أعمل رايح
05-21-2014 11:14 AM

• إذا تمت محاكمة (الجماعة) بقانون (التحلل) ثم تم إلغاء الحكم وتتم محاكمتهم الأن بالقانون الجنائي .. ما تسأل هل أخوانا القانونيين ما فاهمين القانون ولا شنو يعني ؟ ما تسال وأعمل رايح وبس !

• إذا كنت تسير بعربتك فى أحد شوارع العاصمة الرئيسية وأنت تود اللحاق بموعد مهم وسمعت أصوات العربات ويويويويويوي وتوقفت الحركة حتى يمر موكب أحد المسئولين ما تتكلم وأعمل رايح وبس ح تعمل أيه يعنى ! مش لازم المسئول يوصل مكتبو بى سرعة عشان يطلع ليهو قرار (خطأ) بى سرعة ؟
• إذا كنت صاحب (دكان) صغير فى أحد الأحياء وجاءك موظف الضرائب وعاين للمحل والرفوف الفاضية وصنقر ودنقر وكتب ليك ضرائب عشرة مليون .. ما تتكلم معاهو ولا تناقشوا عشان بعد شوية يفتح ليك بلاغ أعتراض عمل موظف .. أعمل رايح وبس وأرفع إيدينك للسماء !
• لما تشوف الناس المتكالبه على (المال الحرام) ما تحرق دمك .. الناس دي غبيانه ساكت هو (المال الحلال) بقي ممحوق .. ما تقيف في المسألة دي .. وما تحرق أعصابك أعمل رايح وبس
• رغم الوعود التى وعدتك بها الجهات المسئولة بثبات (سعر الدولار) على الأقل بعد الوديعة القطرية (المليارية) إلا أن سعر الدولار (تجاوز العشرة جنيهات) ولسه ماشي .. ما تسأل يه الوديعه م (وقفتو) عشان ما ح تلاقي أي إجابه .. أنسي الموضوع وأعمل رايح .. قال أيه لو ما جينا كان حصل إطناشر جنيه !
• إذا كان قائد العربة القدامك (ماشى على أقل من مهلو) وعندما تخطيته وجدت أنه يتحدث بالموبايل وهو يرتدى الزى العسكرى يعنى ح تقول ليهو شنو؟ الإلتزام بالقانون ده ليك إنتا إنتا عاوز تغلط (الحكومة) أسكت وبس وما تودى نفسك فى داهية !
• إذا طالبك متحصل النفايات برسوم زائده قائلاً (الرسوم زادوها) فلا تسأله عن (الضمير) فى زادوها عائد لمنو؟ لأنو أساسا ديل ناس ماعندهم ضمير وبيزيدوا على كيفهم ولو ما دفعتا ح يودوك (نيابة التفايات عشان كده أعمل رايح وأدفع وبس
• لما تشاهد برنامج حواري فى التلفزيون والمذيع قاعد يتكلم أكتر من الضيف ذاتو ويسأل الضيف ويجاوب على السؤال قبلو اقفل التلفزيون على طول بدل ما يجيك ضغط دم وتمشى الدكتور تلاقى قيمة الكشف مية جنيه .. أعمل رايح وأقفل على طول منها توفر ليك شوية كهرباء
• لما تلاقي الواحد شايل ليهو سبحة وعلامة الصلاة تتوسط جبهتو وكل ما تجى (مرا) ماشة يعاين ويدنقر فى الواطة تسكت .. أعمل رايح وما شايفو .. مش (شيخ حسبو) قال الراجل (مصمم) لأكتر من مرا واحده
• • إذا كانت لديك قضية تنظرها المحاكم ولاحظت أن القاضى يأتى إلى المحكمة متأخراً (بعد ما يفطر في بيتو) بينما المتخاصمون يأتون من (صباح الرحمن) فأعمل رايح وما تسأل ليه؟ فى زول كمان بيسال القاضى؟
• إذا توقفت أمام إشارة المرور وأمامك عربة (بدون لوحات) تجاوزها رجل المرور وجاء ليسألك عن أوراق (عربيتك) ما تندهش وأعمل رايح وما تودى روحك في داهية لأنو أكيد بيكون هو عارف العربية البدون لوحات دى تابعة لمنو!
• إذا عانيت من الأرق وعدم القدرة على النوم والساعة قد تجاوزت الحادية عشر مساء بينما مايكرفونات (الشيخ فلان) تبث على الهواء (حلقة الذكر) الاسبوعى التى يقيمها .. ما تضجر مش (السلطات) سامعة وفايت أضانا .. أبلع ليك (حبه منومة) وأعمل رايح !
• إذا كنت ممكن يعانون من مرض الفشل الكلوى وتعاني من رداءة الأجهزة وعدم وجود المحليل فلا تشكو ولا تسأل (علماء الأمة) عن دور الحاكم فى (توفير العلاج) لأنهم سوف يقولون لك أن الحديث يقول (إذا عثرت بغلة بالعراق) وليس إذا مات (مريض بالفشل الكلوى) .. أعمل رايح وبس!

كسرة :

إذا مقالنا بقي كوووولو (واوات) .. ما تسأل ليه الموضوع ده (غاتس كده) و (المغتسوا شنو) أعمل رايح هو وزير العدل يلاقيها من وين وللا من وين؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و؟


تعليقات 25 | إهداء 0 | زيارات 8412

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1013002 [عبدالله احمد محمد]
4.00/5 (2 صوت)

05-23-2014 06:25 AM
يا استاذ و الله ما عارف طريق هيثرو ده شنو ممكن توضح

[عبدالله احمد محمد]

#1012925 [حليمه وجزمتا القديمه!!]
4.07/5 (5 صوت)

05-23-2014 12:28 AM
إذا قبلوك فى الكليه الحربيه وتخرجت منها وتدرجت فى الرتب لغاية ما تصل لرتبة لواء وسمعت أن الرئيس قطع من راسو وكون قوات تدخل سريع عشان (يهنضبك) وقت ما عايز اعمل (نايم) وإذا ما جاك نوم أعمل رايح!!!!.

[حليمه وجزمتا القديمه!!]

#1012653 [komikukulo]
4.07/5 (5 صوت)

05-22-2014 05:30 PM
طيب اذا شفت واحدة مسكينة عاوزين يعدمها عشان غيرت دينها شنو ردك يا عم الفاتح اين حرية العقيدة والراي، في بلد متعدد الثقافات والاثنيات والاعراق والاديان، اصلا الناس راح يكونوا مسيحيين بسبب الاسلام البشوفوه في البتعمل فيه الحكومة من ظلم وجشع وكذب وذل بس بالعقل في واحد بيذلوه في بلدوا هذا ما يحدث في السودان. رجاءاً تكتب عن هذا الموضوع.

[komikukulo]

#1012464 [غسان بابكر]
3.50/5 (2 صوت)

05-22-2014 02:38 PM
ناس البرلمان قالوا قضية خط هيثرو قيت طلعت من يدنا ومشت النائب العام يعني يا أستاذ نحن تاني ما نسأل ﻷنهم موتوها وأدوها للنائب العام ولو سألناه بقول ما لقي إسم متهم في القضيه ولو زنقناهو شديد بقول مارسوا عليه ضغوط من جهات عليا.
طيب حارقين دمنا ف شنو؟؟.
نرفع يدينا أنا وإنت وأي زول بسأل لي رافع السماء ونقول: يا رب رجع لينا خط هيثرو..

[غسان بابكر]

#1012227 [وهج الشمس]
4.07/5 (5 صوت)

05-22-2014 11:33 AM
يا استاذ جبرا ..

اذا صبحت بكرة وجاء مشترى الخرطوم الجاب غفيره المسمى الجنجوووووووووووووووووووووووووووووووووويد وووووووووووووووووووووقالوا ليك اشترينا اطلع بره .. ما تشيل هدوووووووووووووووووووووووووووووووومك ولا اى حاجة تخصك لان الجنجوووووووووووووووووووووووووويد بعرفه يشيلوا الحاجات براهم .. انت ابلغ حبوب الضغط والسكرى ووووووووووووووووووووووووووووووووووكل الادوووووووووووووووووووووووية الباقية معاكم وشوف ليك ضل لوووووووووووووووووووووووو لقيت ووووووووووووووووووووووارقد وووووووووووووووووووووواعمل رايح .. الباقى شوووووووووووووووووووف ليه وووووووووووووووووووووووووووووووووووووووووووووووووووووووووووووووووووواوت تظبطه ..

وووووووووووووووووووووووووواحدة رايحة

[وهج الشمس]

#1012027 [عبد الحميد جباره]
4.00/5 (4 صوت)

05-22-2014 09:23 AM
الاخ الفاتح صباح الخير ا\ا قالوا ليك كبرى الحلفايا باعو اعمل نائم انت حاتسال منو واذا قالوا ليك قروشو لهفوها جماعة الوالى فاعمل نائم لانها ما حاترجع واذا قالوا ليك القصر الجمهورى معروض للبيه ماتتحير موقع ومساحه تمام والباعو منو ماتتحير لان حايكون واحد من الجماعه واذا قالوا ليك ان الميريه محل الوالى الحالى ربما ستباع وباوراق الوالى الموقع عليها فليس هنالك جديد هو اصلو عارف حاجه وحايجى يقول الجماعه غفلونى وابليس غشاهم مع انه ابليس زاتو محتار في البعملوا فيه - واذا قالو ليك قصر الصداقه معروض للبيع تحت تحت فما الغريب المشترى جاهز اما كبرى توتى وتوتى زاتها اتباعت واهلها ما عارفين فجائز لان الحكومه خائف عليهم من الغرق - واذا كان ولاية الخرطوم كلها اتباعت بما فيها انت فليس ذلك بقريب ربما طلعت شهادة بحثك وانت لا تدرى وانا زاتو البكتب ده اذا طلعت لى شهادة بحث باننى من ضمن البيعه فليس ذلك ببعيد لانه ليس في بلادنا غريب

[عبد الحميد جباره]

#1011927 [واحد عامل رايح]
4.07/5 (5 صوت)

05-22-2014 07:27 AM
إذا كنت خريج جامعي من مدة تجاوزت العشر سنوات وشهاداتك موثقة من وزارة التعليم العالي ووزارة الخارجية من نفس الفترة وانت الآن عاوز توثق الشهادة في سفارة دولة أخرى في السودان، فيجب أن تعود للجامعة مرة أخرى لاستخراج شهادة جديدة برسوم جديدة، وتوثيقها في الجامعة وتوثيقها في وزارة التعليم العالي (برسوم جديدة) وتوثيقها في وزارة الخارجية (برسوم جديدة) ولو حاولت الاحتجاج وقالوا ليك شهادتك القديمة بلها وأشرب مويتها.. فأعمل رايح وأدفع بس وإلا لن تتمكن من الاستفادة من شهادتك خارج السودان.

الله المستعان.

[واحد عامل رايح]

#1011768 [فاروق جبرا]
3.50/5 (3 صوت)

05-22-2014 12:42 AM
لو واحد جاء وقال ليك انو والي الخرطوم راجل نضيف وهو ووالي الجزيرة رهم ما عارفين انو الجماعة المهاجم فاسدين تعمل شنو؟ برضو رائح وإلا دائم

[فاروق جبرا]

#1011699 [Younis]
4.00/5 (3 صوت)

05-21-2014 11:18 PM
لو لقيت مقال الفاتح جبرا بعد عشرين سنه
حا تلقاهو كلو وأوات اقرأ ساكت واعمل نائم

[Younis]

#1011613 [المتشائل]
3.50/5 (2 صوت)

05-21-2014 09:20 PM
أنا ما قادر اعترف بحذف التلات أصفار من العملة، لأنها بتفقد المقارنة أبعادها الحقيقية... مثلاً الجماعة قالوا لو ما جينا كان الدولار حصل 12 جنيه واليوم الدولار بي 10000 عشرة آلاف جنيه (موش عشرة جنيه)، يعني الفرق 9988 جنيه (وذاتو عشان الجماعة المغتربين الطولوا شديد ما يتغشوا بالمقارنات الرقمية)..

[المتشائل]

ردود على المتشائل
United States [المقهورة] 05-22-2014 12:42 AM
عشان نعرف التدهور الحصل لجنيهنا تعالوا نحسبها بالورقة والقلم:
قبل مجيئ الخوازيق الحاكمننا ال12 جنيه كانت بتجيب دولاراً واحداً
وعليه ال10000 جنيه مفروض تجيب 833.33 دولاراً. ولكن للأسف فإن ال10000
جنيه الآن = دولاراً واحداً!! الله يلعنك يا حكومة السجم


#1011361 [magdi]
4.07/5 (5 صوت)

05-21-2014 04:45 PM
مقابلة الدكتور ب 100 جنيه......انت قديم و طولت من المرض............المقابلة بقت 150 جنيه و الماعندو المقابر قريبة

[magdi]

#1011330 [الفاتح الاسد]
1.00/5 (1 صوت)

05-21-2014 04:08 PM
اذا شفت ليك واحدبعمل في حركات ما مظبوطة كده وما عجبتك ، دا بكون بتمسح ، أقصد بتحلل، ما تسألوا تقول ليهو بتتجلبط ، أقصد بتتحلل من شنو ، بجيبليك هوا، بس طنش وأعمل رايح وما تكتر الفضايح.

[الفاتح الاسد]

#1011295 [ضحية انقاذ]
4.00/5 (3 صوت)

05-21-2014 03:36 PM
مقالبيكسر الاجنحة والمقاديف ويعلم علي الاستسلام والخنوع والذلة والخنوع وتتكلم وتقول الصاح لانه من سكت عن قول الحق شيطان اخرس وفرق الانسان من الحيوان هو ان الانسان له عقل ولسان يفكر وينطق ولازم تتكلم لانه من تتكلم معه له عقل احتمال لو اقل من واخد في المية يسمعك تقوليهو وطالما سمعك اذن فهمك وهذا هو المهم فلاتكسر مقاديفنا واجنحتنا حتي لاتكون مثلهم في ضررنا

[ضحية انقاذ]

#1011279 [محمد شرف]
3.00/5 (3 صوت)

05-21-2014 03:17 PM
والله يا ود جبرا بقيت خطير بعد كل الواوات والمداخلات في التلفزيونات عملت رايح وماشي ابو ظبي . دي آخرتا يا ود حبرا تعمل رايح !

[محمد شرف]

#1011175 [زعفران]
3.75/5 (3 صوت)

05-21-2014 01:41 PM
والله يا استاذ هسي يقروا كلامك كوولهم ويقولوا انك جنيت وبقيت بتتكلم خارج نطاق التغطية اللهم انصر المظلومين في السودان وكل العالم يا ارحم الراحمين

[زعفران]

#1011154 [radona]
3.75/5 (7 صوت)

05-21-2014 01:23 PM
لماذا يااستاذ الفاتح تدغمس وتجغمس الامور هكذا
يجب ان تعلم بان يقول لك بلدنا جيعانة روج اكبر اكذوبة
ومن قال لك بلدنا فسدانة فهو عدو لله والوطن وطابور خامس ومندس
واظنك تاكدت تماما السنة الفاتت في موضوع النفايات ان اجهزة الدولة تعمل بوتيرة متناغمة من اجل راحة ونظافة المواطن وان تحصيل الايرادات ارج اورنيك 15 لا يعد فسادا اليس كذلك .. اجب ..!!

[radona]

#1011131 [المجنون]
3.50/5 (2 صوت)

05-21-2014 12:58 PM
رئيس الجمهورية نفسه وين

[المجنون]

#1011111 [البعير]
4.00/5 (4 صوت)

05-21-2014 12:44 PM
انا اليومين دي بقيت بعاين للمقالاتك البتكتب فيها دى وبنعمل رايح .

[البعير]

#1011102 [mohand El najme]
3.75/5 (3 صوت)

05-21-2014 12:35 PM
مقال انهزامي جدا ..

[mohand El najme]

#1011099 [كمواطن سودانى]
4.00/5 (4 صوت)

05-21-2014 12:34 PM
الله يديك العافيه ياستاذ جبره كاتب ساخر بجد

[كمواطن سودانى]

#1011093 [حكم]
3.63/5 (4 صوت)

05-21-2014 12:30 PM
اذا لقيت الشعب السودانى الفضل كله لافى صينية .. ما تستغرب واعمل رايح .. هو العليهو هين؟؟

[حكم]

#1011083 [داوودي]
3.00/5 (3 صوت)

05-21-2014 12:24 PM
متاكد انو اي واحد قراء عمودك دا حيقول ليك اعمل انته زاتك رايح لحدى ما ربك يفرجه من عندو .

[داوودي]

#1011078 [ناصر المظلومين بالقلب]
3.25/5 (4 صوت)

05-21-2014 12:21 PM
نحن اصلا رايحين من غير نعمل رايحين
لكن المشكلة وين ؟ اذا جاءوا جماعة اخري وقالوا نحكم بالشريعة-----الناس ح تقول الجماعةدي عايزة تسرق -ده المفهوم السائدعند الناس عن الجماعة اللي بتتكلم عن الشريعة - كفى لعبا مع الله وحسنو صورتكم قبل ان تغادروا حتى لا يخسف الله بكم الارض --- حتى لا تضيع شريعة الله للاجيال القادمة - الظلم بين الناس شديد كيف الظلم مع الله

[ناصر المظلومين بالقلب]

#1011074 [osama dai elnaiem]
3.13/5 (4 صوت)

05-21-2014 12:19 PM
واذا الجنجويد احاطوا الخرطوم احاطة السوار بالمعصم(حلوة) ما تسأل واعمل رايح والا تحصل (الصادق).
واذا الجنجويد بعد شوية دخلوا ام درمان عشان ياخدوا(الدقنية)بدون اورنيك 15-- اعمل مطنش وقول شكيكتم علي الله يا اللي قلتو العاوزة يشيل اسلاح ويجي يقلعها مننا.
كسرة--- ايه الفرق بين الجنجويد والحركة الشعبية ( الحشرة الشعبية)في رواية عليا.

[osama dai elnaiem]

#1011023 [وحيد]
4.38/5 (4 صوت)

05-21-2014 11:39 AM
يا استاذ جبرة : اعمل حسابك .. موضوعك دا فيه " تجاوز للخطوط الحمرا " .... جماعة الحكومة كل ما زاد الفساد و الاستبداد و الكوارث و الفضائح بيزيدو عدد الخطوط الحمرا و يمدوها شوية لي قدام ... الكلام في الفساد = خطوط حمرا ... الكلام في الجيش= خطوط حمرا .. الكلام في بلاوي الامن = خطوط حمرا .... الكلام في الجنجويد = خطوط حمرا كتيره ... الكلام في فشل المسطولين اقصد المسئولين = خطوط حمرا ... تشكي من المعيشه= خطوط حمرا .....
تقفل خشمك و تطاطي راسك و تمشي جنب الحيط بس !

[وحيد]

الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة