المقالات
السياسة
حب استطﻻع ساي .. !!
حب استطﻻع ساي .. !!
05-19-2014 03:52 PM


* من باب حب الاستطﻻع ﻻغير ، فقط نريد ان نعرف ، لماذا تم استدعاء الصادق المهدي لنيابة امن الدولة ، ومن هي الجهة التي فتحت فيه بﻻغ ، وسمعنا تحت تحت كدا انها جهاز الامن ، طيب في حالة براءة الصادق حيفتح في منو بﻻغ مضاد ، يعني عشان نقرب القصة اكتر ، هو جهاز الامن دا الواحد ممكن يقاضيهو يعني ، طيب الصادق قال حيقاضيهو يعني ممكن ؟؟ اها طيب ﻻ سمح الله في حالة ثبوت التهمة على الجهاز الحيخش السجن منو ؟ طيب كان القاضي قال غرامة ، الجهاز حيدفع الغرامة من قروش منو ؟ طيب من باب حب الاستطﻻع ايضا ، قوات الدعم السريع ديل منو ؟* صراحة اول مرة اسمع من السيد الصادق انها تابعة لجهاز الامن ، طيب كيف تجي دي ، يعني ممكن جهاز المغتربين يعمل قوات اسقاط جوي سريع تتبع ليهو ، وناس جهاز الضمان الاجتماعي ممكن يكونوا قوات الردع المجتمعي وكدا يعني ؟؟ وﻻ كيف ، طيب في داعي في الحالة دي لي قوات شعب مسلحة ، اذا فعﻻ صح كﻻم الصادق ، وﻻ القصة نحن ما فاهمنها صح ، وفي الحالة دي دايرين نعرف القصة من طق للسﻻم عليكم .. !!

* ومن الباب التاني لحب الاستطﻻع ، نريد توضيح من البروف حياتي مدير جامعة الخرطوم ، يعني كيف التنظيمات السياسية ترفع يدها عن الجامعة ، هل تقصد جامعة خالية من النشاط السياسي وﻻ خالية من الاحزاب ، مافهمناك صراحة ، طيب ممكن نعرف وحدة ( الجهاد ) دي شنو في الجامعة وما دورها تجاه الطالب الجامعي ، وسمعنا انها مكونة بي قرار رئاسي ، يعني عندها ميزانية من اموال الشعب ، يعني ممكن تكون مناصفة بين كل التنظيمات ، طيب هل من العدل انو طﻻب المؤتمر الوطني يشيلوا القروش دي براهم كدا ، ودورك شنو انت كمدير معين من رئاسة المؤتمر الوطني ، طيب الفرق شنو في الحالة دي بينك وبين الوحدة الجهادية ، مش الاتنين تعين رئاسي ، يعني تصريحاتك كمدير ﻻ تمثل ادارة الجامعة وتصريحات الجهادية ﻻ تمثل باقي التنظيمات ، وحب استطﻻع اخير ، هل صحيح ما يقال عن تعليمات صدرت لمعاليكم من قبل طﻻب المؤتمر الوطني بتعليق الدراسة فورا ، وانت نفذت التعليمات ؟؟ وﻻ اشاعات مغرضة ساي ، ومن شباك حب الاستطﻻع : الصادق مشى كوبر زيارة وﻻ سجن وﻻ اعتقال ، والفرق شنو بين الزيارة والسجن والاعتقال ، وهل في حكم قضائي اسمو زيارة او اسمو اعتقال ، طيب في حالة وجود حكم قضائي بهذه المسميات ، كان في داعي لي عملية الاستدعاء الاخيرة للصادق ، وكان ( سجن ) القاضي اصدر الحكم يوم الاستدعاء يعني وﻻ كيف ؟؟، وبالمناسبة سؤال اخير ، المؤتمر الوطني حيواصل في حكاية الحوار وﻻ كفاية كدا ؟؟ وكان حيواصل ، حيحاور نفسو مثﻻ* بعد حكاية كوبر دي ؟؟ وهل فعﻻ المؤتمر الوطني محتاج لحوار بينو وبين نفسو على وزن الحوار الدارفوري دارفوري ؟؟ حقيقي ابواب الاستطﻻع كثيرة ولكن لكل باب مدخل للخروج ومخرج للدخول .. !!

مع كل الود

صحيفة الجريدة
manasathuraa@gmail.com


تعليقات 0 | إهداء 0 | زيارات 937

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




نورالدين عثمان
نورالدين عثمان

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة