المقالات
السياسة
القــرين.. تراجيديا الإلتباس والتّبدِيل
القــرين.. تراجيديا الإلتباس والتّبدِيل
05-27-2014 08:10 AM

القــرين.. تراجيديا الإلتباس والتّبدِيل
رفع السّتار عن صراعٍ خاسر
------------------------------------
" فركوا النّار علي الحِجّار
شالوا رمادَة من قلبي
وقطعة لكنَة من حلقي
معاها ندم وحفنة هم
جَسّوا ترابة شمّوا خطاي
عوجوا لساني رطنو معاي "
...........................
النّص :-
لوحــــــة ســـوداء:-

وقف شدر الحراز
إنشّرّ فوق درب الخلا الضّلمان
شرب دمع السَرَاب في الليل
لبس جلد أم لَهِيب رقد نشفان
خمَد شوق أم رِعِيد في الجّوف
كتم معناهو مات شرقان
حرن هيم الصَعيد سدّر
مدّ لسانو للغيمة انشحط عريان
لا ضُلاً وقف طوّل
لا ريحاً صَدق قوّل
.....................
شِن معناك
يا زولي البقيت معناك ؟؟
شن بتدور
من النَجمة المصاقرة قفاك ؟؟
وشن بتدور
من العِينَة الرَّمت
ضلّ السَحابة وراك ؟؟
كَرَفتَ دروب مسارب الغيب
تمور وتفور !!
كل ما اقول معاك مستور
تلف وتدور!!
تدودر فيني زي عصفور
بقيت مأسور
علي شَرَكَك
أسِك مجبور
.................
شنو الجابرني غير صبري
ومطال حبلي ؟؟
تراك شيتاً
محيرني وملك أمري !!
أسيبك في الكلام نايم
ألقاك في غناي حايم
لا عرفتك عزيفاً
حلّ في راسي
لا جناً ملكني وبدل احساسي؟؟
كِبرت معاي يا زولي البقيت كلي؟؟
كِبرت معاي يازولي البقيت كلي ؟؟
مشيت دربك .. لقيتك صيِ ،.
أكلت ثمر .. غرورك ني ،
مليت من ريح..نفوك إيدي ،
ضَلّ غناي .. حرفي وِدِر ،
أدمنتك .. كلامي كِتِر
غنيتك .. لساني خِدِر ،.
شنو الرّاجيهو من تعبي
وخلف شِعَبي ؟؟
................
يا ريح السَواد هِبَي
نِشِي كلامي من قلبي ،
يا نار الرَماد شبَي
حَفِي عماي من دربي ،
يا غيم السَجم صُبَي
بلي حشاي من غلبي ،
.....................
حكايتو معاي في نومي
مرة سمعني في حلمي !!
أحكي وأشكي من ظلمي !!
هزَ كِتيفو لي سَدّر
زَمّ خِشِيمو واتكَدّر
صَرَ وجِيِهو واتندَر
قَلَب عِينيهو لي حدّر،
ختّ حِروفو في حِروفي
سرح فيني
سرحت معاهو في خوفي ،
نبت في دمي واتجذَر
لا ريحني من عمري الحرق قلبي
ورقد جنبي ،،
لا نَجّاني من قلبي السَرق عمري
وشرد مني ،،
كسر في الرَوح جناح الشَوق
شهق معناي
من الحسرة مات مخنوق ،
دفنتو هناك مع الأنات
في الدَمعة الورا الأهات
حِزنت عليهو زي ضحكي
ضحكت عليهو زي حزني !!
رجعت وحيد ...
قلت خلاص رميتو بعيد ،
لقيتو معاي في تولاي
لقيتو معي في تولاي ،،
كشفت غُناي
لي شدراً
براري صباح ونومو خزاز ،
نفّ غناي
نِشِف حلق الشَدر
مدّ شخالبو للكزَاز!!؟
كشفت غناي لي ليلاً
شرب دمع السَراب
طرش ألغاز ،
نزّ غناي
من دمع السرَاب
نَزف في اللّيل
نزيفو مجاز!!؟
كشفت غناي
لي ريحاً قَرَح
قطّع قلب السّحابة رَزَاز
فسد الرَيح
هَجَر قلب السَحاب
رقد منحاز!!؟
...............
سرقتَ خطاي من مرماي
شايلو معاي في معناي !!
سريت بالليل براري التَيه
سَبَع وِهاد .. وسبع بِحور
نزلت وِدِي مرابع الصّيِ
سندتَ لساني في قلبي
كشفت غناي للسَحرَة
البسايسوا الرّيح
بِعرِفوا سر مسارب الضَيِ ،
فَرَكوا النَار علي الحِجَار
شالوا رمَادَة من قلبي
قطعة لَكنَة من حلقي
معاها ندم وحِفنَة هم ،،
جسَوا تُرَابة شمَّوا خُطَاي
عوجوا لساني رَطَنوا معاي
" فيك حسرة
وعليك حسرة
ركبتَ دِروب
سرج مقلوب
أنَاك نَكِره
وغناك نكره
شن راجيهو من بُكرَه
وصَدَى الذِّكرى !؟؟
شن راجيهو من بُكرَة
وصَدَى الذّكرى !؟؟
بلا حزناً مزج مَعَناك
سكن دَمّك !!
شن راجيهو من بُكرَه
وصَدَى الذَكرى !؟؟
بلا غماً طَفَح في الرَوح
كَتَل مَعَناك
لَجَم فمَك !!
شن راجيهو من بكرَه
وصَدَى الذّكرى !؟؟
بلا همَاً
غمض عينيهو
نام فرحان
سَرق حُلمك !!
مغرَّب وين؟؟
يا راقد تَحِت
ضلّ الحَجَر في الصَيف؟؟
مشنّق وين معاك زولك؟؟
تزازي وراهو
دافن سرَو في قولك؟؟
مشرَق وين
يا راحل
فوق موجاً بلا ساحل؟؟
تبقى الحسرة والوجعة
لو حِرقَت مراكب الرَجعة للداخل
تبقى الحسرة والوجعة
لو حِرقت مراكب الرَجعة للداخل .
------------------------------

بعض معاني الكلمات التي وردت في القصيدة :-
هيم : صوت المطر
إنشَحَطَ : وقف منتصب القامة
المَصَاقرة : الملازمة
العِيِنَة : خاصة بفصل الخريف
كرفتَ : كرف تعني استنشق – يكرف اي يشم
تدودر: دودر الطائر- إستدرجه للمصيدة
عزيفاً : العزيف لغة الجن
نفوك : غبارك
شِعَبي : خلف العصي أو الصلب أو الطُرق المتقاطعة التي تَضل السائر
سدّر : مد الصّدر الي الامام نوع من التحدي في الدارجي
اتكدّر : نقيض الصّفا هنا دلالة علي الغضب
إتندّر : تحدي في الدارجية
تولاي : دلالة علي الملازمة
الكزَاز : كلمة كزَ تعني جفَ او تصلَب
لكنَة : في كلام ..عجمة اللسان
مشنق : رفع رأسه اي نظر إلي أعلي في القصيدة دلالة علي التَوهان

عوض شيخ إدريس حسن
ولاية أريزونا .. أمريكا

[email protected]


تعليقات 1 | إهداء 0 | زيارات 789

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1019009 [malik]
0.00/5 (0 صوت)

05-29-2014 02:19 AM
ما اروعك عوض

[malik]

عوض شيخ إدريس حسن
  عوض شيخ إدريس حسن

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة