرة جعلته يتعامل مع مخابرات أجنبية الجماعة بتوعونه ديل فى ظروف خلتهم يمدوا يدهم للحرام ويفسدوا ويسرقوا ويتجاروا فى المخدرات وما نحن الكيزان بس الفاسدين حتى نماذجكم إنتو فاسده وهاكم دا مبارك الفاضل اقر بنفسه انه جاسوس مصرى
والله يا حسين مادام ود المهدى عمل كده أسرقوا وسوسو يا عشاى
عندنا مجنوب فى البلد فى إمرأة جات لقت زول جوه زريبتها يحلب فى غنمها - قالت دا منو البيحلب فى الغنم - الزول الطبيعى بيجرى عشان يخفى نفسه - وقف على حيله وقال ليها أنا ( عثمان ) عثمان سو سو يا عشاى مجنوب تعمل شنو أعطته إذن هسي يا حسين سو سو يا الخضر عشاى

[المهندس سلمان إسماعيل بخيت على]

#1006427 [ود الشرفة]
0.00/5 (0 صوت)

05-17-2014 04:06 PM
و الله انت يا عم سلمان فايق و رايق تباري حسين و دراماته السمجة .. ده الناس فتحت ليه من زمان بعد كشف عورنه و حلمه بتلميع جماعته و ارجاعنا ل 1990 .. فدعه ينبح و ( يتغنج ) و مسيرتنا لدك حصونهم ماضية .. أليس الصبح بقريب !!!

[ود الشرفة]

المهندس سلمان إسماعيل بخيت على
 المهندس سلمان إسماعيل بخيت على

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة